Malaknab ya Onkakayat Iray Deperensya’d Laman

SI CHRISTIAN, a manaayam ed sakey a bansa ed Aprika, so kinidnap na saray sundalo a mamipilit ed sikaton mansundalo met, balet sikatoy ag-inmabobon lapud nibase’d-Biblian konsiensia to. Sikatoy inawit na saray sundalo ed kampo na militar a diman et sakey ed sikara so amaltog ed sikato diad bikking, kayarin sikatoy binugbog ed loob na apat agew. Ayarian ni nen Christian so linma ed ospital, balet say bikking to so kaukolan a putoten manlapud leksab na pueg. Diad sananey nin bansa ed Aprika et pinuputot na saray armadon rebelde iray bikking na anggan saray ankekelag ya ugugaw. Tan manlapud Cambodia ya anggad Balkans, manlapud Afghanistan anggad Angola et namparan ugaw tan matakken so napupukol-pukolan tan nalulupoy lapud saray akakotkot a bomba.

Say sakey met nin pakakabaldadoan et saray aksidente tan sakit, a singa say diabetes. Anggan saray samal (toxin) ed kaliberliber so pakapansengegay beblay na laman. Singa bilang, diad nanaasinggeran a lugar diad sakey a syudad ed Mamabukig a Europa et dakel ya ugugaw so ninianak ya andian na sakey a taklay. Wala lambengat so melag a gamet da a tinmubo diad leksab na siko. Napapaneknekan a satan so depekto ed henetiko makasengeg ed kemikal a polusyon. Dakerakel a totoo so walaan ni na saray bikking balet ta agmakayari lapud inkaparalisa odino arum nin sakit. On, malaknab ya onkakayat iray deperensya’d laman.

Antokaman so sengegan, saray deperensya’d laman so walaay mauges ya epekto. Si Junior et apukol so kawigin bikking to sanen mantaon na 20. Oniay inkuanto ed saginonor: “Ansakisakit so liknaan ko. Nanakis ak a maong lapud amtak ya aglan balot nipawil so bikking ko. Agko amta so gawaen ko. Siak so awetwet.” Balet, sinmabi panaon et biglan nauman so awawey nen Junior. Ginapoan toy nanaral na Biblia tan naaralan toray bengatla ya aglambengat akatulong ed sikaton makatalona noagta angiter met ed sikato na makapakelkelaw ya ilalo nipaakar ed maliket ya arapen dia ed mismon dalin. No walaan ka na deperensya, labay mo met kasi so nawalaan na ontan ya ilalo?

No ontan, ipangasim sirin a basaen so ontumbok ya artikulo. Pasesegen mi ka a nengnengen iray nisitan Kasulatan ed mismon Bibliam ta pian natalosan mon mismo no anto so itatarya na Manamalsa parad saraman so manaaral nipaakar ed gagala to tan itutunos day bilay da ed satan.