Akin a Manpabautismo?

“Onla kayo . . . tan manggawa kayo na saray babangatan ed amin a nasyones, a binyagan [o bautismoan] yo ra.”​—MATEO 28:19.

1, 2. (a) Diad antoran sirkumstansya ya agawa so arum a panagbinyag? (b) Antoran tepet so apalesa nipaakar ed panagbinyag?

 PINASKAR nen Frankish ya Arin Carlomagno iray akonkestan Saxon pian manpabinyag iran amin nen 775-77 K.P. “Impilit to so pakakomberte ra ed tatawagen ya Inkakristiano,” so insulat na manag-awaran a si John Lord. Ontan met, kayari na impangasawa to ed sakey a prinsesa a Greek Orthodox nen 987 K.P., nandesidi so Ruson manuley a si Vladimir I a saray sakop to so nepeg a magmaliw a “Kristianos.” Ingganggan to so lapag iran panagbinyag na totoo to​—a napapatey so siopaman ya agmalabay!

² Kasin susto iratan a panagbinyag? Kasin walaan iratan na peteg a kabaliksan? Nepeg kasin nabinyagan so anggan siopa?

Bautismo​—Panon?

3, 4. Akin a say panagwalsik odino panangikalbo na danum ed ulo so agmanepeg a Kristianon bautismo?

³ Sanen pinaskar di Carlomagno tan Vladimir I so totoo pian manpabinyag, sarayan manuley so agmitunosan ed Salitay Dios. Diad tua, anggapo so nagunggona sano saray panagbinyag so mangilalanor ed panagwalsik, pangikalbo na danum ed ulo, odino pangipalgep ni ingen ed saray totoo ya agni nibangat ed Makasulatan a katuaan.

⁴ Konsideraen pa so agawa sanen linma si Jesus na Nazaret ed si Juan a Managbautismo nen 29 K.P. Si Juan so manbabautismo ed totoo diad Ilog Jordan. Sikara so boluntaryon inmasingger ed sikato pian manpabautismo. Kasin pinaalagey to labat ira ed Jordan legan ton kakalboan na danum na ilog so kauloan da odino winalsikan to labat ira? Anto so agawa sanen binautismoan nen Juan si Jesus? Inreport nen Mateo a kayari na inkabautismoan to, ‘si Jesus so tinmatdang a tampol manlapud danum.’ (Mateo 3:16) Sikato so tinmiblong ed danum, ya impalgep ed Ilog Jordan. Ontan met, say debosyonado ya Etiopen eunoko so abautismoan diad “sakey a danum.” Saratan a danum so nakaukolan lapud say impanbautismo nen Jesus tan saray babangatan  to so mangilanor ed sigpot a kipalgep.​—Gawa 8:36.

5. Panon so impanbautismo na saray inmuunan Kristiano ed saray totoo?

⁵ Saray Griegon salita a nipatalos a “manbautismo,” “bautismo,” tan arum nira, so manutukoy ed pangipalgep, pangilebleb, odino pangipalseb ed danum. Inkuan na Smith’s Bible Dictionary: “Say bautismo so matukoy tan literal a mankabaliksan na pangipalgep.” Walaray patalos na Biblia ya anukoy sirin ed si “Juan a Manangipalgep” tan “Juan a manangilebleb.” (Mateo 3:1, Rotherham; Diaglott interlinear) Oniay kuan na History of the Christian Religion and Church, During the Three First Centuries nen Augustus Neander: “Say orihinal a pangaagamil ed bautismo et diad panamegley na panangipalgep.” Oniay komento na bantog a sulat a Pranses a Larousse du XX^e Siècle (Paris, 1928): “Abautismoan iray inmuunan Kristiano diad panangipalgep inerman a walay danum.” Tan inkuan na say New Catholic Encyclopedia: “Mapatnag a say Bautismo diad inmunan Iglesia et panamegley na panangipalseb.” (1967, Tomo II, pahina 56) Ontan met natan, say bautismo bilang sakey ed saray Tastasi nen Jehova so boluntaryon kundang a mangilalanor ed sigpot a kipalgep ed danum.

Balon Rason Parad Bautismo

6, 7. (a) Parad anton gagala a nambautismo si Juan? (b) Anto so balo nipaakar ed bautismo na saray patumbok nen Jesus?

⁶ Saray bautismon ginawa nen Juan so miduma ed gagala na saray impanbautismo na saray patumbok nen Jesus. (Juan 4:1, 2) Binautismoan nen Juan so totoo bilang mapublikon simbolo na panagbabawi ra ed saray kasalanan da sumpad Ganggan. * (Lucas 3:3) Balet walay balon bengatla a nalalanor ed bautismo na saray patumbok nen Jesus. Nen Pentecostes 33 K.P., pinaseseg nen apostol Pedro iray dumerengel to: “Magbabawi kayo, tan manbinyag so sinansakey ed sikayo ed ngaran nen Jesu-Kristo, pian pakapaandian na kasalanan yo.” (Gawa 2:37-41) Anggaman ipapaarap to itan ed saray Judio tan proselita, agsasaglawien nen Pedro so nipaakar ed bautismon mangisisimbolo na panagbabawi lapud saray kasalanan da sumpad Ganggan; agto met kabaliksan a say bautismo ed ngaran nen Jesus so mangililitrato ed panguras ed saray kasalanan.​—Gawa 2:10.

⁷ Diad saman ya inkagawa, inusar nen Pedro so primero ed ‘saray tombok na panarian.’ Parad anton gagala? Ta pian niparungtal ed saray onderengel ed sikato so pikakabat nipaakar ed pankanawnawan makaloob ed Panarian na tawen. (Mateo 16:19) Lapud impulisay na saray Judio si Jesus bilang Mesias, say pagbabawi tan pangagamil na pananisia ed sikato so balo tan makanan sengegan na pananap tan pangawat ed panamerdona na Dios. Nayarian da so mangiter na pakapatnagan ed publiko nipaakar ed satan a pananisia diad kipalgep ed danum diad ngaran nen Jesu-Kristo. Diad ontan a dalan et isimbolo ra so personal a dedikasyon da ed Dios panamegley nen Kristo. Amin a manpilalek natan ed panangabobon na Dios so nepeg a mangagamil ed ontan met a pananisia, ya idedika ra so inkasikara ed si Jehova a Dios, tan ondalan ed Kristianon bautismo bilang simbolo na nagnap a dedikasyon ed Sankatageyan a Dios.

Makana so Suston Pikakabat

8. Akin a say Kristianon bautismo et aliwan parad amin?

⁸ Say Kristianon bautismo so aliwan parad amin. Oniay ganggan nen Jesus ed saray patumbok to: “Onla kayo . . . tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Sakbay a nabautismoan, say totoo so nepeg a ‘nibangat a mangunor ed amin a bengatlan ingganggan nen Jesus ed saray babangatan to.’ Kanian say paskaran a panagbautismo ed saramay andian na pananisia a nibase ed suston pikakabat ed Salitay Dios so andiay-kakanaan tan misumlangan ed ingganggan nen Jesus ed saray tuan patumbok to.​—Hebreos 11:6.

9. Anto so kabaliksan na pampabautismo ed ‘ngaran na Ama’?

⁹ Anto so kabaliksan na pakabautismoan ‘ed ngaran na Ama’? Kabaliksan na satan a say kandidato  ed bautismo so mamidbir ed posisyon tan autoridad na mangatatawen ya Ama tayo. Si Jehova a Dios so bidbiren sirin bilang Manamalsa tayo, ‘say Sankatageyan ed amin a dalin,’ tan say Sankatalbaan a Soberano.​—Salmo 83:18; Isaias 40:28; Gawa 4:24.

10. Say pampabautismo ed ‘ngaran na Anak’ so mankabaliksan na anto?

¹⁰ Say kabaliksan na pampabautismo ed ‘ngaran na Anak’ et say pamidbir ed betang tan autoridad nen Jesus bilang bogbogtong ya Anak na Dios. (1 Juan 4:9) Saramay kualipikadon manpabautismo so mangawat ed si Jesus bilang say sakey a diad panamegley to et intarya na Dios so “panondon ed amayamay.” (Mateo 20:28; 1 Timoteo 2:5, 6) Saray kandidato ed bautismo so nepeg a mamidbir met ed “atagtagey a posisyon” ya impangitandoroan na Dios ed Anak to.​—Filipos 2:8-11; Apocalipsis 19:16.

11. Anto so kabaliksan na pakabautismoan ed ‘ngaran na masanton espiritu’?

¹¹ Anto so kabaliksan na bautismo ‘ed ngaran na masanton espiritu’? Ipapabitar na saya a bidbiren na saray kandidato ed bautismo so masanton espiritu bilang say aktibon puersa nen Jehova, ya uusaren ed nanduruman dalan a mitunosan ed gagala to. (Genesis 1:2; 2 Samuel 23:1, 2; 2 Pedro 1:21) Saramay onkualipika ed bautismo so mamidbir a say masanton espiritu so ontutulong ed sikaran mantalos ed ‘aralem a bengatla na Dios,’ manumpal ed kimey a panangipulong ed Panarian, tan mangipatnag ed bungabunga na espiritu a singa say ‘aro, liket, deen, kasungdoan, kauyamoan, kaabigan, sisia, tayadno, dangka.’​—1 Corinto 2:10; Galacia 5:22, 23; Joel 2:28, 29.

Kaimportantian na Panagbabawi tan Pampataoli

12. Panon a misiglaotan so Kristianon bautismo ed panagbabawi?

¹² Nilikud ed andiay-kasalanan a toon si Jesus, say bautismo so naabobonan-na-Dios a simbolo a misiglaotan ed panagbabawi. Sano magbabawi itayo, pirmi so panermen, odino pansibkel tayo ed sakey a bengatlan agawaan odino agtayo agawaan. Saray Judio nen inmunan-siglo a mankaliktan a mamaliket ed Dios so kinaukolan a magbabawi ed saray kasalanan da sumpad Kristo. (Gawa 3:11-19) Walaray mananisian Gentil diad Corinto a nagbabawi lapud pilalawanan, idolatriya, panagtakew, tan arum niran ambelat a kasalanan. Lapud panagbabawi ra, sikara so “naurasan” ed dala nen Jesus; ya “apasantos,” odino nibiig, parad serbisyo ed Dios; tan ‘nibilang ira a matunong’ ed ngaran nen Kristo tan panamegley na espiritu na Dios. (1 Corinto 6:9-11) Say panagbabawi so makanan kundang ed pakagamor na maong a konsiensia tan inter-Dios a pakainawaan manlapud pakakonsiensia ed kasalanan.​—1 Pedro 3:21.

13. No nipaakar ed bautismo, anto so lalanoren na pampataoli?

¹³ Say pampataoli so nepeg a nagawa sakbay a manpabautismo tayo bilang Tastasi nen Jehova. Say pampataoli et sakey a boluntaryon kiwas a mabulos a ginawa na sakey ya interon-puson nandesisyon a manumbok ed si Kristo Jesus. Ipulisay na saratan ya indibidual so datin mauges a kurang da tan determinado ira a manggaway maptek ed imaton na Dios. Diad Kasulatan, saray Hebreo tan Griegon verb a manutukoy ed pampataoli so walaan na kabaliksan a mangibeneg. Sayan kiwas so mankabaliksan na idago ed Dios diad pangibeneg ed sakey a mauges a kurang. (1 Arari 8:33, 34) Say pampataoli so mankaukolan na ‘panggawa na saray manepeg ed panagbabawi.’ (Gawa 26:20) Kakaukolanen na satan so pangitalirak ed palson panagdayew, onkiwas a mitunosan ed saray ganggan na Dios, tan pangisaklang na nikabkabiig a debosyon ed si Jehova. (Deuteronomio 30:2, 8-10; 1 Samuel 7:3) Say pampataoli so manresulta ed pananguman ed panag-isip, gagala, tan personalidad tayo. (Ezequiel 18:31) “Manpataoli” itayo legan met a nasasalatan na balon personalidad iray agmaridios a walna.​—Gawa 3:19; Efeso 4:20-24; Colosas 3:5-14.

Makana so Sigpot-Puson Dedikasyon

14. Anto so kabaliksan na dedikasyon na saray patumbok nen Jesus?

¹⁴ Sakbay a manpabautismo iray patumbok nen Jesus, nepeg met nin gawaen so sigpot-puson dedikasyon ed Dios. Say kabaliksan na dedikasyon et say pangibiig parad sagradon gagala. Importantin tuloy iyan kundang ta nepeg tayon ibalikas ed si Jehova diad pikakasi so desisyon tayon mangisaklang ed sikato na nikabkabiig a debosyon ed ando  lan ando. (Deuteronomio 5:9) Siempre, say dedikasyon tayo et aliwan parad sakey a kimey odino parad sakey a too noagta parad Dios mismo.

15. Akin ya ipapalgep iray kandidato ed bautismo?

¹⁵ Sano idedika tayo so inkasikatayo ed Dios panamegley nen Kristo, ibabalikas tayo so determinasyon tayo a mangusar na bilay tayo diad panggawa na linawa na Dios unong a nidatak ed Kasulatan. Bilang simbolo na satan a dedikasyon, saray kandidato ed bautismo so ondalan ed kipalgep ed danum, no panon a si Jesus so abautismoan ed Ilog Jordan pian mangisimbolo ed pangipresenta to na inkasikato ed Dios. (Mateo 3:13) Makatantanda ta si Jesus so manpipikasi ed satan ya importantin tuloy ya inkagawa.​—Lucas 3:21, 22.

16. Panon a matukoy a nipatnag so liket tayo sano naimatonan tayo so totoo a nababautismoan?

¹⁶ Say bautismo nen Jesus so masimoon balet maliket ya ebento. Ontan met ed modernon agew a Kristianon bautismo. Sano naimatonan tayo so totoon mangisisimbolo ed dedikasyon da ed Dios, say liket tayo so nayarin nipatnag diad marespeton pantipak tan ampetang a komendasyon. Balet ta paliisan so paneyag, panngisiw, tan arum nira lapud inkasagrado na sayan panangipatnag na pananisia. Say liket tayo so nibalikas ed mapagalang a paraan.

17, 18. Anto so makatulong pian nadetermina no kasin kualipikado iray indibidual parad bautismo?

¹⁷ Aliwan singa saramay manwawalsik ed saray kapangiyanak odino mangipapaskar ed lapag a panagbautismo ed saramay andian ni na pikakabat ed Kasulatan, saray Tastasi nen Jehova so agbalot mamipilit ed siopaman a manpabautismo. Diad tua, agda babautismoan iramay agkualipikado ed espiritual. Sakbay ni ingen a magmaliw ya agbautismadon manangipulong na maong a balita so siopaman, saray Kristianon mamatatken so maneguro no atalosan toray manunan bangat na Biblia, no manbibilay unong ed saratan, tan no positibon onebat ed tepet a singa say, “Kasin labay mon talaga so magmaliw a sakey ed saray Tastasi nen Jehova?”

¹⁸ Kaslakan, sano saray indibidual so walaan lay makabaliksan a pibibiang ed kimey na panangipulong ed Panarian tan angibalikas la ed pilalek dan manpabautismo, pitongtongan ira na saray Kristianon mamatatken pian naseguro a mananisia ira ya angidedika ed si Jehova tan akakapet la ed saray kakaukolanen na Dios parad bautismo. (Gawa 4:4; 18:8) Say personal iran ebat da ed masulok a 100 a tepet nipaakar ed saray bangat na Biblia so ontulong ed saray mamatatken a mandetermina no kasin saramay tetepetan so makakapet ed saray Makasulatan a kakaukolanen ed panangipalgep. Arum so aliwan kualipikado tan sirin et agnaabobonan parad Kristianon bautismo.

Wala Kasi so Mangaamper ed Sikayo?

19. Unong ed Juan 6:44, sioparay magmaliw a miuley ed si Jesus?

¹⁹ Nikalar ed dakel ya apaskar a mibiang ed lapag a panagbinyag ya onla ira ed tawen diad ipatey. Balet diad impanukoy to ed saray ontutumbok ed bakat to, oniay inkuan nen Jesus: “Anggapo so too a makadago ed siak, likud no say Ama ya angibaki ed siak sikato so yasingger to.” (Juan 6:44) Inyasingger nen Jehova ed si Kristo so 144,000 a magmaliw a miuley ed si Jesus diad mangatatawen a Panarian. Say impilit a pambautismo so agbalot mamasantos ed siopaman parad satan a maglorian pasen ed uksoyan na Dios.​—Roma 8:14-17; 2 Tesalonica 2:13; Apocalipsis 14:1.

20. Anto so nayarin makatulong ed saray agni abautismoan?

²⁰ Nagkalautla nen kapegleyan na 1930, say karaklan a maniilalon makaliktar ed ‘baleg a kairapan’ tan manbilay ed dalin diad ando lan ando so akibiang ed “arum a karnero” nen Jesus. (Apocalipsis 7:9, 14; Juan 10:16) Onkualipika ira ed bautismo lapud itutunos da so kabibilay da ed Salitay  Dios tan sikatoy inaro ra ‘ed amin a puso, tan amin a kamarerwa, tan amin a kasil, tan amin ya isip da.’ (Lucas 10:25-28) Anggaman namomoria na arum a totoo a saray Tastasi nen Jehova so ‘mandadayew ed Dios tekep na espiritu tan katuaan,’ agda ni atumbok so ehemplo nen Jesus tan agda ni impatnag ed publiko so puron panangaro tan nikabkabiig a debosyon da ed si Jehova diad panagpabautismo. (Juan 4:23, 24; Deuteronomio 4:24; Marcos 1:9-11) Say masimoon tan espesipikon pikakasi nipaakar ed makanan kundang so nayarin mangiter ed sikara na gunggona tan biskeg pian sigpot iran makapitunosan ed Salitay Dios, pian manggawa na sigpot a dedikasyon ed si Jehova a Dios, tan nabautismoan.

21, 22. Antoray rason no akin a say arum et masuyat a mangidedika tan manpabautismo?

²¹ Arum so masuyat a mangidedika tan manpabautismo lapud sikara so nigalet ed saray agamil ed mundo odino diad pangegemtan ed kayamanan kanian anggapo la lawari so panaon da ed saray espiritual a bengatla. (Mateo 13:22; 1 Juan 2:15-17) Agaylan liket da komon no umanen da iray panmoria tan kalat da! Say iyapit ed si Jehova so mamabulaslas ed sikara diad espiritual a paraan, ontulong a mamakepa ed kapagaan da, tan mangitarok ed sikara na deen tan inkapnek lapud panaggawa na madibinon linawa na Dios.​—Salmo 16:11; 40:8; Uliran 10:22; Filipos 4:6, 7.

²² Ibabaga na arum ya inaro ra si Jehova balet agda labay so mangidedika tan manpabautismo lapud iisipen dan napaliisan day pikuekuentaan ed Dios. Balet amin tayo so nepeg a mikuentaan ed Dios. Wala lay eebatan tayo sanen nadngelan tayo la so salita nen Jehova. (Ezequiel 33:7-9; Roma 14:12) Bilang ‘pinilin baley,’ nianak iray Israelita nensaman diad sakey a nasyon a dedikado la ed si Jehova, tan walaan ira na obligasyon a sitotoor a manlingkor ed sikato a mitunosan ed saray ganggan to. (Deuteronomio 7:6, 11) Anggapo so nianak ed ontan a nasyon natan, balet no agamoran tayo la so Makasulatan a bangat, nepeg itayon onkiwas unong ed satan tekep na pananisia.

23, 24. Antoran kapapagaan so mangaamper ed pampabautismo na saray indibidual?

²³ Aglabay na arum so manpabautismo lapud takot ya aliwa nin magenap so pikakabat da. Ingen, amin tayo so walaan ni na dakel ya aralen lapud ‘agbalot naromog na katooan so kimey a ginawa la na tuan Dios manlapud gapo anggad sampot.’ (Eclesiastes 3:11, NW) Konsideraen pa so  Etiopen eunoko. Bilang proselita, sikato so walaan lay pikakabat ed Kasulatan, balet agto naebatan so amin a tepet nipaakar ed saray gagala na Dios. Balet, kayari ton naaralan so probisyon nen Jehova nipaakar ed kilalaban panamegley na dondon bagat nen Jesus, say eunoko so tampol a nampabautismo ed danum.​—Gawa 8:26-38.

²⁴ Arum so masuyat a mangidedika ed Dios lapud napapagaan ira ompano agda nasumpal so dedikasyon da. Oniay kuan na 17 años a si Monique: “Agko labay so manpabautismo lapud mapaga ak ya ompano agak makapambilay unong ed dedikasyon ko.” Balet, no manmatalek itayo ed si Jehova diad interon puso tayo, ‘itonton to so saray basbas tayo.’ Sikato so ontulong ed sikatayon ‘manakar ed katuaan’ bilang matoor a dedikadon lingkor to.​—Uliran 3:5, 6; 3 Juan 4.

25. Anton tepet so makanepegan na konsiderasyon tayo?

²⁵ Lapud nagnap a panagmatalek ed si Jehova tan masimoon a panangaro ed sikato, kada taon et nilibo so napapakiwas a mangidedika tan manpabautismo. Tan maseguro ya amin a dedikadon lingkor na Dios so mankaliktan a manmatoor ed sikato. Ingen ta manbibilay itayo ed maatap a panaon, tan nipapaarap itayo ed nanduruman subok ed pananisia. (2 Timoteo 3:1-5) Anto so nagawaan tayo pian makapambilay itayo unong ed dedikasyon ed si Jehova? Saya so konsideraen ed ontumbok ya artikulo?

[Paimano ed Leksab]

Kasin Nanonotan Yo?

• Panon a gagawaen so Kristianon bautismo?

• Anton pikakabat so nakaukolan pian nabautismoan so sakey?

• Antoran kundang so mangitonton ed bautismo na saray tuan Kristiano?

• Akin a masuyat so arum a manpabautismo, balet panon iran natulongan?

[Tepetepet Parad Panagaral]

[Saray litrato ed pahina 14]

Kasin amta yo so kabaliksan na pakabautismoan ed ‘ngaran na Ama, say Anak, tan say masanton espiritu’?