“Linmereg Ira”

“Saray madaluyon a danum so ginmapon manakbong ed sikara; tan linmereg ira ed kaaralman a singa bato.”

DIAD saratan a salita, a sinelebraan di Moises tan saray Israelita ed kanta so inkiliktar da manlapud Ambalangan Dayat tan say inkaderal na onuusil a taga-Ehipto a kabusol da​—si Faraon tan saray armada to.​—Exodo 15:4, 5, NW.

Mapatnag so leksion ed balang sakey ya akaimaton ed sayan makapakelkelaw ya inkagawa. Anggapo so ontalonan makaangat odino makasumpa ed autoridad nen Jehova tan manbilay. Balet, kayari lambengat na pigaran bulan et saray prominentin Israelita​—di Core, Datan, Abirom, tan 250 a mananuporta ra​—so parungtalan a sinmumpa ed inter-Dios ya autoridad di Moises tan Aaron.​—Numeros 16:1-3.

Diad panangiwanwan nen Jehova, pinasakbayan nen Moises iray Israelita ya onarawi ed saray tolda na saray rebelde. Si Datan tan Abirom, kaiba iray membro na sankaabungan da, so ag-anguman ed kiwas da. Inyabawag sirin nen Moises a diad dalan To a dili, ipalinew nen Jehova ed saray totoo a sarayan lalaki so ‘nanmudmora ed si Jehova.’ Diad satan a bekta, pinalengat nen Jehova so dalin ya akaalageyan da. “Dia ed ontan, sikara tan saray amin ya akinonong ed sikara agalasogos ira a mabilay diman ed Sheol: et say dalin kinapotan tora.” Panon balet si Core tan saray arum nin rebelde? “Pinmaway so apoy a nanlapu ed si Jehova, et inakmon to so duanlasus tan limamplo a lalaki ya angiyapay na insenso.”​—Numeros 16:23-35; 26:10.

Si Faraon tan saray armada to, pati saramay rebelde ed kalawakan, so atawtaw ya amin lapud agda binidbir so autoridad nen Jehova tan say interes to ed saray pakurang na totoo to. Pankaganatan sirin ya amin a malabay a makaeksperiensya ed pananalimbeng nen Jehova ed sayan maatap a panaon so manaral tan ontulok ed si Jehova bilang “Sankatagyan” tan “Makapanyarin-amin.” Diad panggawa ed satan, ipapuso da so makapabiskeg iran salita nen Jehova: “Say sanlibo nabaktar ed dikingan mo; tan say samplon libo nabaktar ed nikawanan mo; balet ag-ira makasabi ed sika. Saray matamatam labat so panengneng mo, et nanengneng mo so gunggona na bagel. Ta sika, Jehova, so salimbeng ko! Say Sankatageyan so ginawam ya ayaman mo.”​—Salmo 91:1, 7-9.