Tepetepet Manlapud Saray Managbasa

Sanen anengneng nen Juan so “baleg ya ulop” a mangisasaklang na sagradon serbisyo ed templo nen Jehova, iner ed templo so panggagawaan da ed saya?​—Apocalipsis 7:9-15.

Makatunongan ya ibaga a mandadayew so baleg ya ulop ed si Jehova diad sakey ed saray mangaraldalin a lolooban (o saban) na baleg ya espiritual a templo to, salanti samay lolooban a mipetekan ed akinpaway a lolooban ed templo nen Solomon.

Diad apalabas et nibaga a say baleg ya ulop so walad sakey ya espiritual a kasimbangan, odino say iyaaliling, na say Korte na saray Gentil a niwala ed panaon nen Jesus. Balet, say malaknab ya impansukimat so angiparungtal na limaran rason no akin ya aliwan ontan. Unona, aliwan amin a kabiangan na templo nen Herodes et walaan na iyaaliling ed baleg ya espiritual a templo nen Jehova. Alimbawa, say templo nen Herodes et walaan na sakey a Korte na saray Bibii tan sakey a Korte na Israel. Saray lalaki tan bibii so nayarin makaloob ed Korte na saray Bibii, balet diad Korte na Israel et saray lalaki labat so makaloob. Diad mangaraldalin iran lolooban na baleg ya espiritual a templo nen Jehova, agnambiigan iray lalaki tan bibii diad panagdayew da. (Galacia 3:28, 29) Kanian, anggapoy kasimbangan na say Korte na saray Bibii tan say Korte na Israel diad espiritual a templo.

Komadua, anggapo so Korte na saray Gentil diad saray desinyon intarya na Dios nipaakar ed pamaalagey ed templo nen Solomon odino templon nipasingawey ed si Ezequiel; nisay wala itan diad templon impaalagey lamet nen Zerubabel. Kanian anggapoy basiyan pian isuheri a say Korte na saray Gentil so kaukolan a walaay kasimbangan ed uksoyan na baleg ya espiritual a templo nen Jehova parad panagdayew, nagkalalo la sano nakonsidera so onggendan a punto.

Komatlo, say Korte na saray Gentil so impaalagey na say Edomitan Ari a Herodes pian igloria so inkasikato tan pian nagamoran so pabor na Roma. Nayarin inggapo nen Herodes so pangapiger ed templo nen Zerubabel nen 18 odino 17 K.K.P. Oniay isasalaysay na The Anchor Bible Dictionary: “Say klasikon panlabay na pakayari na empiryo parad Sagur [Roma] . . . et nankaukolan na sakey a templon babaleg nen saramay nampapara a syudad ed banda’d bukig.” Anggaman ontan, saray sukat (na kinaawang) na mismon templo so niletneg la. Oniay isasalaysay na diksionaryo: “Anggaman say mismon Templo so kaukolan a mipara ed saray sukat na akadkauna iran templo [nen Solomon tan Zerubabel], say Letnegan na Templo so ag-intumbok ed potensyal a kabaleg na satan.” Sirin, pinaawang nen Herodes so kaliberliber na templo diad impangiyarum to ed say natatawag natan a say Korte na saray Gentil. Akin a wala ni so iyaliling na kipaalagey na satan diad uksoyan na espiritual a templo nen Jehova?

Komapat, amin lawarin totoo​—say bulag, piley, tan saray ag-agalsiman a Gentil​—so makaloob ed Korte na saray Gentil. (Mateo 21:14, 15) Tua, kinmana so korte parad dakel ya ag-agalsiman a Gentil a malabay a mangisaklang na saray apay ed Dios. Tan ditan imay pasen ya aminsan et akitongtongan nen Jesus so dakel a totoo tan amidua ton pinapaway iray managsalat na pilak tan managtagilako, a kuanton agda igagalang so abung nen Ama to. (Mateo 21:12, 13; Juan 2:14-16) Sakey ni et oniay imbaga na The Jewish Encyclopedia: “Diad estrikton panangibaga, say akinpaway a korte so aliwan kabiangan na Templo. Say dalin na satan so aliwan sagrado, tan makaloob ditan so anggan siopa.”

Komalima, say Griegon salita (hi·e·ron’) a nipatalos a “templo” ya inusar diad impanaglawi ed say Korte na saray Gentil et “manutukoy ed interon sular, imbes ya espesipikon manukoy ed mismon bilding  na Templo,” so kuan na A Handbook on the Gospel of Matthew, nen Barclay M. Newman tan Philip C. Stine. Diad pidumaan et mas espesipiko so Griegon salita (na·os’) a nipatalos a “templo” diad pasingawey ed si Juan nipaakar ed baleg ya ulop. Diad konteksto nipaakar ed templo na Jerusalem, satan so kaslakan a manukoy ed say Masanto na Saray Masanto, say bilding na templo, odino saray sular na templo. Satan so ipapatalos no maminsan bilang “santuaryo.”​—Mateo 27:5, 51; Lucas 1:9, 21; Juan 2:20.

Saray membro na baleg ya ulop so mangaagamil na pananisia ed dondon bagat nen Jesus. Sikaray malinis ed espiritual, ta “inurasan da so kawekawes da, tan sikara so pinaputi ra ed dala na Kordero.” Kanian, sikaray niyabawag a matunong tekep na ilalon magmaliw a kakaaro na Dios tan makaliktar ed baleg a kairapan. (Santiago 2:23, 25) Diad dakel a paraan et singara proselita ed Israel a nampasakop ed Ganggan a sipanan tan nandayew a kaiba na saray Israelita.

Siempre, saraman a proselita so agnanlingkor ed akindalem a lolooban, a ditan gagawaen na saray saserdote iray obligasyon da. Tan saray membro na baleg ya ulop et anggapo ra’d akindalem a lolooban na baleg ya espiritual a templo nen Jehova, ta say lolooban so mangirerepresenta’d kipapasen na ayadyari tan matunong a toon inkailalak na saray membro na “masantos ya inkasaserdote” nen Jehova leleg a sikaray wadiad dalin. (1 Pedro 2:5) Balet unong ya imbaga na mangatatawen a matatken ed kinen Juan, say baleg ya ulop et peteg a walad loob na templo, diad paway na mismon templo ya ipapasen bilang espiritual a Korte na saray Gentil. Agaylan pribilehyo itan! Tan agaylan ipapabitar na satan so pankaukolan a mantinien na balang sakey so espiritual tan moral a kalinisan diad amin a panaon!

[Diagram/Litrato ed pahina 31]

(Parad aktual a format, nengnengen so publikasyon)

Templo nen Solomon

1. Bilding na Templo

2. Akindalem a Lolooban

3. Akinpaway a Lolooban

4. Andukey a takayan ya ompugta’d Lolooban na Templo