Anto so Panmoriam ed Ipapatey?

NAYNAY a mantatalaran ed sikatayo so ipapatey legan tayon gagawaen iray inagew-agew a kimey tayo, anggan panon lay inkabunigas odino inkayaman tayo. Nayarin ompatey itayo diad ontumbok ya ibeltang tayo ed karsada odino iyugip tayo. Saray desyang a singa saray inyataki na terorista nen Setyembre 11, 2001, diad New York City tan Washington, D.C., so mangipapamoria ed sikatayo a say “kaunoran a kabusol,” say patey, so manitipon na saray biktima to manlapud amin a nengneng na panagbilay tan edad, a no maminsan et manitigway na nilibon bilay diad loob labat na pigaran minuto.​—1 Corinto 15:26.

Anggaman ontan, ompapatnag a say ipapatey so makapainteres ed totoo. Anggapo lay ompatnag a masaliw a peryodiko odino managyat ed dakel a totoo a manbantay na telebisyon nen saray balita a nipaakar ed impatey, nagkalautla say impatey na dakdakel a totoo diad makapakebbiew iran kipapasen. Singano agbalot onsawa so totoo ed satan, balanglan ipapatey nisesengeg ed bakal, kalamidad, krimen, odino sakit. Sayan pirmin pampapaga ed patey so nipapatnag diad makawetwet a tuloy a paraan na alabas a panag-ermen sano ompatey iray dederlengen odino bantog a totoo.

Sayan amin so agniburi. Siansia nin makapainteres ed totoo so ipapatey​—say ipatey na arum. Balet, sano sikaray mismon nipaarap ed ipapatey, agda labay a nonoten itan. Say mismon ipapatey tayo et sakey a pamaakaran ya aglabay a molimolien na maslak ed sikatayo.

Nagogonigon Ka ta Lapud Ipapatey?

Agmakapaliket lawas so pannonot ed mismon ipapatey tayo tan lawas lan ontan. Akin? Lapud insipor na Dios ed puso tayo so pampilalek a manbilay a maando. “Impasen to so kaandoan [“inkamagnayon,” Anchor Bible] ed puso ra,” so kuan na Eclesiastes 3:11. Kanian say inkapeteg na ipapatey so magmamaliw a sumlang ed akindalem a liknaan na totoo, a tuloy-tuloy itan ya agmantunosan. Pian naresolbi iyan akindalem ya agpantunosan tan pian napenek so sipor lan pilalek a manbilay, amalesa so totoo na amin a nengneng na sisisiaen, manlapud doktrina nipaakar ed ag-ipatey na kamarerwa ya anggad say sisiaen nipaakar ed reinkarnasyon.

Antokaman so kipapasen, say ipapatey so makapagonigon tan makapataktakot ya ebento, tan say takot ed ipapatey so inkalapagan. Sirin, nepeg ya agtayo la pankelawan a say ipapatey so momoriaen na inkalapagan a sosyedad na too a makapadismayan iilaloan. Sakey lan rason et ipaparungtal na ipapatey so ultimon kaapaan na bilay a nisentro ed pangegemtan na kayamanan tan pakayari.

Niyarawi Ka ta Lapud Ipapatey?

Nensaman et kaslakan ya aabuloyan so sakey a toon walaan na agnatambal a sakit odino  makapatey a sugat ya ompatey a walad dikingan to iray kabkabat tan inad-aro to diad mismon abung to. Mabetbet ya ontan so kipapasen diad panaon na Biblia, tan nagagawa ni itan diad arum a kultura. (Genesis 49:1, 2, 33) Diad saratan a kipapasen, say pamilya so mantitipon, tan kaiba iray ugugaw ed pantotongtong. Saya so mangipalikna ed kada membro na pamilya ya agto bukbukor so maneermen tan makaligliwa iya lapud sikaray mantutulongan ed responsabilidad tan saniiban mannanangis.

Saya so miduman tuloy ed say nagagawa ed sakey a sosyedad a sebel a pantongtongan so ipapatey, ya ipapasen bilang makapaermen, tan ipuepuera iray ugugaw lapud isipen dan “agda nasarag” itan. Duma la natan so ipapatey diad nanduruman paraan, tan mabetbet a mas maermen. Anggaman maslak so malabay ya ompatey ed abung, a mareen tan maaron naasikaso na pamilya, say maruksan kapetegan et dakel so ompapatey diad ospital, a kaslakan et nisian tan manliliknay ot-ot tan akakonekta ed makapataktakot iran aparato na high-tech a kagawaan. Diad biek a dapag, minilyon so basta ompapatey ya ag-iilaloan​—saray agkabat a biktima na palanit a panamatey, eras, AIDS, guerra sibil, odino sobran kairapan lambengat.

Sakey a Pamaakaran a Molimolien

Ag-ibabaga na Biblia a makapuy so pandalepdep ed ipapatey. Diad tua et ibabaga ed sikatayo na Eclesiastes 7:2: “Magmaong so iyakar ed abung a panagogolan nen say yakar ed abung a panliketan: ta satan so kasumpalan na amin a totoo.” Sano nipaarap ed kapetegan na ipapatey, nayarin benegan tayo iray inagew-agew a kapagaan odino kimey tayo tan iyapasakey so imano tayo diad kinatikey na bilay. Makatulong iya ed sikatayo pian makapambilay itayo diad paraan a lalon makabaliksan imbes a basta labat la manbilay ya andian na giya odino gagala.

Anto so panmoriam ed ipapatey? Kasin nausisam la so liknaan, sisisiaen, iilaloan, tan tatakotan mo nipaakar ed panampot na bilay mo?

Singa met ed kasiporan na bilay, say kasiporan na ipapatey so agsarag ya ipaliwawa tan talosan na too. Say mogmon napanmatalkan ya autoridad ed sayan pamaakaran et say Manamalsa tayo. Sikato so “subol na bilay,” tan sikatoy “makankien na kililiktar a manlapu ed patey.” (Salmo 36:9; 68:20) Anggaman ompatnag itan a makapakelaw, say pangusisa ed pigaran kabkabat a sisiaen nipaakar ed ipapatey diad pangonsidera ed Salitay Dios so peteg a makaligliwa tan makapaseseg. Satan so mangiparungtal a say ipapatey so aliwan anggaan na amin a bengatla.

[Blurb ed pahina 4]

Say posibilidad na ipapatey so ontulong ed sikatayo pian makapambilay itayo diad paraan a lalon makabaliksan