Kaukolan Tayon Amtaen No Siopa so Dios

AGKA ta pirmin naliliketan a makanengneng ed mabitewen a tawen diad malinak a labi? Agta makapalikliket so balingit na saray makolor a rosas? Agmo ta panliliketan so pakakarengel ed saray uni na kamanokan tan kalasakas na saray bulong ed mapalnan siplog na dagem? Tan agaylan makapadinayew iray mabibiskeg a balyina tan arum niran pinalsa a walad dayat! Wadtan met iray totoo a walaan na nisipor lan konsiensia tan makapakelkelaw a komplikadon utek. Panon mon ipaliwawa so kiwawala na amin ya alay abig a bengatla ya akapaliber ed sikatayo?

Panisiaan na arum a nibanbana labat so inkiwala na amin na saya. Balet no tua iya, akin a manisia so totoo ed Dios? Akin a say agginagalan panlalaok na nanduruman kemikal so mamapawala na saray pinalsa a walay pankaukolan ed espiritual?

“Say relihyon so nilamut a maong ed inkatoo tan naeeksperiensya diad amin a kipapasen ed ekonomya tan edukasyon.” Sinegek na sayan balikas so impansukimat ya impresenta nen Propesor Alister Hardy diad libro ton The Spiritual Nature of Man. Say agano niran impan-eksperimento ed utek so angitonton ed pigaran neuroscientist a mangisuherin say totoo so nayarin “henetikon imprograma” a walaay abilidad a mangagamil na relihyon. Oniay inkuan na libron apauloan na Is God the Only Reality?: “Say panaanap na kabaliksan panamegley na relihyon. . . so kaslakan lan eksperiensya diad kada kultura tan kada peryodo na awaran nanlapula’d inlesa na sankatooan.”

Konsideraen so imbaga na sakey ya edukadon too manga 2,000 taon lay apalabas. Insulat to: “Amin ya abung pinaalagey na bengatlan too; balet say amaalagey ed saray amin a bengatla sikato so Dios.” (Hebreos 3:4) Diad tua, say sankaunaan a bersikulo ed Biblia so angikuan: “Sanen gapo say Dios pinalsa to so saray tawen tan say dalin.”​—Genesis 1:1.

Balet, siopa so Dios? Mandurumaan iray ebat na katooan ed sayan tepet. Sanen atepetan no siopa so Dios, inmebat so sakey a tin-edyer a Hapones: “Agak segurado. Sakey ak a Buddhista, tan agla importantin naamtaan ko no siopa so Dios.” Balet, inaksobi nen Yoshi a si Buddha a mismo et diodiosen na dakel. Si Nick, sakey a negosyante a masulok to lan 60, so manisia ed Dios tan ipapasen to bilang sankamakapanyarian a puersa. Sanen impaisalaysay ed sikato no antoray amta to nipaakar ed Dios, abayagan insan inmebat si  Nick: “Agaylay irap itan a tepet, amigo. Basta say nibagak labat et wala so Dios.”

Arum a totoo so “mangigagalang tan manlilingkor ed pinalsa na Dios imbes a diad mismon Amalsa.” (Roma 1:25, Today’s English Version) Minilyon so mandadayew ed saray inaatey lan inmunan atateng, diad panisian arawrawi so Dios pian naasinggeran. Diad relihyon a Hindu et dakel so dirios tan diosdiosa. Diad panaon na saray apostol nen Jesu-Kristo et nanduruman dios, a singa si Jupiter tan si Mercurio, so dinayew. (Gawa 14:11,12) Ibabangat na dakel ya iglesia na Kakristianoan a say Dios et sakey a Trinidad, a tibukelen na Dios Ama, Dios Anak, tan Dios Espiritu Santo.

Peteg a “wala so dakel a dirios tan dakel a kakatawan,” so kuan na Biblia. Balet, inyarum na satan: “Diad sikami wala so saksakey a Dios, say Ama, a sikato so panlapuan na ami ganagana.” (1 Corinto 8:5, 6) On, saksakey so tuan Dios. Balet siopa iyan Dios? Anto so nengneng to? Importantin naamtaan tayo iray ebat ed sarayan tepet. Oniay impikasi nen Jesus a mismo ed sayan Sakey: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Makatunongan a panisiaan ya akadependi so magnayon a pankaabigan tayo diad pakaamta na katuaan nipaakar ed Dios.

[Litrato ed pahina 3]

Anto so makapangipaliwawa ed kiwawala ra?

[Credit Line]

Balyina: Courtesy of Tourism Queensland

 [Picture Credit Line ed pahina 2]

COVER: Index Stock Photography © 2002