Propesiya nen Isaias​—Liwawa Parad Amin a Katooan I

Katuloyan na Kapitulo Beinte-Dos

Ipapasakbay nen Isaias so ‘Makapakelaw a Kimey’ nen Jehova

Say ‘Makapakelaw a Kimey’ nen Jehova

16. Anto so ‘makapakelaw a kimey’ nen Jehova, tan akin a nikadkaduma iyan gawa?

¹⁶ Say pansumpalan na saray pakurang so sigpot a miduma ed iilaloan na saray relihyoson pangulo na Juda. Si Jehova so manggawa na bengatlan makapakelaw ed saray espiritual a managbuanges na Juda. “Si Jehova onalagey naani a singa diman ed palandey Perasim, singa diman ed lawak na Gabaon so isanok to; pian nagawa to so kimey to, say kimey to a makapakelaw, tan palabasen to so gawa to, say gawa to a makapakelaw [“nikadkaduma,” NW].” (Isaias 28:21) Diad panaon nen Arin David, inter nen Jehova ed totoo to so makatantanda iran impanalo sumpad saray Filisteo diad Palandey Perasim tan diad lawak na Gabaon. (1 Awaran 14:10-16) Diad panaon nen Josue, pinansiansia to ni ingen so banwa diad Gabaon pian nasigpot so pananalo na Israel sumpad saray Amorreo. (Josue 10:8-14) Satan so nikadkaduman tuloy! Natan et mibakal lamet si Jehova, balet diad sayan bekta et sumpad saramay mankuan a totoo to. Wala ni kasi mas makapakelaw odino nikadkaduma? Anggapo la no imanoen so katuaan a say Jerusalem so sentro na panagdayew ed si Jehova tan syudad na nilanaan ya ari nen Jehova. Anggad natan, say maarin sankaabungan nen David ed Jerusalem so agnin balot atalo. Anggaman kuan, maseguron sumpalen nen Jehova so ‘makapakelaw a kimey’ to.​—Ikompara so Habacuc 1:5-7.

17. Anto so epekto na panamalaw ed pakasumpal na propesiya nen Isaias?

¹⁷ Kanian, insimbawa nen Isaias: “Agkayo manbalaw, ompan lamang onelet so saray balor yo, ta sakey a bilin a panamagbag so nadngel ko a manlapu ed Katawan, si Jehova na saray ehersito, ed amin a dalin.” (Isaias 28:22) Anggaman mamabalaw iray pangulo, say mensahe nen Isaias so tua. Nadngel to itan manlapud si Jehova, ya akisipanan na saraman a pangulo. Mipadpara natan, saray relihyoson pangulo na Kakristianoan so mamabalaw sano narerengel da so ‘makapakelaw a kimey’ nen Jehova. Maningal-ingal tan manpasnok ni ra ingen. Balet say mensahen iyaabawag na saray Tastasi nen Jehova et tua. Naromog itan ed Biblia, say libron inkuan na saraman a pangulo ya irerepresenta ra.

18. Panon ya iyiilustra na Isaias so inkabalanse nen Jehova sano manidisiplina?

 ¹⁸ No nipaakar ed saray masimoon ya indibidual ya ag-ontutumbok ed saraman a pangulo, peteken ira nen Jehova tan ipawil to so pabor to ed sikara. (Basaen so Isaias 28:23-29.) No panon a say dumaralos so manguusar na maasigta iran paraan pian taltagen so pino a bukel, a singa say komino, ontan met so pangitutukoy nen Jehova ed panagdisiplina to unong ed indibidual tan sirkumstansya. Sikatoy agbalot mapasang tan maruksa noagta sikatoy onkikiwas tekep na panmoria ed posiblin pakapawil na sakey a nankasalanan. On, no onkiwas iray indibidual ed kerew nen Jehova, wala so ilalo. Mipadpara natan, anggaman atatakan la so pansumpalan na interamentin Kakristianoan, napaliisan na siopaman ya indibidual a manpasakop ed Panarian nen Jehova so onsasabin ambelat a panangukom.

Abagey la so Jerusalem!

19. Diad anton dalan a say Jerusalem so magmaliw a “panagpoolan ya altar,” tan kapigan tan panon iyan agawa?

¹⁹ Balet, anto so sasalitaen natan nen Jehova? “O Ariel, Ariel; a syudad a nampakalsoan nen David! Panaaruman yo so taon tan taon; saray liket onliber ira: saman la pairapen ko so Ariel, et wala naani paningel tan paney-ey, et sikato naani ed siak so singa Ariel [“panagpoolan ya altar na Dios,” NW].” (Isaias 29:1, 2) Say “Ariel” so nayarin mankabaliksay “Say Panagpoolan ya Altar na Dios,” tan mapatnag dia a satan so ontutukoy ed Jerusalem. Satan so kawalaan na templo a wadtan so altar na panagbagatan. Saray Judio so regular a manseselebra ed saray piesta tan mangiyaapay na saray bagat diman, balet agnapapaliket si Jehova ed panagdayew da. (Oseas 6:6) Imbes, ingganggan ton say syudad a mismo so magmaliw a “panagpoolan ya altar” diad duman pantalos. Singa sakey ya altar, onagus ditan so dala tan napoolan. Indeskribe ni ingen nen Jehova no panon iyan nagawa: “Manpakalso ak ed liberliber mo a sumpa ed sika, tan kubkoben ta ka ed impasen a sunsundalo, tan mamaalagey ak na salimbeng sumpa ed sika. Et sika naani napaabeba, tan mansalita ka naani a manlapu ed dalin, et say salitam ompaway naani ya abeba ed dabok.” (Isaias 29:3, 4) Asumpal iya ed Juda tan Jerusalem nen 607 K.K.P. sanen kinubkob tan dineral na saray armada na Babilonia so syudad tan pinoolan da so templo. Say Jerusalem so nipaabeba a singa kaabeba na dalin ya angiletnegan ed sikato.

20. Anto so ultimon pansumpalan na saray kakabusol na Dios?

²⁰ Antis na satan a makadesyang a panaon, panapanaon ya awalaan so Juda na ari a manguunor ed saray Ganggan nen Jehova. Anto sirin? Si Jehova so milalaban parad totoo to. Anggano liktoben na kakabusol so dalin, sikaray magmamaliw a singa “dabok” tan “taep.” Diad nigeter a panaon to, buybuyaken ira nen Jehova “tekep na saray karol, tan yegyeg, tan baleg a tanol, ed alimbusabos tan bagyo, tan say dalang na mangakmon ya apoy.”​—Isaias 29:5, 6.

21. Ipaliwawa so ilustrasyon ed Isaias 29:7, 8.

²¹ Nayarin pantintindekan na saray maruksan armada so panamsam ed Jerusalem tan mansawasawa ira ed saray samsam ed bakal. Balet sikaray naliing a bigla! Singa sakey a nabibigot a toon mankukugkugip a sikatoy manbubuwag insan naliing a narnarasan a maong, saray kakabusol na Juda so agmanggayaga ed panangan a pantintindekan dan alagaren. (Basaen so Isaias 29:7, 8.) Imanoen pa so agawa ed armada na Asiryano diad uley nen Senakerib sanen pinagyaw na satan so Jerusalem diad panaon nen matoor ya Arin Hezekias. (Isaias, kapitulo 36 tan 37) Diad loob na sakey a labi, ya anggapoy akibakal a too, say makapataktakot tan maruksan armada na Asiryano so inmatras​—185,000 ed saray mabiskeg a bumabakal to so atigway! Saray kukugkugipen a pangubkob so onsaew lamet sano say maruksan armada na Gog na Magog so onkiwas sumpad totoo nen Jehova diad maganon arapen.​—Ezequiel 38:10-12; 39:6, 7.

22. Panon a naapektaan so Juda ed inkabuanges to ed espiritual?

²² Legan na panaon ya imbalikas nen Isaias iyan parte na propesiya to, saray pangulo ed Juda so andian na pananisia a singa ed si Hezekias. Binuek da so inkasikara anggad sikara lay diwengdiweng ed espiritual diad impialyansa ra ed agmaridios iran nasyon. “Manabala kayo tan mankelaw kayo; alaen yo so kaliktan yo, et nabulag kayo: abuek ira, balet andi ed alak; mantogingging ira, balet andi ed mabayani ya inumen.” (Isaias 29:9) Lapud abuek ira ed espiritual, agnatebek na sarayan pangulo na Kakristianoan so kabaliksan na pasingawey ya inter ed tuan propeta nen Jehova. Oniay inkuan nen Isaias: “Si Jehova inibong to ed sikayo so espiritu na maitlep ya ugip, tan pinalikdem to so saray propeta; et saray ulo yo, saray managnengneng, sinakbongan to. Et amin a pasingawey nagmaliw ed sikayo a singa saray salita na sakey a libro ya atatakan, ya inyawit na saray totoo ed sakey ya abangatan, a kuan da, Kerewen ko ed sika, basam pa so saya; et sikato kuan to, Agko nayarian, ta atatakan: et samay libro niyawat ed saman so ag-abangatan a kuan da, Kerewen ko ed sika, basam pa so saya; et sikato kuan to, Agak abangatan.”​—Isaias 29:10-12.

23. Akin a mikuentaan si Jehova ed Juda, tan panon ton gawaen itan?

²³ Saray relihyoson pangulo na Juda so mankuan a maalwar ira no nipaakar ed espiritual, balet inkaindan da si Jehova. Imbes et ibabangat da so pikewet iran ideya ra nipaakar ed susto tan lingo, ya ipapasen dan makatunongan so inka-andi na pananisia ra tan imoral a kagagawa ra tan say panangiwanwan da ed totoo ed agpanangabobon na Dios. Panamegley na bengatlan “pankelawan,”  salanti say ‘makapakelaw a kimey’ to, mikuentaan si Jehova ed sikara lapud pansimpisimpitan da. Oniay inkuan to: “Lapu ed saya a baley onasingger ed siak, tan dia ed sangi ra tan dia ed saray bibil da igalang da ak, ingen saray puso ra inyarawi ra ed siak, tan say takot da ed siak sikato so sakey a bilin na saray totoo a nibangat ed sikara; kanian, nia, umanen ko naani a gawaen so sakey a makapakelaw a gawa ed pegley na saya a baley, salanti makapakelaw a gawa tan pankelawan; et say kakabatan na saray totoo ra a makabat nabalang, tan say pakatalos na saray totoo ra a mabinta niyamot.” (Isaias 29:13, 14) Say nanlapu’d-dilin kakabatan tan pakatalos na Juda so naandi sano imaneobra nen Jehova so bengabengatla pian say interamintin apostata a relihyoson sistema na satan so panganggaen na Pakayari Mundo a Babilonia. Ontan so agawa nen inmunan siglo kayarin saray makabat ed dili a pangulo na saray Judio so angibalang ed nasyon. Ontan met a bengatla so nagawa ed Kakristianoan diad mismon agew tayo.​—Mateo 15:8, 9; Roma 11:8.

24. Panon ya impatnag na saray taga-Judea so inka-andian da na takot ed Dios?

²⁴ Balet, kaleganan ni, saray manlalastog a pangulo na Juda so manisia a mataktika ran naliktaran so impamikewet da ed tuan panagdayew. Kasin ontan? Inekal nen Isaias so maskara ra, inwalwal to ya andian ira na peteg a takot ed Dios tan sirin et andian na tuan kakabatan: “Abagey la so saray mangiyamot na simbawa ra a manlapu ed Jehova, tan saray gawa ra wala ra ed bilunget, et kuan da, Siopa so makanengneng ed sikami? Tan siopa so mikabat ed sikami? Sikayo pigaren yo so saray bengatla! Pablien ta so domadamili a singa say pitek; a say bengatla a ginawa to kuan to ed saman so nanggawa ed sikato, Sikato agto ak ginawa: odino say bengatla a tinibukel kuanto ed anibukel ed sikato, Sikato anggapo so pakatalos to?” (Isaias 29:15, 16; ikompara so Salmo 111:10.) Anggan panon lay abig na pangiyamot da, sikaray “lakseb tan mapatnag” ed imaton na Dios.​—Hebreos 4:13.

‘Saray Telek so Peteg a Makadngel’

25. Diad anton pantalos a makadngel iray “telek”?

²⁵ Balet, walay kililiktar parad indibidual a mangaagamil na pananisia. (Basaen so Isaias 29:17-24; ikompara so Lucas 7:22.) Saray “telek” so ‘makadngel ed saray salita na libro,’ say mensahe a manlalapud Salita na Dios. On, aliwa iyan iyabig ed pisikal ya inkatelek. Saya so espiritual ya iyaabig. Tutukoyen lamet nen Isaias so kiletneg na Mesianikon Panarian ed arapen tan say kipawil na tuan panagdayew diad dalin panamegley na uley na Mesias. Saya so asumpal ed panaon tayo, tan minilyon a masimoon a totoo so paipepetek ed si Jehova tan naaralan da so mandayew ed sikato. Agaylan makapalikliket a kasumpalan! Diad kaunoran, onsabi so agew sano balang sakey, amin a bengatlan onlilinawa, so mandayew ed si Jehova tan sagradoen da so masanton ngaran to.​—Salmo 150:6.

26. Antoran espiritual a panonot so narerengel natan na saray “telek”?

²⁶ Anto so naaral na saratan a “telek” a makakadngel natan ed Salita na Dios? Ya amin a Kristiano, nagkalalo la ed saramay ipapasen na kongregasyon bilang ehemplo, so nepeg a maalwar ya ompaliis a ‘nabalang ed mabayani ya inumen.’ (Isaias 28:7) Niarum ni, agtayo komon nakesawan ya ondengel ed saray panonot na Dios, ya ontulong ed sikatayon nawalaan na espiritual a panmoria ed amin a bengatla. Anggaman saray Kristiano so matukoy a pauuleyan ed gobierno tan maniilalo ed sikara parad pigaran serbisyo, say kililiktar so agmanlalapud sekular a mundo, noagta diad si Jehova a Dios. Ontan met, agtayo nepeg a lingwanan a say panangukom na Dios ed sayan kapolian so agnapaliisan, a singa say impangukom ed apostatan Jerusalem. Diad tulong nen Jehova et nitultuloy tayon niproklama so pasakbay to, a singa ginawa nen Isaias, anggaman walaray isusumpa.​—Isaias 28:14, 22; Mateo 24:34; Roma 13:1-4.

27. Antoran leksion so naaral na saray Kristiano ed propesiya nen Isaias?

²⁷ Saray mamatatken tan atateng so makaaral manlapud paraan na pangipapaakseb nen Jehova na disiplina, a lawas panggugunaetan ya ipawil so akapankasalanan ed pabor na Dios, ya aliwan basta dusaen ira. (Isaias 28:26-29; ikompara so Jeremias 30:11.) Tan amin tayo, pati saray kalangweran, so napapanonotan ya agaylan makana so panlingkor ed si Jehova manlapud puso, ya aliwa labat lan mankuankuanan a Kristiano pian napaliket so totoo. (Isaias 29:13) Nepeg ya ipatnag tayo, aliwan singa saray andian na pananisian manaayam ed Juda, a walaan itayo na mabunigas a takot ed si Jehova tan aralem a respeto ed sikato. (Isaias 29:16) Niarum ni, kaukolan ya ipatnag tayon sikatayoy mabulos a paipetek tan manaral manlapud si Jehova.​—Isaias 29:24.

28. Panoy panmoria na saray lingkor nen Jehova ed manangiliktar iran kiwas to?

²⁸ Agaylan makana so pakawalaan na pananisia tan talek ed si Jehova tan ed paraan to diad panggagawa ed bengabengatla! (Ikompara so Salmo 146:3.) Parad karaklan, say manamasakbay a mensahe ya ipupulong tayo so singa inuugaw. Say arapen a kaderal na sakey ya organisasyon, say Kakristianoan, a mankuan a manlilingkor ed Dios so makapakelaw tan nikaduman ideya. Balet sumpalen nen Jehova so ‘makapakelaw a kimey’ to. Nipaakar ed satan et anggapo so panduaruwaan. Kanian, diad sarayan kaunoran ya agew na sayan sistema na bengabengatla, saray lingkor na Dios so sigpot a manmamatalek ed Panarian to tan ed tinuro ton Ari, si Jesu-Kristo. Amta ra a say manangiliktar a kiwas nen Jehova​—a gawaen to tekep na ‘makapakelaw a kimey’ to​—so mangitarok na magnayon iran bendisyon ed amin a matulok a katooan.

[Tepetepet Parad Panagaral]