Anapen so Dios Panamegley na Puso tan Nonot Mo

Ipapaseseg na tuan Inkakristiano so pangusar ed puso tan nonot diad pangiletneg na pananisia a makapaliket ed Dios.

DIAD tua et imbangat na say angiletneg na Inkakristiano, si Jesu-Kristo, a nepeg tayon aroen so Dios ed “interon nonot,” odino pakatalos tayo, nilikud ed “interon puso” tan “interon kamarerwa” tayo. (Mateo 22:37, NW) On, nepeg a walaan na manunan betang iray abilidad tayon mannonot diad panagdayew tayo.

Kapagno panmolimolien nen Jesus iray dumerengel to nipaakar ed ibabangat to, oniay mabetbet ya ibaga to: “Anto so isisip mo?” (Mateo 17:25; 18:12; 21:28; 22:42) Diad mipadparan paraan, sinulat nen apostol Pedro iray kapananisiaan to ta pian ‘liingen so malinis a kanonotan da.’ (2 Pedro 3:1) Si apostol Pablo, say misionaryo nensaman a sankalaknaban so aliber to, so amaseseg ed saray Kristiano pian mangusar ed “pakayari na panagkatunongan” da tan pian “nasali [ra] no anto so maong, tan makapaliket, tan nasnaspot a linawa na Dios.” (Roma 12:1, 2) Dia ed panamegley lambengat na aralem tan maalwar a pangusisa na saray Kristiano ed sisisiaen da so pakapangiletneg da na pananisian makapaliket ed Dios tan ontulong ed sikaran makatalona ed saray onlelesan pakasubokan ed bilay.​—Hebreos 11:1, 6.

Pian natulongay arum a makapangiletneg ed ontan a pananisia, saray inmunan Kristianon ebanghelisador so “akikatunongan ed sikara manlapud Kasulatan, ya impaliwawa tan pinaneknekan da panamegley na saray reperensya” iray bengatlan nibabangat. (Gawa 17:1-3, NW) Say ontan a matudion paraan so sengegan na maabig ya inkiwas na saray matuan-impapuson totoo. Alimbawa, dakel a totoo ed Berea a syudad na Macedonia so ‘angawat ed salita [na Dios] ed sipaparaan a nonot; inagew-agew ya inusisa ra so  sulat no peteg so sarayan bengatla [ya impaliwawa nen Pablo tan saray kaiba to].” (Gawa 17:11) Duaran bengatla so makanan imanoen dia. Unona, saray taga-Berea so sipaparaan ya ondengel ed Salitay Dios; komadua, agda sinalin palbengan a duga so nadngel da, noagta pinaneknekan da itan manlapud Kasulatan. Lapud saya et marespeton kinomendaan na Kristianon misionaryo a si Lucas iray taga-Berea, a tinawag toran “mapagalang.” Kasin ipapatnag mo so ontan a mapagalang a kanonotan ed espiritual iran pamaakaran?

Mankaiba so Nonot tan Puso

Unong ya asalambit ed gapo, lalanoren na tuan panagdayew so nonot tan puso. (Marcos 12:30) Pawilen tayo pa so ilustrasyon ed inmunan artikulo nipaakar ed inupaan a managpinta ya aliway inusar toran kolor sanen pinintaan to so abung. No tinalineng to komon a maong iray bilin na amo to, nayarin nisekar to so puso tan kamarerwa to a manumpal ed kimey to tan awalaan komon na kompiyansa a say kimey to so abobonan na makan-abung. Onaaplika met itan ed panagdayew tayo.

“Saray tua a manangigalang,” kuan nen Jesus, “igalang da so Ama dia ed espiritu tan katuaan.” (Juan 4:23) Kanian insulat nen apostol Pablo: “Lapu ed sayan sengegan sikami met . . . andi tunda min mankerew tan manggawa na pikakasi a nipaakar ed sikayo, pian napano kayo komon na kakabatan na linawa to ed amin a karunongan a maespiritu tan pakatalos, mankurang kayo a makana ed Katawan ya onarap ed amin a makapaliket.” (Colosas 1:9, 10) Ontulong itan a ‘suston pikakabat’ ed saray masimoon ya indibidual pian nisekar dan mataletalek so puso tan kamarerwa ra diad panagdayew da lapud ‘igagalang da so amta ra.’​—Juan 4:22.

Lapud sarayan rason, agbabautismoan na saray Tastasi nen Jehova so melag nin ugaw odino balobalon interesado a totoo ya agni akaaral a maong ed Kasulatan. Oniay ingganggan nen Jesus ed saray patumbok to: “Manggawa kayo na saray babangatan ed amin a nasyones, . . . ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Say sakey a masimoon ya estudyante na Biblia so makapanggawa lambengat na makabat a desisyon nipaakar ed pandayew no sikatoy akagamor la na suston pikakabat ed linawa na Dios. Kasin pambabanikelan yon nagamoran itan a suston pikakabat?

Suston Pakatalos ed Pikakasi na Katawan

Pian natalosan so pandumaan na pakawalaay suston pikakabat ed Biblia tan say pakawalaay limitadon pikakabat ed ibabaga na satan, konsideraen tayo so kaslakan a tatawagen ya Ama Mi, odino say Pikakasi na Katawan, a nikurit ed Mateo 6:9-13.

Minilyon so maparanay a manasalambit ed modelon pikakasi nen Jesus diad loob na simbaan. Balet pigara ta so nibabangat ed kabaliksan na satan, nagkalalo la ed say unonan kabiangan na pikakasi a nipaakar ed ngaran na Dios tan say Panarian to? Sarayan tema so ontanlan importante lapud inyuna nen Jesus iratan diad pikakasi.

Oniay gapo na satan: “Ama min wala ka ed tawen, nagalang komon so ngaran mo,” a kabaliksan toy nabendito, odino napasantos. Imanoen ya inkuan nen Jesus ya ipikasi a napasantos so ngaran na Dios. Satan so mangipapaarap na duaran tepet ed dakel a totoo. Unona, anto so ngaran na Dios? Tan komadua, akin a nakaukolan a napasantos so ngaran na Dios?

Say ebat ed unonan tepet so naromog ed masulok a 7,000 pasen ed Biblia diad orihinal iran lenguahe. Say sakey et diad Salmo 83:18: “Pian saray totoo nakabatan da a sika, a say ngaran mo a bukbukor et Jehova, sankatageyan ka a manuna nen say amin a dalin.” Nipaakar ed ngaran na Dios, a Jehova, oniay ibabaga na Exodo 3:15: “Sikato ya so ngaran ko ed andi anggaan, tan sikato ya so pakanodnonotan ed saray amin a kailalakan.” * Balet akin a say ngaran na Dios, a mismon segek na inkamaralus tan inkamasanto, so nakaukolan a napasantos? Lapud satan so pinabanday  tan pinauges manlapud gapoy-gapo na awaran na too.

Diad Eden, imbaga na Dios ed kinen Adan tan Eva ya ompatey ira sano kanen da so isesebel a prutas. (Genesis 2:17) Makmakpel a kinontra nen Satanas so Dios, ya imbaga to’d Eva: “Agkayo ompatey.” Diad ontan et inakusaan nen Satanas a matila so Dios. Ingen, aliwan satan labat. Binuntonan to ni na panamabanday so ngaran na Dios, ya imbaga to ed si Eva ya agmakatunongan ya ikikibot na Dios ed sikato so mablin kakabatan. “Amta na Dios a diad agew a pangan yo ed saman [so kiew a pakaamtaan na maong tan mauges], nalukasan so saray mata yo ed satan, et singa kayo Dios, ya amta yo so maong tan mauges.” Agaylan panagpauges!​—Genesis 3:4, 5.

Diad impangan da ed isesebel a bunga, akidapag si Adan tan si Eva ed kinen Satanas. Sikakabat man so maslak a totoo odino andi, satan ya inmunan panamabanday so pinaloor da manlapula’d nensaman diad pangipupulisay da ed matunong iran estandarte na Dios. (1 Juan 5:19) Papaugesen ni na totoo so Dios diad panetetel da ed sikato ed paniirap da​—anggaman makasengeg itan ed dilin kaugsan da. “Say dilin kabaglan na too maneral ed bilay to, insan panem-eman toy Katawan,” so kuan na Uliran 19:3. (The New English Bible) Kasin natebek yo no akin a si Jesus, a peteg ya angaro’d Ama to, so angipikasi a napasantos so ngaran To?

“Onsabi Komon so Panarian Mo”

Kayari impangipikasi to a napasantos so ngaran na Dios, inkuan nen Jesus: “Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:10) Nipaakar ed satan a balikas, nayarin itepet tayo: ‘Anto so Panarian na Dios? Tan panon a nisisiglaot so isabi na satan ed linawa na Dios a nagagawa ed dalin natan?’

Diad Biblia, say salitan “panarian” et manunan mankabaliksan na say “pananguley na sakey ya ari.” Makatunongan sirin ya ontukoy so Panarian na Dios ed sakey a pananguley, odino gobierno, na Dios, panamegley na sakey ya ari a pinili to. Sayan Ari et anggapoy arum noag say pinaolin si Jesu-Kristo​—say “Ari na saray arari tan Katawan na saray kakatawan.” (Apocalipsis 19:16; Daniel 7:13, 14) Nipaakar ed Mesianikon Panarian na Dios ya uleyan nen Jesu-Kristo, oniay insulat nen propeta Daniel: “Dia ed agew na saratan ya arari [gobierno na too a manuuley natan], say Dios na tawen mamaalagey naani na sakey a panarian ya anggan kapigan agnaani naderal tan say pananguley to agnaani niiter ed sananey a baley; balet buybuyaken to naani tan upoten to naani so saraya ya amin a panarian, et sikato mansiansia lawas,” salanti, anggapoy anggaan.​—Daniel 2:44.

On, say Panarian na Dios so sigpot lan mangontrol ed dalin, a palinen na satan so amin a mauges tan satan so manuley “lawas,” salanti, diad ando lan ando. Diad onian paraan, say Panarian na Dios so paraan ya usaren nen Jehova ed pamasantos ed ngaran to, a paandien na satan so amin a tilan panamabanday nen Satanas tan marelmeng a totoo.​—Ezequiel 36:23.

Singa ed amin a gobierno, say Panarian na Dios so walaan na saray uuleyan. Siopa iraya? Oneebat so Biblia: “Saray mauyamo tawiren da naani dalin: tan manliket ira a dili ed inkadaakan na kareenan.” (Salmo 37:11) Mipadpara, inkuan nen Jesus: “Mapalar iray mauyamo [“maumildi,” NW]; ta tawiren day dalin.” Siempre, saraya so walaan na suston pikakabat ed Dios, a sakey itan a kakaukolanen parad bilay.​—Mateo 5:5; Juan 17:3.

Naisip mo ta so interon dalin a napno na mauyamo, maumildin totoo a peteg a mangaaro ed Dios tan manaaroan ed sakey tan sakey? (1 Juan 4:7, 8) Satan iman so impikasi nen Jesus sanen inkuanto: “Onsabi komon so panarian mo. Nagawa komon so linawam, unong ed tawen, ontan met ed dalin.” Kasin natebek mo no akin ya imbangat nen Jesus iray patumbok to a manpikasi ed ontan a paraan? Mas importante ni, kasin naimanom no panon a say kasumpalan na satan a pikakasi so mangapekta ed sikan mismo?

Minilyon Natan so Mankakatunongan Diad Kasulatan

Impasakbay nen Jesus so sankagloboan a kampanya na espiritual a panagbangat a mangipakabat ed onsasabin Panarian na Dios. Inkuanto: “Saya ya ebanghelyo na panarian nipulong naani ed sankamundoan ya onkanan pamintuaan  ed saray amin a nasyones; et saman la onsabi so anggaan [na sayan peles a mundo, odino sistema].”​—Mateo 24:14.

Diad sankamundoan et manga anemiran milyon a Tastasi nen Jehova so manginanabang ed satan maong a balita diad kapara ran totoo. Iimbitaan da ka a manaral na nagkalalo ni nipaakar ed Dios tan say Panarian to diad ‘maalwar a pangusisa ed Kasulatan,’ ya usaren moy pakayari na panagkatunongan mo. Diad panggawam ed satan, napabiskeg so pananisiam tan panliketan mo so ilalo na bilay diad paraison dalin, a “napano naani na pikakabat ed Jehova, singa saray danum sakbongan da so dayat.”​—Isaias 11:6-9.

[Paimano ed leksab]

 [Kahon/Litrato ed pahina 8]

Aligen So Matalonggaring A Managbangat

Mabetbet a nambangat si Jesus diad impangiyapasakey to ed saray espesipikon tema ed Biblia. Alimbawa, kayari na inkioli to et impaliwawa toy betang to ed gagala na Dios diad duaran babangatan to ya awetwet nipaakar ed impatey to. Oniay ibabaga na Lucas 24:27: “Nanlapu ed Moises tan manlapu ed saray amin a propetas impaliwawa to ed sikara dia ed saray amin a sulat so saray bengatla nipaakar ed sikato lanlamang.”

Imanoen ya amili si Jesus na espesipikon tema​—‘sikaton mismo,’ say Mesias​—tan angaon manlapud ‘amin a Kasulatan’ diad impaningbat to. Bilang epekto, pinantetekep nen Jesus iray mitukoyan a teksto a singa saray piraso na puzzle, a tinmulong ed saray babangatan to a makatalos ed malinew ya alasir na espiritual a katuaan. (2 Timoteo 1:13) Bilang resulta, ag-ira lambengat aliwawaan noagta atenyeg met iran tuloy. Oniay ibabaga ed sikatayo na salaysay: “Inkuan da ed sakey tan sakey, Agta dinmalang so puso ta ed loob ta, legan a nansalita ed sikata ed dalan sanen nilukasan to ed sikata so saray Sulsulat?”​—Lucas 24:32.

Panggugunaetan na saray Tastasi nen Jehova ya aligen iray metodo nen Jesus diad ministeryo ra. Saray manunan katulongan da ed panagaral et say brosyur ya Anto so Kakaukolanen na Dios ed Sikatayo? tan say libron Pikakabat a Mangitonton ed Andi-Anggaan a Bilay. Saraya so manisingbat ed dakerakel a makapainteres iran tema ed Biblia, a singa say: “Siopa so Dios?,” “Akin ya Aabuloyan na Dios so Panirap?,” “Panon Mon Naromog so Tuan Relihyon?,” “Saraya la so Kaunoran ya Agew!,” tan “Panangipaalagey na Sakey a Pamilya a Mangigagalang ed Dios.” Lugan na kada leksion so dakerakel a teksto.

Sikay naabrasa a mitalosan ed saray Tastasi nen Jehova diad lugar yo odino mansulat ed address a wala’d pahina 2 na sayan magasin parad libren panagaral na Biblia nipaakar ed saraya tan arum niran tema.

[Litrato]

Sabien so puso na iyaaralan yo diad pangiyapasakey ed saray espesipikon tema ed Biblia

[Saray litrato ed pahina 7]

Kasin natatalosan mo so kabaliksan na modelon pikakasi nen Jesus?

“Ama min wala ka ed tawen, nagalang komon so ngaran mo . . .”

“Onsabi komon so [Mesianikon] panarian mo . . .”

“Nagawa komon so linawam, unong ed tawen, ontan met ed dalin”