Propesiya nen Isaias​—Liwawa Parad Amin a Katooan I

Kapitulo Beinte-Singko

Say Ari tan Saray Prinsipe To

Isaias 32:1-20

1, 2. Anto so nibaga ed lugan na Dead Sea Scroll na Isaias?

 DIAD pansamposampot na dekada na 1940, aromog so nikadkaduman koleksion na saray lukot diad saray ungib ya asingger ed Inatey a Dayat, diad Palestina. Akabkabat iratan bilang Dead Sea Scrolls tan panisiaan a nisulat iratan diad baetan na 200 K.K.P. tan 70 K.P. Say kabkabat a maong ed saratan et say lukot na Isaias a nisulat ed Hebreo diad malet a katat. Sayan lukot so ngalngali kompleto, tan samet labat so pidumaan na lugan na satan ed saray manuskrito na Masoretikon teksto ya apetsaan na ngalngali 1,000 taon ed saginonor. Kanian, ipapanengneng na lukot so suston panangipatalos ed lugan na Biblia.

² Sakey a makatantandan detalye nipaakar ed Dead Sea Scroll na Isaias et say seksion a titibukelen na kabkabat natan bilang Isaias kapitulo 32 so amarkaan na “X” ya insulat na eskriba ed gilig na pahina. Agtayo amta no akin a minarkaan itan na eskriba, balet amta tayo a walay bengatlan nikadkaduma ed sayan kabiangan na Masanton Biblia.

Manuuley ed Inkatunong tan Inkahustisya

3. Anton administrasyon so impropesiya ed saray libro na Isaias tan Apocalipsis?

³ Ginmapo so Isaias kapitulo 32 ed makapalikliket a propesiya a walaan na makatantandan kasumpalan ed panaon tayo: “Nia sakey ya ari so manari naani ed kaptekan [“inkatunong,” NW], tan saray prinsipe manuley ira naani ed inkatunong [“inkahustisya,” NW].” (Isaias 32:1) On, “Nia”! Sayan kelyaw so mangipapanonot ed mipadparan kelyaw a naromog ed unor a mapropetikon libro na Biblia: “Say manyurong ed trono kuanto: Nia, siak gawaen ko a balo so saray amin a bengatla.” (Apocalipsis 21:5) Saray libro na Biblia ya Isaias tan Apocalipsis, ya insulat diad baetan na 900 a taon, so angiparungtal na makapaligsan deskripsion na sakey a balon administrasyon​—‘sakey a balon tawen,’ a tutugyopen na Ari, si Kristo Jesus, a nitrono ed katawenan nen 1914, tan saray kaiban manuley a 144,000 ya “asaliw ira dia ed saray totoo”​—ontan met ed ‘sakey a balo a dalin,’ say sankamundoan tan nankakasakey a sosyedad na totoo. * (Apocalipsis 14:1-4; 21:1-4; Isaias 65:17-25) Sayan interamentin uksoyan so nagmaliw a posibli panamegley na dondon bagat nen Kristo.

4. Anton sentro na balon mundo so onkukurang la natan?

⁴ Kayarin anengneng nen apostol Juan ed pasingawey so unor ya inkatatakan na sarayan 144,000 a kaiban manuley, oniay inreport to: “Ninmengneng ak, tan nia, so sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita, a manalalagey ira’d arap na trono, tan ed arap na Kordero.” Nia so sentro na balon mundo​—sakey a baleg ya ulop a minilyon la natan so bilang da, ya atipon ed dapag na daiset, a kaslakan et mamatatken lan natitilak a kabiangan na 144,000. Sayan baleg ya ulop so makaliktar ed maples ya onsasabin baleg a kairapan tan diad Paraison dalin et miulop ed sikara iray pinaolin matoor tan binilyon nin arum ya ikdan na pankanawnawan mangagamil na pananisia. Amin a  manggawa na ontan so nabendisyonan na andi-anggaan a bilay.​—Apocalipsis 7:4, 9-17.

5-7. Anto so betang na saray impasakbay a “prinsipe” diad pulok na Dios?

⁵ Balet, anggad mansiasiansia ni so mundon napnoy-gula, kaukolan na saray membro na baleg ya ulop so salimbeng. Diad inkalapagan et saya so itatarya na “saray prinsipe” a ‘manuley ed inkahustisya.’ Agaylan dakep ya uksoyan! Sarayan “prinsipe” so nagkalalon deneskribe ed makapaligsa iran salita na propesiya nen Isaias: “Sakey a too so magmaliw naani a singa sakey ya amotan na dagem, tan sakey a siroman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya apagaan.”​—Isaias 32:2.

⁶ Diad sayan kaplesan a panaon na sankamundoan a kagogonigon, nakaukolan iray “prinsipe,” on, saray mamatatken a ‘manalwar ed amin a kasimpukokan,’ a mangasikaso ed karnero nen Jehova tan mangipakurang na inkahustisya a mitunosan ed matunong iran prinsipyo nen Jehova. (Gawa 20:28) Saratan a “prinsipe” so nepeg a makakapet ed saray kualipikasyon a nidatak ed 1 Timoteo 3:2-7 tan Tito 1:6-9.

⁷ Diad matalonggaring a propesiya to a manedeskribe ed makapagonigon a “kasampotan na sistema na bengabengatla,” inkuan nen Jesus: “Imanoen yo ya agkayo komon natatakot.” (Mateo 24:3-8, NW) Akin ya agnatatakot iray patumbok nen Jesus ed mapeligron kipapasen na mundo natan? Say sakey a rason et “saray prinsipe”​—balang lan alanaan odino ‘arum a karnero,’ so matoor a manasalimbeng ed pulok. (Juan 10:16) Sikaray andi-takot a mangaasikaso ed saray agagi ra, anggan diad arap na saray makapakebbiew ya etnikon pambabakal tan palanit a panagpatey. Diad mundon napgaan ed espiritual, seseguroen da a saray nagogonigon a totoo so nainawaan panamegley na makapabiskeg iran katuaan na Salitay Dios, say Biblia.

8. Panon ya ipapasal tan uusaren nen Jehova iray “prinsipe” a kabiangan na arum a karnero?

⁸ Legan na apalabas a 50 taon, “saray prinsipe” so malinew ya apatnagan. “Saray prinsipe” a kabiangan na arum a karnero so nipapasal bilang natitibukel a “pangulo” a klase pian kayari na baleg a kairapan, saray kualipikado ed sikara so akaparaan a turoen pian manlingkor ed administratibon betang diad ‘balon dalin.’ (Ezequiel 44:2, 3, NW; 2 Pedro 3:13) Diad pangitatarya ra na espiritual a giya tan pakainawaan legan a mangidadaulo ra diad serbisyo ed Panarian, papaneknekan day inkasikara a “singa anino ed batondampay,” a mangitatarok na inawa ed pulok diad nasasakopan na satan a panagdayewan. *

9. Antoran kipapasen so pakapatnagan a nakaukolan natan iray “prinsipe”?

⁹ Diad sarayan mapeligron kaunoran ya agew na marelmeng a mundo nen Satanas, kakkaukolan na saray Kristiano so ontan a proteksion. (2 Timoteo 3:1-5, 13) Onsisiplog iray maksil a dagem na palson doktrina tan ayesyes a propaganda. Manasibengbeng iray bagyo panamegley na saray bakal diad baetan tan diad loob na saray nasyon ontan met ed direktan panangataki ed matoor iran managdayew nen Jehova a Dios. Diad sayan mundo a napapaet lapud espiritual a kelang, kakkaukolan na saray Kristiano so ag-agus na danum na puro tan ag-alaokan a katuaan pian napenek so inkapgaan da ed espiritual. Makapalikliket, insipan nen Jehova a say manuuley ya Ari To, panamegley na alanaan ya agagi to tan saray masuportan “prinsipe” na arum a karnero, so mangitarya na panamaseseg tan panangiwanwan ed saray nagogonigon tan nadidismayan totoo diad sayan panaon na pankaukolan. Seguroen sirin nen Jehova ya ontalona no anto so matunong tan maptek.

Ontalineng Panamegley na Saray Mata, Layag, tan Puso

10. Antoran probisyon so ginawa nen Jehova pian “makanengneng” tan “makadngel” so totoo to na espiritual iran bengatla?

¹⁰ Panon so inkiwas na baleg ya ulop ed teokratikon uksoyan nen Jehova? Oniay intuloy na propesiya: “Saray mata na saray makanengneng ag-ira naani onkuyep, tan saray layag na saray makadngel ondengel ira naani.” (Isaias 32:3) Diad inlabas na saray taon, si Jehova so angitarya pian nibangat tan ontakken iray pinablin lingkor to. Say Teokratikon Eskuelaan Parad Ministeryo tan arum niran miting ya onkukurang diad saray kongregasyon na Tastasi nen Jehova ed interon mundo; say distrito, nasyonal, tan internasyonal iran kombension; ontan met ed saray nikaduman panangipasal ed “saray prinsipe” pian simamaaron mangasikaso ed pulok, so akatulong ya amin ed kiwala na nankakasakey tan sankamundoan ya impanaagi na saray minilyon. Inerman so kawalaan na sarayan managpastol diad dalin, akaparaan iran mangawat ed saray pananguman ed pakatalos na onaaligwas a salita na katuaan. Tekep na nipasal ed Biblia a konsiensia, lawas iran akaparaan ya ondengel tan mangunor.​—Salmo 25:10.

11. Akin a matalek la a mansasalita iray totoo na Dios natan, ya ag-ataata ed panduaruwa?

¹¹ Insan amasakbay so propesiya: “Say puso na agmalikas natalosan to naani pikakabat, et say dila na saray amil masiglat naani a manbalikas a maliwawa.” (Isaias 32:4) Anggapo komon so maganat a manisip no anto so susto tan lingo. Kuan na Biblia: “Nanengneng mo so too a magangganat ed saray salita to? Wala  so lalo ya ilalo ed maatiw nen sikato.” (Uliran 29:20; Eclesiastes 5:2) Antis na 1919, anggan saray totoo na Dios so amatikan met na saray Binababilonian ideya. Balet manlapu la’d saman a taon, inikdan ira nen Jehova na mas malinew a pakatalos ed saray gagala to. Nalmoan dan aliwan ingganat so katuaan ya imparungtal to, noagta talagan ninonot a maong, tan mansasalita la ra natan tekep na kaseguroan ed sisisiaen da, ya aliwan ataata ed panduaruwa.

(Ituloy ed onsublay a paway.)

[Saray paimano ed leksab]

[Tepetepet Parad Panagaral]