Magano lan Manampot Iray Problema na Katooan!

“LIMITADO so kakanaan na pananulong ed kaparan too no ag-itan implano ed mas malaknab a paraan tan no andian na mapolitikan suporta a ginetman manresolbe ed saray manunan sengegan na gotgotan. Paulit-ulit ya ipapabitar na eksperiensya a say pananulong ed kaparan too lambengat so agmakaresolbi ed saray problema a say manunan lapuan et politika.”​—The State of the World’s Refugees 2000.

Anggaman ed baleg a pakatutulong ed kaparan too, saray problema na katooan so ompapalalo. Antoy posibilidad ed kiwala na magnayon a solusyon manlapud politika? Diad tua et dagdaiset. Balet iner ni so nayarin panilaloan tayo? Diad makabaliksan a balikas ed gapo na sulat to ed saray Kristiano diad Efeso, impaliwawa nen apostol Pablo no panon a panampoten na Dios so amin a problema na katooan. Impanengneng to ni ingen no anton ahensia so usaren na Dios pian gawaen iya​—sakey ya ahensian manresolbe ed saray manunan sengegan na amin a probleman manasalot ed sikatayo natan. Akin ya agkonsideraen no antoy sasaglawien nen Pablo? Sayan balikas so naromog ed Efeso 1:3-10.

“Tiponen Lamet Iray Amin a Bengatla ed Kristo”

Ibabaga na apostol a say gagala na Dios et parad say tutukoyen ton “pakauley [odino panangipakurang ed saray pamaakaran] diad kapanpantokan na nigetar a panaon.” Antoy kabaliksan na saya? Kabaliksan na saya a say Dios so walaan na nigetar a panaon sano sikato lay onkiwas ed ontan a paraan unong a “tiponen lamet iray amin a bengatla ed Kristo, saray bengatlan wala ed katawenan tan saray bengatlan wala ed dalin.” (Efeso 1:10, NW) On, say Dios so nanggawa lay uksoyan pian ipawil ed pantutunosan so amin a bengatla ed tawen tan ed dalin diad silong na direktan pananguley to. Makapainteres ta onia so inkomento na iskolar na Biblia a si J. H. Thayer nipaakar ed terminon impatalos dia a “tiponen lamet”: “Tiponen lamet nipaakar ed sikato . . . so amin a bengatla tan totoo (ya abuybuyak anggad natan lapud kasalanan) diad inkasaksakey na panlilimog ed Kristo.”

 Ipapabitar na satan a nakaukolan a gawaen na Dios iya lapud inlesa na agpankakasakey. Asasakbay ed awaran na too, say inmunan atateng tayo, di Adan tan Eva, so akinonong ed si Satanas a Diablo diad impanrebeldi ed Dios. Nilabay day magmaliw ya independente a denesidi ra’d inkasikaran dili no anto so maong tan mauges. (Genesis 3:1-5) Unong ed inkahustisya na Dios, sikara so impulisay ed pamilya na Dios tan apakset so pililimog da ed sikato. Inlereg da so katooan ed ag-inkayadyari tekep na amin a makapasinagem a nansumpalan a naeeksperiensya tayo natan.​—Roma 5:12.

Temporaryon Pangiyaabuloy ed Kaugsan

‘Akin et inabuloyan na Dios a gawaen da itan?’ so nayarin itepet na arum. ‘Akin ya agto la inkana so supremon pakayari to tan inyimpuersa so panlabayan to, pian agtayo la komon asagmak so amin ya ot-ot tan paniirap natan?’ Nayarin makapaayat so panisip na ontan. Balet antoy peteg ya ipatnag na pangusar ed ontan a makapataktakot a pakayari? Kasin pandinayewan odino abobonan mo so siopaman a sano wala labat lay duma so opinyon to et sikatoy basta maneral ed amin ya isusumpa lapud walay pakayari ton manggawa ed satan? Peteg ya andi.

Diad tua et ag-inangatan na saratan a rebelde so sankabiskegan a pakayari na Dios. Say nagkalautlan inangat da et say inkamakanepegan tan inkasusto na pananguley to. Pian naresolbi a maminpinsan iray linmesan manunan isyu, inabuloyan nen Jehova iray pinalsa to ya uleyan so inkasikaran dili ya anggapoy direktan pananguley to diad loob na ageteran a panaon. (Eclesiastes 3:1; Lucas 21:24) Sano anampot la itan a panaon, sikato so onsalet pian sigpot a manguley lamet ed dalin. Diad satan et magmaliw lan mabitabitar a say paraan na pananguley to so mogmon paraan a mangarantiya ed magnayon a kareenan, liket, tan aligwas parad saray manaayam ed dalin. Insan amin a mangaruksan totoo ed mundo so naandi la ed ando lan ando.​—Salmo 72:12-14; Daniel 2:44.

“Nen Agni Nipasen so Mundo”

Abayag lan gagala nen Jehova a gawaen iyan amin. Inkuan nen Pablo a “nen agni nipasen so mundo.” (Efeso 1:4) Aliwa itan a sakbay na inkapalsay dalin odino nen Adan tan si Eva. Satan a mundo et ‘maong a tuloy,’ tan anggapo ni so panagrebeldi. (Genesis 1:31) Dinan sirin a “mundo” so tutukoyen nen apostol Pablo? Say mundo na saray anak nen Adan tan Eva​—say makasalanan, ag-ayadyarin mundo na katooan a walaay ilalo a narondon. Sakbay a nianak so siopaman ya ugugaw, amta la nen Jehova no panon ton resolbien iray pamaakaran pian nitarya so pakainawaan parad saray ilalak nen Adan a nayarin dondonen.​—Roma 8:20.

Siempre, maseguron ag-ipapatnag na saya a say Soberano na uniberso so kaukolan a manresolbe ed saray pamaakaran a singa ed paraan na totoo. Lapud natetebek da a nayarin onlesa iray ag-iilaloan, sikaray mangiplaplano na nambabangil ya estratehiyan masoliwet pian ontalona. Andi, say makapanyarin-amin a Dios so mangileletneg ed gagala to tan susumpalen to itan. Anggaman kuan, si Pablo so mangipapaliwawa no panon a denesidi nen Jehova a resolbien iray pamaakaran pian nitarok so permanentin pakainawaan ed katooan. Anto iratan a paraan?

Siopa so Mangitarok na Pakainawaan?

Impaliwawa nen Pablo a saray alanaan na espiritun babangatan nen Kristo so walaan na espisyal a betang diad pamatunda ed mauges ya epekto na Adamikon kasalanan. Si Jehova “pinili to itayo a mikasakey ed [si Kristo],” so kuan nen Pablo, pian manuley a kaiba nen Jesus diad mangatatawen a Panarian to. Diad pangipapaliwawa ni nen Pablo, inkuan to a si Jehova “tinandaan to itayo diad gapo pian tagibien panamegley nen Jesu-Kristo bilang ananak to.” (Efeso 1:4, 5, NW) Siempre, sikaray agpinili, odino tinandaan diad gapo, nen Jehova bilang indibidual. Balet, tinandaan to diad gapo so sakey a grupo na matoor tan debosyonadon totoo a mibiang ed si Kristo diad pamatunda ed deral ya intarok nen Satanas a Diablo, pati lay Adan tan si Eva, diad pamilya na too.​—Lucas 12:32; Hebreos 2:14-18.

Agaylan makapakelaw itan! Diad inmunan impanubok to ed inkasoberano na Dios, impasagilig nen Satanas a walay depekto na totoon pinalsa na Dios​—a sano nisilong ed pirmin pananesdes odino pakaayatan et amin da kuno so manrebeldi  ed uley na Dios. (Job 1:7-12; 2:2-5) Diad sakey a dramatikon panangipanengneng na “maglorian agkanepegan a kaabigan to,” asabi panaon et impatnag nen Jehova a Dios so kompiyansa to ed mangaraldalin a palsa to diad impanagibi to ed arum ed makasalanan a pamilya nen Adan pian magmaliw ya espiritual ya ananak to. Saramay kabiangan ed sayan melag a grupo so naawit pian manlingkor diman ed tawen. Diad anton gagala?​—Efeso 1:3-6, NW; Juan 14:2, 3; 1 Tesalonica 4:15-17; 1 Pedro 1:3, 4.

Sarayan tinagibin ananak na Dios, kuan nen apostol Pablo, so magmaliw a “mitatawir ed Kristo” diad mangatatawen a Panarian to. (Roma 8:14-17) Bilang arari tan saserdote, nawalaan ira na betang diad pangibulos ed pamilya na totoo manlapud ot-ot tan paniirap a nasasagmakan na satan natan. (Apocalipsis 5:10) Tua, say “lapag a pinalsa maningel ira ya amin tan maniirap ira a mananak ya anggad natan.” Balet, agla manbayag et sarayan espisyal a pinilin ananak na Dios so onkiwas a kaiba nen Jesu-Kristo, tan amin a matulok a totoo so “niliktar ed inkaaripen na kabulokan ya onloob ed kawayangan na gloria na saray anak na Dios” la lamet.​—Roma 8:18-22.

‘Arondon Itayo’

Amin iya so nagmaliw a posibli panamegley na say makapakelkelaw tan matalonggaring a tuloy a panangipatnag na agkanepegan a kaabigan na Dios ed sayan mundo na katooan a narondon​—say dondon bagat nen Jesu-Kristo. Insulat nen Pablo: “A dia ed [ Jesu-Kristo] so kawalaan na karondon tayo ed panamegley na dala to, say pakapaandian na saray kasalanan tayo, unong ed saray kayamanan na grasya to.”​—Efeso 1:7.

Si Jesu-Kristo so manunan persona diad panumpal ed gagala na Dios. (Hebreos 2:10) Say dondon bagat to so angitarya na legal a basiyan parad si Jehova pian tagibien so arum ed ilalak nen Adan diad mangatatawen a pamilya to tan pian nainawaan so katooan ed saray pansusumpalan na Adamikon kasalanan, ya agda papakapuyen so panagmatalek da ed saray ganggan tan prinsipyo To. (Mateo 20:28; 1 Timoteo 2:6) Gagawaen nen Jehova iray bengatla diad paraan a mangitandoro ed inkatunong to tan makakapet ed kaukolanen na nagnap a hustisya.​—Roma 3:22-26.

“Sagradon Sekreto” na Dios

Diad loob na libulibon taon, ag-eksakton imparungtal na Dios no panon so panumpal to ed gagala to parad dalin. Nen inmunan siglo K.P., “impakaba’to ed [saray Kristiano] so misteryo [“sagradon sekreto,” NW] na linawa to.” (Efeso 1:9) Malinew ya atalosan nen Pablo tan saray kapara ton alanaan a Kristiano so engranden betang a nipabtang ed si Jesu-Kristo diad panumpal ed gagala na Dios. Sikaray akatebek met ed espisyal a betang da bilang mitatawir ed Kristo diad mangatatawen a Panarian to. (Efeso 3:5, 6, 8-11) On, say gobierno na Panarian ya uleyan nen Jesu-Kristo tan saray kaiba ton manuley so ahensian usaren na Dios pian itarok so magnayon a kareenan ya aliwa labat ed tawen noagta ontan met diad dalin. (Mateo 6:9, 10) Diad panamegley na satan, ipawil nen Jehova iyan dalin ed kipapasen ya inggagala to la nensaman parad satan.​—Isaias 45:18; 65:21-23; Gawa 3:21.

Say aturon panaon to parad direktan ikiwas pian punasen so amin a panaglames tan ag-inkahustisya so nigana diad magano lan arapen. Balet diad tua et inggapo la nen Jehova so proseso na panangipawil nen Pentecostes 33 K.P. Panon? Diad impanipon to ed saman ed “saray bengatlan wala ed katawenan,” saramay manuley a kaiba nen Kristo diad katawenan. Kabiangan ed saraya iray Kristianon taga-Efeso. (Efeso 2:4-7) Aganggano  ni, diad panaon tayo, si Jehova so manitipon la ed “saray bengatlan wala ed dalin.” (Efeso 1:10, NW) Panamegley na panagpulong a kampanya diad interon globo, ipapakabat to ed amin a nasyon so maong a balita nipaakar ed gobierno na Panarian ya uuleyan nen Jesu-Kristo. Saramay onkikiwas so nititipon anggad natan diad pasen a kawalaay espiritual a salimbeng tan panamaabig. (Juan 10:16) Magano da lan naeksperiensya so sigpot a kawayangan manlapud amin ya ag-inkahustisya tan paniirap diad sakey ya alinisan a paraison dalin.​—2 Pedro 3:13; Apocalipsis 11:18.

“Dakel a makapadinayew ya aligwas” so agawaan diad pansasagpot na too a tulongan iray kaparan totoo a nalalames. (The State of the World’s Children 2000) Ingen, say nagkalautlan makapadinayew a kundang et say asingsingger lan isalet nen Kristo Jesus tan saray kaiba ton manuley diad mangatatawen a gobierno na Panarian. Sikara so sigpot a manresolbe ed amin a manunan sengegan na gotgotan tan amin ya arum nin kaugsan a mangogonigon ed sikatayo. Panampoten da so amin a problema na katooan.​—Apocalipsis 21:1-4.

[Saray litrato ed pahina 4]

Say panutulong ed totoo so ag-makakaresolbi ed saray problema na katooan

[Litrato ed pahina 6]

Say dondon bagat nen Kristo so angitarya ed katooan na pakainawaan manlapud Adamikon kasalanan

[Litrato ed pahina 7]

Posibli natan a naromog so espiritual a salimbeng tan panamaabig

[Saray litrato ed pahina 7]

Magano lan onsabi so sigpot a kibulos manlapud saray problema panamegley na Mesianikon Panarian