Aliwa nin Mataktakken Pian Manaral

SI Kseniya so nianak nen 1897. Sikato so walaan na 3 anak a bibii, sakey ya anak a laki, 15 ya apo, tan 25 ya apo ed pueg. Diad interon bilay to et ginawa to so amin ya imbangat ed sikato na atateng to. Anggaman sikatoy linma ed Moscow bilang sakey a takas manlapud atabek na bakal ya Abkhaz Republic, a walad baetan na Black Sea tan Caucasus, sikato so kontento la ed bilay to, nagkalalo la ed say tatawagen ton atawir to a pananisia manlapud inmunan atateng to.

Nen 1993, say anak nen Kseniya a si Meri so nagmaliw a sakey ed saray Tastasi nen Jehova. Ginapoan nen Meri ya intongtong ed si Kseniya so nipaakar ed si Jehova a Dios tan say Biblia, balet agto labay so ondengel. Oniay naynay ya ibaga nen Kseniya ed anak to, “Siak so akulaw lan tuloy pian manaral ni na bengatlan balo.”

Anggaman ontan, si Meri ya anak to; si Londa, ya asaway apo to; si Nana tan Zaza ya apo to’d pueg, a nagmaliw iran amin a Tastasi nen Jehova et intultuloy dan intongtong ed sikato so nipaakar ed Biblia. Sakey a labi nen 1999, imbasa ra ed si Kseniya so sakey a teksto ya anenyeg ed puso to. Lugan na satan so makapakiwas iran salita nen Jesus ed saray matoor ya apostol to sanen igagapo to so Pangdem na Katawan. (Lucas 22:19, 20) Diad edad a 102, denesidi nen Kseniya ed saman a labi ya aralen so Biblia.

“Kayari na 102 a taon na impanbilay ko,” kuan nen Kseniya, “atalosan kon siansia so kabaliksan na bilay. Amoriak natan ya anggapo lay bengatlan magmaong nen say panlingkor ed makapakelaw tan maaron Dios, si Jehova. Maksil tan mabunigas ak ni. Makabasa ak ya anggan anggapoy antipara tan aktibo ak a mililimog ed pamilyak.”

Nen Nobyembre 5, 2000, si Kseniya so abautismoan. Oniay inkuanto: “Natan et iter ko la so bilay ko ed si Jehova pian manlingkor ed sikato tekep na aro. Mangipapalima ak na saray magasin tan tracts leleg kon akayurong ed bus stop ya asingger ed panaayaman ko. Mabetbet ya ombibisita so kakanayon ko, tan maliket kon inanabang ed sikara so katuaan nipaakar ed si Jehova.”

Tatalaranan nen Kseniya so agew sano say ‘laman to sikato naani tadtariwa nen say laman na ugaw; sikato ompawil ed saray agew na kaugawan to.’ (Job 33:25) No say sakey a toon manedad lay sanlasus et agto liknaen a sikatoy mataktakken la pian makaaral ed kabaliksan na bilay diad Biblia, komusta ka balet?