No Panon a Say Anak so Tinmulong ed Ama To

SI JAMES, a taga-Inglatera, a mantaon na masulok labat a 30, so walaan na deperensya ed utek tan medyo autistiko. Ingen, diad loob na dakel lan taon et sikatoy onaatendi ed saray miting na Tastasi nen Jehova a kaibay ina tan atsi to. Balet, say ama to so agbalot interesado ed saray sisiaen da. Sakey a labi kayari inyatendi ra ed miting a nidemostra diman no panon so pangimbita ed sakey a kabkabat a too diad Memoryal na impatey nen Kristo, si James so tampol a linma ed kuarto to. Lapud paga nen ina to, sikatoy tinumbok to tan asabian ton manbubukait ed saray daan a paway na magasin a Panag-Bantayan tan Awake!. Pinili to so magasin a pakaromogan na imbitasyon ed Memoryal diad beneg a pahina tan nanapuran inmasingger ed si ama to. Inturo ton unona so litrato insan si ama to tan inkuanto “Sika!” Nanlimgisan si ina tan ama to tekep na pankelaw ta amoria ran si James so mangiimbita ed si ama to diad Memoryal. Imbaga nen ama to a salien toy onatendi.

Diad samay labi na Memoryal, linma si James ed aparador nen ama to, tan amili na sakey a paris na kawes, inawit to ed kinen ama to, tan inmari to ya isulong to iratan. Inmebat si ama to a sikatoy ag-onla ed miting. Kanian, si James tan si ina to labat so namparaan a linma ed Kingdom Hall.

Balet, apalabas so pigaran panaon, si James et agto labay lan unoren so nanay to sano sikatoy pamparaanen pian onatendi ed saray miting ed kongregasyon, imbes et lablabayen to lay natilak ed abung a kaiba nen ama to. Insan sakey a kabuasan na Simba et aglabay lamet nen James ya unoren so ina to sanen sikatoy pampaparaanen parad miting. Diad impakasurprisan maong nen ina to, si James so dinago nen ama to tan inkuan to, “James, no onla ak natan ed miting, onla ka met?” Si James so aliketan. Nilakap toy ama to tan inkuanto “On!” tan sikaran talo so linma ed Kingdom Hall.

Nanlapud saman ya agew, say ama nen James so maparanay lan onaatendi ed amin a miting ed Simba tan ag-abayag et impaamta to a pian onaligwas, kaukolan ton atendian met so arum niran miting. (Hebreos 10:24, 25) Saya so ginawa to, tan kayari na duay bulan et sikato lay maparanay a nanaral na Biblia. Maples so inyaligwas to, a ginawa ton tampol iray nakaukolan a pananguman ed bilay to, tan agnambayag et sikato lay akibiang ed kimey a panangipulong na Panarian. Kayari na sakey taon ya impanaral to ed Biblia, indedika to so bilay to ed si Jehova tan insimbolo to itan panamegley na inkipalgep ed danum. Sikato la natan so manlilingkor bilang sakey a ministeryal a lingkor ed kongregasyon da. Natan et sikaran sankapamilyaan so nankakasakey a manlilingkor ed si Jehova.