“Dago Kayo’d Siak, . . . et Itdan ta Kayoy Pampainawa”

Mankakaukolan na Maganat a Panamalaknab so Makatantandan Idaraak

“DAGO kayo’d siak, . . . et itdan ta kayoy pampainawa,” so inkuan nen Jesu-Kristo. (Mateo 11:28) Agaylan makapaliket ya imbitasyon manlapud Ulo na Kristianon kongregasyon! (Efeso 5:23) Sano molimolien tayo iratan a salita, talagan apresyaen tayo so makanan lapuan na pakainawaan​—say pililimog ed saray espiritual ya agagi tayo diad saray Kristianon pantitipon. Seguradon onabobon itayo ed salmista ya angikanta: “Nengneng yo, alay kaabigan tan alay kaligliwaan na panayam na sanaagi ed inkasaksakey!”​—Salmo 133:1.

On, sankaabigan iray kalimog tayo ed saratan a pantitipon parad panagdayew, tan maligen tan makapaliket so espiritual ya atmospera. Parad maabig a rason sirin et inkuan na sakey a kalangweran a Kristiano: “Sanagew ak diad eskuelaan, tan nadedetdetan ak a maong. Balet saray pantitipon so singa sakey a siroman diad desierto, a ditan et narerepreskoan ak pian talonaan lamet so ontumbok ya agew diad eskuelaan.” Inkuan na sakey a tobonbalo a taga-Nigeria: “Naimanok a say maapit a pililimog ed arum a mangaaro ed si Jehova so ontutulong ed siak pian mansiansian maapit ed sikato.”

Say lokal a Kingdom Hall na Tastasi nen Jehova so mausausar bilang sentro na tuan panagdayew diad komunidad. Diad maslak iran pasen, saray pantitipon so gagawaen diad Kingdom Hall a mamidua ed sakey simba, tan papasesegen iray iyaaralan na Biblia ya onatendin tampol no nayadyari ta pian nagunggonaan ira manlapud makarepreskon panlilimog ditan.​—Hebreos 10:24, 25.

 Maganat a Pankaukolan

Anggaman ontan, naiimano ya aliwan amin a Tastasi nen Jehova so walaan na matukoy a Kingdom Hall. Walay maganat a pankaukolan lapud makatantandan idaraak ed bilang na saray manangipalapag na Panarian ed sankamundoan. Nilibon Kingdom Hall so nakaukolan ni, nagkalalo la ed aliwa nin maaligwas iran bansa.​—Isaias 54:2; 60:22.

Diad pangiyilustra: Wala so samplora labat a Kingdom Hall parad 290 iran kongregasyon diad kabisera na Democratic Republic of Congo. Satan a bansa so walaan na maganat a pankaukolan parad dakel a Kingdom Hall. Diad Angola, maslak iran miting ed kongregasyon so gagawaen diad mapalaway a lugar lapud wala labat so pigpigaran Kingdom Hall. Ontan met so pankaukolan ed dakel niran bansa.

Kanian, nanlapula’d 1999, sakey ya inorganisan sagpot so ginawa pian ontulong ed panagpaalagey na Kingdom Hall diad saray bansa a limitado iray napangalaan. Pian naasikaso iray proyekto ed panagpaalagey diad saratan a bansa, saray eksperiensyadon Tastasi so mangiboboluntaryo ed saray serbisyo ra. Sano saratan a sagpot so natekepan na mabulos ya espiritu tan walaray akaparaan a lokal iran boluntaryo, saray resulta et talagan makapaseseg. Diad ontan, saray lokal a Tastasi so nagugunggonaan manlapud kipapasal da. Amin na saya so ontutulong pian nakapet iray pankaukolan parad panagpaalagey ed Kingdom Hall diad saray kawalaan dan bansa.

Nitatarya sirin so praktikal a tulong diad nitukoytukoy a paraan ed panagpaalagey na Kingdom Hall ya uusaren iray lokal a metodo tan materyales. Say kalat et aliwan say pakakapet labat ed pirmin pankaukolan parad saray Kingdom Hall noagta pian paaligwasen met so programa ed panagmantini a matukoy ed lokal iran sirkumstansya.​—2 Corinto 8:14, 15.

Makapaseseg Iran Agawaan

Anto so epekto na sarayan sagpot ed panangitarya na saray pasen parad pandayewan? Kasakbayan na 2001, onia so inkuan na sakey a report ed Malawi: “Talagan makapasagyat so agawaan diad sayan bansa. Diad duay bulan ni et nasumpal mi la iray kaaruman a Kingdom Hall.” (Retrato 1 tan 2) Diad Togo, saray boluntaryo so akapangipaalagey na pigaran simplin Kingdom Hall ed agano niran bulan. (Retrato 3) Saray maabig a kimey a gagawaen na saray mabulos a boluntaryo so ontutulong met ed pangitatarya na matukoy iran Kingdom Hall diad Mexico, Brazil, tan arum niran bansa.

Naiimano na saray kongregasyon a sano nipaalagey la so sakey a Kingdom Hall, namoria na saray totoo a mansiansia la ditan iray Tastasi nen Jehova. Dakel so singa masuyat a milimog ed Tastasi anggad sanen wala la so matukoy a pasen parad  panagdayewan. Onia so report na Kongregasyon a Nafisi ed Malawi: “Natan ta wala lay matukoy a Kingdom Hall mi, satan so manreresulta ed maabig a pantasi. Kanian, mainomay so pakapangigapo na saray panangiyaral na Biblia.”

Saray membro na Kongregasyon a Krake ed Benin so nansungdo na dakel a panagbalaw ed apalabas lapud say datin Kingdom Hall et dagdaan la no ikompara ed arum iran kapilya. (Retrato 4) Natan et say kongregasyon so walaan la na balon Kingdom Hall a mangirerepresenta na tuan panagdayew diad simpli ingen walay dignidad a paraan. (Retrato 5) Sayan kongregasyon so walaan na 34 a manangipalapag na Panarian a walaan na promedyon onaatendi a 73 diad saray miting ed Simba, balet 651 so inmatendi diad impangidedika ed  Kingdom Hall. Maslak ed sikara et taga-baley a mandinayew ed impakaimano ra a sarag na saray Tastasi so maganon panangipaalagey na sakey a hall. Diad pangipapaimano ed apalabas iran agawaan nipaakar ed saya, onia so insulat na sanga ed Zimbabwe: “Diad loob na sakey bulan a panagpaalagey na balon Kingdom Hall, kaslakan et adoble so onaatendi.”​—Retrato 6 tan 7.

Segurado, say dakel a balo iran Kingdom Hall so mamapawala na saray pasen parad espiritual a pakapasesegan na saray dedikadon Kristiano tan saray interesadon totoo. “Pirmi so liket mi,” so inkuan na sakey a Tasi diad Ukraine sanen uusaren la na lokal a kongregasyon so balo a Kingdom Hall. “Naimatonan min mismo no panon a tutulongan nen Jehova iray totoo to.”

[Kahon/Saray litrato ed pahina 10, 11]

Papablien so Mabunlok a Suporta

Naliliketan iray Tastasi nen Jehova ed pakakaimano ed maples ya iyaaligwas pian nakapet so maganat a pankaukolan parad balo iran Kingdom Hall diad interon globo. Say tuloytuloy ya idaraak ed bilang na saray managdayew ed si Jehova ed nanduruman bansa so mankakaukolan na pangipaalagey ed arapen na dakel a balo iran Kingdom Hall. Agayla, unong ed promedyo, legan na 2001 a serbisyon taon, 32 a balon kongregasyon so aporma kada simba! Saratan a kongregasyon so mankaukolan na saray pasen a pantitiponan tan pandayewan.

Nayarin onlesa so tepet: ‘Panon tayon gagastosan iray proyekto a singa say panagpaalagey na balo iran Kingdom Hall, nagkalalo la diad saray bansa a limitadoy pinansyal na saray agagi?’ Say ebat so managlawi ed namparan suporta na Dios tan say inkamabunlok na too.

Diad panotoor ed sipan to, ikakalbo nen Jehova so masanton espiritu to ed saray lingkor to, ya ontutulong ed sikaran ‘manggawa na maabig, a mayaman ed saray maabig a gawa, a managpalangkap, a mainomay a mangiter.’ (1 Timoteo 6:18) Say espiritu na Dios so manadagdag ed saray Tastasi nen Jehova pian suportaan so panangipulong ed Panarian diad amin a paraan​—ya igagana ray panaon, biskeg, personal a sagpot da, tan arum niran kaykayarian parad Kristianon aktibidades.

Say awawey a mabunlok a panangiter so mamapakiwas ed Tastasi tan arum ni ya ontulong ed panamalaknab tan panagpaalagey a kimey diad pinansyal a paraan. Nilikud ed itutulong da ed regular iran gastos na lokal a kongregasyon, sikara met so mandodonasyon parad panagpaalagey a kimey diad arum a parte na dalin.

Diad kada kongregasyon, walaray kahon a mabitar ya atatakan na “Contributions for the Worldwide Work​—Matthew 24:14.” Ditan et nayarin ipelag na saray indibidual iray boluntaryon donasyon da no kaliktan da. (2 Arari 12:9) Amin a donasyon, baleg man o melag, so aapresyaen. (Marcos 12:42-44) Sarayan pundo so uusaren ed nanduruman paraan unong ed pankaukolan, pati panagpaalagey na saray Kingdom Hall. Saratan a pundo so ag-isusueldo ed saray administrador lapud anggapo so ontan diad limog na Tastasi nen Jehova.

Kasin saray kontribusyon parad sankamundoan a kimey so onkakana ed gagala na saratan? On, peteg. Say sanga ed Liberia​—sakey a bansa ya atabek lay guerra sibil​—so mangirereport a karaklan ed Tastasi diman so nidunget ed agpakaempleyo tan seryoso iran problema ed pinansyal. Panon a nawalaan iray totoo nen Jehova ed sayan bansa na matukoy iran pasen parad panagdayew? “Saray mabunlok a kontribusyon na agagi ed arum a bansa so nausar pian gastosan so kimey,” so ipapaimano na sangan opisina. “Agaylan makabat tan maaron uksoyan!”

Saray lokal ya agagi so mandodonasyon met, anggaman ed limitadoy pinansyal da. Onia so irereport na bansa ed Aprika a Sierra Leone: “Saray lokal ya agagi so manusuporta ed sagpot tan maliket iran manginabang ed saray sagpot da tan antokaman a pinansyal iran kontribusyon a nayarian dan itulong ed panagpaalagey na saray Kingdom Hall.”

Kaunoran, sayan panagpaalagey a sagpot so kidadayewan nen Jehova. Onia so maligsan ibabaga na saray agagi ed Liberia: “Say panangipaalagey na matukoy iran pasen parad panagdayew diad interon bansa so mangipaimano ed totoo a say puron panagdayew so permanente dia tan mangiter na dignidad tan parakep ed matalonggaring a ngaran na Dios.”