Tepetepet Manlapud Saray Managbasa

Kasin kinaukolan so sigpot a kipalgep ed danum no say toon labay toy manpabautismo et walaay pirmin depekto ed laman odino mabeblay a tuloy, a sengegan na mairap a pangipalgep ed sikato?

Say salitan “panagbautismo” so inaon ed Griegon verb a baʹpto, a mankabaliksay “pangilebleb.” Diad Biblia, say “pambautismo” so mipadpara ed “pangipalgep.” Nipaakar ed impanbautismo nen Felipe ed say Etiopen eunoko, oniay inkuan na The Emphasised Bible, nen Rotherham: “Sikaran dua so tinmaksaw ed danum, si Felipe tan say eunoko,​—tan sikatoy impalgep to.” (Gawa 8:38) Kanian, say toon babautismoan so aktual ya ipalseb ed danum.​—Mateo 3:16; Marcos 1:10.

Oniay ingganggan nen Jesus ed saray babangatan to: “Onla kayo sirin, tan manggawa kayo na saray babangatan ed amin a nasyones, a binyagan yo ra.” (Mateo 28:19, 20) Unong ed satan, saray bautismo so iyaarunsa na saray Tastasi nen Jehova diad saray pool, linok, ilog, odino ed arum iran pasen a wala so magenap a danum a sigpot a pangipalgepan. Lapud say bautismo diad sigpot a kipalgep et sakey a Makasulatan a kakaukolanen, anggapoy autoridad na totoo ya ipuera so sakey manlapud pampabautismo. Kanian kaukolan a nabautismoan so sakey a too anggano kapilitan a gawaen iray nikadkaduman kundang lapud kipapasen to. Alimbawa, saray bautismo diad angkabaleg iran banyera (bathtub) so akatulong ed saramay maedad la odino ed saramay maletey a tuloy so bunigas da. Nayarin tabayawan so danum ed banyera, insan say manpabautismo so kalmado tan kalkalnan itaksaw ed danum tan, no akaadapta la’d satan, gawaen so aktual a pambautismo.

Anggan saray totoon walaan na pirmin deperensya ed laman so nababautismoan. Singa bilang, nipapalgep iray indibidual a naoperaan ed kulongkulong, a walaan na permanentin botbot ed beklew, odino saramay mankaukolan na makinan respirator. Siempre, nakaukolan so pirmin panagparaan ed ontan iran bautismo. Makabat no walay onaasistin nipasal a nars odino sakey a doktor no wala. Anggaman ontan, sano gawaen so nikaduman panangasikaso odino panag-alwar, nagagawa so panagbautismo diad amin lawarin kipapasen. Kanian, nepeg a gawaen so amin a makatunongan a sagpot pian nabautismoan ed danum so sakey a too no ontan so masimoon a pilalek to tan no kaliktan ton awaten iray nalalanor a pakarisgoan.