Tepetepet Manlapud Saray Managbasa

Kasin walay makapuy ya epekto na ag-inkayadyari nen birhen a si Maria nen inlukon to si Jesus?

Nipaakar ed “inkianak nen Jesu-Kristo,” onia so kuan na impuyan a rekord: “Sanen akidesposaday Maria ya ina to ed kinen Jose; sanen agni ra nansinggeran aromog a malukon lapud pakayari na espiritu santo.” (Mateo 1:18) Peteg a say masanton espiritu na Dios so walaan na makanan betang ed impanlukon nen Maria.

Balet, komusta si Maria? Kasin say egg cell, odino iknol (ovum) to so anggan panon et kinmana ed impanlukon to? No konsideraen iray sipan na Dios ed si Abraham, Isaac, Jacob, Juda, tan Arin David​—ya inmuunan atateng nen Maria​—say iyanak ya ugaw so nepeg a peteg a nanlapud poli ra. (Genesis 22:18; 26:24; 28:10-14; 49:10; 2 Samuel 7:16) Wala ni kasi arum a paraan pian say ugaw ya iyanak nen Maria so onkanepegan a mananawir ed saraman a sipasipan na Dios? Nepeg a sikato so magmaliw a mismon anak nen Maria.​—Lucas 3:23-34.

Pinmatnag so anghel nen Jehova ed birhen a si Maria, tan inkuanto: “Agka antakot, Maria, ta akaromog ka na pamalangkap ed Dios. Et nia, ilukon mo tan yanak mo so sakey ya anak a laki et tawagen mo so ngaran to a Jesus.” (Lucas 1:30, 31) Kakaukolanen ed panlukon a say iknol so onkuri (fertile). Mapatnag, pinakuri nen Jehova a Dios so sakey ya iknol ed panag-anakan nen Maria, diad impangiyalis to ed bilay na bogbogtong ya Anak to diad dalin manlapud mundo na espiritu.​—Galacia 4:4.

Nayari kasi a say ugaw ya inlukon ed onian paraan na ag-ayadyarin bii so magmaliw ya ayadyari tan andian na kasalanan so pisikal a laman to? Panon ya onkana iray ganggan nipaakar ed tawir no pankasakeyen so inkayadyari tan ag-inkayadyari? Tandaan ya inusar so masanton espiritu diad impangiyalis ed ayadyarin puersa na bilay na Anak na Dios tan lapuan na impanlukon to. Saya so angekal ed antokaman ya ag-inkayadyarin wala ed iknol nen Maria, diad ontan et amawala na henetikon padron ya ayadyari manlapud gapo na satan.

Antokaman so kipapasen, maseguro itayo a say inkurang na masanton espiritu na Dios diad saman a panaon so angipaseguro ed intalona na gagala na Dios. Impaliwawa nen anghel Gabriel ed si Maria: “Say espiritu santo onla ed sika, et say pakapanyari na Sankatageyan tarongan to ka: kanian say nianak met ningaran naani Santo, say Anak na Dios.” (Lucas 1:35) On, say masanton espiritu na Dios so amorma, a singa panangibaga, na mananalimbeng a samben pian anggapoy ag-inkayadyari odino makaderal ya epekto a maneral ed ombabaleg a lukon manlapud impannginew a manpatuloy.

Malinew, otang nen Jesus so ayadyarin bilay to bilang too ed mangatatawen ya Ama to, aliwan diad siopaman a too. ‘Imparaan [nen Jehova] so sakey a laman’ parad si Jesus tan manlapud inkilukon to a manpatuloy, sikato so peteg ya “andi-tilol, nisian ed saray managkasalanan.”​—Hebreos 7:26; 10:5.

[Litrato ed pahina 19]

“Ilukon mo tan yanak mo so sakey ya anak a laki”