Niyatagey so Lima nen Jehova
Propesiya nen Isaias—Liwawa Parad Amin a Katooan I
Katuloyan na Kapitulo Beinte-Uno
Niyatagey so Lima nen Jehova
Pampilalek ed Inkatunong tan ed ‘Pakanodnonotan’ nen Jehova
16. Anton maabig ya ehemplo na debosyon so inletneg nen Isaias?
16 Kayari na sayan kanta ed impanbiktorya et imparungtal nen Isaias so kaaralem na dili ton debosyon tan saray tumang na panaglingkor ed Dios na inkatunong. (Basaen so Isaias 26:7-9.) Angiter so propeta na maabig ya ehemplo ed ‘panalagar ed si Jehova’ tan ed pakawalaan na aralem a pampilalek ed “ngaran” tan ed ‘pakanodnonotan’ nen Jehova. Anto so pakanodnonotan nen Jehova? Oniay inkuan na Exodo 3:15: “Jehova . . . sikatoya so ngaran ko ed andi-anggaan, tan sikatoya so pakanodnonotan ed saray amin a kailalakan.” Pinabli nen Isaias so ngaran nen Jehova tan amin ya irerepresenta na satan, a pati saray matunong ya estandarte tan dalan To. Saramay mamabayubo na ontan a panangaro ed si Jehova so napapaseguroan na panamendisyon to.—Salmo 5:8; 25:4, 5; 135:13; Oseas 12:5.
17. Antoran pribilehyo so ag-ipagamor ed saray marelmeng?
17 Balet, aliwan amin so mangaaro ed si Jehova tan ed atagey iran estandarte to. (Basaen so Isaias 26:10.) Saray marelmeng, anggano iimbitaan la ra et agdan balot labay so manaral na inkatunong pian makaloob “ed dalin na inkatunong [“kaptekan,” NW],” say dalin a panaayaman na saray maptek ed moral tan espiritual a lingkor nen Jehova. Bilang resulta, ‘agnapatnagan [na marelmeng] so kaatageyan nen Jehova.’ Ag-ira manbilay a napanggayagaan iray bendisyon ya onagus ed katooan kayarin napasanto so ngaran nen Jehova. Anggan diad balon mundo, sano say interon dalin so magmaliw a ‘dalin na kaptekan,’ arum so nayarin ag-onkiwas ed maaron-kaabigan nen Jehova. Say kangaranan na saratan so ag-isulat ed libro na bilay.—Isaias 65:20; Apocalipsis 20:12, 15.
18. Diad anton dalan a nilabay na arum ed panaon nen Isaias so magmaliw a bulag, tan kapigan ira napaskar ya ‘onnengneng’ ed si Jehova?
18 “Jehova, say liman niyatagey, anggan ontan agda nanengneng: balet nanengneng da so panamabaing mo nipaakar ed baley, tan nibabaing ira: on, apoy so mangakmon naani ed sikara ed saray kasumlang mo.” (Isaias 26:11) Diad panaon nen Isaias, say lima nen Jehova so apatnagan a nipaatagey sanen sinalimbengan nen Jehova so totoo to diad inkiwas sumpad kakabusol da. Balet, agbinidbir na karaklan iya. Saratan, a nilabay day magmaliw a bulag ed espiritual, so napaskar diad kaunoran ya ‘onnengneng,’ odino mamidbir ed si Jehova sano sikaray akmonen na apoy na seseg to. (Sofonias 1:18) Oniay inkuan na Dios ed si Ezequiel ed saginonor: “Naamtaan da ak naani a siak si Jehova.”—Ezequiel 38:23.
“Didisiplinaen nen Jehova so Aaroen To”
19, 20. Akin tan panon a dinisiplina nen Jehova so totoo to, tan siopa so agunggonaan manlapud satan a disiplina?
19 Kabat nen Isaias ya antokaman a kareenan tan kaligenan a panggagayagaan na kabaleyan to et lapud panamendisyon nen Jehova. “Jehova, manguksoy ka na deen nipaakar ed sikami; ta ginawam met so saray amin a kimey mi nipaakar ed sikami.” (Isaias 26:12) Anggaman onia tan anggaman intarya nen Jehova ed totoo to so pankanawnawan magmaliw a “sakey a panarian na saray saserdotes, tan sakey a masimpit a nasyon,” say Juda so awalaan na maabig tan mauges ya awaran. (Exodo 19:6) Paulit-ulit a binmaling so totoo to diad panagdayew ed palso iran dirios. Bilang resulta et aminpiga iran dinisiplina. Balet, satan a panagdisiplina so paneknek na panangaro nen Jehova lapud “didisiplinaen nen Jehova so aaroen to.”—Hebreos 12:6, NW.
20 Mabetbet, didisiplinaen nen Jehova so totoo to diad pangiyaabuloy to’d arum a nasyones, “arum a kakatawan,” a manguley ed sikara. (Basaen so Isaias 26:13.) Nen 607 K.K.P. et inabuloyan to iray taga-Babilonia a manestiero ed sikara. Kasin pakagunggonaan da iya? Say panirap a mismo so agmangunggona ed sakey a too. Balet, no say manasagmak et makaaral ed agawa, magbabawi, tan iter to so nikabkabiig a debosyon ed si Jehova, diad ontan et sikatoy nagunggonaan. (Deuteronomio 4:25-31) Kasin walay siopaman a Judio ya angipatnag na maridios a panagbabawi? Wala! Oniay mapropetikon impangikuan nen Isaias: “Lapu ed panamegley mo salambengat a nasalita mi so ngaran mo.” Kayari inkipawil da manlapud inkadestiero nen 537 K.K.P., mabetbet a kinaukolan na saray Judio so disiplina lapud arum a kasalanan, balet agla ran balot lamet apatitan na panlingkor ed dirios a bato.
21. Anto so nagawa ed saramay mamapairap ed totoo na Dios?
21 Komusta iray angautibo ed Juda? “Sikara so anino [“andian na pakayari,” NW], ag-ira onalagey la: kanian dinalaw mo tan binagbag mo ra, tan ginawam so amin a pakanodnonotan ed sikara a natawtaw.” (Isaias 26:14) Say Babilonia so manirap lapud impanlames ed pinilin nasyon nen Jehova. Panamegley na saray Medo tan Persiano et galpongen nen Jehova so mapaatagey a Babilonia tan ibulos to iray adestieron totoo to. Satan a baleg a syudad, say Babilonia, so ipasen ya andian na pakayari, a singa la inatey. Diad saginonor et sikato la so naandi.
22. Diad modernon panaon, panon a nabebendisyonan so totoo na Dios?
22 Diad modernon kasumpalan, say nakdaan na adalisay ya espiritual ya Israel so nibulos ed Babilonia a Baleg tan nipawil diad panaglingkor ed si Jehova nen 1919. Lapud apasimbalon biskeg, maseseg ya indeboto na saray alanaan a Kristiano so inkasikara ed panagpulong a kimey. (Mateo 24:14) Benendisyonan met ira nen Jehova diad indaak da, ya inyarum to ni ingen so baleg ya ulop na ‘arum a karnero’ pian manlingkor a kaiba ra. (Juan 10:16) “Pinabaleg mo so nasyon, O Jehova, pinabaleg mo so nasyon, narayrayew ka; pinaawang mo so saray amin a ketegan na dalin. Jehova, dia ed gonigon dinalaw da ka; angiyapay ira na pikakasi sanen say pananusam wala ed tapew da.”—Isaias 26:15,16.
“Onalagey Ira”
23. (a) Anton nikadkaduman panangipatnag na pakapanyari nen Jehova so agawa nen 537 K.K.P.? (b) Anton mipadparan panangipatnag so agawa nen 1919 K.P.?
23 Pinawil nen Isaias so kipapasen a kidungetan na Juda legan a say nasyon so kautibo ni ed Babilonia. Inkompara to so nasyon ed sakey a bii a manpapasakit a no anggapo so tulong et agto nayarian so mananak. (Basaen so Isaias 26:17, 18.) Satan a tulong so sinmabi nen 537 K.K.P., tan pinmawil so totoo nen Jehova ed dalin da, a magunaet a mangipaalagey lamet ed templo tan ipawil lamet so tuan panagdayew. Singano say nasyon so inmoli manlapud patey. “Saray inatey mo ombilay ira; saray inaatey a laman ko onalagey ira. Liing tan mankanta kayo, sikayo a manayam dia ed dabok; ta say linaew mo sikato ed singa linaew na saray dika, tan say dalin ipaway da naani so saray inatey.” (Isaias 26:19) Agaylan panangipatnag na pakapanyari nen Jehova! Niarum ni, agaylan baleg a panangipatnag so agawa sanen sarayan salita so asumpal diad espiritual a pantalos nen 1919! (Apocalipsis 11:7-11) Tan agaylan pantintindekan tayo so panaon sano nasumpal irayan salita ed literal a pantalos diad balon mundo tan saramay agmakayarin inaatey so ‘makadngel ed boses nen Jesus tan ompaway’ manlapud pakanodnonotan iran lubok!—Juan 5:28, 29.
24, 25. (a) Panon a tinulok na saray Judio nen 539 K.K.P. so ganggan nen Jehova ya onamot ira? (b) Anto so nayarin tutukoyen na “saray silir” diad modernon panaon, tan anton awawey so nepeg tayon bayuboan nipaakar ed saraya?
24 Balet, pian napanggayagaan na saray matoor so espiritual a bendisyon ya insipan panamegley nen Isaias, nepeg dan unoren iray ganggan nen Jehova: “Gala, baley ko, onloob ka ed saray silir mo, tan ikapot mo so saray silir mo, tan ikapot mo so saray pintom ed kaliberliber mo: yamot mo so inkasika ed daiset a panaon angga ed say kasanokan onlabas. Ta, nia, si Jehova ompaway a manlapu ed pasen to pian dusaen to so saray manaayam ed dalin lapu ed inkauges da: say dalin met lakseban to so dala to, tan anggan kapigan agto la sakbongan so saray inatey to.” (Isaias 26:20, 21; ikompara so Sofonias 1:14.) Sayan balikas so nayarin walaan na pilimeron kasumpalan sanen kinubkob na saray Medo tan Persiano, ya indaulo nen Arin Ciro, so Babilonia nen 539 K.K.P. Unong ed Griegon manag-awaran a si Xenophon, sanen linmoob si Ciro ed Babilonia, ingganggan to so amin a mansiansia ed kaabungan da lapud saray de-kabayoan to so “niganggan a mamagit ed amin a naromog ed paway.” Natan, “saray silir” na sayan propesiya so misiglaotan a tuloy ed sinamplon nilibo a kongregasyon na totoo nen Jehova ed interon mundo. Saratan a kongregasyon so mantultuloy a nawalaan na makanan betang ed bilay tayo, anggan diad “baleg ya irap.” (Apocalipsis 7:14) Agaylan makana a pansiansiaen tayo so positibon awawey nipaakar ed kongregasyon tan regular a milimog ed satan!—Hebreos 10:24, 25.
25 Magano lan mangangga so mundo nen Satanas. Agtayo ni amta no panon a salimbengan nen Jehova so totoo to legan na satan a makapataktakot a panaon. (Sofonias 2:3) Balet, amta tayo a say kililiktar tayo so mandependi ed pananisia tayo ed si Jehova tan ed katooran tan katutulok tayo ed sikato.
26. Anto so “Leviatan” ed panaon nen Isaias tan ed panaon tayo, tan anto so nagawa ed sayan “tongol”?
26 Diad panatalaran ed satan a panaon et oniay impropesiya nen Isaias: “Dia ed saman ya agew si Jehova lapu ed panamegley na anawet tan baleg tan mabiskeg a kampilan dusaen to naani so Leviatan a marlas ya uleg, tan say Leviatan a makiwi ya uleg; et pateyen to naani so tongol a wala ed dayat.” (Isaias 27:1) Diad pilimeron kasumpalan, say “Leviatan” so ontutukoy ed saray bansa a nikaykayatan na Israel, a singa say Babilonia, Ehipto, tan Asirya. Sarayan bansa so agmakayarin mangamper ed kipawil na totoo nen Jehova ed dalin da diad nigeter a panaon. Balet, siopa so modernon-agew a Leviatan? Ompapatnag a si Satanas itan—“say daan ya uleg”—tan say marelmeng a sistema na bengabengatla to diad dalin, ya uusaren to diad pibabakal sumpad espiritual ya Israel. (Apocalipsis 12:9, 10; 13:14, 16, 17; 18:24) Abalang na “Leviatan” so pakayari ton mameget ed totoo na Dios nen 1919, tan agmanbayag et sikato lay maminpinsan a naandi sano “pateyen to [nen Jehova] naani so tongol.” Ambegya, anggapoy antokaman a salien na “Leviatan” a gawaen ed totoo nen Jehova a peteg ya ontalona.—Isaias 54:17.
‘Sakey ya Ubasan na Manburaboran Alak’
27, 28. (a) Pinano na ubasan nen Jehova na anto so interon dalin? (b) Panon a sasalimbengan nen Jehova so ubasan to?
27 Tekep na sananey a kanta, marakdakep ya inyilustra nen Isaias so inkamabunga na nibulos a totoo nen Jehova: “Dia ed saman ya agew: Sakey ya ubasan na [“manburaboran,” NW] alak, sikato so kantaan yo. Siak si Jehova a managtalima ed sikato, sikato so salogen ko ed balang kasanlilikna: ompan wala so manduksa ed sikato, sikato so talimaen ko ed labi tan agew.” (Isaias 27:2, 3) Peteg a pinano na saray nakdaan na espiritual ya Israel tan saray makukulin kaiba ra so interon dalin na espiritual a bunga. Agaylan sengegan na panselebra tan pankanta! Kien nen Jehova so amin a dayew, say sakey a maaron manatalima ed ubasan to.—Ikompara so Juan 15:1-8.
28 Peteg, asalatan so sanok nen Jehova na gayaga! “Sanok andi ed siak saray tala tan saray sabitan wala ra komon a sumpa ed siak ed bakal! Manakar ak komon ed tapew da, poolan ko ra komon a bansag. Odino andi sikato so ombemben komon ed biskeg ko, pian makapipakna ed siak; on, paulyan mo a sikato so mipakna ed siak.” (Isaias 27:4, 5) Pian naseguro a saray yakal to so mantultuloy a mamawala na daakan a ‘manburaboran alak,’ mekmeken tan simuten nen Jehova a singa apoy so singa-sabitan ya impluensya a manederal ed ubasan to. Kanian, anggapo komon so siopaman a mangiyan na kaatapan ed pankaabigan na Kristianon kongregasyon! Imbes, amin komon so ‘ombemben ed biskeg nen Jehova,’ ya anapen so pabor tan salimbeng to. Diad panggawa ed saya, mikakareenan ira ed Dios—bengatlan importantin tuloy kanian amiduan sinalambit itan nen Isaias. Say resulta? “Dia ed saray agew ya onsabi si Jacob manlamot; say Israel manbolaklak tan onsimit: et panoen da so lupa na mundo ed bunga.” (Isaias 27:6) Agaylan makapakelkelaw a paneknek na pakapanyari nen Jehova so kasumpal na sayan bersikulo! Nanlapu la’d 1919 et pinano na saray alanaan a Kristiano so dalin na “bunga,” say masustansian espiritual a tagano. Bilang resulta, akiulop ed sikara so minilyon a matoor ya arum a karnero, a kaiba ra a “mangisasaklang ed [Dios] na sagradon serbisyo ed agew tan labi.” (Apocalipsis 7:15, NW) Diad utel na abulok a mundo, napansiasiansia na saraya so atagey iran estandarte to. Tan mantutultuloy a bebendisyonan ira nen Jehova na idaraak. Agtayon balot komon nalingwanan so baleg a pribilehyo na pangan na “bunga” tan panginabang ed satan ed arum panamegley na dili tayon kelyaw na panangidayew!
[Tepetepet Parad Panagaral]