Kasin Kuekuentaen Mo so Bili?

INYOPRESI nen Jesu-Kristo ed saray babangatan to so ilalo ya andi-anggaan a bilay, balet binilin to met ira a kuentaen da so bili na pagmaliw a sakey a Kristiano. Inyilustra to itan a punto diad impantepet: “Siopa ed sikayo so, anta labay to so mamaalagey na sakey ya ilang, ag-onyurong ya unona tan bilangen [odino, kuentaen] to so bili, no walaan kasi panumpal to ed sikato?” (Lucas 14:28) Anton bili so labay ya ibaga nen Jesus?

Amin a Kristiano so makakaabet na saray pakasubokan​—ya arum ed saratan et seryoso. (Salmo 34:19; Mateo 10:36) Sirin, kaukolan a sikatayoy akaparaan ed mental tan espiritual pian ag-itayo nabigla sano onsabi ed sikatayo so isusumpa odino arum niran problema. Nepeg a kalkulado tayo la iratan a subok diad bili na pagmaliw a babangatan nen Kristo, lapud amta tayon say tumang​—a kisalba manlapud kasalanan tan patey​—so nagkalalon makana nen say antokaman a bengatlan niyopresi ed sikatayo na sayan peles a sistema. On, anggapo so iyaabuloy na Dios​—anggan say patey​—a makaderal ed sikatayo a permanente no mantultuloy itayon manlingkor ed sikato.​—2 Corinto 4:16-18; Filipos 3:8.

Panon a magmaliw ya ontan kabiskeg so pananisia tayo? Lalon ombiskeg so pananisia tayo kapag no manggawa itayo na dugan desisyon, no ontalindeg itayon mapekder parad saray Kristianon totontonen, odino no mankurang itayo a mitunosan ed linawa na Dios​—nagkalalo la sano nadedesdes itayon manggawa na bengatlan sumlang. Sano personal a naeksperiensya tayo so panamendisyon nen Jehova lapud matoor a kurang tayo, say pananisia tayo so onelet tan onaralem. Diad ontan et tutumboken tayo so alimbawa nen Jesus, saray inmunan babangatan to, tan amin a lalaki tan bibii a walaan na pananisia diad loob na andukey a panaon a sustoy ‘impanguenta ra ed bili’ na panaglingkor ed Dios.​—Marcos 1:16-20; Hebreos 11:4, 7, 17, 24, 25, 32-38.