Agpapapalikdo

SAY panagpalikdo so singa kabayag la na awaran na too. Sakey ed saray manunan ebento a nikurit ed awaran et say gawan panamalikdo. Satan so agawa sanen pinalikdo nen Satanas si Eva diad hardin na Eden.​—Genesis 3:13; 1 Timoteo 2:14.

Anggaman agni kasmak ed mundo so panagpalikdo manlapu la’d saman a panaon, satan so nagkalalon kinmayat natan. Nipaakar ed nagawa ed moderno iran panaon, oniay impasakbay la na Biblia: ‘Balet saray totoo a mauges tan saray managsaol onuges laran onuges, a mansaol ira, tan nasaol ira met a dili.’​—2 Timoteo 3:13.

Saray totoo so napapalikdo ed dakel iran rason. Saray masilib tan managswitik a totoo so mamapalikdo ed saray biktima pian naala so kuarta ra. Arum a politiko so mamapalikdo ed saray kakaiba ra, a determinadon mansiansia ed pakauley anggan anto so nagawa. Papalikdoen met na totoo so inkasikara. Imbes ya arapen da iray katuaan, kokombinsien day inkasikara ya anggapo so mauges a pansumpalan na delikadon kurang da, a singa say panagsigarilyo, lingon panag-usar na druga, odino seksual ya imoralidad.

Wala met so panagpalikdo ed saray relihyoson pamaakaran. Saray papangulo na relihyon ed agew nen Jesus so amalikdo ed saray totoo. Nipaakar ed saraman a manamalikdo, oniay inkuan nen Jesus: “Sikara so bulag a manangitonton. Et no say bulag itonton to so bulag, sikaran dua napelag ira ed abot.” (Mateo 15:14) Niarum ni, papalikdoen na totoo so inkasikara ed saray relihyoson pamaakaran. Inkuan na Uliran 14:12: “Wala so dalan a singa maptek ed too; balet say sampot to saray dalan na patey.”

Singa ed panaon nen Jesus, agpankelawan sirin a dakel natan so napapalikdo ed relihyoso iran pamaakaran! Inkuan nen apostol Pablo a si Satanas et “binulag to so kaisipan da lapu’d agpanisia, pian say silew na ebanghelyo na gloria nen Kristo a sikato so talintao na Dios, agkomon onsinag ed sikara.”​—2 Corinto 4:4.

Sano sikatayo so apalikdo na managsaol, nabalangan itayo na kuarta. Sano sikatayo so apalikdo na politiko, nayarin nabalang tayo so arum ed kawayangan tayo. Balet no apalikdo itayo nen Satanas ya impulisay tayo so katuaan nipaakar ed Jesu-Kristo, nabalang tayo so andi-anggaan a bilay! Kanian agpapapalikdo! Ilukas yo so isip tan puso yo ed sakey ya agnasuppiat a lapuan na relihyoson katuaan, say Biblia. Dakel so nayarin nabalang tayo no agtayo gawaen itan.​—Juan 17:3.