Kasin Epektibo so Panagbangat Mo?

ATATENG, mamatatken, manangiyabawag na maong a balita​—amin so kakaukolanen a magmaliw a managbangat. Ibabangat na atateng so ananak da, ibabangat na mamatatken iray membro na Kristianon kongregasyon, tan ibabangat na saray managpulong na maong a balita iray balon interesado. (Deuteronomio 6:6, 7; Mateo 28:19, 20; 1 Timoteo 4:13, 16) Anto so nagawaan mo pian lalon epektibo so panagbangat mo? Sakey a paraan et say pangalig ed ehemplo tan paraan na saray makayarin managbangat ya asalambit ed Salita na Dios. Si Esdras so ontan a managbangat.

Makaaral Manlapud Ehemplo nen Esdras

Si Esdras so sakey a saserdote diad kapolian nen Aaron a nambilay na manga 2,500 taon lay apalabas diad Babilonia. Nen taon 468 K.K.P., sikatoy linma ed Jerusalem pian iyalibansa so puron panagdayew ed limog na saray Judion manaayam diman. (Esdras 7:1, 6, 12, 13) Kakaukolanen na sayan kimey ya ibangat to ed totoo so Ganggan na Dios. Anto so ginawa nen Esdras pian naseguron epektibo so panagbangat to? Sikatoy nanggawa na pigaran nakaukolan iran kundang. Imanoen irayan kundang a nikurit ed Esdras 7:10:

‘Si Esdras [1] impasen [“imparaan,” NW] to so puso to [2] a mananap na tunong nen Jehova, tan [3] manumpal ed satan, tan [4] mangibangat ed Israel na saray panontonan tan saray panguksoyan [“inkahustisya,” NW].’ Sansasakeyen tayon imanoen pan magano irayan kundang tan nengnengen no anto so naaralan tayo manlapud saratan.

‘Imparaan nen Esdras so Puso To’

No panon a say dumaralos et iparaan to nin unona so dalin diad pambaka antis a mangitanem na bukel, sipipikasin imparaan nen Esdras so puso to a mangawat ed salita na Dios. (Esdras 10:1) Diad arum a panangibaga et ‘impeket to so puso to’ ed bangat nen Jehova.​—Uliran 2:2.

Mipadpara, ibabaga na Biblia a si Arin Josafat et “impasen [to] so puso [to] a mananap ed Dios.” (2 Awaran 19:3) Misunian, say kailalakan na Israel “ya agda inapiger so puso ra” so adeskribe a “benger tan masumpa.” (Salmo 78:8) Nanenengneng nen Jehova so “niamot a too na puso.” (1 Pedro 3:4) On, “ibangat to ed mauyamo so dalan to.” (Salmo 25:9) Talagan makanakana sirin a tumboken na saray managbangat natan so ehemplo nen Esdras diad sipipikasin pangiparaan da nin unona ed dugan kondisyon na puso ra!

 “Mananap na Tunong nen Jehova”

Pian magmaliw a makayarin managbangat, tinmupleg si Esdras ed Salita na Dios. No onkonsulta ka ed sakey a doktor, agta ontalineng kan maong tan seguroen mon natatalosan mo so amin ya ibabaga odino iririsita to? Maseguron ontan so gawaen mo, lapud nalalanor so bunigas mo. Sirin, nepeg a nagkalalo ni so panimano tayon maong ed saray bengatlan ibabaga nen Jehova ed sikatayo, odino iririsita to, panamegley na Salita to, say Biblia, tan panamegley na “matoor tan makabat ya aripen.” Tutal, say simbawa to so mangilalanor ed mismon bilay tayo! (Mateo 4:4; 24:45-47) Siempre, nayarin nalingo so sakey a doktor, balet “say katunongan nen Jehova [et] nagnap.” (Salmo 19:7) Agtayon balot nakaukolan so sananey nin opinyon.

Ipapanengneng na saray libro na Biblia ya Awaran (ya orihinal ya insulat nen Esdras bilang sakey a tomo) a si Esdras so talagan onsianon estudyante. Pian nisulat iratan a libro, sikatoy tinmupleg ed dakel a reperensya. * Saray Judio, a kasabisabi ra lambengat a nanlapud Babilonia, so mankakaukolan na sumaryo na awaran na bansa ra. Agmagenap so pikakabat da ed saray panagngilin ed relihyon da, panaglingkor ed templo tan saray kimey na saray Levita. Importantin maong ed sikara iray rekord na kapolian da. Inimanon tuloy nen Esdras irayan pamaakaran. Anggad isabi na Mesias, kaukolan a mansiansia iray Judio bilang nasyon a walaan na sarilin dalin, templo, inkasaserdote, tan gobernador. Lapud impormasyon ya atugyop nen Esdras, napansiansia so pankakasakey tan tuan panagdayew.

Komusta so niyugalim a panagaral no ikompara ed gagawaen nen Esdras? Say makulin panagaral ed Biblia so ontulong ed sika pian epektibon nibangat so Biblia.

“Mananap na Tunong nen Jehova” Bilang Pamilya

Say pananap na tunong nen Jehova so aglilimitaan parad personal a panagaral labat. Say panagaral na pamilya so ekselentin pankanawnawa pian nagawaan met iya.

Si Jan tan Julia, a sanasawan taga-Netherlands, so maksil a mangibabasa ed duaran anak dan lalaki nanlapu la’d inkianak na ugugaw. Natan, si Ivo so 15 años la tan si Edo so 14 años. Maminsan ed sakey simba a siansia nin manaaral so interon pamilya ra. Oniay impaliwawa nen Jan: “Say manunan kalat mi et aliwan pian kobrian so dakerakel a materyal legan na panagaral noagta say pakatalos na ugugaw ed sisingbaten.” Inyarum to: “Lanang a mansusukimat iray ugugaw. Susukimaten da iray agnatalosan a salita tan saray totoo ed Biblia​—no kapigan ira nambilay, siopa ra, antoy trabaho ra, tan arum ni. Manlapud nen makabasa la ra, tinmupleg ira ed saray libro a singa say Insight on the Scriptures, saray diksionaryo, tan ensayklopedia. Lalon makapaliket so panagaral na pamilya lapud satan. Naynay a magunaet a mantatalaran iray ugugaw.” Bilang kaaruman a gunggona, saratan ya ugugaw et napapalumbasan daray kaklase ra diad abilidad ed lenguahe.

Si John tan Tini, sananey nin sanasawa a taga-Netherlands, so angiyaaral ed anak dan laki, a si Esli, (24 años la natan tan sakey a payunir diad sananey a kongregasyon), tan ed marikit da, a si Linda (20 años la natan tan akiasawa ed maabig ya agin laki). Balet, imbes ya aralen da so sakey a publikasyon panamegley na tepet-tan-ebat a metodo, inyadapta ra so panagaral na pamilya ra unong ed edad tan saray pankaukolan na ananak da. Anton metodo so inusar da?

Impaliwawa nen John a nampili so ananak to na makapainteres a tema ed “Tepetepet na Saray Managbasa” (manlapud Say Panag-Bantayan) tan “The Bible’s Viewpoint” (manlapud Awake!). Insan da imparungtal so imparaan da, a lawas nanresulta ed makapasagyat iran diskusyon na pamilya. Diad onian paraan et akagamor iray kalangweran na eksperiensya diad panagsukimat tan diad panangisingbat ed saray resulta na impanaral da. Kasin ‘aanapen mo so tunong nen Jehova’ a kaiba iray anak mo? Aglabat iya mamaaligwas ed abilidad mon manbangat noagta ontulong met ed ananak mon magmaliw a lalon epektibon managbangat.

‘Manumpal ed Satan’

Inyaplika nen Esdras so naaralan to. Singa bilang, legan a walad Babilonia et nayarin mainawa  so bilay to. Anggaman kuan, sanen amoria ton nayarian ton tulongan iray kabaleyan to ed biek-taew, insalat to so mainawan kabibilay ed Babilonia diad arawin syudad na Jerusalem, a laktipen na satan iray amin a kairapan ed bilay, problema, tan kapeligroan. Malinew ya aglabat onggagamor na kakabatan si Esdras diad Biblia noagta sikatoy akaparaan ya onkiwas unong ed naaralan to.​—1 Timoteo 3:13.

Diad saginonor, legan a manaayam ed Jerusalem, impanengneng lamet nen Esdras ya inyaplika to so naaralan to tan ibabangat to. Mapatpatnag iya sanen nadngelan to so impangasawa na Israelitan lalaki ed paganon bibii. Ibabaga ed sikatayo na rekord ed Biblia a ‘pinilat to so kawes to tan say sukbong to, tan inggunot to so buek to ed ulo to tan ed iming to, tan imyurong ya agulo angga ed labi.’ Sikato ni ingen so ‘binmaing tan nampabalanga a mangitangay na lupa to’ ed si Jehova.​—Esdras 9:1-6.

Talagan sikato so naapektaan a tuloy ed impanaral to ed Ganggan na Dios! Malinew so panmoria nen Esdras ed saray makapasinagem a pansumpalan na itutunganga na totoo. Dagdaiset iramay akapawil a Judio. No mangasawa ira na saray sankaili, nayarin diad kaunoran et miulop lara ed akapaliber a paganon nasyones, tan main-inomay lan naandi ed tapew na dalin so puron panagdayew!

Makapalikliket ta say ehemplo nen Esdras ed masimoon ya itatakot tan seseg so anenyeg ed saray Israelita ya ipetek iray kurang da. Pinasempet da iray sankailin kaasawaan da. Diad loob na taloran bulan et nipetek so amin a pamaakaran. Say mismon inkamatoor nen Esdras ed Ganggan na Dios so akatulong na baleg pian magmaliw ya epektibo so panagbangat to.

Tua met itan natan. Sakey a Kristianon ama so angikuan: “Aaligen na ugugaw so gagawaen mo; aliwan say ibabagam!” Onaaplika met itan a prinsipyo diad loob na Kristianon kongregasyon. Saray mamatatken a mangipapanengneng na maabig ya ehemplo so makapan-ilalo ya onkiwas so kongregasyon unong ed saray ibabangat da.

‘Mangibangat ed Israel na Panontonan tan Inkahustisya’

Wala ni sananey a rason no akin ya epektibo so panagbangat nen Esdras. Agto imbangat iray dili ton ideya, noagta say ‘pananontonan tan inkahustisya.’ Salanti, saray pananontonan, odino ganggan nen Jehova. Saya so responsabilidad to bilang saserdote. (Malaquias 2:7) Imbangat to met so inkahustisya, tan sikato so angipanengneng na ehemplo ed ibabangat to panamegley na impansiansia to ed no anto so duga diad maptek tan agmangidumaduman paraan, unong ed estandarte. Sano ipapatnag na saray wala’d pakauley so inkahustisya, nileletneg so inkaligen tan niwala iray permanentin resulta. (Uliran 29:4) Mipadpara, saray Kristianon mamatatken, atateng, tan manangiyabawag na Panarian a mikabisadon maong ed Salita na Dios so makapangiletneg na espiritual ya inkaligen sano ibabangat da iray panontonan tan inkahustisya nen Jehova diad kongregasyon, diad saray pamilya ra, tan diad saray interesadon totoo.

Agta onabobon ka a magmaliw a mas epektibo so panagbangat mo no sigpot mon aligen so ehemplo nen matoor ya Esdras? Kanian, ‘iparaan mo so pusom, anapen so tunong nen Jehova, sumpalen itan, tan ibangat so panontonan tan inkahustisya nen Jehova.’​—Esdras 7:10.

[Paimano ed Leksab]

[Kahon/Litrato ed pahina 22]

AKIN YA EPEKTIBO SO PANAGBANGAT NEN ESDRAS?

1. Imparaan to so puso to ed dugan kondisyon

2. Sikatoy tinmupleg ed Ganggan nen Jehova

3. Impanengneng to so maabig ya ehemplo diad impangiyaplika ed naaralan to

4. Sikatoy makulin nanaral tan angiyaplika ed panmoria na Kasulatan