“Labay Kon Panlingkoran so Dios”
Report na Saray Manangiyabawag na Panarian
“Labay Kon Panlingkoran so Dios”
“OMPAWAY kayo ed sikato, baley ko.” Satan so anghelikon tawag a nadngel nen apostol Juan nen inmunan siglo K.P. Diad panaon tayo minilyon ed saray matuan-impanpuso so kinmiwas tan tinmaynan la ed “Babilonia a Baleg,” say sankamundoan ya empiryo na palson relihyon. (Apocalipsis 18:1-4) Sakey ed sikara et si Wilner a nanlapud Haiti, ya angidalatdat na eksperiensya to.
“Siak so nianak nen 1956 ed sakey a pamilyan debotadon Katoliko diad melag a baley na St. Marc, Haiti. Isipen pa so liket na pamilyak sanen apili ak, kaiba so duara ni manlapu ed baley mi, pian maneskuela ed seminaryo diad St. Michel de l’Atalaye, Haiti. Insan nen 1980, sikami so nibaki ed Stavelot, Belgium, parad kaaruman a panagpasal. Naneskuela kami met diman ed sakey a Katolikon unibersidad.
“Diad unona et labalabay ko so man-pari. Sakey ya agew diad panangogtoan, say parin mangaasikaso ed grupo mi so angibagan natilak ak na pigaran minuto ta walay labay ton ibaga ed siak. Isipen pay impakabiglak sanen inkuan ton sikatoy nasasagyat ed siak diad seksual a paraan! Imbaliwalak so pangaanamot to bangbalet siak so sigpot ya adismaya. Siak so sinmulat ed pamilyak nipaakar ed agawa tan inmalis ak ed seminaryo kayari na pigaran bulan, anggaman sikaray maingongot. Akalmo ak na panayaman ko ed baryo tan intuloy koy panagaral ko ed sananey lan propesyon.
“Sanen pinmawil ak ed St. Marc, anggapo la so talek ko ed Iglesia Katolika. Anggaman ontan, labay kon panlingkoran so Dios, balet agko amta so gawaen ko. Siak so linma ed simbaan na Adventist, diad simbaan na Ebenezer, tan diad simbaan na Mormon. Siak so nipalirpalir ed espiritual.
“Anonotan ko a leleg ya onaatendi ak ed seminaryo ed Belgium, siak so maparanay a manbabasa na Biblian Crampon. Diad satan et aromog ko a say Dios so walaan na ngaran. Kanian diad panguusar ed ngaran to et siak so magunaet a nampikasi ed Dios parad tulong pian naromog so tuan relihyon.
“Kayari tuloy na satan, duaran bibii a Tastasi nen Jehova so inmalis ed lugar mi. Sikaray mareen, marespeto, tan magalang. Siak so mandinayew ed nengneng na kabibilay da. Sakey ya agew, sakey ed sarayan duaran Tastasi so angimbita ed siak pian onatendi ed tinaon a panagselebra ed Memoryal na impatey nen Kristo. Peteg a nanggayagaan ko so miting tan regular ya impaiyaralan ak na Biblia ed saray Tastasi. Diad loob na ngalngali anem bulan, siak so kombinsido a nalmok la so tuan dalan pian panlingkoran so Dios. Siak so angidedika na bilay ko ed si Jehova tan abautismoan ak nen Nobyembre 20, 1988.”
Sinmabi panaon, si Wilner so linmoob ed sigpot-panaon a serbisyo. Natan, sikato so manseserbi bilang sakey a matatken ed kongregasyon. Sikato tan say asawa to, kaiba so duaran anak da, so malikeliket a manseserbi ed kongregasyon da.
[Litrato ed pahina 9]
Diad impanbasa to na Biblia, naamtaan nen Wilner a say ngaran na Dios et Jehova