“Say Manayam Agto Naani Ikuan, Mabeblay Ak”
Propesiya nen Isaias—Liwawa Parad Amin a Katooan I
Kapitulo Biente-Sais
“Say Manayam Agto Naani Ikuan, Mabeblay Ak”
1. Akin a makapaligliwa iray salita na Isaias 33:24?
SAY “lapag a pinalsa maningel ira ya amin tan maniirap ira a mananak ya anggad natan.” Ontan so inkuan nen apostol Pablo. (Roma 8:22) Anggaman ed saray iyaabanti na medikal a siensia, lalon sasaloten na sakit tan ipapatey so sankatooan. Agaylan makapakelkelaw sirin so sipan a mamantok ed sayan kabiangan na propesiya nen Isaias! Isipen pa so panaon sano “say manayam agto naani ikuan, Mabeblay ak.’ (Isaias 33:24) Kapigan tan panon a nasumpal iyan sipan?
2, 3. (a) Diad anton dalan a mansasakit so nasyon na Israel? (b) Panon a kinmana so Asirya bilang “pekpek” na Dios ed panagdisiplina?
2 Nansulat si Isaias ed samay panaon a mansasakit ed espiritual so akisipanan a totoo na Dios. (Isaias 1:5, 6) Pirmi so inkigalet da la ed apostasya tan imoralidad kanian nakaukolan da so ambelat a disiplina nen Jehova a Dios. Say Asirya so onkanan “pekpek” nen Jehova diad pangipaakseb to ed satan a disiplina. (Isaias 7:17; 10:5, 15) Unona, say amianen a samploran-tribu a panarian na Israel so naplag ed saray Asiryano nen taon 740 K.K.P. (2 Arari 17:1-18; 18:9-11) Kayari na pigaran taon, inggapo nen Arin Senakerib na Asirya so malaknab ya iyaataki ed abalaten a panarian na Juda. (2 Arari 18:13; Isaias 36:1) Diad inlubak na kimuyekyek a puersa na Asirya diad interon dalin, ompatnag ya agla napaliisan so sigpot a pakapagit na Juda.
3 Balet say Asirya, a pinalakbatan to so betang to a manisiplina ed totoo na Dios, so nanggegemtan la na dili ton maagum ya ambisyon a konkestaen so mundo. (Isaias 10:7-11) Kasin abuloyan nen Jehova ya agnadusa so maruksan panagmaltrato na satan ed totoo to? Wala ni kasi so iyabig na espiritual a pansasakit na nasyon? Diad Isaias kapitulo 33, nabasa tayo iray ebat nen Jehova ed sarayan tepet.
Pamagbag ed Managbagbag
4, 5. (a) Anton pananguman so naeksperiensya na Asirya? (b) Anto so impikasi nen Isaias diad biang na totoo nen Jehova?
4 Oniay gapo na propesiya: “Abagey ka la a mamagbag, et agka abagbag; tan managamil ka a liputan, et agda ka nanagamilan ed liputan! Sano mangangga ka a mamagbag, nabagbag ka naani, tan sano ontunda ka a managamil ed liputan, panagamilan da ka naani ed liputan.” (Isaias 33:1) Direktan akisalita si Isaias ed managbagbag, say Asirya. Diad kapantokan na pakayari to, ompatnag ya agnatalo itan ya agresibon nasyon. Satan so ‘amagbag ya ag-abagbagan,’ a ginaygay toray syudad na Juda, a nilimas to ni ingen so kayamanan ed abung nen Jehova—tan singa ag-ira adusa ed ginawa ra! (2 Arari 18:14-16; 2 Awaran 28:21) Balet ta nasuni so kipapasen. ‘Sika so nabagbag,’ so makpel ya inyabawag nen Isaias. Agaylan makapaligliwa iyan propesiya ed saray matoor!
5 Legan na satan a makapataktakot a panat na panaon, saray matoor a managdayew ed si Jehova so nakaukolan ya onkerew na tulong ed sikato. Kanian oniay impikasi nen Isaias: “O Jehova, kasian mo kami komon; inalagar mi ka: sika komon so panagkataklay [na biskeg tan suporta] mi ed kinabuasan, kilalaban mi met ed panaon na kairapan. Saray ombaley tinmaynan ira ed tanol na ingal; dia ed inyalagey mo lanlamang abuybuyak so saray nasyon.” (Isaias 33:2, 3) Matukotukoy ya impikasi nen Isaias ya iliktar nen Jehova so totoo To a singa ginawa To la ya aminpiga diad apalabas. (Salmo 44:3; 68:1) Tan agni nambayag kayari na impangipikasi nen Isaias ed satan et impasakbay to la so ebat nen Jehova!
6. Anto so nagawa ed Asirya, tan akin a matukoy itan?
6 “Saray samsam yo [saray Asiryano] natipon ira naani a singa say pantitipon na antataro: singa panlukso na saray duron so panlukso na saray totoo ed sikato.” (Isaias 33:4) Say Juda so mikabisado ed makaderal ya ilulubak na saray insekto. Balet, diad sayan panaon et say kakabusol na Juda so naderal. Sagmaken na Asirya so makapabaing a pakatalo, tan napaskar iray sundalo to ya ombatik, ya itilak da so dakerakel ya asamsam da tan tiponen iratan na saray manaayam ed Juda! Matukoy lambengat a say Asirya, a kabkabat ed inkaruksa to, so managmak na pakabagbag.—Isaias 37:36.
Say Modernon-Agew ya Asiryano
7. (a) Siopa natan so nikompara ed mansasakit ed espiritual a nasyon na Israel? (b) Siopa so onkanan “pekpek” nen Jehova a maneral ed Kakristianoan?
7 Panon ya onaplika so propesiya nen Isaias ed panaon tayo? Say mansasakit ed espiritual a nasyon na Israel so nikompara ed agmatoor a Kakristianoan. No panon ya inusar nen Jehova so Asirya bilang “pekpek” pian dusaen so Israel, sikato so mangusar met na “pekpek” pian dusaen so Kakristianoan—ontan met ed arum niran kabiangan na sankamundoan ya empiryo na palson relihyon, say “Babilonia a Baleg.” (Isaias 10:5; Apocalipsis 18:2-8) Satan a “pekpek” et saray nasyon a kabiangan na Nasyones Unidas—sakey ya organisasyon a nilitrato ed Apocalipsis bilang sakey ya eskarlatan-kolor ya atap ya ayep a walaan na pitoran-ulo tan samploran-saklor.—Apocalipsis 17:3, 15-17.
8. (a) Siopa natan so niyaliling ed si Senakerib? (b) Siopa natan so modernon-agew a Senakerib ya onsebeg a mangataki, tan anto so pansumpalan?
8 Sano onlubak so modernon-agew ya Asirya ed interon sakop na palson relihyon, ompatnag itan ya agnaamper. Singa ed awawey nen Senakerib, si Satanas a Diablo so onsebeg a mangataki—aliwa labat a sumpa ed saray apostatan organisasyon a makanepegan na dusa noagta ontan met ed saray tuan Kristiano. Kaiba ed saray nakekeraan nin alanaan ya espiritual ya anak nen Jehova, minilyon a pinmaway la ed mundo nen Satanas, a mangilaktip ed Babilonian Baleg, so ontalindeg ed dapag na Panarian nen Jehova. Lapud sikatoy asanokan ed agpandayew ed sikato na saray tuan Kristiano, “say dios na sayan panaon,” si Satanas, so mangigapo ed malaknab ya iyaataki ed sikara. (2 Corinto 4:4; Ezequiel 38:10-16) Makapatalagnaw man itan ya iyaataki, agnakaukolan ya onggiwgiw ed takot so totoo nen Jehova. (Isaias 10:24, 25) Walaan ira na panamaseguro na Dios a sikato so magmaliw a ‘kilalaban da ed panaon na kairapan.’ Sikato so onsalet, a mangitarok na pankibalatar ed si Satanas tan say ulop to. (Ezequiel 38:18-23) Singa met ed kadaanan iran panaon, saramay manasalin mamagbag ed totoo na Dios so nabagbag a mismo! (Ikompara so Uliran 13:22b.) Say ngaran nen Jehova so napasantos, tan natumangan iray makaliktar lapud inanap da so “kakabatan tan pikakabat [tan] say takot ed Jehova.” —Basaen so Isaias 33:5, 6.
Sakey a Pasakbay ed Saray Andiay-Pananisia
9. (a) Anto so gawaen na saray “mabayani” tan “embahador na pampapakna”? (b) Panon ya onkiwas so Asiryano ed saray pikakareenan na Juda?
9 Komusta balet so pansumpalan na saray andiay-pananisia a walad Juda? Makapasinagem so impangilitrato nen Isaias ed asingger lan kadederal da diad lima na Asirya. (Basaen so Isaias 33:7.) Saray “mabayani” ed militar na Juda so oneyag ed takot diad iyaabanti na Asirya. Saray diplomatikon“embahador na pampapakna,” a nibaki pian minegosasyon na kareenan ed saray maguerran Asiryano, so nipaarap ed panagmudmora tan kababaingan. Sikara so onakis ya ampaipait lapud pakatalo ra. (Ikompara so Jeremias 8:15.) Say maruksan Asiryano so agmangasi ed sikara. (Basaen so Isaias 33:8, 9.) Sikato so maruksan mangibaliwala ed saray akipaknaan to ed saray manaayam ed Juda. (2 Arari 18:14-16) Say Asiryano so ‘mamalaw ed saray syudad’ na Juda, a moriaen da ira tekep na panggula tan panludlurey, ya andian ira na panamabli ed bilay na too. Makapadesyang so kipapasen lapud say dalin a mismo, a singa panangibaga, so manermen. Say Libano, Saron, Basan, tan Carmelo so manermen met ed impankibalatar.
10. (a) Panon a napaneknekan ya anggapo so nagawaan na saray “mabayani” na Kakristianoan? (b) Siopa so manalimbeng ed saray tuan Kristiano legan na agew na gonigon na Kakristianoan?
10 Maseguron ontan met so nagawa ed asingger ya arapen no igapo la na saray nasyon so iyataki ed relihyon. Singa ed panaon nen Ezekias, anggapoy kakanaan na aktual a pilaban ed sarayan makadesyang a puersa. Saray “mabayani” na Kakristianoan—saray politiko, managpuonan, tan arum nin maimpluensyan totoo—so agmakatulong ed sikato. Nasumlang laray mapolitika tan pinansyal iran ‘sipanan,’ odino paknaan, ya adesinyon manalimbeng ed intereses na Kakristianoan. (Isaias 28:15-18) Onsaew iray kalimbuatan a getma pian paeren so kadederal panamegley na diplomasya. Ontunda iray kimey ed negosyo, lapud nakompiska odino naderal iray kayarian tan puonan na Kakristianoan. Siopaman a walaan ni na pikakaaro ed Kakristianoan ondistansya tan manermen ed pakabalang to. (Apocalipsis 18:9-19) Kasin napideral so tuan Inkakristiano ed palso? Andi, lapud inter a mismo nen Jehova iyan panamaseguro: “Natan onalagey ak, kuan nen Jehova; yatagey ko natan so laman ko lanlamang; nitandoro ak natan la.” (Isaias 33:10) Diad kaunoran, onsalet si Jehova ed biang na saray matoor, a singa si Ezekias, tan amperen to so iyaabanti na Asiryano.—Salmo 12:5.
11, 12. (a) Kapigan tan panon a nasumpal iray salita ed Isaias 33:11-14? (b) Saray salita nen Jehova so mangiter na anton pasakbay natan?
11 Agnailaloan na saray agmatoor so ontan a proteksion. Inkuan nen Jehova: “Mannginew kayo na taep, yanak yo naani so dayami: say panlinawa yo sikato so sakey ya apoy a mangakmon ed sikayo. Et saray balbaley singa ra naani ed saray pampalbaan na dena, singa saray sabit a pinalaspas tan pinoolan na apoy. Denglen yo, sikayo a wala ed arawi, so ginawak; et sikayo a wala ed asingger, bidbiren yo so biskeg ko. Saray makasalanan ed Sion antakot ira; saray andian na dios da inala ra na panggiwgiw: Siopa ed sikatayo so makayari a miayam ed mangakmon ya apoy? Siopa ed sikatayo so makayari a miayam ed andi-anggaan a kapoolan?” (Isaias 33:11-14) Sarayan salita so mapatnag ya onaplika ed panaon sano nipaarap la so Juda ed balon kabusol, say Babilonia. Kayari na impatey nen Ezekias, pinmawil so Juda ed saray marelmeng a dalan to. Diad tinmumbok a pigaran dekada, linmoor iray kipapasen ed Juda anggad punton say interon nasyon so kaukolan a managmak na apoy na sanok na Dios.—Deuteronomio 32:22.
12 Saray marelmeng a plano tan pakana a pinawala na saray matunganga pian mangamper ed panangukom na Dios so apaneknekan ya anggapoy kakanaan a singa dayami. Diad tua, say mapangta tan rebelyoson awawey na nasyon so peteg a panggapoan na saray ebento a mansumpal ed kadederal to. (Jeremias 52:3-11) Saray marelmeng so “singa ra naani ed saray pampalbaan na dena”—sigpot a naderal! Legan dan uumamengen iyan manasingger lan kadederal, saray rebelyoson manaayam ed Juda so makalikna na pirmin takot. Saray salita nen Jehova ed agmatoor a Juda so mangiyilustra ed kipapasen na saray membro na Kakristianoan natan. No agda talinengen so pasakbay na Dios, mantatalaran ed sikara so mauddiem ya arapen.
“Manakar a Mapmaptek”
13. Anto so nisipan ed sakey a “manakar a mapmaptek,” tan panon itan ya asumpal ed biang nen Jeremias?
13 Diad pidumaan, oniay tinmumbok ya inkuan nen Jehova: “Saman so manakar a mapmaptek, tan mansalita a matunotunong; say manigpay a mudmoraen to so anap ed saray panangapos, say mangipayag ed saray lima to ta agto labay ya awaten so panuksok, say mamepet ed layag to pian agmakadngel na marala, tan mangilikdem ed saray mata to pian agmakanengneng na mauges: sikato so manayam naani ed tagey; saray bakor a binato sikara naani so pansalimbengan to, say tinapay niiter naani ed sikato; saray danum to agnaani onkulang.” (Isaias 33:15, 16) Unong ed impangibalikas nen apostol Pedro ed saginonor, “amta na Katawan so pangiliktar to ed saray masantos ed katukso, tan mangikana ed saray aliwan matunong ed lepsag na kadudusa no nasabi agew na panangukom.” (2 Pedro 2:9) Naeksperiensya nen Jeremias so ontan a kililiktar. Legan na impangubkob na Babilonia, saray totoo so nakaukolan a ‘mangan na tinapay a sinimbang, tan sitatakot.’ (Ezequiel 4:16) Kinan na arum a bibii so laman na ananak dan mismo. (Tagleey 2:20) Ingen, sineguro nen Jehova ya akaliktar si Jeremias.
14. Panon a makapantultuloy iray Kristiano a “manakar a mapmaptek”?
14 Saray Kristiano natan so nepeg met a “manakar a mapmaptek,” ya inagew-agew a manusumpal ed saray estandarte nen Jehova. (Salmo 15:1-5) Nepeg a ‘salitaen da so maptek’ tan ipulisay da so panagtila tan katilaan. (Uliran 3:32) Say panagsaol tan panagpaklap so nayarin kaslakan ed dakel a daldalin, balet ta saratan so karimdimla na sakey a ‘manaakar a mapmaptek.’ Saray Kristiano so nepeg met a mamasiansia ed “maabig a konsiensia” diad saray negosyo, a magunaet dan paliisan so mabanday odino mapalikdo iran getma. (Hebreos 13:18; 1 Timoteo 6:9, 10) Tan say sakey a “mamepet ed layag to pian agmakadngel na marala, tan mangilikdem ed saray mata to pian agmakanengneng na mauges” so magmaliw a mapili ed labay ton musika tan panligliwaan. (Salmo 119:37) Legan na agew na panangukom to, salimbengan tan sustunien nen Jehova iray mandadayew ed sikato, a manbibilay ed ontan iran estandarte.—Sofonias 2:3.
Nengnengen so Ari Ra
15. Anton sipan so manustuni ed matoor iran adestieron Judio?
15 Ontumbok ya inter nen Isaias iyan masnag a pasimar ed arapen: “Saray matam nanengneng da naani so ari ed kalimgasan to: napatnagan da naani so sakey a dalin ya onsabi ed arawi. Say pusom pakanonoten to naani so nipaakar ed makapataktakot: Iner so kawalaan na saman so nambilang, iner so kawalaan na saman so animbang ed buis? Iner so kawalaan na saman so nambilang ed saray ilang? Agmo naani nanengneng so masebeg a baley, sakey a baley ya aralem so salita to ya agmo natalosan, sakey a salita a sankaili ya agmo natalosan.” (Isaias 33:17-19) Say sipan nipaakar ed Mesianikon Ari diad arapen tan say Panarian to so manustuni ed saray matoor a Judio legan na andukey iran dekada na inkadestiero ra ed Babilonia, anggaman natatalosan da a mabayag ni so isabi na satan a Panarian. (Hebreos 11:13) Sano petepeteg la so uley na Mesias, say impanlames na Babilonia so agla nanonotan. Saray makaliktar ed iyataki na Asiryano so malikeliket ya ontepet: “Iner so kawalaan la na saray opisyal na managlames, a nampabuis ed sikatayo, nansingil ed sikatayo, angala na galang tayo?”—Isaias 33:18, Moffatt.
16. Manlapu la’d kapigan ya ‘anengneng’ na totoo na Dios so Mesianikon Ari, tan tekep na anton resulta?
16 Anggaman ipapaseguro na saray salita nen Isaias so pakapawil manlapud impakakautibo ed Babilonia, saray sinansakey ya adestieron Judio so nakaukolan a mantalaran ed kioli pian panggayagaan da so sigpot a kasumpalan na sayan kabiangan na propesiya. Komusta balet iray lingkor na Dios natan? Nanlapula’d 1914, ‘anengneng,’ odino atebek, na saray totoo nen Jehova so Mesianikon Ari, si Jesu-Kristo, diad sigpot ya espiritual a karakpan to. (Salmo 45:2; 118:22-26) Bilang resulta, naeksperiensya ra so kililiktar manlapud panamairap tan panangontrol na marelmeng a sistema nen Satanas. Diad silong na Sion, say panangiletnegan na Panarian na Dios, panggagayagaan da so tuan espiritual a kaligenan.
17. (a) Antoray nisipan nipaakar ed Sion? (b) Panon ya asumpal iray sipan nen Jehova nipaakar ed Sion diad Mesianikon Panarian tan diad saray mananuporta ed satan diad dalin?
17 Intuloy na Isaias: “Nengnengen mo so Sion, say syudad na inkagayaga tayo: saray matam nanengneng da naani so Jerusalem a sakey a mareen a panag-ayaman, sakey a tolda ya agniyalis, saray palitek to ag-ira nabagot anggan kapigan, tan agmet napultot so saray lubir to. Noag ingen si Jehova miayam ed sikatayo’d man ed kaatageyan to, sakey a pasen na saray maawang ya ilog tan agus, ya anggapo naani onsabi a baloto ya akabegsay diman, tan anggapo met naani marakep a sakayan ya onlabas diman.” (Isaias 33:20, 21) Ipapaseguro ed sikatayo nen Isaias a say Mesianikon Panarian na Dios so agnabagot odino naderal. Niarum ni, satan a proteksion so malinew a ninanatnat ed matoor iran mananuporta ed Panarian diad dalin natan. Anggano dakel ya indibidual so niiyan ed pirmin subsubok, saray uuleyan na Panarian na Dios so apaseguroan ya anggapo so posiblin sagpot ya ontalonan maneral ed sikara bilang sakey a kongregasyon. (Isaias 54:17) Protektaan nen Jehova so totoo to diad paraan a panasalimbeng na banawang odino kanal ed sakey a syudad. Siopaman a kabusol ya onataki ed sikara—anggan say mabiskeg a singa say “baloto ya akabegsay” odino sakey a “marakep a sakayan”—so nipaarap ed kadederal!
18. Anton responsabilidad so aakoen nen Jehova?
18 Akin balet a makapanmatalek iray manangaro ed Panarian na Dios parad madibinon proteksion? Oniay impaliwawa nen Isaias: “Si Jehova sikato so Ukom tayo, si Jehova sikato so Mangiiter na tunong ed sikatayo, si Jehova sikato so Ari tayo; ilaban to itayo.” (Isaias 33:22) Aakoen nen Jehova so responsabilidad a manalimbeng tan mangidirehi ed totoo to, a mamibidbir ed posisyon to bilang Sankatagyan a Soberano. Saraya so mabulos a manpapasakop ed uley to panamegley na Mesianikon Ari to, a mamibidbir a si Jehova so aglabat walaan na autoridad a manggawa na saray ganggan noagta mangiyimpuersa met ed saratan. Balet, lapud si Jehova so manangaro ed inkatunong tan inkahustisya, say uley to, panamegley na Anak to, so aliwan makapabelat ed saray mandadayew ed sikato. Imbes, ‘minanabang ira’ diad pampapasakop da ed autoridad to. (Isaias 48:17) Agton balon kaindanan iray matoor ed sikato.—Salmo 37:28.
19. Panon so impaneskribe nen Isaias ed agpakasarag na saray kabusol na matoor a totoo nen Jehova?
19 Oniay inkuan nen Isaias ed saray kakabusol na matoor a totoo nen Jehova: “Saray lubir mo malukak ira: agda apabiskeg so sali na anlayasan da, agda nibuskag so layag: saman la naapag-apag so betang ed baleg a samsam; say piley angala ed samsam.” (Isaias 33:23) Siopaman ya onasingger a kabusol so agmakasarag tan pakaskasi sumpad si Jehova a singa bapor a panguerra a walaan na lupok iran taker, manyugayog a lusek, tan andian na panlayag. Say kadederal na kakabusol na Dios so manresulta ed dakerakel a samsam ya anggan saray baldado et miapag ed saray samsam. Makapanmatalek itayo sirin a diad panamegley nen Arin Jesu-Kristo, si Jehova so manbiktorya ed saray kabusol to diad onsabin ‘baleg a kairapan.’—Apocalipsis 7:14.
Sakey a Panamaabig
20. Naeksperiensya na totoo na Dios so anton klase na panamaabig, tan kapigan?
20 Sayan seksion na propesiya nen Isaias so anampot ed makapaligsay-puson sipan: “Say manayam agto naani ikuan, Mabeblay ak: saray ombaley a manayam diman napaandi naani inkauges da.” (Isaias 33:24) Say sakit a manunan sasaglawien nen Isaias et espiritual, lapud nisiglaot itan ed kasalanan, odino “inkauges.” Diad primeron aplikasyon na sarayan salita, insipan nen Jehova a kayari na inkibulos da manlapud impakakautibo ed Babilonia, say nasyon so napaabig ed espiritual a paraan. (Isaias 35:5, 6; Jeremias 33:6; ikompara so Salmo 103:1-5.) Lapud aperdona ira ed akadkauna iran kasalanan da, saray ompawil a Judio so mangiletneg lamet ed puron panagdayew ed Jerusalem.
21. Diad antoran dalan a saray managdayew ed si Jehova natan so makakaeksperiensya na espiritual a panamaabig?
21 Balet, say propesiya nen Isaias so walaan na modernon kasumpalan. Say totoo nen Jehova natan so nanggayaga met ed espiritual a panamaabig. Sikara so nibulos manlapud saray palson bangat a singa say ag-ipatey na kamarerwa, say Trinidad, tan say impiernon-apoy. Akaawat ira na panangigiya ed moral, a nibulos ira manlapud imoral iran agamil tan akatulong ed sikara a manggawa na maong iran desisyon. Tan lapud dondon bagat nen Jesu-Kristo, sikara so awalaan la na malinis a talindeg ed arap na Dios tan panggagayagaan da so malinis a konsiensia. (Colosas 1:13, 14; 1 Pedro 2:24; 1 Juan 4:10) Sayan espiritual a panamaabig so walaan na pisikal iran gunggona. Alimbawa, say ipaliis ed imoral a sekso tan pangusar na saray produkto na tabako so manalimbeng ed saray Kristiano manlapud makaalis iran sakit ed sekso tan arum niran nengneng na kanser.—1 Corinto 6:18; 2 Corinto 7:1.
22, 23. (a) Anton engranden kasumpalan na Isaias 33:24 so walad arapen? (b) Anto so determinasyon na saray tuan managdayew natan?
22 Niarum ni, wala so babaleg a pansumpalan na saray salita na Isaias 33:24 kayari na Armagedon, diad balon mundo na Dios. Diad pananguley na Mesianikon Panarian, naeksperiensya na totoo so malaknab a pisikal a panamaabig katekep so espiritual ya iyabig da. (Apocalipsis 21:3, 4) Kayarin tuloy na kadederal na sistema na bengabengatla nen Satanas, saray milagro a singa saramay ginawa nen Jesus sanen sikatoy wadia ni’d dalin so seguradon nagawa ed interon globo. Makanengneng laray bulag, makadngel laray telek, makaakar laray piley! (Isaias 35:5, 6) Saya so mangiyabuloy ed amin a makaliktar ed baleg a kairapan a mibiang ed engranden kimey a pangitarok ed dalin diad singa-paraison kipapasen.
23 Saginonor, sano onggapo la so kikioli, saramay ombilay so seguradon napaoli a walaay maong a bunigas. Balet diad malalaknab a kiyaaplika na balor na dondon bagat, lalon nagamoran iray pisikal a gunggona, anggad naagwat ed inkayadyari so katooan. Insan, saray matunong so ‘ombilay’ diad sankagnapan a pantalos. (Apocalipsis 20:5, 6) Diad satan a panaon, diad espiritual tan pisikal a paraan, “Say manayam agto naani ikuan, Mabeblay ak.” Agaylan makapasagyat a sipan! Komon ta amin na saray tuan managdayew natan so determinadon magmaliw a kabiangan na saramay makaeksperiensya ed kasumpalan na satan!
[Tepetepet Parad Panagaral]