No Panon a Manampot Iray Deperensya’d Laman

ISIPEN pa a saray mata na bulag et makanengneng la, saray layag na telek so makadngel la ed kada tanol, say dila na emel so mankanta la ed gayaga, tan say sali na piley so masekder la tan nayarian to lay manakar-akar! Say tutukoyen mi et aliwan saray biglan inyabanti na medikal a siensia, noagta saray resulta na mismon pibabali na Dios ed biang na katooan. Oniay ipapasakbay na Biblia: “Satan la nilukas so saray mata na bulag, tan say layag na saray telek nibuang naani. Satan la manlukso so piley a singa sakey ya ulsa, tan say dila na emel mankanta naani [ed gayaga].” (Isaias 35:5, 6) Balet panon itayon makaseguro a nagawa iyan makapakelkelaw a tuloy a propesiya?

Manuna, sanen wadia ed dalin si Jesu-Kristo, aktual a tinambal to iray totoo a walaan na nanduruman nengneng na sakit tan deperensya’d laman. Niarum ni, maslak ed saray milagro to so atasian na dakel a totoo​—anggan saray kakabusol to. Diad tua, walay inkagawa ya inusisan maong na saray manduaruwan onsusumpa so panagtambal ta pian deralan si Jesus. Balet diad pirmin inkadismaya ra, amin a ginawa ra so amekder ed saray milagro to. (Juan 9:1, 5-34) Kayarin ginawa nen Jesus so sakey nin agniburi a milagro, oniay inkuan da tekep na inkadismaya: “Anto so gawaen tayo, ta sayan too manggawa na amayamay a tanda?” (Juan 11:47) Anggaman ontan, saray kabanyakan a totoo so aliwan singa sikara ya agmakalikna, lapud dakel so anisia ed kinen Jesus.​—Juan 2:23; 10:41, 42; 12:9-11.

Saray Milagro nen Jesus​—Sakey a Pasimar na Sankagloboan a Panagtambal

Mas ni so agawaan na saray milagro nen Jesus nen say pamaneknek a si Jesus so Mesias tan Anak na Dios. Saratan so angitarya na basiyan pian napanisiaan iray sipan na Biblia a say matulok a katooan so napaabig diad arapen. Laktipen na sarayan sipan so propesiya ed Isaias kapitulo 35, ya asalambit ed unaan a parapo. Nipaakar ed arapen a bunigas na totoon matakot ed Dios et oniay inkuan na Isaias 33:24: “Say manaayam agto naani ikuan, Mabeblay ak.” Ontan met, isisipan na Apocalipsis 21:4: “Punasen [na Dios] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla [saray pakasubokan tan paniirap natan] sikara so linmabas la.”

Naynay ya ipipikasi na totoo so kasumpalan na sarayan propesiya diad panguulit da ed modelon pikakasi nen Jesus, a bilang kabiangan et kuan na  satan: “Onsabi so panarian mo. Nagawa so linawam ed dalin, a singa pakagagawa to ed tawen.” (Mateo 6:10, King James Version) On, say linawa na Dios so mangilalaktip ed dalin tan sankatooan. Say sakit tan nanduruman beblay, anggaman iyaabuloy lapud sakey a rason, so magano lan mangangga; agla iratan maneral ed ‘gagatinan na saray sali’ na Dios ed ando lan ando.​—Isaias 66:1. *

Apaabig ya Anggapoy Ot-ot tan Bayar

Antokaman so sakit a liliknaen na saray totoo, tinambal iratan nen Jesus ya anggapoy ot-ot, tamtampol, tan anggapoy bayar. Agnapaliisan a sayan balita so kinmayat a singa apoy ed takel, tan ag-abayag et “sinmabi ed sikato so dakerakel a katooan, a sankaawit da so saray piley, bulag, emel, sikwel, tan arum niran dakerakel, tan inggaton da ra ed salian to; et pinaabig to ra.” Panon a kinmiwas so totoo? Oniay intuloy na salaysay nen Mateo ya akatasi: “Nikelawan so dakel a katooan, nen anengneng da so emel a makasalita, say sikwel ya inmabig, tan say piley a makaakar, tan say bulag a makanengneng; et inggalgalang da so Dios na Israel.”​—Mateo 15:30, 31.

Imanoen ya agpinipili nen Jesus iramay tinambal manlapud dakel a totoo​—paraan ya uusaren na saray managpalikdo. Imbes, saray dakel a kakanayon tan kakaaro na saray mansasakit et “inggaton da ra ed salian [nen Jesus]; et pinaabig to ra.” Repasoen tayo sirin so pigaran espesipikon alimbawa na pakayari nen Jesus a mamaabig.

Inkabulag: Legan a walad Jerusalem, inikdan nen Jesus na pakanengneng so sakey a toon “bulag nanlapud inkianak to.” Sayan too so kabkabat ed interon syudad bilang sakey a bulag a mipapayabol. Kanian nilitrato yo’d kanonotan yo so inkaliket tan paneyag sanen sikatoy anengneng na totoo a manaakar a makanengneng la! Ingen, aliwan amin a totoo et maliket. Lapud sikaray naingongotan ed inmunan impangiwalwal nen Jesus ed karelmengan da, arum a membro na prominente tan maimpluensyan sekta na Judio a tatawagen a saray Fariseo so desperadon nananap na pangalotan da ed kinen Jesus. (Juan 8:13, 42-44; 9:1, 6-31) Kanian, tinetepetan da so toon apaabig, insan saray ateng to, tan insan say too lamet. Balet, say impantetepet na sarayan Fariseo so amekder lambengat ed milagro nen Jesus, ya amasanok ed sikara. Lapud awetwet so toon apaabig ed panusuppiat na sarayan relihyoson mansimpisimpitan, oniay inkuanto: “Nanlapu ed inggapo na mundo agnadnadngelan anggan kapigan a wala so sakey ya angilukas na saray mata na sakey a too a nianak a bulag. No sayan too agnanlapu ed Dios, anggapo komon so ayarian to a gawaen.” (Juan 9:32, 33) Lapud satan a matua tan matudion impangibalikas na pananisia, “sikato so pinapaway [na saray Fariseo],” a mankabaliksan a pinataynan da so datin-bulag a too ed sinagoga.​—Juan 9:22, 34.

Inkatelek: Legan a si Jesus so walad Decapolis, sakey a rehyon ed bukig na Ilog Jordan, ‘inyakar na totoo diman ed sikato so sakey a telek tan walaan na makasbel ed pansasalita to.’ (Marcos 7:31, 32) Aglambengat tinambal nen Jesus iyan too noagta imparungtal to met so aralem a pakatebek ed liknaan na telek, a nayarin nababaingan ed arap na dakel a totoo. Ibabaga ed sikatayo na Biblia ya ‘insian nen Jesus iyan telek a too a maamot ed saray dakel a katooan’ tan sikatoy pinaabig to. Lamet, saray akatasi et “alabas so inkikelawan da,” a kuan dan: “Sikato ginawa to so amin a bengatlan maong; gawaen to a makadngel so telek, tan mansalita so emel.”​—Marcos 7:33-37.

Inkaparalisado: Legan a walad Capernaum si Jesus, inyasingger na saray totoo ed sikato so sakey a toon paralisado a mandukdukol ed dalagan. (Mateo 9:2) Dedeskribien na bersikulo 6 ya anggad 8 no anto so agawa. “Inkuan [nen Jesus] ed [paralitiko], Onalagey ka, et alam so dalagan mo tan onsempet ka’d abung mo. Et sikatoy inmalagey, tan linma ed abung to. Bangnen anengneng na dakel iran katooan so saya, tinmakot ira tan inggalgalang day Dios, a sikatoy angiter na ontan a pakauley ed saray totoo.” Sayan milagro met so ginawa diad imaton na saray babangatan nen Jesus tan saray kakabusol to. Imanoen a saray babangatan nen Jesus, ya agbinulag na panggula tan panaglabi, et “inggalgalang day Dios” lapud atasian da.

Sakit: “Dinmago ed [si Jesus so] sakey ya akating a mankekerew ed sikato, tan manaltalimukor  ed sikato, tan kuan to ed sikato, No labay mo, nayarian moak a linisan. Et lapud atenyeg so panangabagey to, inuna’toy lima to, et sikatoy diniwi’to tan inkuan to, ed sikato, Labay ko; nalinisan ka komon. Tan dingan na intaynan na kating ed sikato, et agawan malinis.” (Marcos 1:40-42) Imanoen ya agmasuyat si Jesus ya amaabig ed sayan too noagta walaay puron panangabagey. Isipen pan sakey kan akating. Panoy liknaan mo no sikay tampol tan andiay ot-ot ya apaabig ed sakey a makapataktakot a sakit a kalkalnan manmimigmig ed laman mo tan pangipupulisayan ed sika manlapud sosyedad? Seguradon natalosan mo no akin a say sananey nin akating a mamilagron apaabig et “indakmomo to so lupa to ed sali [nen Jesus], ya akisalamatan to.”​—Lucas 17:12-16.

Sugat: Say unor a milagro nen Jesus antis a sikatoy erelen tan ipasak et sakey a panagtambal. Lapud sugba-sugba sumpad saramay mangerel la’d si Jesus, si apostol Pedro, “a walaan na kampilan binago’to, tan sinugatan to so aripen na atagey a saserdote, tan piningol to so layag to a kawanan.” (Juan 18:3-5, 10) Ibabaga ed sikatayo na miparan salaysay ed Lucas a si Jesus “diniwi’to so layag to, et sikatoy pinaabig to.” (Lucas 22:50, 51) Lamet, sayan mapangasin kiwas so ginawa diad imaton na kakaaro nen Jesus ontan met ed saray kakabusol to​—diad sayan pankanawnawa et saray mangerel ed sikato.

On, diad lalon maapit a pangusisa tayo ed saray milagro nen Jesus, lalon natebek tayo iray pakabidbiran a tanda na inkatudtua na saratan. (2 Timoteo 3:16) Tan unong ya asalambit ed gapo, say panaral ed satan so mamabiskeg na pananisia tayo ed sipan na Dios a mamaabig ed matulok a katooan. Uukeran na Biblia so Kristianon pananisia bilang “say agpanduaruwa ed saray bengatla ya iilaloan, say panangipatnag ed saray bengatla ya agni anengneng.” (Hebreos 11:1) Malinew, say ipapaseseg na Dios et aliwan say basta panisia labat odino pampirpirawat noagta say putel a pananisian nibase ed ebidensya. (1 Juan 4:1) Legan a gagamoran tayo so ontan a pananisia, napaneknekan tayon sikatayoy magmamaliw a lalon mabiskeg, lalon mabunigas, tan lalon maliket diad espiritual a paraan.​—Mateo 5:3; Roma 10:17.

Nepeg a Nagawan Unona so Espiritual a Panagtambal!

Dakel a totoon mabunigas ed pisikal so agmaliket. Sasalien ni ingen na arum so manbikkel lapud andian ira na ilalo parad arapen odino lapud sikara lay nadadaeg na saray problema. Bilang resulta et sikaray walaan na deperensya ed espiritual​—a mas seryoson kipapasen ed imaton na Dios nen say deperensya’d pisikal. (Juan 9:41) Diad biek a dapag, dakel a mabeblay ed pisikal, singa si Christian tan si Junior ya asalambit ed inmunan artikulo, so walaan na maliket tan makapenek a panagbilay. Akin? Lapud sikaray mabunigas ed espiritual tan sikaray napapabiskeg panamegley na seguradon ilalo a nibase ed Biblia.

Diad panutukoy ed nikaduman pankaukolan tayo bilang totoo, inkuan nen Jesus: “Aliwa a say tinapay labat so napambilay na too noag say amin a salitan ombesngaw ed sangi’ [nen Jehova].” (Mateo 4:4) On, aliwan singa saray pinalsan ayep, kaukolan na totoo so mas ni nen say materyal a pantagano. Lapud apalsa itayo unong ed “indengan” na Dios, nakaukolan tayo so espiritual a tagano​—say pikakabat ed Dios tan no panon itayon onnepeg ed gagala to ontan met ed panggawa na linawa to. (Genesis 1:27; Juan 4:34) Lapud pikakabat ed Dios, say bilay tayo so walaan na kabaliksan tan espiritual a biskeg. Ileletneg met na satan so basiyan parad maandon bilay diad paraison dalin. “Saya sikato so andi-anggaan a bilay,” inkuan nen Jesus, “a naamtaan da ka a saksakey a tuan Dios, tan saman so imbakim, salanti Jesu-Kristo.”​—Juan 17:3.

Makatantanda a si Jesus so agtinawag na saray kapanaonan to bilang “Managtambal” noagta bilang “Managbangat.” (Lucas 3:12; 7:40) Akin? Lapud imbangat nen Jesus ed totoo so permanentin solusyon ed saray problema na katooan​—say Panarian na Dios. (Lucas 4:43; Juan 6:26, 27) Sayan mangatatawen a gobierno diad silong na uley nen Jesu-Kristo so manguley ed interon dalin tan manumpal ed amin iran sipan na Biblia nipaakar ed sigpot tan magnayon a kipawil na matunong a totoo tan say mangaraldalin ya ayaman da. (Apocalipsis 11:15) Satan so rason no akin a diad modelon pikakasi nen Jesus et insiglaot to so isabi na Panarian ed linawa na Dios a nagagawa diad dalin.​—Mateo 6:10.

 Parad dakel ya indibidual a walaay deperensya, say panaral ed sayan makapasagyat ya ilalo so mangipalikna ed sikara na pirmin gayaga imbes a kaermenan. (Lucas 6:21) Diad tua et nagkalalo ni so gawaen na Dios nen say pangekal ed sakit tan deperensya’d laman; punasen to so mismon sengegan na paniirap na too​—say kasalanan. On, isisiglaot na Isaias 33:24 tan Mateo 9:2-7, ya inaon ed inmuna, so sakit ed makasalanan a kipapasen tayo. (Roma 5:12) Kanian no nadaeg la so kasalanan, diad kaunoran et manggayaga la so katooan “ed kawayangan na gloria na saray anak na Dios,” kawayangan a mangilaktip ed inkayadyari na nonot tan laman.​—Roma 8:21.

Saramay walaan na maabig a bunigas so nayarin mainomay a mangibaliwala ed kipapasen da. Balet aliwan ontan ed saraman so manasagmak na saray epekto na deperensya’d laman. Amta ra ya agaylan importante so bunigas tan say bilay tan no panon a saray bengatla so nayarin bigla-bigla tan ag-iilaloan a manguman. (Eclesiastes 9:11) Kanian, ilaloan mi a saramay walaan na beblay ed limog na saray managbasa mi so mangonsideran maong ed saray makapakelkelaw a sipan na Dios unong a nikurit diad Biblia. Inter nen Jesus so bilay to ta pian naseguro so pakasumpal na saratan. Wala ta ni so magmaong a garantiya a niwala ed sikatayo?​—Mateo 8:16,17; Juan 3:16.

[Paimano ed Leksab]