Propesiya nen Isaias​—Liwawa Parad Amin a Katooan I

Katuloyan na Kapitulo Beinte-Tres

Mantultuloy a Manalagar ed si Jehova

Ligliwa Diad Utel na Panangondena

14, 15. Anton ligliwa so iyoopresi na saray salita na Isaias 30:18 ed saray manaayam ed Juda nensaman tan ed saray tuan Kristiano natan?

14 Legan a narerengel ni na saray dumerengel nen Isaias irayan seryoson salita, say tonada na mensahe to so anguman. Say sesga na kadederal so mangitotonton ed sakey a sipan na saray panamendisyon. “Sikato so makasengeg a manalagar si Jehova, pian kasian to kayo; pian diad ontan sikato so nitandoro [“onalagey,” NW]; et sikato so maparaan ed panangasi ed sikayo: ta si Jehova sikato so Dios na inkatunong [“panangukom,” NW]; mapalar so saray amin a manalagar ed sikato.” (Isaias 30:18) Agaylan makapaseseg iran balikas! Si Jehova so mapangasin Ama a manpipirawat ya ontulong ed ananak to. Panggagayagaan to so mangipatnag na panangasi.​—Salmo 103:13; Isaias 55:7.

¹⁵ Sarayan manamaseguron balikas so onaaplika ed saray nakdaan a Judio a mapangasin inabuloyan a makaliktar ed kadederal na Jerusalem nen 607 K.K.P. tan ed saray dagdaiset ya akapawil ed Insipan a Dalin nen 537 K.K.P. Balet, saray salita na propeta so manliligliwa met ed saray Kristiano natan. Napapanonotan itayo a si Jehova so “onalagey” nisengeg ed sikatayo, a panganggaen to iyan marelmeng a mundo. Saray matoor a managdayew so makapanmatalek a si Jehova, a ‘Dios na panangukom,’ so agmangiyabuloy ed mundo nen Satanas a mansiansia ni na anggan sakey ya agew nen say kakaukolanen na inkahustisya. Kanian, “saray amin a manalagar ed sikato” so walaan na daakan a rason pian manliket.

Liligliwaen nen Jehova so Totoo To Diad Pangeebat ed Saray Pikakasi Ra

16. Panon a liligliwaen nen Jehova iray nadidismaya?

¹⁶ Balet, nayarin nadismaya so arum lapud agtampol sinmabi so kililiktar ya iilaloan da. (Uliran 13:12; 2 Pedro 3:9) Komon ta naliligliwa ira manlapud onsublay iran salita nen Isaias, a mangipapabitar na nikaduman aspekto na personalidad nen Jehova. “Ta saray ombaley manayam ira naani ed Sion ed Jerusalem; agka la naani onnangis; ag-onlaron naani a mangasi ed sika lapu ed boses na pantawag mo; sano narengel to ka, ebatan to ka naani.” (Isaias 30:19) Si Isaias so mangipapatnag na inkatamoy diad sarayan balikas diad impansalat ed “kayo” diad bersikulo 18 ed “ka” diad bersikulo 19. Sano liligliwaen nen Jehova iray nagogonigon, pidedenengan to so balang indibidual. Bilang Ama, agto itetepet ed adismayan anak to ya ‘Akin et aliwa kan singa si agim a mabiskeg?’ (Galacia 6:4) Imbes et tatalinengen ton maong so balang sakey. Diad tua, “sano narengel to ka, ebatan to ka naani.” Agaylan manamaseguro iran balikas! Saray nadidismaya so napabiskeg a tuloy no manpikasi ra ed si Jehova.​—Salmo 65:2.

Talinengen so Manangiwanwan a Boses na Dios Diad Pambasa ed Salita To

17, 18. Anggan diad mairap iran panaon, panon a mangitatarya si Jehova na panangiwanwan?

¹⁷ Legan na pangisasalaysay nen Isaias, pinanonotan to iray dumerengel to ya onsabi so gonigon. Mangawat iray totoo na “tinapay na panamairap tan danum na panamasegsegang.” (Isaias 30:20a) Say gonigon tan panamairap a nasagmak da sano nakubkob ira so kaslakan la a singa tinapay tan danum. Anggaman ontan, si Jehova so akaparaan a mangiliktar ed saray maptek-impanpuso. “Ag-ira niyamot anggan kapigan so saray mangibangat [“Engranden Managbangat,” NW] ed sika, noag ingen saray matam nanengneng da naani so saray mangibangat ed sika. Et saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato; sano onarap kayo ed nikawanan,  tan sano onarap kayo ed nikawigi.”​—Isaias 30:20b, 21. *

¹⁸ Si Jehova so “Engranden Managbangat.” Anggapoy mipara ed sikato bilang managbangat. Balet, panon a “nanengneng” tan ‘narengel’ na totoo si Jehova? Ipapaamta nen Jehova so inkasikato panamegley na saray propeta to, a saray salita ra so nikurit ed Biblia. (Amos 3:6, 7) Natan, sano babasaen na saray matoor a managdayew so Biblia, say singa-aman boses na Dios so mangibabaga ed sikara na dalan a laen da tan manapaseseg ed sikaran ipetek so kabibilay da pian makapankurang ed satan. Balang Kristiano so nepeg a maalwar ya ontalineng legan a mansasalita si Jehova panamegley na saray pahina na Biblia tan saray nibase’d-Biblia iran publikasyon ya itatarya na “matoor tan makabat ya aripen.” (Mateo 24:45-47) Balang sakey komon so mangisekar ed pambasa na Biblia, ‘ta sikato so kabilayan to.’​—Deuteronomio 32:46, 47; Isaias 48:17.

Molimolien Iray Bendisyon ed Arapen

19, 20. Antoran bendisyon so akatarya ed saramay onkikiwas ed boses na Engranden Managbangat?

¹⁹ Saramay onkikiwas unong ed boses na Engranden Managbangat so mangibantak ed saray imbolik a talintao ra, a moriaen da iratan a makapadimla. (Basaen so Isaias 30:22.) Insan, saramay onkikiwas so makapanggayaga ed alay abig iran bendisyon. Saraya so deneskribe nen Isaias, a singa nikurit diad Isaias 30:23-26, bilang makapalikliket a propesiya nipaakar ed panangipawil a walaan na inmunan kasumpalan sanen pinmawil iray nakdaan a Judio manlapud impakakautibo nen 537 K.K.P. Natan, sayan propesiya so ontutulong ed sikatayon nanengneng so makapakelkelaw iran bendisyon ya itatarok na Mesias diad espiritual a paraiso natan tan ed onsabin literal a Paraiso.

²⁰ “Sikato iter to naani uran a nipaakar ed binim ya itanem mo ed dalin; tan say tinapay manlapu ed bunga na dalin, tan sikato naani mataba tan daakan. Dia ed satan ya agew mantagano so saray ayep mo ed saray maawang a pankabkaban; ontan met so saray baka a kalakian tan saray kilaw ya asno a manbaka ed dalin, mangan ira naani ed mananam ya ilik, ya integap [“intaep,” NW] ya inagamil so sariok tan karalukar.” (Isaias 30:23, 24) Say “mataba tan daakan” a tinapay​—taganon napno na sustansia​—so magmaliw ya inagew-agew a manunan tagano na too. Say dalin so manbunga na daakan a pakagunggonaan na anggan saray ayayep. Saray ayayep so pakanen na “mananam ya ilik”​—kakanen na ayayep ya inreserba parad nikaduma iran okasyon. Sayan tagano so “intaep” ni ingen​—a kaslakan lan gagawaen ed belas a taganoen na too. Agaylan makapalikliket iran detalye so impresenta dia nen Isaias pian iyilustra so inkadaakan na saray bendisyon nen Jehova ed matoor a katooan!

21. Deskribien so inkakompleto na saray bendisyon ya onsabi.

²¹ “Wala naani ed tapew na amin a palandey ya atagey, tan ed tapew na amin a pukdol ya atagey, so saray kulos. (Isaias 30:25a) * Imparungtal nen Isaias so matukotukoy a deskripsion a mangidadanet ed inkakompleto na saray bendisyon nen Jehova. Agla onkulang so danum​—a kakkaukolan a bengatla ya onagus aliwa labat diad abeba iran lugar noag pati diad balang palandey, anggan diad “tapew na amin a palandey ya atagey, tan ed tapew na amin a pukdol ya atagey.” On, say eras so apalabas la. (Salmo 72:16) Niarum ni, say imano na propeta so binmaliksat ed bengabengatlan atagtagey nen saray palandey. “Say liwawa na bulan singa naani liwawa na banwa tan say liwawa na banwa maminpito naani, a singa say liwawa na pitoran agew, dia ed agew a pamedber nen Jehova ed sugat na baley to, tan say panamaabig to ed saray letak na sugat da.” (Isaias 30:26) Agaylan makapalikliket a kapantokan ed sayan alay dakep a propesiya! Say gloria na Dios so onsinag tekep na amin a karlangan na satan. Saray bendisyon a nitarya ed saray matoor a managdayew na Dios so onlalaknab  a tuloy​—a maminpiton danay​—nen say antokaman a naeksperiensya da la ed apalabas.

Panangukom tan Gayaga

22. Miduma ed saray bendisyon ya onsabi ed matoor, anto so itatarya nen Jehova parad saray marelmeng?

²² Say tonada na mensahe nen Isaias so anguman lamet. “Nia”! inkuan to, a singano sasagyaten to so imano na saray dumerengel to. “Say ngaran nen Jehova onsabi a manlapu ed arawi, a mandarlang ed sanok to, tan dia ed makapal a mamaatagey ya asewek: saray bibil to napno ed sanok, tan say dila to singa say manunaw ya apoy.” (Isaias 30:27) Angga ni’d natan, si Jehova so agni sinmalet, a papaulyan to ni iray kakabusol na totoo to a gawaen so labay da. Natan et sikatoy onaasingger​—singano tuloy-tuloy ya onsasabin bagyo​—pian ipaakseb so panangukom. “Say panlinawa to sikato so singa delap, a sabien to so tenger a yakayaken to so saray nasyon ed yakayak na kabagbag: et sakey a patili a mamalingo so wala naani ed sangi na saray totoo.” (Isaias 30:28) Saray kakabusol na totoo na Dios so naliktob na “delap,” a maksil a “yakayaken,” tan singeran na sakey a “patili [o renda].” Sikaray naderal.

23. Anto so sengegan na “gayaga na puso” na saray Kristiano natan?

²³ Dinmuma lamet so tonada nen Isaias legan ton dedeskribien so maliket a kipapasen na saray matoor a managdayew ya ompawil ed dalin da diad onsabin panaon. “Nawalaan kayo naani na sakey a kanta a singa dia ed labi no ngilinen so sakey a liket a masanto; tan gayaga na puso, a singa no say sakey onla ya akatolali ed palandey nen Jehova, ed Batondampay na Israel.” (Isaias 30:29) Saray tuan Kristiano natan so makakalikna na ontan met a “gayaga na puso” legan dan momolimolien so kaukom ed mundo nen Satanas; say salimbeng ya innatnat ed sikara nen Jehova, say “Batondampay na kilalaban;” tan say onsabi iran bendisyon na Panarian.​—Salmo 95:1.

24, 25. Panon ya idadanet na propesiya nen Isaias so inkapeteg na onsasabin panangukom ed Asirya?

²⁴ Kayari na sayan balikas na gayaga, pinmawil si Isaias ed tema na panangukom tan tinukoy to so bengatlan mamapasnok na Dios. “Si Jehova gawaen to naani a narengel so magloria a boses to, et ipanengneng to naani so inkileksab na taklay to, pati say masebeg a sanok to, tan say dalang na sakey a manunaw ya apoy, dia ed sakey ya alimbusabos tan bagyo, tan kristal ya uran. Ta dia ed panamegley na boses nen Jehova napunaw naani so Asiryo; sikato naani kabilen to ed pekpek to.” (Isaias 30:30, 31) Diad sayan malinew ya impangideskribe, indanet nen Isaias so inkapeteg na panangukom na Dios ed Asirya. Singano say Asirya so akaalagey ed arapan na Dios tan manggiwgiwgiw ed impakanengneng ed ‘onleleksab a taklay’ na panangukom to.

²⁵ Oniay intuloy na propeta: “Balang pangabil na pekpek ya aturo, a si Jehova isiplat to naani ed sikato, wala naani anyeweng na saray pandereta, tan saray arpa; et dia ed saray bakal na pangyayag na taklay to mibakal naani ed sikara. Ta sakey a Tofet so nitadia la nensaman; on, tan say ari nitadia la; sikato so ginawa to ya aralem tan baleg; say losbo to sikato so apoy tan dakel a kiew; say panlinawa nen Jehova, singa sakey ya agus ya asupre, sikato so selselan to. (Isaias 30:32, 33) Say Tofet, diad Lawak na Hinnom so inusar dia bilang piguratibon lugar a mangapuy-apoy. Diad impangipanengneng a ditan mangangga so Asirya, idadanet nen Isaias so bigla tan sigpot a kaderal ya onsabi ed satan a nasyon.​—Ikompara so 2 Arari 23:10.

26. (a) Say proklamasyon nen Jehova sumpad Asirya so walaan na anton modernon-agew a kiyaplikaan? (b) Panon a makapantultuloy a manalagar iray Kristiano natan ed si Jehova?

²⁶ Anggaman sayan panangukom a mensahe et parad Asirya, say propesiya nen Isaias so walaan na nagkalalon kakanaan. (Roma 15:4) Si Jehova so onsabi lamet, a singa panangibaga, manlapud arawi, pian manelap, manyegyeg, tan manaker ed amin na saramay mamapairap ed totoo to. (Ezequiel 38:18-23; 2 Pedro 3:7; Apocalipsis 19:11-21) Komon ta magano lan onsabi itan ya agew! Kaleganan ni, saray Kristiano so magunaet a manatalaran ed agew na kilalaban. Sikaray napapabiskeg diad panmomolimoli ed malinew iran salita a nikurit ed Isaias kapitulo 30. Sarayan salita so mamapaseseg ed saray lingkor na Dios a pablien so pribilehyo a pikakasi, panaral ed Biblia, tan panumameng ed saray bendisyon na Panarian ya onsabi. (Salmo 42:1, 2; Uliran 2:1-6; Roma 12:12) Kanian saray salita nen Isaias so ontutulong ed sikatayon amin pian mantultuloy a manilalo ed si Jehova.

[Saray paimano ed leksab]

[Tepetepet Parad Panagaral]