Alinisan Bilang Totoon Parad Maabig Iran Gawa
Alinisan Bilang Totoon Parad Maabig Iran Gawa
“Linisan tayo komon so inkasikatayon dili ed ami’ tilol na laman tan espiritu, a yadyarien itayo na kasantosan dia ed takot ed Dios.”—2 CORINTO 7:1.
1. Anto so kakaukolanen nen Jehova ed saramay mandadayew ed sikato?
“SIOPA so ontatdang ed pukdol nen Jehova? Tan siopa so onalagey ed masantos a pasen to?” Si Arin David na kadaanan ya Israel so amalesa ed satan a makatenyeg-kanonotan a tepet nipaakar ed panagdayew a makapaliket ed si Jehova. Insan to inter so ebat: “Say walaan na malinis a limalima, tan maralus a puso; a sikato agto intandoro so puso to ed katilaan, tan agnansamba na pamalpalingo to.” (Salmo 24:3, 4) Pian makapaliket ed si Jehova, a pinagka-persona na kasantosan, say sakey so nepeg a magmaliw a malinis tan masanto. Asasakbay ni et pinanonotan la nen Jehova so kongregasyon na Israel: “Mansimpit kayo ed inkasikayo, tan mansantos kayo; ta siak santo ak.”—Levitico 11:44, 45; 19:2.
2. Panon ya indanet di Pablo tan Santiago so kaimportantian na kalinisan ed tuan panagdayew?
2 Kayari na pigaran siglo, sinulat nen apostol Pablo iray kapara ton Kristiano diad imoral a syudad na Corinto: “Anta wala ed sikatayo sirin so saraya a sipan, inararok ira, linisan tayo komon so inkasikatayon dili ed ami’ tilol na laman tan espiritu, a yadyarien itayo na kasantosan dia ed takot ed Dios.” (2 Corinto 7:1) Ipapabitar lamet na sayan punto a say sakey so kaukolan a magmaliw a malinis tan andi-tilol tan ag-arutakan ed pisikal tan espiritual pian sikatoy nawalaan na pisisiglaotan ed Dios tan makagamor ed saray insipan ton bendisyon. Ontan met, oniay kuan nen babangatan a Santiago sanen insulat to so nipaakar ed panagdayew a makapaliket ed Dios: “Say relihyon a malinew tan andi tilol ed arap na Dios tayo tan Ama sikato ya: Dalawen so saray ulila tan babalo a bibii ed kaermenan da, tan say pansiansia ya andi mantsa to ed mundo.”—Santiago 1:27.
3. Pian makapaliket ed Dios so panagdayew tayo, anto so nepeg tayon nonoten a maong?
3 Lapud say pagmaliw a malinis, masanto, tan andi-tilol so importante ed tuan panagdayew, siopaman a manpilalek a makagamor na panangabobon na Dios so nepeg a sinononot a maong ed pakakapet ed saratan. Balet, lapud nanduruman tuloy iray estandarte tan ideya na totoo natan nipaakar ed kalinisan, nakaukolan tayon talosan tan tuloken so ipapasen nen Jehova a malinis tan makapaliket. Nipaakar ed saya et nakaukolan tayon amtaen no anto so kakaukolanen na Dios ed saray managdayew ed sikato tan no anto so ginawa to la pian natulongan ira a magmaliw tan mansiansian malinis tan makapaliket ed sikato.—Salmo 119:9; Daniel 12:10.
Malinis Parad Tuan Panagdayew
4. Ipaliwawa so ideya na Biblia nipaakar ed inkamalinis.
4 Parad maslak a totoo, say pagmaliw a malinis et mankabaliksan labat na pagmaliw ya agmarutak odino agmakaalis. Balet diad Biblia, say ideya na pagmaliw a malinis so nipabitar ed pigaran Hebreo tan Griegon salita a manideskribe ed kalinisan ya aliwa labat lan diad pisikal a pantalos noagta mas mabetbet et diad moral tan espiritual a pantalos. Kanian, oniay nikuan ed sakey ya ensayklopedia na Biblia: “Saray terminon ‘malinis’ tan ‘agmalinis’ so matalag ya isiglaot ed saray pamaakaran na kalinisan ed laman, balet manuna et diad saray relihyoson pamaakaran. Unong ed satan ya uker, say prinsipyo na ‘inkamalinis’ so mangapekta ed amin lawarin aspekto na bilay.”
5. Diad anton kalaknab so impangiwanwan na Mosaikon Ganggan ed kalinisan diad bilay na saray Israelita?
5 On, laktipen na Mosaikon Ganggan iray totontonen tan reglamento ed amin lawarin aspekto na bilay na saray Israelita, a mangidadatak ed no anto so malinis tan makapaliket tan no anto so andi. Alimbawa, diad Levitico kapitulo 11 anggad 15, naromog tayo iray detalyadon instruksion a misiglaotan ed kalinisan tan karutakan. Walaray ayayep ya agmalinis, tan ag-iratan nepeg a kanen na saray Israelita. Magmaliw ya agmalinis so sakey a bii ed loob na espesipikon panat na panaon kayari na pananak to. Walaray sakit ed baog, nagkalautla ed kating, tan saray ompapaway (discharges) ed kayarian na laki tan bii so sengegan met na pagmaliw ya agmalinis na sakey a too. Indatak met na Ganggan no anto so nepeg a gawaen ed saray situasyon a mangilalanor ed karutakan. Alimbawa, diad Numeros 5:2 et oniay nabasa tayo: “Ibilin mo ed saray anak na Israel a papawayen ed kampamento so balang akating, tan balang sakey ya asakitan na panturo, tan siopaman ya aliwan malinis lapu ed inatey.”
6. Parad anton gagala a niiter iray ganggan nipaakar ed kalinisan?
6 Andi-duaruwa, saraya tan arum niran ganggan nen Jehova so angipatnag la na saray ideya nipaakar ed medikal tan pisyolohikal a paraan sakbay nin tuloy a nadiskobre itan, tan agunggonaan so totoo sanen inunor da iratan. Ingen, sarayan ganggan so aliwa lambengat a sakey a kodigo nipaakar ed bunigas odino onkana labat a medikal iran totontonen. Kabiangan iratan ed tuan panagdayew. Say katuaan a saratan so angapekta ed inagew-agew a panagbilay na totoo—pangan, pananak, relasyon na sanasawa, tan arum nira—so angipabitar lambengat ed punto a bilang Dios da et si Jehova so walaay kanepegan a manetermina parad sikara no anto so manepeg tan no anto so agmanepeg ed amin ya aspekto na bilay da, a nikabkabiig a nidedika ed si Jehova.—Deuteronomio 7:6; Salmo 135:4.
7. Diad pangunor ed Ganggan, anton bendisyon so nagamoran na nasyon na Israel?
7 Say Ganggan a sipanan so analimbeng met ed saray Israelita manlapud makatilol iran agamil na saray nasyon a walad kaliberliber da. Diad matoor a panumpal da ed Ganggan, kalaktip lay amin iran kakaukolanen parad pansiansian malinis ed imaton nen Jehova, saray Israelita so magmaliw a makapaliket ed panaglingkor da ed Dios tan makagamor ira na bendisyon to. Nipaakar ed saya, oniay kuan nen Jehova ed nasyon: “No tuloken yo so boses ko a tuatua, tan em-eman yo so sipanan ko, sikayo ed satan so pabpablien ko a pinagka-kayamanan ko a manuna nen saray amin a totoo: ta amin a dalin kien ko. Et sikayo naani singa sakey a panarian na saray saserdotes, tan sakey a masimpit a nasyon.”—Exodo 19:5, 6; Deuteronomio 26:19.
8. Akin a nepeg ya imanoen a maong na saray Kristiano natan so nibaga ed Ganggan nipaakar ed kalinisan?
8 Lapud saratan a detalye so inlaktip nen Jehova ed Ganggan pian nibangat iray Israelita ed no panon so pagmaliw dan malinis, masanto, tan makapaliket ed sikato, agta matukoy met ed saray Kristiano natan so maalwar a pangonsidera ed no panon so pakakapet da ed sayan pamaakaran? Unong ed insalaysay nen Pablo, anggaman saray Kristiano so anggapo la ed silong na Ganggan, nepeg a sinononot ira ya amin a nidatak ed Ganggan et “anino na saray bengatla ya onsabi; bangbalet say laman sikato so kayarian nen Kristo.” (Colosas 2:17; Hebreos 10:1) No si Jehova a Dios, ya angikuan ya, “Agak anguman,” et moriaen ton importante ed tuan panagdayew nensaman so pagmaliw a malinis tan andi-tilol, sikatayo natan so nepeg a manseryoso ed pagmaliw a malinis ed pisikal, moral, tan espiritual no kaliktan tayo so panangabobon tan bendisyon to.—Malaquias 3:6; Roma 15:4; 1 Corinto 10:11, 31.
Say Kalinisan ed Pisikal so Mangirekomenda ed Sikatayo
9, 10. (a) Akin ya importante ed sakey a Kristiano so kalinisan ed pisikal? (b) Antoray mabetbet a nikomento nipaakar ed saray kombension na saray Tastasi nen Jehova?
9 Kasin say kalinisan ed pisikal so importante nin kabiangan na tuan panagdayew? Anggaman say pisikal a kalinisan lambengat et agto pagmaliwen so sakey bilang tuan managdayew ed Dios, maseguron matukoy ed tuan managdayew so pagmaliw a malinis ed pisikal legan ya iyaabuloy na saray sirkumstansya to. Nagkalalo la natan, saramay mansiasiansian malinis so mabetbet a naiimano na totoon walad kaliberliber da lapud ta dakel so agtanton mamapasiansian malinis ed inkasikaran dili, diad panangawes da, odino ed kaliberliber da. Saya so mangitonton ed positibo iran resulta, a singa ed inkuan nen Pablo ed saray Kristianon taga-Corinto: “Agkami mangiter na bengatlan kagapolan pian say panangasikaso mi agnabalaw. Et dia ed balang bengatla imamatalek mi inkasikamin dili, a singa ministros na Dios.”—2 Corinto 6:3, 4.
10 Saray Tastasi nen Jehova so mabetbet a kokomendaan na saray opisyales na gobierno lapud malinis, mauksoy, tan marespeton kondukta tan ugali ra, a nagkalautlan naiimano diad angkakabaleg iran kombension. Alimbawa, nipaakar ed sakey a kombension ya agawa ed probinsya na Savona, Italya, oniay inkomento na peryodiko a La Stampa: “Say naimanon tampol sano manakar so sakey ed saray pasilidad et say kalinisan tan inkauksoy na totoon manguusar ed saratan.” Kayari kombension na Tastasi diad istadyum na São Paulo, Brazil, inkuan na opisyal na istadyum ed superbaysor na saray managlinis: “Manlapud natan et linisan tayo so istadyum a singa ed panaglinis na saray Tastasi nen Jehova.” Inkuan na sananey nin opisyal ed satan met lanlamang ya istadyum: “Sano labay ya abangan na saray Tastasi nen Jehova so istadyum, say nonoten mi labat et saray petsa na pangusar da. Anggapo lay arum nin pampagaan mi.”
11, 12. (a) Anton prinsipyo na Biblia so nepeg tayon nodnonoten nipaakar ed personal a kalinisan? (b) Antoray nayarin itepet nipaakar ed personal iran ugali tan paraan na kabibilay tayo?
11 No say kalinisan tan inkauksoy ed pasen na panagdayew tayo et kirayewan na Dios a dadayewen tayo, seguradon importante met so pangipatnag ed saratan a kalidad diad personal a kabibilay tayo. Balet, diad loob na ayaman tayo, nayarin isipen tayo a walaan itayo na kanepegan a manrelaks tan onkiwas na labay tayo. Tan no nipaakar ed panangawes tan panag-ayos, maseguron walaan itayo na kawayangan a manpili no anto so komportable tan marakep ed sikatayo! Ingen, diad malaknab a kipapasen, amin na saya so relatibo lambengat. Nonoten pa a diad impaningbat nen Pablo ed panagpili na sakey ed kanen to iran tagano et pinasakbayan to iray kapara ton Kristiano: “Imano yo, ta aglapiga no sayan inkabulos yo magmaliw a kagapolan na saray makapuy.” Insan indatak to so sakey a makanan prinsipyo: “Amin a bengatla niyabuloy, bangbalet aliwan amin et manepeg. Ami bengatla niyabuloy; bangbalet ta aliwa, ya amin da mamabiskeg.” (1 Corinto 8:9; 10:23) Panon ya onaplika ed sikatayo so simbawa nen Pablo nipaakar ed kalinisan?
12 Makatunongan labat ya ilaloan na totoo ed sakey a ministro na Dios so pagmaliw ton malinis tan mauksoy ed paraan na kabibilay to. Kanian nepeg tayon seguroen a say itsura na ayaman tayo tan saray kaliberliber na satan so agmangapekta ed itatalindeg tayo, salanti, bilang ministros na Salitay Dios. Anton nengneng na pantasi, odino panamatua so ipapabitar na ayaman tayo nipaakar ed sikatayo tan ed saray sisiaen tayo? Kasin ipapatnag na satan a sikatayo so peteg a manpipilalek a manbilay diad malinis tan mauksoy a balon mundo na inkatunong, ya ipupurek tayon maong ed arum? (2 Pedro 3:13) Ontan met, say personal ya itsura tayo—balanglan legan na panaoy panagrelaks odino diad ministeryo—so mamapuersa odino mamakapuy ed makapasagyat a mensahe ya ipupulong tayo. Alimbawa, imanoen iyan komento na sakey a reporter na peryodiko diad Mexico: “Petepeteg, kalangweran a totoo so baleg a kabiangan na saray membro na saray Tastasi nen Jehova, tan say mapatpatnag et saray puklis da, inkalinis da, tan say masimpit a panangawes da.” Agaylan liket so pakawalaan tayo na ontan iran kalangweran diad limog tayo!
13. Anto so nagawaan tayo pian naseguro a malinis tan mauksoy so amin ya aspekto na inagew-agew a panagbilay tayo?
13 Siempre, mairap so paneguron naynay a malinis tan mauksoy so itsura tayo, saray kagawaan tayo, tan say ayaman tayo. Say nakaukolan et, aliwan say dakel a komplikado tan mablin kagawaan odino uusaren, noagta say maong a panagplano tan tuloytuloy a sagpot. Nepeg ya ipanaon so panlinis ed laman tayo, saray kawes tayo, say ayaman tayo, say luganan tayo, tan arum ni. Say pagmaliw ya okupado ed ministeryo, iyaatendi ed miting, tan personal a panagaral—nilikud ed panangasikaso ed arum niran obligasyon ed inagew-agew—so agmangipuera ed sikatayo manlapud pankaukolan a mansiansian malinis tan makapaliket ed imaton na Dios tan totoo. Say kabisadon prinsipyo ya “amin a bengatla [et] wala so sakey a panaon” so onaaplika met ed sayan kabiangan na bilay tayo.—Eclesiastes 3:1.
Sakey a Puson Agmarumsis
14. Akin a nibagan mas importante so moral tan espiritual a kalinisan nen say pisikal a kalinisan?
14 No panon ya importante so pangimano ed pisikal a kalinisan, lalon importante so pannonot ed moral tan espiritual a kalinisan. Oniay nibaga tayo no nodnonoten tayo ya impulisay nen Jehova so nasyon na Israel, aliwan lapud sikara so agmalinis ed pisikal, noagta lapud sikaray arutakan ed moral tan espiritual. Panamegley nen propetan Isaias, inkuan ed sikara nen Jehova a nisesengeg ed impagmaliw dan “managkasalanan a nasyon, baley a nanawit na inkauges,” saray bagat da, say panagngilin da ed balon bulan tan sabaton, on, anggan saray pikakasi ra so nagmaliw a makapabelat ed sikato. Anto so nepeg dan gawaen pian nagamoran da lamet so pabor na Dios? Inkuan nen Jehova: “Manuras kayo, manlinis kayo; iwaklit yo so mauges ed saray gawa yo a manlapu ed arap na saray matak; ontunda kayo a manggawa na mauges.”—Isaias 1:4, 11-16.
15, 16. Anto so imbaga nen Jesus a mandumsis ed too, tan panon itayon nagunggonaan ed saray salita nen Jesus?
15 Pian lalon natalosan so kaimportantian na moral tan espiritual a kalinisan, konsideraen so inkuan nen Jesus sanen imbaga na saray Fariseo tan eskriba ya agmalinis iray babangatan to lapud agda inurasan so kalimaan da sakbay iran mangan. Sikaray kinorehi nen Jesus diad impangikuanton: “Aliwan say onloob ed sangi so mandumsis ed too noag say ombesngaw ed sangi, saya so mandumsis ed too.” Insan impaliwawa nen Jesus: “Saray bengatlan ombesngaw ed sangi manlapu ra’d puso; et dumsisan da so too. Ta dia ed puso so pawayan na saray mauges a nonot, panagpatey, saray pikakalugoran, saray panaglawan, saray panagtakew, panagtasi ed aliwan tua, saray mabanday a salita. Saraya so mandumsis ed too; say panangan balet ya ag-urasan so lima agto dumsisan so too.”—Mateo 15:11, 18-20.
16 Anto so naaralan tayo manlapud saray salita nen Jesus? Impabitar nen Jesus a say marelmeng, imoral, tan agmalinis iran gawa so manlapu ed marelmeng, imoral, tan agmalinis iran kiling na puso. Unong ya inkuan nen babangatan a Santiago, say “sinansakey a too natukso, no natangguyor tan naayat na kaibgan na laman to a dili.” (Santiago 1:14, 15) Kanian, no agtayo labay so makagawa na saray ambelat a kasalanan ya indeskribe nen Jesus, nepeg ya ekalen tayo iratan a sigpot tan agtayo aabuloyan so puso tayo ya onkiling ed saratan a bengatla. Kabaliksan na satan a nepeg itayon maalwar nipaakar ed babasaen, babantayan, tan dedengelen tayo. Natan, makasengeg ed bulos a panangibalikas tan panangiyabuloy lapud artistikon bengatla, say panligliwaan tan saray industriya na patalastas so mamapawala na dakerakel iran tanol tan retrato a lalon manasagyat ed saray kagletan na makabos a laman. Kaukolan a determinado itayo ya agpapalamoten so ontan iran ideya diad puso tayo. Say manunaan et nepeg itayon manbantay a naynay diad pamasiansia tayo ed malinis tan agmarumsis a puso ta pian magmaliw itayon makapaliket tan naabobonan na Dios.—Uliran 4:23.
Alinisan Parad Maabig Iran Gawa
17. Akin ya intarok nen Jehova so totoo to ed malinis a kipapasen?
17 Diad tulong nen Jehova, maseguron sakey a bendisyon tan proteksion a napanggayagaan tayo so malinis a talindeg ed arap to. (2 Corinto 6:14-18) Ingen, natalosan tayo met ya intarok nen Jehova so totoo to diad malinis a kipapasen lapud espesipikon gagala. Inkuan nen Pablo ed si Tito a si Kristo Jesus et “initer to so inkasikato ya insalat ed sikatayo, pian dondonen to itayo ed amin a kaugsan, tan linisan to so sakey a baley a nipaakar a kien ton dili, mapaga [“maseseg,” NW] ed saray maabig a gawa.” (Tito 2:14) Bilang alinisan a totoo, antoran kimey so nepeg a pansesegan tayo?
18. Panon tayon nipatnag a maseseg itayo ed saray maabig a gawa?
18 Manuna’d amin, nepeg tayon isekar so inkasikatayo diad mapublikon pangiyabawag ed maong a balita na Panarian na Dios. (Mateo 24:14) Diad panggawa ed satan, niyoopresi tayo ed totoo ed inerman a pasen so ilalo a manbilay ya andi-anggaan diad dalin ya anggapo so antokaman a polusyon. (2 Pedro 3:13) Saray maabig a gawa tayo so mangilaktip met ed pangipatnag na bungay espiritu na Dios diad inagew-agew a kabibilay tayo, a kigloriaan na mangatatawen ya Ama tayo. (Galacia 5:22, 23; 1 Pedro 2:12) Tan agtayo lilingwanan iramay andi ed katuaan a nayarin naapektaan a tuloy na natural iran desyang odino trahedya ed too. Sinononot itayo ed simbawa nen Pablo: “Ontan sirin, unong a wala so kiambegya manggawa itayo na maabig ed saray amin, nagkalalo ed saray kaamong na pananisia.” (Galacia 6:10) Amin na saratan a serbisyo, a nisaklang manlapud malinis a puso tan puron motibo, so makapaliket ed Dios.—1 Timoteo 1:5.
19. Antoran bendisyon so manatalaran ed sikatayo sano itultuloy tayon mantinien so atagey ya estandarte na kalinisan—diad pisikal, moral, tan espiritual a paraan?
19 Bilang lingkor na Sankatageyan, talinengen tayo iray salita nen Pablo: “Pikasik ed sikayo, agagi, lapu ed saray panangasi Dios, ya ipatnag yo so saray laman yo a mabilay a bagat, masantos, makapaliket ed Dios, ta sikato so maespiritu a lingkor yo.” (Roma 12:1) Komon ta itultuloy tayon pablien so pribilehyo tayo bilang nilinisan nen Jehova tan gawaen tayo so anggaay nayarian tayo pian namantini so atagey ya estandarte ed pisikal, moral, tan espiritual a kalinisan. Diad panggagawa tayo ed satan, aliwa lambengat a dilin-respeto tan inkapnek so nagamoran tayo natan noagta ontan met ed ilalo a naimatonan so kaandi na “saray una a bengatla”—say kaplesan a marelmeng tan marumsis a sistema—sano say Dios et ‘gawaen to lan balo so amin a bengatla.’—Apocalipsis 21:4, 5.
Kasin Natandaan Yo?
• Akin a niiter ed saray Israelita so dakerakel a ganggan nipaakar ed kalinisan?
• Panon a mamapuersa so pisikal a kalinisan ed makapasagyat a mensahen ipupulong tayo?
• Akin a lalon importante so moral tan espiritual a kalinisan nen say pisikal a kalinisan?
• Panon tayon nipatnag a sikatayo so totoo a “maseseg ed saray maabig a gawa”?
[Tepetepet Parad Panagaral]
[Saray litrato ed pahina 21]
Lapud pisikal a kalinisan, lalon makapasagyat so mensahen ipupulong tayo
[Litrato ed pahina 22]
Impasakbay nen Jesus a saray marelmeng a kanonotan so mangitonton ed marelmeng iran gawa
[Saray litrato ed pahina 23]
Bilang alinisan a totoo, saray Tastasi nen Jehova so maseseg parad maabig iran gawa