Propesiya nen Isaias​—Liwawa Parad Amin a Katooan I

Kapitulo Beinte-Tres

Mantultuloy a Manalagar ed si Jehova

Isaias 30:1-33

1, 2. (a) Anto so lugan na Isaias kapitulo 30? (b) Antoran tepet so konsideraen tayo natan?

 DIAD Isaias kapitulo 30, nabasa tayo iray kaaruman nin panangiyabawag na Dios sumpad marelmeng. Anggaman kuan, sayan parte na propesiya nen Isaias so mangipapabitar ed arum iran makapaligsay-puson kalidad nen Jehova. Diad tua et adeskribe iray walna nen Jehova ed ontan lan kalinew iran balikas, a singa tayo nanenengneng so makaligliwan kiwawala to, narerengel so manangiwanwan a boses to, tan nalilikna so makapaabig a panamuyok to.​—Isaias 30:20, 21, 26.

² Anggaman ontan, saray kabaleyan nen Isaias, saray apostatan manaayam ed Juda, so agpinmawil ed si Jehova. Imbes et nanmatalek ira ed too. Panoy liknaan nen Jehova ed saya? Tan panon a makatulong iyan parte na propesiya nen Isaias ed saray Kristiano natan pian mantultuloy a manalagar ed si Jehova? (Isaias 30:18) Nengnengen tayo.

Inkamakulangkulang tan Kadederal

3. Anton pakana so inwalwal nen Jehova?

³ Diad loob na pigaran panaon et maamot a plaplanoen na saray pangulo na Juda so panggaway paraan pian ag-ira nauleyan na Asirya. Balet, manbabantay si Jehova. Natan et inwalwal to so pakana ra: “Abagey la so saray matunganga ya anak, kuan nen Jehova, a mangawat na simbawa, ya agmanlapu ed siak; tan saman so manggawa na sakey a siglaot, ya agmanlapu ed espirituk, pian niarum da so kasalanan ed kasalanan. A manpikal ira ya onlasor ed Ehipto.”​—Isaias 30:1, 2a.

4. Panon ya inyan na rebelyoson totoo na Dios so Ehipto ed pasen na Dios?

⁴ Agaylay inkabigla na saramay manplaplanon papangulo a narengelan dan niwalwal so plaplanoen da! Say iyakar ed Ehipto pian mialyansa ed sikato so mas ni nen say pirmin isumpa ed Asirya; satan et panagrebelde ed si Jehova a Dios. Diad panaon nen Arin David, say nasyon so maniilalo ed si Jehova bilang sakurong tan pasasalimbengan ira ed ‘sirum na payapayak to.’ (Salmo 27:1; 36:7) Natan et “manpabiskeg ira lanlamang ed biskeg nen Faraon” tan “onapireng ira ed sirum na Ehipto.” (Isaias 30:2b) Inyan da so Ehipto ed pasen na Dios! Agaylan panagliput!​—Basaen so Isaias 30:3-5.

5, 6. (a) Akin a makapatey a lingo so impialyansa ed Ehipto? (b) Anton akadkaunan impanbaroy na totoo na Dios so mangipapabitar ed inkamakulangkulang na sayan impanbaroy ed Ehipto?

⁵ A singa to eebatan so antokaman ya ideya a say misyon ed Ehipto so singa labat ipasyar, inter nen Isaias so nagkalalo nin detalye. “Say awit na saray ayayep ed Abalaten. Diad dalin na gotgot tan ermen, a panlapuan na leon a kabatyan tan leon a kalakian, say tadyuko tan masebeg ya uleg ya ontekyab, yakar da so saray kayarian da ed abala na saray kilaw ya asno, tan saray kayamanan da ed beneg na saray kamelyo.” (Isaias 30:6a) Malinew, say pambaroy so implanon maong. Inorganisa na saray embahador so grupo na kamelyo tan asno, a kinargaan da na mabmabli iran kayarian tan amaarap ed Ehipto diad kelang a kalawakan a napno na saray managlem a leon tan madita iran uleg. Akasabin siansia iray embahador ed destinasyon da tan imparesibe da iray kayamanan ed Ehipto. Sinaliw da so salimbeng​—ontan so iisipen da. Balet, oniay inkuan nen Jehova: “Ed sakey a baley ya agda ra tumangan. Ta say Ehipto ontulong ya andi kakanaan, tan maapa: kanian sikato so inngaran ko a Rahab so onyurong a maligeligen.” (Isaias 30:6b, 7) Say “Rahab” a sakey ya “olimaw,” so mangisisimbolo ed Ehipto. (Isaias 51:9, 10) Sikatoy mangisisipan ed amin a bengatla balet anggapoy nagagawaan to. Say impialyansa na Juda ed sikato so sakey a makadesyang a lingo.

⁶ Legan a dedeskribien nen Isaias so pambabaroy na saray embahador, nayarin nanonotan na saray dumerengel to so mipadparan impanbaroy legan na panaon nen Moises. Saray inmunan atateng da so dinmalan met ed satan a “makapataktakot a kalawakan.” (Deuteronomio 8:14-16) Balet, diad panaon nen Moises, saray Israelita so nambaroy pian ontaynan ed Ehipto tan ed inkaaripen. Diad sayan pankanawnawa saray embahador so manbabaroy ed Ehipto tan, diad katuaan to et mamapaarap ira ed panagpasakop! Agaylan inkamakulangkulang! Komon ta agtayo makapanggawa na ontan ya agmakabat a desisyon tan isalat so espiritual a kawayangan tayo parad pakaaripen!​—Ikompara so Galacia 5:1.

Isusumpa ed Mensahe na Propeta

7. Akin ya impaisulat nen Jehova ed si Isaias so pasakbay To ed Juda?

⁷ Ingganggan nen Jehova si Isaias ya ikurit so mensahen kapkapangipasabi to pian “sikato komon so nipaakar ed panaon ya arapen, ed ando lan ando.” (Isaias 30:8) Say agpanangabobon nen Jehova ed piaalyansa ed too imbes a manilalo ed Sikato so nepeg a nikurit pian pakagunggonaan na saray kailalakan ed arapen​—pati say kailalakan tayo natan. (2 Pedro 3:1-4) Balet wala ni nagkalalon pankaukolan parad nisulat a rekord. “Sikato so matunganga a baley, anak a matila, anak ira ya agda labay a denglen so tunong nen Jehova.” (Isaias 30:9) Impulisay na totoo so simbawa na Dios. Kanian, kaukolan  ya isulat itan pian diad saginonor et agda niburi a naawat da so manepeg a pasakbay.​—Uliran 28:9; Isaias 8:1, 2.

8, 9. (a) Diad anton dalan ya iimpluensyaan na saray pangulo na Juda iray propeta nen Jehova? (b) Panon ya impatnag nen Isaias a sikatoy agnapagyaw?

⁸ Angiter natan si Isaias na sakey ya alimbawa na rebelyoson awawey na totoo. “Sikara a mankuan ed saray makanengneng ed arapen, Agkayo onnengneng; ta ed saray pomaparles, Agkayo manparles ed sikami ed saray maptek a bengabengatla, mansalita kayo ed sikami ed saray makaanlay a bengabengatla, mangiparles kayo na saray lingo.” (Isaias 30:10) Diad pangigaganggan ed saray matoor a propeta ya ontundan mansalita na “maptek,” odino tua, imbes et mansalita na “makaanlay” tan “lingo,” odino tila, ipapatnag na saray pangulo na Juda a labay dan nakiki iray kalayagan da. Kaliktan day narayew, aliwan nakondena. Diad padesir da, siopaman a propetan agmalabay a manpropesiya unong ed panlabayan da so nepeg ya ‘ontaynan ed dalan, onsian ed basbas.’ (Isaias 30:11a) Balanglan sikatoy mansalita na makapalikliket a denglen iran bengatla odino sigpot lan ontunda a manpulong!

⁹ Oniay ipipilit na saray onsusuppiat ed si Isaias: “Patundaen yo so kiwawala na Santo na Israel ed arapan tayo.” (Isaias 30:11b) Patundaen si Isaias a mansalita ed ngaran nen Jehova, say “Santo na Israel”! Sayan titulo a mismo so makapaingongot ed sikara lapud saray atagtagey ya estandarte nen Jehova so mangipapatnag ed mauge-uges a kipapasen da. Panoy inkiwas nen Isaias? Oniay inyabawag to: “Onia so kuan na Santo na Israel.” (Isaias 30:12a) Tampol, imbalikas nen Isaias iray mismon salita a kabkabusol a narengel na saray onsusuppiat ed sikato. Sikatoy agnapagyaw. Alay abig ya alimbawa parad sikatayo! No nipaakar ed panangiyabawag na mensahe na Dios, nepeg ya agmikokompromiso iray Kristiano. (Gawa 5:27-29) Singa si Isaias, oniay tuloytuloy dan iyaabawag: ‘Onia so inkuan nen Jehova’!

Saray Resulta na Rebelyon

10, 11. Antoray pansumpalan na impanrebeldi na Juda?

¹⁰ Impulisay na Juda so Salita na Dios, nanmatalek ed katilaan, tan nanilalo ed “panamairap [“bengatlan makapalikdo,” NW].” (Isaias 30:12b) Antoray resulta? Imbes a paulyan nen Jehova so situasyon unong a labay a nagawa na nasyon, panganggaen to so nasyon! Saya so nagawa a bigla tan sigpot, unong ya indanet nen Isaias ed sakey ya ilustrasyon. Say inkarebeldi na nasyon so singa “sakey ya ungib a maparaan a nageba, akadungaw ed atagey a bakor, a say kageba to onsabi a bigla ed kasanlilikna.” (Isaias 30:13) No panon a say ombabaleg a bikogkog so mangigeba ed atagey a padir diad kaunoran, ontan met say ikakasmak na inkarebeldi na saray kapanaonan nen Isaias so mangigeba ed nasyon.

¹¹ Panamegley na sakey nin ilustrasyon et impanengneng nen Isaias so inkasigpot na onsabin kadederal: “Sikato naani nabuyak a singa nabuyak a sakey a kagawaan na domadamili, a sikato so buyaken to ya anggapo so nilikud; dia ed ontan ya anggapo naani naromog ed saray taping to a sakey a taping a sikato so pangala na apoy ed dalikan, odino pangaor na danum ed samang.” (Isaias 30:14) Say kaderal na Juda so nasigpot ya anggapo so natilak a walaay kakanaan​—anggapo anggan taping na langa so makaakop na ngalab ed dalikan odino makapangaor na danum ed samang. Agaylan makapabaing a pansumpalan! Say onsabin kadederal na saramay onsumpa ed tuan panagdayew natan so bigla tan sigpot met.​—Hebreos 6:4-8; 2 Pedro 2:1.

Impulisay so Iyoopresi nen Jehova

12. Panon a napaliisan na totoo ed Juda so kadederal?

¹² Balet, parad saray dumerengel nen Isaias et napaliisan met so kadederal. Walay kililiktar. Oniay impaliwawa nen Isaias: “Onia so kuan na Katawan a Jehova, say Santo na Israel, Nilaban kayo naani ed pampataoli tan pampainawa; dia ed kareenan tan panmatalek so kawalaan naani na biskeg yo.” (Isaias 30:15a) Akaparaan si Jehova a mangiliktar ed totoo to​—no ipatnag da so pananisia diad “pampainawa,” odino itunda da so pananap na kililiktar panamegley na piaalyansa ed too, tan diad “kareenan,” odino ipatnag da so panagmatalek ed pakayari na Dios a mangiliktar panamegley na agda itakot. “Et,” kuan nen Isaias ed totoo “agyo nilabay.”​—Isaias 30:15b.

13. Anto so nanmatalekan na saray pangulo na Juda, tan kasin makatunongan itan a panagmatalek?

¹³ Insan, pinalaknab nen Isaias: “Noag ingen inkuan yo, Andi, ta ontaynan kami naani ya akakabayo; kanian ontaynan kayo naani: Tan, onkabayo kami naani a masiglat; kanian saray onosil ed sikayo masiglat ira naani.” (Isaias 30:16) Abaloan na saray taga-Judea a saray masiglat a kabayo, imbes a si Jehova, so makapangiliktar ed sikara. (Deuteronomio 17:16; Uliran 21:31) Balet, inmebat so propeta a say panmamatalekan da so sakey lambengat ya ilusyon lapud sikaray naabotan na saray kakabusol da. Anggan say kinarakel da so agmakatulong ed sikara. “Sanlibo so ontaynan naani ed pangayag na sakey: ed pangayag na lima ontaynan kayo naani.” (Isaias 30:17a) Nakigtot iray armada na Juda tan onkuyat ira diad eyag labat na dagdaiset a kakabusol. * Diad kaunoran, sakey labat a nakdaan so natilak, a begtebegtew, “singa sakey a parola ed toktok na palandey, tan singa sakey a laylay ed tapew na sakey a pukdol.” (Isaias 30:17b) Tua so impropesiya, sanen aderal so Jerusalem nen 607 K.K.P., sakey labat a nakdaan so akaliktar.​—Jeremias 25:8-11.

(Ituloy ed ontumbok a paway.)

[Saray paimano ed leksab]

[Tepetepet Parad Panagaral]