Tepetepet Manlapud Saray Managbasa

Kasin makabat parad sakey a tuan Kristiano so iyakar ed ponpon odino kasal ed loob na simbaan?

Say pibiang ed antokaman a nengneng na palson relihyon so kainglit nen Jehova tan nepeg a paliisan. (2 Corinto 6:14-17; Apocalipsis 18:4) Say ponpon ed simbaan et sakey a relihyoson serbisyo a maseguron manasaglawi ed sakey a sermon a mangiyaalibansa ed agmakasulatan iran ideya a singa say imortalidad na kamarerwa tan mangatatawen a tumang parad amin a maong a totoo. Nayarin laktipen met na satan iray agamil a singa say pan-krus tan pibiang ed dasal na sakey a pari odino ministro. Saray dasal tan arum niran relihyoson agamil a sumlang ed bangat na Biblia so nayari met a kabiangan na relihyoson seremonya ed kasal diad simbaan odino ed arum nin pasen. Diad pidagup ed saramay mangaagamil na palson relihyoson gawa, say sakey a Kristiano so nayarin nairapan a manresisti ed pakakadesdes a mibiang. Agaylan agmakabat so kipaarap ed ontan a pananesdes!

Panon balet no naoobliga so sakey a Kristiano ya onla ed sakey a ponpon odino kasal diad loob na simbaan? Alimbawa, nayarin paskaren na agmananisian asawan laki ya itagar so Kristianon asawa to ed ontan ya okasyon. Nayari kasi a sikatoy onlan manimano labat? Nisesengeg ed panamagalang ed saray kaliktan na asawa ton laki, nayarin desidien na asawan bii so mila ed sikato, a determinadon agmibiang ed antokaman a relihyoson seremonya. Diad biek a dapag, nayarin desidien to met so ag-onla, ya isipen ton say desdes na saray kipapasen ed emosyonal a paraan so agto naanosan, a nayarin pansengegan na pakapangikompromiso to ed saray maridios a prinsipyo. Desisyon to itan. Maseguron kaliktan to so magmaliw a determinado ed puso to, a walaan na malinis a konsiensia.​—1 Timoteo 1:19.

Antokaman so kipapasen, makagunggona parad sikato so pangipaliwawa ed asawa ton laki ya agnitepel na konsiensia to so mibiang ed antokaman a relihyoson seremonya odino ed saray panangansion ed simbaan odino pangituek na ulo to sano mandadasal. Base ed panangipaliwawa to, namoria na asawa ton laki a say kiwala na akulaw to so nayarin mamalesa na kipapasen ya agmakapaliket ed sikato. Nayarin desidien la na laki so onlan bukor nisengeg ed panangaro to ed akulaw to, respeto ed saray sisiaen to, odino pilalek a paliisan so antokaman a pakabaingan. Balet no ipilit na masiken to a sikatoy mila, nayarin sikatoy onlan manimano labat.

Agnepeg met ya ibaliwala so epekto ed saray kapananisiaan tayo sano onatendi itayo ed sakey a seremonya ed loob na simbaan. Kasin naapektaan so konsiensia na arum? Kasin napakapuy so talindeg da ya agmibiang ed idolatriya? “Abobonan so bengatla ran sankaabigan,” so insimbawa nen apostol Pablo, “pian matua kayo komon tan anggapo so pakabalawan yo ya angga ed agew nen Kristo.”​—Filipos 1:10.

No say okasyon et mangilalanor ed maapit a kanayon, nayarin wala niray kaaruman a desdes na pamilya. Antokaman so kipapasen, kaukolan a say Kristiano so maalwar a manimbang ed amin a sengegan a nalalanor. Walaray kipapasen a nayarin isipen na asawan laki odino bii ya anggapo so onlesan pamproblemaan diad iyatendi ed ponpon odino kasal ed simbaan bilang maniimano labat. Balet, nayarin ontan iray kipapasen ta diad iyatendi, say maseguron makapuy ya epekto ed mismon konsiensia na sakey odino ed arum so manaeg ed posibli iran gunggona diad pagmaliw a presente. Antokaman so situasyon, nepeg a seguroen na sakey a Kristiano a say desisyon to et mamasiansia ed maong a konsiensia to ed arap na Dios tan too.