Propesiya nen Isaias​—Liwawa Parad Amin a Katooan I

Katuloyan na Kapitulo Biente-Singko

Say Ari tan Saray Prinsipe To

“Say Makulangkulang”

12. Siopa iray “makulangkulang” natan, tan diad anton dalan ya ag-ira mabunlok?

¹² Tinmumbok et imparungtal na propesiya nen Isaias so pandumaan: “Say makulangkulang anggan kapigan agla natawag a mabli, agmet la naani ikuan a mapalabo so too a madaakan. Ta say makulangkulang mansalita a makulangkulang.” (Isaias 32:5, 6a) Siopa iyan “makulangkulang”? Singano panangidanet, amiduan inter nen Arin David so ebat: “Say andi-kalakal inkuan to ed puso to, anggapo so Dios. Aderal ira, nanggawa ra na bubusolen ira a gawa; anggapo a balot so manggawa na maong.” (Salmo 14:1; 53:1) Siempre, saray nigalet lan ateista so mangibabaga ya anggapo so Jehova. Ontan met, “saray intelektual” tan arum niran onkikiwas a singano anggapo so Dios et manisia ya anggapo so siopaman a pikuentaan da. Anggapo so katuaan ed sikara. Anggapo so inkamabunlok ed kapusoan da. Andian ira na maong a balita nipaakar ed aro. Midumaan ed saray tuan Kristiano, ag-ira aliston ontulong ed saray mankaukolan diad panaon na gonigon odino agda nagagawaan itan a sigpot.

13, 14. (a) Panon ya aagamilen na saray modernon-agew ya apostata so makapasakit a bengatla? (b) Anto so ikikibot na saray apostata ed nanaerasan tan napgaan, balet anto so pansumpalan ed kaunoran?

¹³ Dakel ed saratan a makulangkulang so mamubusol ed saramay mangidedepensa ed katuaan na Dios. “Say puso to manggawa naani na inkauges, a manggawa na agpanangigalang ed masagrado, tan mangibitla na lingo a sumpa ed Jehova.” (Isaias 32:6b) Agaylan tua itan ed saray modernon-agew ya apostata! Diad pigaran bansa ed Europa tan Asia, akimuyong iray apostata ed arum niran onsusumpa ed katuaan, a nansalita ira na sigpot a katilaan ed saray autoridad, ta pian nasebelan odino napegetan iray Tastasi nen Jehova. Ipapatnag da so espiritu na “mauges ya aripen,” a nipaakar ed saratan et oniay impropesiya nen Jesus: “No satan a mauges ya aripen ikuan to naani ed puso to, Say katawan ko mabayag. Tan igapo ton pekpeken iray ibiba ton aripen, tan mikan tan miinum ed saray buanges. Say katawan na satan ya aripen onsabi naani ed sakey ya agew ya agto amta. Et sikato naani balsigen ton palduaen tan ituro toy betang to ed saray mansimpisimpitan; diman naani paningel tan panngalatenget na ngipengipen.”​—Mateo 24:48-51.

¹⁴ Kaleganan ni, say apostata et “gawaen to ya anggapo so manayam ed kamarerwa na narasan, tan paandien to so inumen ed napgaan.” (Isaias 32:6c) Ikikibot na saray kabusol na katuaan so espiritual a tagano ed saray totoon nanaerasan ed katuaan, tan ipapaliis da iray napgaan manlapud iyinum ed makaparepreskon danum na mensahe na Panarian. Balet say pansumpalan ed kaunoran et inyabawag nen Jehova ed totoo to diad panamegley na sananey nin propeta to: “Mibakal ira naani ed sika; balet agda ka naani taloen; ta siak wala ak ed sika, kuan nen Jehova, pian ilaban ta ka.”​—Jeremias 1:19; Isaias 54:17.

15. Siopa so nagkalautlan “mauges” natan, antoran “matila a salsalita” so iyaalibansa ra, tan anto so resulta?

¹⁵ Manlapud kapegleyan iran taon na koma-20 siglo, maparungtal a kinmasmak so imoralidad ed saray lugar na Kakristianoan. Akin? Impasakbay na propesiya so sakey a rason: “Saray kagawaan na maagum sikara so mauges, sikato [so] mannonot ed saray silib a mauges a maneral ed mabinta ed saray matila a salsalita, anggan say naukolan mansalita na maptek.” (Isaias 32:7) Bilang kasumpalan na sarayan salita, dakel ed saray klero so angawat ed maabuloy ya awawey nipaakar ed sekso sakbay na kasal, panamong na agkasal, homoseksualidad​—on, “lawan, tan say amin a nengneng na karumsisan.” (Efeso 5:3) Kanian, ‘dineral’ da iray pulok da panamegley na saray palson ibabaga ra.

16. Anto so mamapaliket ed saray tuan Kristiano?

¹⁶ Misunian, agaylan makaparepresko so kasumpalan na saray ontumbok a salita na propeta! “Say mabli [“mabunlok,” NW] mannonot ed saray mabli [“mabunlok,” NW] a bengatla; et sikato magnayon naani ed saray mabli [“mabunlok, NW]a bengatla.” (Isaias 32:8) Impaseseg a mismo nen Jesus so inkamabunlok sanen inkuanto: “Mangiter kayo, et naikdan kayo; sukat a maong, pinerper, aseksek tan manleplepwas, so iter da ed akwalan yo. Ta sukat a pansukat yo sikato met so pansukatan ed sikayo.” (Lucas  6:38) Impabitar met nen apostol Pablo iray bendisyon ya onsabi ed saray mabunlok sanen inkuan to: “Nonot yo so saray salita nen Jesus a Katawan a sikato a dili kuan to: Lalo a mapalar so mangiter nen say mangawat.” (Gawa 20:35) Maliket iray tuan Kristiano, aliwan diad pakakagamor day materyal a kayamanan odino inkabantog ed sosyedad, noagta diad pagmamaliw dan mabunlok​—a mipadpara ed mabunlok a Dios da, si Jehova. (Mateo 5:44, 45) Say sankabalegan a panliliketan da et say panggagawa na linawa na Dios, diad mabunlok a pangiiter da ed inkasikara ta pian nipaamta ed arum so “ebanghelyo na gloria na bendito [“maliket,” NW] a Dios.”​—1 Timoteo 1:11.

17. Siopa natan so mipadpara ed ‘saray agmakalikas ya anak a bibii’ a tinukoy nen Isaias?

¹⁷ Intuloy na propesiya nen Isaias: “Onalagey kayo, sikayo a bibii a wala ed painawaan, et denglen yo so boses ko; sikayo ya andi likasan ya anak ira a bibii, denglen yo so salitak. Ta dia ed saray agew ed labas na sakey a taon nagonigon kayo, sikayo bibii ya andi likasan; ta say pamburbor na ubas, onandi, say panag-ani agnaani onsabi. Giwgiw kayo bibii a wala ed kareenan; nagonigon kayo, sikayo ya andi likasan.” (Isaias 32:9-11a) Say awawey na sarayan bibii so mangipanonot ed sikatayo nipaakar ed saramay mankuan natan a manlilingkor ed Dios balet ta ag-ira maseseg ed panaglingkor ed sikato. Saratan so naromog ed saray relihyon na “Babilonia a Baleg, ina na saray balangkantis.” (Apocalipsis 17:5) Alimbawa, saray membro na saray relihyon na Kakristianoan so mipadpara ed deskripsion nen Isaias ed sarayan “bibii.” Saraya so “wala ed painawaan,” a kampante nipaakar ed panangukom tan egagel a magano lan mangakmon ed sikara.

18. Siopa so binilin a ‘mangibalkes na abel a magaspang ed saray banel da,’ tan akin?

¹⁸ Nikelyaw sirin so tawag ed palson relihyon: “Manlakseb kayo, tan manlabos kayo, tan manbalkes kayo na abel a magaspang ed saray banel yo. Sikara dugalen da so saray pagew nipaakar ed makapalikliket ya um-uma, nipaakar ed mabunga ya ubas. Dia ed tapew na dalin na baley ko ompaway naani so saray sabitan tan saray tala; on dia ed tapew na saray amin ya abung na liket dia ed malikeliket a syudad.” (Isaias 32:11b-13) Say balikas a “Manlakseb kayo, tan manlabos kayo” so agmankabaliksay sigpot a pangekal ed kawes. Say kustombre nensaman et ilatop so akinpaway a kawes ed akindalem a kawes. Mabetbet et say akinpaway a kawes so paraan a pakabidbiran. (2 Arari 10:22, 23; Apocalipsis 7:13, 14) Say propesiya so mangigaganggan sirin ed saray membro na palso iran relihyon a mangekal ed akinpaway iran kawes da​—say mankuankuanan a pakabidbiran ed sikara bilang lingkor na Dios​—tan isulong da so magaspang iran kawes, a simbolo na panermen da ed manasingger lan kaukom da. (Apocalipsis 17:16) Anggapo so maridios ya inkamabunga a naromog ed saray relihyoson organisasyon na Kakristianoan, a mankuan a “malikeliket a syudad” na Dios, odino ed arum niran kabiangan na sankamundoan ya empiryo na palson relihyon. Say sakop a pankukurangan da so mamapaway na “saray sabitan tan saray tala” na inkitalirak tan impakapaulyan.

19. Anton kipapasen na apostatan “Jerusalem” so inwalwal nen Isaias?

¹⁹ Sayan mauddiem a panangilitrato so onnatnat ed amin a kabiangan na apostatan “Jerusalem”: “Say palasyo napaulyan naani, say syudad a dakel so totoo nikaindan; say pukdol [“Ofel,” NW] tan say talayapan magmaliw ira naani ya ungib ed ando lan ando, sakey a liket na saray asno ya atap, sakey a panpakabkaban ed saray ay-ayep.” (Isaias 32:14) On, anggan say Ofel et nilaktip. Say Ofel et nipukdol a parte na Jerusalem a mangitatarya na sakey a mabiskeg a depensa. Say pangibagan say Ofel so nagmaliw labat ya uma so manutukoy ed sigpot a pankibalatar na syudad. Ipapabitar na saray salita nen Isaias a say apostatan “Jerusalem”​—Kakristianoan​—so agmaimano ed panaggaway linawa na Dios. Satan so lepes ed espiritual a paraan, ya andian a balot na katuaan tan inkahustisya​—ya alabas a singa ayep.

Sakey a Maliwawan Pandumaan!

20. Anto so epekto na espiritu na Dios a niyiibung ed totoo to?

²⁰ Tinmumbok ya imparungtal nen Isaias so makapaligsay-puson ilalo parad saramay manggagawa na linawa nen Jehova. Antokaman a pankibalatar na mismon totoo na Dios so mantultuloy labat “angga ed naibung ed sikatayo so espiritu a manlapu ed tagey, et say kalawakan magmaliw a mabunga ya uma tan say mabunga ya uma nigaton a singa takel.” (Isaias 32:15) Makapaliket ta manlapu la’d 1919 et daakan a niyiibung so espiritu nen Jehova ed totoo to, a singa panangibaga et nipawil so mabungan taneman na alanaan iran Tastasi, a tinumbokan na onaawang a takel na arum a karnero. Sankaimano so inkaaligwas tan ibubulaslas ed organisasyon to diad dalin natan. Diad nipawil ya espiritual a paraiso, say “gayaga nen Jehova, say kaatageyan na Dios tayo,” so ipapatnag na totoo to legan dan iyaabawag ed sankamundoan so onsabin Panarian to.​—Isaias 35:1, 2.

21. Iner so pakaromogan natan ed inkatunong, inkaulimek, tan kaligenan?

 ²¹ Talinengen natan so maglorian sipan nen Jehova: “Say inkatunong manayam ed kalawakan; et say inkatunong manayam naani ed mabunga ya uma. Et say gawa na inkatunong sikato naani so deen; et say kasumpalan na inkatunong, inkaulimek tan panmatalek lawas.” (Isaias 32:16, 17) Agaylan abig iyan panangideskribe ed espiritual a kipapasen na totoo nen Jehova natan! Midumaan ed karaklan a katooan, a naapag-apag lapud pambubusolan, karawalan, tan makapasinagem ya inkaduka ed espiritual, saray tuan Kristiano so nankakasakey ed interon globo, anggaman “nanlapu [ira] ed balang nasyon tan amin na saray kailalakan, tan binaleybaley, tan salita.” Manbibilay, mankikimey, tan manlilingkor ira a mitunosan ed inkatunong na Dios, a gagawaen da itan tekep na panagmatalek a panggayagaan dan siansia so tuan deen tan kaligenan ed andi-anggaan.​—Apocalipsis 7:9, 17.

22. Anto so pandumaan na kipapasen na totoo na Dios tan ed saramay walad palson relihyon?

²² Diad espiritual a paraiso et nasusumpal la so Isaias 32:18. Inkuan na satan: “Say baley ko manayam naani ed mareen a panag-ayaman; tan dia ed maligen a paspasen, tan dia ed saray mareen a pampainawaan.” Balet parad saray alig-alig a Kristiano, “onuran naani na yelo a mamagbag ed takel; et say syudad sigpot naani a nigeba a patar.” (Isaias 32:19) On, singa manasibengbeng ya uran na yelo, say panangukom nen Jehova so akaparaan lan ombasig ed alig-alig a syudad na palson relihyon, a nimedmer iray “takel” na saray mansusuporta ed satan, a maminpinsan iratan a nagalpong!

23. Anton englobon kimey so asingger lan nasumpal, tan panon so pangipasen ed saramay mibibiang ed satan?

²³ Oniay impanampot na sayan kabiangan na propesiya: “Mapalar [“maliket, NW]kayo a mantanem ed abay na saray amin a danum, a paakaren yo so saray sali na baka tan asno.” (Isaias 32:20) Say baka tan say asno so ayayep ya idadalus na totoo na Dios nensaman pian manbaka ed kaumaan tan mantanem na bini. Natan et uusaren na totoo nen Jehova iray kagawaan ed panag-imprinta, elektronikon uusaren, moderno iran bilding tan luluganan tan, manuna ed amin, say nankakasakey a teokratikon organisasyon a mangiimprinta tan mangibubunog na binilyon iran publikasyon na Biblia. Saratan a kagawaan so uusaren na mabulos iran komikimey ta pian nisibwag so bini na katuaan na Panarian diad interon dalin, a literal a dia “ed abay na saray amin a danum.” Minilyon a matakot-ed-Dios a lalaki tan bibii so nanaani la, tan dakerakel ni so miuulop ed sikara. (Apocalipsis 14:15, 16) Amin ira so peteg ya ipasen a “maliket”!

[Tepetepet Parad Panagaral]