Pakagunggonaan Tayo Iray Ganggan na Dios

“Agayla so panangarok ed ganggan mo!”​—SALMO 119:97.

1. Anto so kasmak ya awawey nipaakar ed katutulok ed saray ganggan na Dios?

 ALIWA lan kaslakan natan so panangunor ed saray ganggan na Dios. Parad karaklan, singano anggapoy kakanaan na pampasakop ed agnanengneng ya atagtagey ya autoridad. Manbibilay itayo ed panaon na moral relativism (sisiaen nipaakar ed manguman-uman iran estandarte), ya aburagas iray pakapangibiigan ed duga tan aliwa, tan ed saray pamaakaran ya agnadetermina. (Uliran 17:15; Isaias 5:20) Bilang pangipatnag ed paraan na panag-isip a kaslakan ed dakel a sekular a muyongan, impabitar na agano nin surbi a “labay na maslak ya Amerikano a sikaray mandesidi ed no anto so duga, maong tan makabaliksan parad inkasikara.” Lablabayen da so “agmapeget a Dios. Anggapo iray mapeget a totontonen. Anggapo so mapeget iran superyor, moral tan arum nira.” Inkuan na sakey a manag-analisa na sosyedad a natan et “saray indibidual so nailaloan a mandetermina ed inkasikaran dili ed no anto so kabaliksan na pambilay a maptek tan walay kasimpitan.” Intuloy to: “Antokaman a nengneng na atagtagey a pakauley so nepeg a mangiyadapta ed saray ganggan to ed saray pankaukolan na peteg a totoo.”

2. Panon a say primeron impakasalambit ed ganggan diad Biblia so maapit a misiglaotan ed panamendisyon tan panangabobon na Dios?

² Lapud dakerakel so manusuppiat ed kablian na saray ganggan nen Jehova, nakaukolan tayon pabiskegen so kombiksion tayo a saray estandarte na Dios et pakagunggonaan tayo. Makapainteres so pangonsidera ed salaysay a say ganggan so primeron asalambit ed Biblia. Diad Genesis 26:5, oniay nabasa tayon sinalita na Dios: “Si Abraham . . . inunor to so bilin ko, ganggan ko tan panangitontonan ko, tan saray panamatunongan ko.” Nibalikas iratan a salita pigaran siglo antis ya inter nen Jehova so detalyadon kodigo na ganggan ed saray kapolian nen Abraham. Panon a tinumangan na Dios so katutulok nen Abraham, pati say katutulok ed saray Ganggan To? Oniay insipan ed sikato nen Jehova a Dios: “Dia ed ilalak mo so pakapikapalaranan na saray amin a nasyon dia.” (Genesis 22:18) Kanian, say katutulok ed saray ganggan na Dios so maapit a misiglaotan ed panamendisyon tan panangabobon na Dios.

3. (a) Anton liknaan nipaakar ed ganggan nen Jehova so imbalikas na sakey a salmista? (b) Antoran tepet so makanepegan na imano tayo?

³ Sakey ed saray salmista​—a maseguron sakey a prinsipe ed Juda tan arapen ya ari​—so angibalikas na liknaan ya aggendat a misiglaotan ed ganggan. Inkelyaw to ed Dios: “Agayla so panangarok ed ganggan mo!” (Salmo 119:97) Aliwa iyan emosyonal labat a kelyaw. Balikas iya na panangaro ed linawa na Dios unong a nidatak ed ganggan to. Ontan met so liknaan na ayadyarin Anak na Dios, si Jesu-Kristo. Mapropetikon adeskribe si Jesus a mangibabagan: “Makaliket ak a mangunor na linawam, O Dios ko; on, say ganggan mo wala ed dalem [ko].” (Salmo  40:8; Hebreos 10:9) Komusta itayo? Kasin panliliketan tayo so panggagawa na linaway Dios? Kasin kombinsido itayo ed inkamausar tan gunggona na saray ganggan nen Jehova? Anto so betang na katutulok ed saray ganggan na Dios diad panagdayew tayo, diad inagew-agew a bilay tayo, diad panagdesisyon tayo, tan ed saray siglaotan tayo ed arum? Pian naaro so madibinon ganggan, maabig a talosan tayo no akin a say Dios so walaan na kanepegan a manggawa tan mangipaakseb na saray ganggan.

Jehova​—Say Makanepegan a Manangiter na Ganggan

4. Akin a si Jehova so sankatageyan tan makanepegan a Manangiter na Ganggan?

⁴ Bilang Manamalsa, si Jehova so sankatageyan tan makanepegan a Manangiter na Ganggan diad uniberso. (Apocalipsis 4:11) Oniay imbalikas nen propeta Isaias: “Si Jehova sikato so mangiiter na tunong ed sikatayo.” (Isaias 33:22) Inletneg to iray pisikal a ganggan a manguuley ed mabilay tan andiay-bilay iran pinalsa. (Job 38:4-38; 39:1-12; Salmo 104:5-19) Bilang pinalsa na Dios, say too so manpasakop ed saray pisikal a ganggan nen Jehova. Tan anggaman say too so walaan na bulos a panagdesisyon, a makayarin mankatunongan ed inkasikaton dili, sikato so maliket labat no sikatoy manpasakop ed saray moral tan espiritual a ganggan na Dios.​—Roma 12:1; 1 Corinto 2:14-16.

5. Panon a napaneknekan a tua so prinsipyo ed Galacia 6:7 nipaakar ed saray ganggan na Dios?

⁵ Unong a kabat tayo la, saray pisikal a ganggan nen Jehova so agnasumlang. (Jeremias 33:20, 21) No misumlangan la so sakey a too ed pigaran pisikal a ganggan, singa say ley na grabidad, nasagmak to iray pansumpalan. Ontan met, saray moral a ganggan na Dios so agnayarin palakbatan odino sumlangen ya anggapoy pakadusa. Saratan so iyiimpuersa a singa kasegurado na saray natural a ganggan to, anggaman say resulta et agnagawan tampol. “Say Dios agnayarin naludlurey: ta say antokaman ya itanem na too satan met so anien to.”​—Galacia 6:7; 1 Timoteo 5:24.

Say Laknab na Ganggan nen Jehova

6. Panon kalaknab iray ganggan na Dios?

⁶ Say matalonggaring a balikas na madibinon ganggan et say Ganggan nen Moises. (Roma 7:12) Sinmabi panaon, sinalatan nen Jehova a Dios so Mosaikon Ganggan na “ganggan nen Kristo.” * (Galacia 6:2; 1 Corinto 9:21) Bilang Kristianos a walad silong na “naspot a ganggan a nipaakar ed kawayangan,” natalosan tayo ya ag-igegeter na Dios iray ganggan to ed pigaran aspekto na bilay tayo, a singa saray doktrina nipaakar ed sisisiaen odino aagamilen da iran ritual. Saray estandarte to so mangokobre ed amin ya aspekto na bilay, a kabiangan so nipaakar ed saray pamaakaran na pamilya, pidedeneng ed negosyo, kondukta ed saramay kasunian ed sekso, awawey ed kaparan Kristiano, tan pibibiang ed tuan panagdayew.​—Santiago 1:25, 27.

7. Mangiter na saray alimbawa na importantin ganggan na Dios.

⁷ Alimbawa, ibabaga na Biblia: “Anggan saray managlawan, anggan saray manangigalang ed talintao, anggan saray manasingger ed agda asawa, anggan saray binabai, anggan saray milawanan ed kapara ra a laki, anggan saray matakew, anggan saray maagum, anggan saray managbuanges anggan saray managpabanday, anggan saray managpatubo, agda natawir so panariay Dios.” (1 Corinto 6:9, 10) On, say pikakalugoran tan pilalawanan et aliwa labat a “relasyon na manaaroan.” Saray agamil a homoseksual et aliwan “estilo na kabibilay.” Saraya so sumlang ed ganggan nen Jehova. Tan ontan met ed panagtakew, panagtila, tan panagpauges. (Salmo 101:5; Colosas 3:9; 1 Pedro 4:15) Kinondena nen Santiago so panaglastog, bangta binilin itayo nen Pablo a paliisan so maatiw a panagsalita tan mabanday a panaglurey. (Efeso 5:4; Santiago 4:16) Parad saray Kristiano, amin na sarayan totontonen ed kondukta so kabiangan na naspot a ganggan na Dios.​—Salmo 19:7.

8. (a) Anto so nengneng na ganggan nen Jehova? (b) Anto so manunan kabaliksan na Hebreon salita parad “ganggan”?

⁸ Saratan a manunan totontonen ed Salita nen Jehova so mangipaparungtal a say ganggan to so aliwa lambengat a datak na anggapoy pililikna, mapeget iran ganggan. Tibukelen na satan so basiyan parad asimbang, produktibon bilay, a walaan na amin ya aspekto na kondukta a pankaabigan.  Say ganggan na Dios so makapabiskeg, walaan na saray etika, tan makaibangat. (Salmo 119:72) Say salitan “ganggan” unong ya impangusar na salmista so nipatalos ed Hebreon salita a toh·rahʹ. Ibabaga na sakey ya iskolar na Biblia: “Sayan salita so pinorma manlapud verb a mankabaliksan na pangidirehi, pangigiya, ipaarap, ikena. Say . . . kabaliksan to sirin et magmaliw a totontonen ed kondukta.” Parad salmista say ganggan et sakey a langkap na Dios. Agta ontan met so panamabli tayo ed satan, ya abuloyan itan a mangimpluensya ed bilay tayo?

9, 10. (a) Akin a nakaukolan tayo so napanmatalkan a panangidirehi? (b) Panon tayo lambengat a nawalaan na maliket tan matalonan panagbilay?

⁹ Amin a pinalsa so mankaukolan na napanmatalkan a panangidirehi tan napanpiyaan a giya. Tua itan ed biang nen Jesus tan arum niran anghel, a mas atagtagey nen say too. (Salmo 8:5; Juan 5:30; 6:38; Hebreos 2:7; Apocalipsis 22:8, 9) No sarayan naspot ya anghel so nagunggonaan ed panangigiya na Dios, agta nagkalalo la ed saray ag-ayadyarin totoo! Say awaran na too tan say personal ya eksperiensya tayo so mamapaneknek ed katuaan na naimano nen propeta Jeremias: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.”​—Jeremias 10:23.

¹⁰ No manpipilalek tayon nawalaan na maliket tan maaligwas a bilay, nepeg a manilalo itayo ed Dios parad panangigiya. Binidbir nen Arin Solomon so kapeligroan na pambilay unong ed personal iran estandarte, a biig ed panangigiya na Dios: “Wala so dalan a singa maptek ed too; balet say sampot to saray dalan na patey.”​—Uliran 14:12.

Saray Rason ed Pamabli ed Ganggan nen Jehova

11. Akin a nepeg a pampilalekan tayon talosan so ganggan na Dios?

¹¹ Maabig a bayuboan tayo so pirmin pampilalek a natalosan so ganggan nen Jehova. Imbalikas na salmista itan a pampilalek sanen inkuanto: “Lukasan mo so saray matak, pian nanengneng ko so pankelkelawan a pamaakaran ya ompaway ira ed ganggan mo.” (Salmo 119:18) No lalo tayon nakabat so Dios tan saray dalan to, lalon onaralem so apresasyon tayo ed katuaan na saray salita nen Isaias: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon. O no komon ta dinengel mo so saray bilin ko!” (Isaias 48:17, 18) Masimoon a pilalek nen Jehova ya ompaliis so totoo to ed desyang tan manggayaga ed bilay diad panimanon maong ed saray ganggan to. Usisaen tayo so pigaran manunan rason no akin a nepeg tayon pablien so ganggan na Dios.

12. Panon a say pikakabat nen Jehova ed sikatayo so manggawa ed sikaton sankaabigan a Manangiter na Ganggan?

¹² Say madibinon ganggan so manlalapu ed samay Sakey a mikabat a maong ed sikatayo. Lapud si Jehova so Manamalsa tayo, makatunongan labat  a kabat ton maong so totoo. (Salmo 139:1, 2; Gawa 17:24-28) Saray maapit a kakaaro, kakanayon, anggan saray atateng so agmikabat a maong ed sikatayo a singa ed pikabat a maong nen Jehova ed sikatayo. Agayla, mas nagkalalon kabat itayo na Dios nen say inkasikatayon dili! Say Nanggawa ed sikatayo so walaan na agnaparaan a pakarandan ed espiritual, emosyonal, mental, tan pisikal iran pankaukolan tayo. Legan ton ipapaarap so imano to ed sikatayo, ipapatnag to so maapit a pakatalos to ed inkagawa, pilpilalek, tan pitamitam tayo. Natatalosan nen Jehova iray limitasyon tayo, balet amta to met so nagawaan tayon maong. Inkuan na salmista: “Sikato kabat to so inkagawa tayo; sikato nanodnonotan to a sapok itayo.” (Salmo 103:14) Kanian, nawalaan tayo na liknaan ya espiritual a kaligenan no panggunaetan tayo so mankurang unong ed ganggan to, a mabulos a manpasakop ed madibinon panangigiya to.​—Uliran 3:19-26.

13. Akin a makapanmatalek itayo a peteg a mapaga si Jehova ed pankaabigan tayo?

¹³ Say madibinon ganggan so manlalapu ed samay Sakey a mangaaro ed sikatayo. Mapagan tuloy so Dios ed magnayon a pankaabigan tayo. Agta baleg so insakripisyo to sanen inter to so Anak to bilang “panondon ed amayamay”? (Mateo 20:28) Agta insipan nen Jehova ya “agto kayo paulyan a natukso na onlabas ed nayarian yo”? (1 Corinto 10:13) Agta ipapaseguro ed sikatayo na Biblia ya ‘aasikasoen to itayo’? (1 Pedro 5:7) Anggapo la so mas maaron manpapaga ed panangitarya na makagunggona iran panangigiya ed totoon pinalsa nen say si Jehova. Kabat to no anto so maong parad sikatayo tan no anto so mangitarok na liket odino ermen. Anggaman sikatayoy ag-ayadyari tan nalilingo, no gegemtanen tayo so inkatunong, ipatnag to so panangaro ed sikatayo diad paraan a manresulta ed bilay tan panamendisyon.​—Ezequiel 33:11.

14. Diad anton importantin dalan a midumaan so ganggan na Dios ed saray ideya na totoo?

¹⁴ Say ganggan na Dios so seguradon agnauman. Diad sarayan magulon panaon a pambibilayan tayo, si Jehova so malet tan mapekder, a mansiasiansia ed ando lan ando. (Salmo 90:2) Oniay inkuanto ed inkasikaton dili: “Siak si Jehova, agak manguman.” (Malaquias 3:6) Saray estandarte na Dios, unong a nikurit ed Biblia, so sigpot a napanmatalkan​—aliwan singa say naynay a manguuman iran ideya na too. (Santiago 1:17) Alimbawa, diad loob na dakel a taon et inyalibansa na saray sikolohista so makonsentin panagpabaleg ed anak, balet diad saginonor et anguman so kanonotan na arum tan inaksobi ra a lingo so simbawa ra. Saray minumundon estandarte tan panangigiya ed sayan pamaakaran so kibangkibang a singa ipapalir na dagem. Balet mapekder so Salita nen Jehova. Diad loob na dakel a siglo et angitarya so Biblia na simbawa ed no panon so pamabaleg ed ananak tekep na aro. Oniay insulat nen apostol Pablo: “Sikayo ya atateng, agyo ilagyat a pasanoken so saray anak yo: noag ingen bangatan yo’ra ed kadudusa tan panamilin na Katawan.” (Efeso 6:4) Agaylan makapaseguron naamtaan a makapanmatalek tayo ed saray estandarte nen Jehova; ag-iratan manguman!

Saray Bendisyon ed Saramay Manguunor ed Ganggan na Dios

15, 16. (a) Anto so resulta no iyaplika tayo iray estandarte nen Jehova? (b) Panon a napaneknekan a makagunggonan giya so ganggan na Dios ed panamaley?

¹⁵ Panamegley na propeta ton Isaias, inkuan na Dios: ‘Say salitak ya ompaway ed sangik . . . onaligwas naani.’ (Isaias 55:11) Seguradon onaligwas itayo, makagawa na maabig, tan nagamoran so liket, sano masimoon tayon pambanikelan a tumboken iray estandarte a naromog ed Salita to.

¹⁶ Konsideraen iray ganggan na Dios ed makagunggonan giya ed matalonan panangasawa. “Say panangasawa sikato komon so narayew ed saray ganagana, tan say dukolan andi komon so tilol to: ta saray managlawan tan saray mankakalugoran ukomen ira naani na Dios.” (Hebreos 13:4) Saray sanasawa so nepeg a manrespetoan tan manaroan ed balang sakey: “Dia ed ganagana gawaen yo met,  balang sakey aroen to so dilin asawa to a bii a singa dilin laman to; et imanoen to komon a say asawan bii nepeg ton takotan so asawa to.” (Efeso 5:33) Say klase na aro a kaukolan so adeskribe ed 1 Corinto 13:4-8: “Say aro manangitepel, tan mauyamo; say aro anggapoy sible’to; say aro agto ipasirayew so inkasikato, aliwan mapangta. Aliwan mabanday so kagagawa to, agto anapen so kien to, agmapasnok, agmanisip na mauges; Agto panliketan so ag-onkatunongan, balet manliket ed katuaan. Amin itepel to, amin sisiaen to, amin ilaloan to, amin sungdoan to. Say aro agbalot mangangga.” Say panamaley a nabidbiran ed onian klase na aro so ag-onsaew.

17. Antoray nagunggona ed pangiyaplika ed saray estandarte nen Jehova nipaakar ed panangusar na de-alkohol ya iinumen?

¹⁷ Say sananey nin ebidensya a makagunggona iray estandarte nen Jehova, et say katuaan a kokondenaen to so panagbuanges. Agto ni ingen aabobonan so ‘mainum na dakel ya alak.’ (1 Timoteo 3:3, 8; Roma 13:13) Dakel a mangibabaliwala ed saray estandarte na Dios ed sayan pamaakaran so manasagmak na sakisakit a makasengeg odino pinaloor na sobran panag-inum. Lapud pangibabaliwala ed simbawa na Biblia nipaakar ed kabkaabigan, arum so nipasal la ed pirmin panag-inum “pian makarelaks ira.” Saray problema a resulta na alabas a panag-inum so dakel, pati lay kaandi na respeto, magulon relasyon ed pamilya odino abuyak a pamilya, adarak a sueldo, tan inkaandi na trabaho. (Uliran 23:19-21, 29-35) Agta saray estandarte nen Jehova nipaakar ed panangusar na de-alkohol ya iinumen et sakey a salimbeng?

18. Kasin praktikal iray ganggan na Dios ed pinansyal iran pamaakaran? Ipaliwawa.

¹⁸ Saray estandarte na Dios so apaneknekan met a praktikal ed pinansyal iran pamaakaran. Ipapaseseg  na Biblia ed saray Kristiano a magmaliw a matua tan makuli. (Lucas 16:10; Efeso 4:28; Colosas 3:23) Lapud tutumboken da iyan simbawa, dakel a Kristiano so akaawat na promosyon odino nansiansia ira ed trabaho ra bangta arum so nakal ed trabaho. Wala met so gunggona ed pinansyal sano paliisan na sakey a too so agmakasulatan ya ug-ugali tan adiksion a singa say panagsugal, panagsigarilyo, tan lingon panag-abuso ed druga. Anggapoy duaruwa a wala niray alimbawan nanonotan yo nipaakar ed inkapraktikal ed ekonomya na saray estandarte na Dios.

19, 20. Akin a makabat so pangawat tan pangiyaplika ed saray ganggan na Dios?

¹⁹ Mainomay parad ag-ayadyarin totoo ya onsuawi manlapud saray ganggan tan estandarte na Dios. Nonoten pa so nipaakar ed saray Israelita diad Palandey Sinai. Inkuan na Dios ed sikara: “No tuloken yo so boses ko a tuatua, tan em-eman yo so sipanan ko, sikayo ed satan so pabpablien ko a pinagka-kayamanan ko a manuna nen saray amin a totoo.” Inmebat ira: “Amin a sinalita nen Jehova gawaen mi.” Ingen, agaylan sumlang so kurang a pinili ran tumboken! (Exodo 19:5, 8; Salmo 106:12-43) Diad pidumaan, awaten tan iyaplika tayo iray estandarte na Dios.

²⁰ Makabat tan makapaliket no mansiansia itayon maapit ed agnaparaan iran ganggan ya intarya nen Jehova pian nigiya so kabibilay tayo. (Salmo 19:7-11) Ta pian nagawaan iya a matalona, nakaukolan tayo met a talosan tan pablien so kablian na saray maridios a prinsipyo. Saya so tema na ontumbok ya artikulo.

[Paimano ed Leksab]

Natatandaan Mo ni Kasi?

• Akin a makapanmatalek itayo a pakagunggonaan tayo iray ganggan na Dios?

• Diad antoran rason a nepeg tayon pablien so ganggan nen Jehova?

• Diad antoran dalan a makagunggona iray ganggan na Dios?

[Tepetepet Parad Panagaral]

[Litrato ed pahina 13]

Si Abraham so mayamyaman ya abendisyonan lapud katutulok ed ganggan nen Jehova

[Saray litrato ed pahina 15]

Saray kapagaan ed okupadon bilay natan so mangisusuawi ed arum manlapud ganggan na Dios

[Litrato ed pahina 17]

Singa say ”lighthouse” ya akaletneg ed malet a pundasyon, say ganggan na Dios et mapekder tan agnauman