“Sankaabigan Ka a Bii”

Sayan komendasyon so imbalikas ed malangwer a biin Moabita. Sikatoy sakey a balo a manngaran na Rut, say manugang na Israelitan bii a si Noemi. Agamoran nen Rut so maabig a reputasyon legan na impanayam to ed Israel manga 3000 a taon lay apalabas, sanen saray ukom so nanuley. (Rut 3:11, NW) Panoy impakagamor to ed sayan reputasyon? Siopa so nagunggonaan ed ehemplo to?

Sikato so toon ag-angan “ed tinapay na inkangiras,” lapud si Rut so mapaot tan makulin nankimey bilang sakey a managtudtor ed kaumaan, kanian sikatoy akomendaan ed ontan ya inkakuli to. Anggan sanen walay inyopresin mamalemew ed kimey to, sikatoy nantultuloy a nansagpot, a ginawa to so mas nen say iilaloan ed sikato. Mapatpatnag, sikato so matukoy parad deskripsion na Biblia nipaakar ed sakey ya asawan bii a makanepegay galang, sankakanaan, tan makuli.​—Uliran 31:10-31; Rut 2:7, 15-17.

Saray espiritual a kalidad nen Rut​—say mapaabeba, masakripisyon awawey tan say matoor ya aro to​—so manunan sengegan a sikatoy akagamor na panamagalang na publiko. Sikatoy nansiansia’d si Noemi, a tinaynan to so atateng to tan say nianakan ton dalin, a walaay samet ya ilalo ed pakaromog na kaligenan a nitarok na piasawa to. Kaleganan to, imbalikas nen Rut so pilalek ton manlingkor ed si Jehova, say Dios na katulangan to. Bilang panangidanet ed kablian to, ibabaga na Makasulatan a salaysay a sikato so “magmaong ed [si Noemi] nen say pitoran anak a lalaki.”​—Rut 1:16, 17; 2:11, 12; 4:15.

Anggaman makanepegay galang so matalonggaring a rekord nen Rut diad saray kalimog ton totoo, say nagkalalon makabaliksan et say positibon impamidbir na Dios ed saray kalidad to tan say impanumang to ed sikato na pribilehyon magmaliw ya inmunan ateng a bii nen Jesu-Kristo. (Mateo 1:5; 1 Pedro 3:4) Agaylan abig ya ehemplo si Rut, aliwan parad saray Kristianon bibii lambengat noagta ontan met ed amin a mangibabagan mandadayew ed si Jehova!