Kagula nen Jehova so Kurang na Panagliput

‘Agkayo mangagamil na panagliput ed balang too.’​—MALAQUIAS 2:10.

1. Anto so kakaukolanen na Dios ed sikatayo no labay tayon nagamoran so andi-anggaan a bilay?

 LABAY yo so manbilay na andi-anggaan? No manisia kayo ed satan ya ilalo ya insipan ed Biblia, nayarin ikuan yo, ‘Siempre.’ Balet no labay yon ipalabo na Dios ed sikayo so agmanganggan bilay ed balon mundo to, nakaukolan a kapeten yo iray kakaukolanen to. (Eclesiastes 12:13; Juan 17:3) Kasin agmakatunongan a kaukolanen ed saray ag-ayadyarin totoo so panggawa ed satan? Andi, lapud oniay makapaseseg ya inkuan nen Jehova: “Say kaabigan so pilalek ko, ya aliwa a say bagat; tan say pikakabat ed Dios a magmaong nen saray bagat a napoolan.” (Oseas 6:6) Kanian anggan saray makabos a totoo so nayarin makakapet ed saray kakaukolanen na Dios.

2. Panon so sililiput ya impideneng na dakel ya Israelita ed si Jehova?

² Balet, aliwan amin et malabay a manggawa na linawa nen Jehova. Imparungtal nen Oseas ya anggan diad saray Israelita et dakel so agmalabay a manggawa ed satan. Bilang nasyon, sikara so akiabobon ed sakey a sipanan, sakey a paknaan, pian unoren iray ganggan na Dios. (Exodo 24:1-8) Ingen, agnambayag et sikara so ‘angitalirak ed sipanan’ diad impanumlang da ed saray ganggan to. Kanian, inkuan nen Jehova a saratan ya Israelita so ‘sililiput ya akideneng’ ed sikato. (Oseas 6:7) Tan ontan so ginawa na dakel a totoo manlapula’d nensaman. Balet kagula nen Jehova so kurang na panagliput, balanglan sumpad sikato odino ed saraman so mangaaro tan manlilingkor ed sikato.

3. Anton panusisa so gawaen ed sayan aaralen?

³ Aliwan si Oseas labat so propetan angipabitar ed satan a panmoria na Dios nipaakar ed panagliput, sakey a panmoria a nepeg tayon awaten no pirawat tayon panggayagaan so andukey tan maliket a bilay. Diad inmunan artikulo, ginapoan tayon inusisa so maslak ed mapropetikon mensahe nen Malaquias, a ginmapo ed primeron kapitulo na sayan libro. Natan et ombaliksat itayo ed komaduan kapitulo na satan a libro tan imanoen tayo no panon a nagkalalon nipapaimano so panmoria na Dios ed panagliput. Anggaman sisingbaten nen Malaquias so kipapasen a niwala ed limog na totoo na Dios pigaran dekada kayari na impawil da manlapud inkakautibo ed Babilonia, satan a komaduan kapitulo so walaay peteg a kabaliksan ed sikatayo natan.

Natetel Iray Saserdote

4. Anto so impasakbay nen Jehova ed saray saserdote?

⁴ Onggapo so kapitulo 2 diad impangondena nen Jehova ed saray saserdote lapud kinmasipa ira ed saray matunong a dalan to. No agda tuloken so simbawa to tan agda ipetek iray dalan da, seguradon sagmaken da so makapasinagem iran pansumpalan. Imanoen so unonan duaran bersikulo: “O sikayo saserdote, saya a bilin sikato so nipaakar ed sikayo. No agyo denglen, tan sikato so agyo ‘yan ed puso, so pangiter na gayaga ed ngaran ko, kuan nen Jehova na saray ehersito, sirin ibakik naani so ayew ed sikayo, et ayewen ko naani so pamendisyon yo.” No imbangat na saray saserdote ed totoo iray ganggan na Dios tan sinumpal da iratan, abendisyonan ira komon. Balet lapud imbaliwala ra so linawa na Dios, sakey ya ayew so onsabi ed sikara. Anggan saray bendisyon ya inyabawag na saray saserdote so magmaliw ya ayew.

5, 6. (a) Akin a nagkalalon natetel iray saserdote? (b) Panon ya imbalikas nen Jehova so panggula to ed saray saserdote?

⁵ Akin a nagkalalon natetel iray saserdote? Iter na bersikulo 7 so malinew a pakapatnagan: “Saray bibil na saray saserdote unoren da komon so pikakabat, tan anapen da komon so tunong ed sangi  to; ta sikato so ibabaki nen Jehova na saray ehersito.” Masulok a sanlibon taon ed akadkauna, saray ganggan na Dios a niiter ed Israel panamegley nen Moises so anaglawi a saray saserdote so walaan na obligasyon ya ‘ibangat ed saray anak na Israel so atiptiponan na saray uliranen [susumpalen] ya imbaga nen Jehova.’ (Levitico 10:11) Makapaermen ta diad saginonor, say managsulat na 2 Awaran 15:3 so angireport: “Andukey a panaon a say Israel wala ya andian na tua a Dios, tan andian na manbabangat a saserdote, tan andian na tunong.”

⁶ Diad panaon nen Malaquias, diad komaliman siglo K.K.P., mipara so kipapasen ed inkasaserdote. Agda ibabangat ed totoo so Ganggan na Dios. Kanian manepeg a mikuentaan iratan a saserdote. Imanoen iray mapuersan salita nen Jehova sumpad sikara. Oniay inyabawag na Malaquias 2:3: “Iwalsik ko naani so dutak ed saray lupa yo, salanti say dutak lanlamang na saray liket yo.” Agaylan panamaat! Say dutak na ibabagat iran ayep so ibantak komon ed paway na kampo tan poolan. (Levitico 16:27) Balet sanen imbaga ed sikara nen Jehova a say dutak so niwalsik ed kalupaan da, malinew itan a mangipapatnag a kagula tan impulisay to iray bagat da tan saray mangiyaapay ed saratan.

7. Akin a sinmanok si Jehova ed saray managbangat na Ganggan?

⁷ Pigaran siglo sakbay na panaon nen Malaquias, pinabtangan la nen Jehova iray Levita a mangasikaso ed tabernakulo tan diad saginonor et say templo tan say sagradon panaglingkor ditan. Sikara so manbangat diad nasyon na Israel. Say panumpal da ed satan a betang da et mankabaliksay bilay tan deen parad sikara tan say nasyon. (Numeros 3:5-8) Balet naandi so takot ed Dios a walad saray Levita diad gapo. Kanian oniay inkuan nen Jehova ed sikara: “Sinmipa kayo ed dalan; sikayo angiter kayo na sengegan a nagapol so dakel dia ed tunong; sikayo dineral yo so sipan nen Levi . . . Agyo [inunor so] saray dalan ko.” (Malaquias 2:8, 9) Diad insaew dan mangibangat ed katuaan tan diad makapuy ya alimbawa ra, pinalikdo na saray saserdote so dakel ya Israelitas, kanian makatunongan labat ya onsanok ed sikara si Jehova.

Pangunor ed Saray Estandarte na Dios

8. Kasin alablabas so panilalo ed saray totoo a nepeg dan sumpalen iray estandarte na Dios? Ipaliwawa.

⁸ Agtayo komon iisipen a saratan a Levita so makanepegan na simpatya tan nepeg a naperdona lapud totoo lambengat ira tan agnailaloan a makapangunor ed saray estandarte na Dios. Say katuaan to et nayarian na totoo ya unoren iray ganggan na Dios, lapud agkakaukolanen nen Jehova ed sikara so agda nagawaan. Maseguron walaray indibidual a saserdote nensaman ya anumpal ed saray estandarte na Dios, tan agpanduaruwaan so sakey ya anumpal diad saginonor​—si Jesus, say baleg ya “atagey a saserdote.” (Hebreos 3:1) Onia sirin so peteg a nibaga nipaakar ed sikato: “Say tunong na katuaan wala nensaman ed sangi to, et say ag-inkatunong agnaromog nensaman ed saray bibil to: sikato akiakar ed siak ed deen tan kaptekan, tan pinapawil to so dakel a manlapu ed inkauges.”​— Malaquias 2:6.

9. Siopa so matoor a mangiyuutob na katuaan ed panaon tayo?

⁹ Mipadpara, diad masulok a sakey siglo la natan, saray alanaan ya agagi nen Kristo, saramay walaan na mangatatawen ya ilalo, so nanlingkor bilang “masantos ya inkasaserdote a mangisaklang na saray maespiritun bagat, makapaliket ed Dios.” (1 Pedro 2:5) Idadaulo ra so panangiyutob na saray katuaan na Biblia ed arum. Legan yon naaaralan so katuaan na Biblia ya ibabangat da, agta naamtaan yo manlapud eksperiensya a say tunong na katuaan so wala ed sangi ra? Atulongan da so dakel a mangitalirak ed relihyoson pakakaluksoan, kanian wala la natan so minilyon ed interon mundo ya akaaral ed saray katuaan na Biblia tan walaan na ilalon andi-anggaan a bilay. Bilang resulta, saraya so walaan na pribilehyo ya ibangat so tunong na katuaan ed minilyon ni.​—Juan 10:16; Apocalipsis 7:9.

Rason Pian Manalwar

10. Akin a walaan itayo na rason a manalwar?

¹⁰ Balet, walaan itayo na rason pian manalwar. Nayarin nasaew tayo iray leksion a nipalinew diad Malaquias 2:1-9. Kasin manaalwar itayon mismo pian anggapo so ag-inkatunong a naromog ed bibil tayo? Alimbawa, peteg kasin napanmatalkan na saray kapamilya tayo so walan ibabaga tayo? Kasin napanmatalkan met itan na saray espiritual ya agagi tayo ed loob na kongregasyon? Mainomay so pakabayubo ed ugali a mangipasabi ed saray imbaga na sakey ya ompatnag a susto ingen ta makapalikdo. Odino ompan nasulokan na sakey odino isekreto to iray detalye nipaakar ed negosyo. Kasin ag-itan naiimano nen Jehova? Tan no tutumboken tayo iratan ya agagamil, kasin awaten to iray bagat na panangidayew na saray bibil tayo?

11. Siopa so nagkalalon nakaukolan a manalwar?

¹¹ Parad saramay walaan na pribilehyo a mangibangat ed Salitay Dios diad saray kongregasyon natan, say Malaquias 2:7 so nepeg ya onkanan pasakbay. Nikuan ditan a saray bibil da so ‘mangunor komon ed pikakabat, tan anapen komon na totoo so tunong’ manlapud saray bibil da. Ambelat so responsabilidad na saratan a managbangat, lapud ipapabitar na Santiago 3:1 ya ‘akoen da naani so ambelbelat a dusa.’ Anggaman nakaukolan a manbangat ira tekep na ligsa tan entusiasmo, nepeg a say bangat da so mabiskeg a nibase ed nisulat a Salita na Dios tan say ibabangat da so manlalapud organisasyon nen Jehova. Diad ontan a dalan et sikara so ‘sigpot a kualipikado a mangibangat ed arum.’ Kanian, sikara so abilin: “Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen mo ed matunong so salita a tua.”​—2 Timoteo 2:2, 15.

12. Saramay manbabangat so nakaukolan a mangagamil na anton panag-alwar?

¹² No agtayo manalwar, ompano natukso itayon mangisalet na saray personal a panlabayan odino opinyon tayo diad ibabangat tayo. Satan so nagkalalon mapeligro parad sakey a too a matalek nipaakar ed saray mismon konklusyon to anggaman misumlangan iratan ed ibabangat na organisasyon nen Jehova. Balet ipapabitar na Malaquias kapitulo 2 a nepeg tayon ilaloan iray manbabangat ed kongregasyon ya ontumbok ed pikakabat a nanlapud Dios tan aliwan diad personal iran ideya ra, a nayarin pakagapolan na karnero. Inkuan nen Jesus: “Siopaman a mangigapol na sakey ed sarayan ugugaw a manisia ed siak, magmaong ni ed sikato ya isabit komon so sakey a baleg a bato na gilingan ed beklew to, tan ipalner komon ed kaaralman na dayat.”​—Mateo 18:6.

Pangasawa o Piasawa ed Agmananisia

13, 14. Anto so sakey ed saray sililiput a kurang ya impabitar nen Malaquias?

¹³ Manlapud Mal 2 bersikulo 10 a manpatuloy, lalon direktaan so pangipapabitar na Malaquias kapitulo 2 ed panagliput. Inyapasakey nen Malaquias so duaran mansiglaotan a kurang a diad saratan et aminpiga ton inusar so salitan ‘sililiput.’ Unona et imanoen tayo a ginapoan nen Malaquias so panisimbawa to panamegley na sarayan tepet: “Agtayo ta walaan na saksakey ya ama? Agta saksakey a Dios so amalsa ed sikatayo? Akin et mangagamil kayo a liputan balang too sumpad agi to, a muraen yo so sipan na saray atateng tayo?” Insan inyarum na Mal 2 bersikulo 11 a say sililiput a kurang na Israel so misimbangan ed panagmudmora ed “kasantosan nen Jehova.” Anto so seryoson tuloy a bengatla a ginawa ra? Tinukoy na satan a bersikulo so sakey ed saray makapuy ya agamil: Sikara so “angasawa na anak a bii na sananey a dios.”

¹⁴ Diad arum a panangibaga, walaray Israelita, a kabiangan na nasyon a dedikado la ed si Jehova, ya angasawa na saramay agmandadayew ed sikato. Tulongan itayo na konteksto a natalosan no akin a seryoson tuloy itan. Ibabaga na Mal 2 bersikulo 10 a walaan ira na saksakey ya ama. Aliwa itan a si Jacob (ya inngaran ya Israel) odino si Abraham odino si Adan ni ingen. Ipapabitar na Malaquias 1:6 a si Jehova imay “saksakey ya ama.” Say nasyon na Israel so walaay pisisiglaotan ed sikato, a kabiangan ira ed impisipanan na saray inmunan atateng da. Sakey ed saray ganggan ed satan a sipanan et say: “Agka miaasawa ed sikara naani; agmo iiter naani bii ya anak mo ed laki ya anak to, odino agka naani mangaala na bii ya anak to a yasawa ed laki ya anak mo.”​—Deuteronomio 7:3.

15. (a) Panon a nayarin ikatunongan na sakey so pangasawa o piasawa ed agmananisia? (b) Panon ya imbalikas nen Jehova so inkasikato diad pamaakaran na panangasawa?

¹⁵ Arum natan so nayarin mangikatunongan: ‘Say toon nagugustoan ko et talagan sankamaongan. Nasabi panaon et sikato so nayarin mangawat ed tuan panagdayew.’ Say ontan a panag-isip so mamepekder ed pinuyanan a pasakbay: “Say puso manamalingo alabas nen saray amin a bengatla, tan sikato so mapalalo a mauges.“ (Jeremias 17:9) Say panmoria na Dios ed pangasawa o piasawa ed agmananisia so nibalikas ed Malaquias 2:12: “Si Jehova pegpegen to naani so too a manggawa na saya.” Kanian, napapaseseg iray Kristiano a mangasawa o miasawa ‘unong ed Katawan lambengat.’ (1 Corinto 7:39) Diad silong na Kristianon uksoyan, say mananisia so ‘agnapegpeg’ lapud angasawa o akiasawa na sakey ya agmananisia. Balet, no mansiansia so agmananisia ed ontan a kipapasen to, anto so nagawa ed sikato sano onsabin bigla so anggaan na sayan sistema?​—Salmo 37:37, 38.

Panagmaltrato ed Asawa

16, 17. Anton kurang na panagliput so ginawa na arum?

¹⁶ Tinmumbok a kinonsidera nen Malaquias so komaduan panagliput: say panagmaltrato ed asawa, nagkalalo diad agmakatunongan a panangidiborsyo. Oniay ibabaga na bersikulo 14 ed Mal kapitulo 2: “Si Jehova sikato nensaman so tasi ed sika tan ed asawa na inkaugaw mo, a sumpa ed sikato nanagamilan a sililiput, anggan sikato so ibam, tan asawa na sipan mo.” Diad sililiput ya impideneng da ed saray kaasawaan dan bibii, pinagmaliw na saray Judion kaasawaan a lalaki so altar nen Jehova ya ‘inagusan na saray lua.’ (Malaquias 2:13) Saratan a lalaki so mangididiborsyo makasengeg ed agmakatunongan iran rason, a sililingon tataynan daray kaasawaan da, pian makapangasawa ira na mas ugaw odino paganon bibii. Tan inabuloyan itan na saray mauges a saserdote! Ingen, oniay inyabawag na Malaquias 2:16: “Siak gulaen ko so pansian, kuan nen Jehova, a Dios na Israel.” Diad saginonor, impabitar nen Jesus a say imoralidad et alenleneg a basiyan na diborsyo  pian makapangasawa o makapiasawa lamet so inosentin kapareha.​—Mateo 19:9.

¹⁷ Motekteken pa so arum a salita nen Malaquias, tan imanoen no panon irayan makapasagyat ed kapusoan tan ed liknaan na simplin kaabigan. Tutukoyen to so “ibam, tan asawa na sipan mo.” Balang laki a nalalanor so angasawa na kapananisian, sakey ya Israelitan bii, a sikatoy pinili to bilang pinabpablin kaiba, sakey a kapareha legay bilay. Anggaman say impanasawa ra so nayarin agawa sanen ugaw nira, say ilalabas na panaon tan say itatakken da so nepeg ya agmangibaliwala ed impansipanan da, salanti, say paknaan ed panangasawa.

18. Diad antoran dalan ya onaplika natan so simbawa nen Malaquias nipaakar ed panagliput?

¹⁸ Onaaplika met natan so simbawa ed saratan a pamaakaran. Makapasinagem ta arum so angibaliwala ed ganggan na Dios a mangasawa o miasawa lambengat unong ed Katawan. Agta makapaermen met ta walaray agnanggunaet pian napansiansian malet so panamaley da? Imbes, sasalien dan ibaraan tan gegemtanen so sakey a kurang a kagula na Dios diad pangaagamil na agmakasulatan a diborsyo pian makaasawa na sananey. Diad panggagawa ra ed saratan a bengatla, ‘pansasagpoten da si Jehova.’ Diad panaon nen Malaquias, saramay angibaliwala ed simbawa na Dios so mapaatagey a nanisip ya agmakatunongan si Jehova ed saray panmoria to. Singano ibabaga ra ya: “Iner so kawalaan na Dios na inkatunong?” Agaylan pikelkel a panagnonot! Komon ta ag-itayo napelag ed ontan a patit.​—Malaquias 2:17.

19. Panon a makaawat na espiritu na Dios iray kaasawaan a lalaki tan bibii?

¹⁹ Diad makapaseseg a dapag, impabitar nen Malaquias a walaray asawan lalaki ed panaon to ya ag-akideneng a sililiput ed kaasawaan da. ‘Walaan ira na kera na masanton espiritu na Dios.’ (Mal 2 Bersikulo 15) Makapaliket ta say organisasyon na Dios  natan so walaan na dakel ya ontan iran lalaki, ya ‘igagalang daray kaasawaan da.’ (1 Pedro 3:7) Agda aabusoen so kaasawaan dan bibii diad pisikal odino ed salita, agda kakaliktanen so mabanday iran agamil ed sekso, tan papagalangan day kaasawaan da diad agda pigagantil ed arum a bibii odino pambabantay na pornograpiya. Abendisyonan met so organisasyon nen Jehova diad impakawalaan na dakel a matoor a Kristianon bibii a manmamatoor ed Dios tan ed saray ganggan to. Kabat na saratan a lalaki tan bibii no anto so kagula na Dios, tan maniisip tan onkikiwas ira unong ed panmoria to. Mantultuloy kayo komon a singa sikara, a ‘tuloken so Dios bilang manuley’ tan napalaboan na masanton espiritu to.​—Gawa 5:29.

20. Anton panaon so asingger lan onsabi ed amin a katooan?

²⁰ Magano lan itarok nen Jehova so panangukom ed sayan interon mundo. Balang indibidual so kaukolan ya onebat ed sikato makasengeg ed saray papanisiaan tan ikikiwas to. “Sakey tan sakey ed sikatayo mangiusausa naani nipaakar ed inkasikaton dili ed arap na Dios.” (Roma 14:12) Kanian say makapaliing a tepet et saya: Siopa so makaliktar ed agew nen Jehova? Say komatlo tan unor ya artikulo na sayan serye so maningbat ed satan a tema.

 Sarag Yo Kasin Ipaliwawa?

• Diad anton manunan rason a kinondena nen Jehova iray saserdote ed Israel?

• Akin ya aliwan atagtagey parad totoo so panumbok ed saray estandarte na Dios?

• Akin a nepeg itayon manalwar ed panagbangat tayo natan?

• Antoran duaran agamil so nagkalalo lan kinondena nen Jehova?

[Tepetepet Parad Panagaral]

[Litrato ed pahina 15]

Diad panaon nen Malaquias, saray saserdote so akondena lapud agda inunor iray dalan nen Jehova

 [Litrato ed pahina 16]

Nepeg itayon manalwar diad pangibangat ed saray dalan nen Jehova, ya agtayo iyaalibansa iray personal a panlabayan tayo

[Saray litrato ed pahina 18]

Kinondena nen Jehova iray Israelita ya angidiborsyo ed kaasawaan da diad agmakatunongan iran sengegan tan angasawa na paganon bibii

[Litrato ed pahina 18]

Igagalang na saray Kristiano natan so sipanan da ed panangasawa