Onsisinag so Gloria nen Jehova ed Totoo To

“Si Jehova sikato naani so maando a liwawam.”​—ISAIAS 60:20.

1. Panon so pamebendisyon nen Jehova ed matoor a totoo to?

 “SI Jehova naroyroyo ed katooan to: sikato parakepen to na kilalaban so mauyamo.” (Salmo 149:4) Ontan so inkuan na salmista nensaman, tan pepekderan na awaran so katuaan na saray salita to. Sano matoor so totoo nen Jehova, iyaansakit to ra, pagmamaliwen to ran produktibo, tan sasalimbengan to ira. Diad kadaanan iran panaon, pinanbiktorya to ra ed saray kakabusol da. Natan, papabiskegen to ira ed espiritual tan papaseguroan to ira na kilalaban base ed bagat nen Jesus. (Roma 5:9) Gagawaen to iya lapud masanting ira ed imaton to.

2. Anggaman makakaabet ira na isusumpa, anto so napanmatalkan na totoo na Dios?

² Siempre, diad mundon nigalet ed kabilungetan, saramay ‘manbilay a sinasanto’ so makaabet na isusumpa. (2 Timoteo 3:12) Anggaman kuan, iimanoen nen Jehova iray onsusumpa, tan papasakbayan to ira: “Satan a nasyon tan nanarian ya agnaani manlingkor ed sika natawtaw; on, saraman a nasyon nabagbag ira naani a sigpot.” (Isaias 60:12) Natan, say panamasegsegang so ompapatnag ed nanduruman dalan. Diad pigaran daldalin et sasalien na saray onsusumpa a pegetan odino sebelan so panagdayew ya isasaklang na saray masimoon a Kristiano ed si Jehova. Diad arum, saray panatiko so pisikal ya angataki ed saray mandadayew ed si Jehova tan pinopoolan da iray kaykayarian da. Balet, tandaan a denetermina la nen Jehova so pansumpalan na antokaman ya isusumpa diad pakasumpal na linawa to. Onsaew iray onsusumpa. Saramay mibakal ed Sion, unong ya inrepresenta na ananak to ed dalin, so ag-ontalona. Agta makapaligsay-puson panamaseguro itan manlapud matalonggaring a Dios tayo, si Jehova?

Agnasabsabaan ya Abendisyonan

3. Panon a niyilustra so karakpan tan inkamabunga na saray managdayew ed si Jehova?

³ Say katuaan et legan na kaunoran iran agew na sayan sistema na bengabengatla, agnasabsabaan so impamendisyon nen Jehova ed totoo to. Nagkalalo la ed tuloytuloy a pamaparakep to ed pasen na panagdayewan ed sikato tan saramay walad limog na mangaakbibit ed ngaran to. Unong ed propesiya nen Isaias, inkuanto ed Sion: “Say gayaga na Libano onla naani ed sika, say abeto, say saleng, tan say alamo manbabansag, pian parakepen da so pasen na santuaryok; et gawaen ko naani so pasen na saray salik a magayaga.” (Isaias 60:13) Saray kapalandeyan ya asakbongan na mabunan katakelan so alay abig a nengnengen. Kanian say dakerakel a kakiewan so matukoy a simbolo na karakpan tan inkamabunga  na saray managdayew ed si Jehova.​—Isaias 41:19; 55:13.

4. Anto so ‘santuaryo’ tan say ‘pasen na saray sali [nen Jehova],’ tan panon irayan napaparakep?

⁴ Anto so ‘santuaryo’ tan say ‘pasen na saray sali [nen Jehova]’ ya asalambit ed Isaias 60:13? Sarayan termino so manutukoy ed saray saban na baleg ya espiritual a templo nen Jehova, a satan so uksoyan ed iyaasingger ed si Jehova diad panagdayew ed sikato panamegley nen Jesu-Kristo. (Hebreos 8:1-5; 9:2-10, 23) Indalatdat nen Jehova so gagala to ya igloria itan ya espiritual a templo diad pantipon ed totoo to manlapud amin a nasyones pian ondago tan mandayew ira ditan. (Aggeo 2:7) Akadkauna lan anengneng nen Isaias iray ulop manlapud amin a nasyones ya onaagus ed niyatagey a palandey nen Jehova parad panagdayew. (Isaias 2:1-4) Kayari na pigan lasus a taon, anengneng nen apostol Juan ed pasingawey so “sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita.” Saraya so akaalagey “ed arap na trono na Dios; tan sikato so panlingkoran da ed agew tan labi ed templo to.” (Apocalipsis 7:9, 15) Diad pakakasumpal na sarayan propesiya ed panaon tayo, naiimatonan tayon mismo a napaparakep so abung nen Jehova.

5. Anton baleg ya iyaaligwas so naeksperiensya na ananak na Sion?

⁵ Agaylan baleg ya iyaaligwas itan parad Sion! Inkuan nen Jehova: “Bangta nikaindan ka tan sika so ginula nensaman, dia ed ontan ya anggapo so too a dinmalan ed sika nensaman, gawaen ta ka naani a sakey a sankablian lawas, sakey a liket na saray dakel a kailalakan.” (Isaias 60:15) Diad pansamposampot na inmunan guerra mundial, say “Israel na Dios” so peteg ya akaeksperiensya ed panaon na pankibalatar. (Galacia 6:16) Alikna to a sikatoy “nikaindan,” lapud agmalinew ya atebek na ananak to ed dalin so linawa na Dios parad sikara. Insan, nen 1919, binilay lamet nen Jehova iray alanaan a lingkor to, tan manlapu la’d saman et benendisyonan to ira na makapakelaw ya aligwas ed espiritual. Niarum ni, agta makapasagyat so sipan a walad sayan bersikulo? Ipasen nen Jehova so Sion bilang “sankablian.” On, say ananak na Sion, tan si Jehova a mismo, so manliket a maong parad Sion. Sikato so magmaliw a “liket,” a sengegan na manleppuan gayaga. Tan aliwa lambengat a maganggano itan. Say apaboran a kipapasen na Sion, unong ya inrepresenta na mangaraldalin ya ananak to, so mansiansia ed “saray dakel a kailalakan.” Agbalot itan ontunda.

6. Panon ya uusaren na saray tuan Kristiano iray kayarian na nasyones?

⁶ Talinengen natan so sananey nin madibinon  sipan. Diad panasaglawi ed Sion, oniay kuan nen Jehova: “Sika met sopsopen mo naani so gatas na saray nasyon, et sopsopen mo naani so [pagew na] saray arari; et sika naamtaan mo naani a siak, si Jehova, say Manangilaban ed sika, tan Mananondon ed sika, say Makapanyari a Saksakey nen Jacob.” (Isaias 60:16) Panon a manatagano so Sion ed “gatas na saray nasyon” tan sopsopen “so pagew na saray arari”? Diad pantalos a saray alanaan a Kristiano tan say “arum a karnero” a kakaiba ra so makanan manguusar ed kaykayarian na saray nasyon pian niyabanti so puron panagdayew. (Juan 10:16) Say boluntaryon pinansyal a kontribusyon so makatulong pian magmaliw a posibli so malaknab ya internasyonal a panagpulong tan panagbangat a kimey. Say makabat a panguusar ed modernon teknolohiya so mamapainomay ed panangipalapag ed saray Biblia tan literatura na Biblia diad nilasus iran lenguahe. Natan, say katuaan na Biblia so wala la ed dakel a totoo nen say saman ed awaran. Saray mibabaley ed dakerakel a nasyon so makakaaral a si Jehova, ya anondon ed saray alanaan a lingkor to manlapud espiritual ya impakakautibo, so peteg a Manangilaban.

Iyaaligwas na Organisasyon

7. Anton matalonggaring ya iyaaligwas so naeksperiensya na ananak na Sion?

⁷ Pinarakep nen Jehova so totoo to diad sananey a dalan. Sikato so amendisyon ed sikara tekep na iyaaligwas na organisasyon. Oniay nabasa tayo ed Isaias 60:17: “Lapu ed gansa mangyakar ak naani na balitok, et lapu ed balatyang mangyakar ak naani na pilak, et lapu ed kiew mangyakar ak na gansa, tan lapu ed saray bato mangyakar ak na balatyang. Et gawaen ko naani met so saray panuleyen mo a deen, tan saray manamairap mo gawaen ko ra a matunong.” Say pansalat na balitok ed gansa et sakey ya iyaaligwas, tan tua met itan ed arum niran materyales ya asalambit. Mitunosan ed saya, naeksperiensya na Israel na Dios so peles iran aligwas na organisasyon diad saray kaunoran ya agew. Konsideraen so pigaran alimbawa.

8-10. Deskribien so pigaran iyaaligwas na organisasyon ya agawa manlapu la’d 1919.

⁸ Antis na 1919, saray kongregasyon na totoo na Dios so inasikaso na saray mamatatken tan diakono ya imbotos na kongregasyon ed demokratikon paraan. Manlapud saman a taon, “say matoor tan makabat ya aripen” so anuro na service director ed kada kongregasyon a mangasikaso ed saray kimey ed lawak na serbisyo. (Mateo 24:45-47) Balet diad dakel a kongregasyon et aliwan epektibo itan ya uksoyan lapud agsigpot a sinuportaan na arum ya imbotos a mamatatken so panag-ebanghelyon kimey. Kanian, nen 1932, saray kongregasyon so abilin ya itunda da  lay panagbotos ed saray mamatatken tan diakono. Imbes, sikara so mamili na lalaki a manlingkor ed service committee kaiba so service director. Satan so singa “gansa” imbes a “kiew”​—sakey a baleg ya iyaaligwas!

⁹ Nen 1938, saray kongregasyon ed interon mundo so determinadon mangawat ed apaaligwas ya uksoyan, a mas mitukoyan ed Makasulatan a pangaligan. Nimatalek so panangipakurang ed kongregasyon diad company servant tan arum niran lingkor, ya amin da so aturo ed silong na panangasikaso na matoor tan makabat ya aripen. Anggapo laray panagbotos! Kanian saray panagturo ed kongregasyon so ginawa ed teokratikon paraan. Satan so singa “balatyang” imbes a saray “bato” odino “balitok” imbes a “gansa.”

¹⁰ Manlapu la’d saman et nantultuloy so aligwas. Alimbawa, nen 1972 et naimanon mas maapit la ingen ed paraan na impangipakurang ed saray Kristianon kongregasyon nen inmunan siglo so pangaasikaso ed saray kongregasyon panamegley na mantutulongan ya ulop na mamatatken a tinuro ed teokratikon paraan, ya anggapoy siopaman a matatken a mangaagamil na autoridad ed arum. Niarum ni, ngalngali duay taon lay apalabas, walay sananey nin kundang na iyaaligwas. Walay pananguman no sioparay direktor na pigaran legal a korporasyon, ya agawan posibli parad say Mananguley ya Ulop a mangiyapasakey lan nagkalalo ed saray espiritual ya interes na totoo na Dios imbes a naabala ed inagew-agew iran pamaakaran ed legal.

11. Siopa so walad benegan na saray pananguman ed organisasyon diad limog na totoo nen Jehova, tan anto so resulta na sarayan pananguman?

¹¹ Siopa so walad benegan na sarayan maaligwas a pananguman? Anggapo lay arum noagta si Jehova a Dios. Sikato imay angibagan: “Mangyakar ak naani na balitok.” Tan sikato so nantultuloy nin angibaga: “Gawaen ko naani met so saray panuleyen mo a deen, tan saray manamairap mo gawaen ko ra a matunong.” On, si Jehova so responsable ed panangasikaso ed totoo to. Say nipasakbay ya iyaaligwas na organisasyon so sananey nin dalan a pamaparakep to ed totoo to. Tan bilang resulta et nabebendisyonan iray Tastasi nen Jehova ed dakel a paraan. Oniay nabasa tayo ed Isaias 60:18: “Say panamasoot agla naani narengelan ed dalin mo, say kabagbag tan kageba agla naani narengelan ed saray ketegan mo; noag ingen sika tawagen mo naani so saray bakor na Kilalaban, tan say wangalan mo tawagen mo naani a Galang.” Agaylay dakep iratan a salita! Balet panon iratan a nasusumpal?

12. Panon ya ontatalona so kareenan ed limog na saray tuan Kristiano?

¹² Saray tuan Kristiano so mapetepet a maniimano ed si Jehova parad bilin tan panangigiya, tan say resulta et samay walan impasakbay la nen Isaias: “Amin iray anak mo nibangat ira ed Jehova; et baleg naani deen na saray anak mo.” (Isaias 54:13) Niarum ni, onkukurang so espiritu nen Jehova ed totoo to, tan say kabiangan na bunga na satan ya espiritu et kareenan. (Galacia 5:22, 23) Lapud inkadeen na totoo nen Jehova, sikara so nagmaliw a makaparepreskon salimbengan ed maramsak a mundo. Say mareen a kipapasen da, a nibase ed aro na saray tuan Kristiano ed balang sakey, so pagpauna na bilay ed balon mundo. (Juan 15:17; Colosas 3:14) Maseguron  naliliketan so balang sakey ed sikatayo a manggayaga tan mangiyalibansa ed satan a kareenan, a mangitarok na dayew tan galang ed Dios tayo tan manunan kabiangan ed espiritual a paraiso tayo!​—Isaias 11:9.

Say Liwawa nen Jehova so Mantultuloy ya Onsinag

13. Akin a makaseguro itayo a say liwawa nen Jehova so agbalot ontundan onsinag ed totoo to?

¹³ Kasin mantultuloy ya onsinag so liwawa nen Jehova ed totoo to? On! Diad Isaias 60:19, 20, oniay nabasa tayo: “Say banwa anggan kapigan aliwa a sikato naani la so liwawam ed agew; anggan say sinag na bulan agla naani onsinag ed sika; noag ingen si Jehova sikato naani so andi ebas a liwawa ed sika, et say Dios mo so gloriam. Say banwam agla naani onselek, anggan say bulan mo agla ompaliis; ta si Jehova sikato naani so maando a liwawam, et say agew na pambaliwan mo mangangga ra naani.” Sanen angangga la nen 1919 so ‘pambabaliwan’ na saray akautibo ed espiritual, ginmapon sinminag so liwawa nen Jehova ed sikara. Kayari na masulok a 80 a taon, panggagayagaan da nin siansia so pabor nen Jehova diad pantutultuloy ya isisinag na liwawa to. Tan ag-itan ontunda. Nipaakar ed saray mandadayew ed sikato, say Dios tayo so ‘ag-onselek’ a singa banwa odino ‘ag-ompaliis’ a singa say bulan. Imbes, isindag to so liwawa ed sikara diad ando lan ando. Agaylan abig a panamaseguro ed sikatayo a manbibilay ed saray kaunoran ya agew na sayan mundo a walad kabilungetan!

14, 15. (a) Diad anton paraan ya amin a totoo na Dios et “matunong”? (b) Nipaakar ed Isaias 60:21, anton importantin kasumpalan so iilaloan na arum a karnero?

¹⁴ Dengelen natan so sananey nin sipan ya imbalikas nen Jehova nipaakar ed saray mangaraldalin a manangilaman na Sion, say Israel na Dios. Oniay kuan na Isaias 60:21: “Saray ombaley mo met matunong ira ya amin naani; sikara tawiren da naani so dalin ed ando lan ando, say sanga na pantanaman ko, say gawa na saray limak, pian napagayagak.” Nen 1919 sanen nipawil ed kimey iray alanaan a Kristiano, sikara so nagmaliw a nikadkaduman grupo na totoo. Diad sayan makaskasalanan lan mundo, sikara so niyabawag a ‘matunong’ base ed agnatenyeg a pananisia ra ed dondon bagat nen Kristo Jesus. (Roma 3:24; 5:1) Insan, singa saray Israelita a nibulos ed impakakautibo ed Babilonia, sikara so angayarian ed “dalin,” say espiritual a dalin, odino sakop na kimey, a panggagayagaan da ditan so espiritual a paraiso. (Isaias 66:8) Say singa-paraison karakpan na satan a dalin so agbalot onkupas lapud, aliwan singa say Israel nensaman,  say Israel na Dios bilang sakey a nasyon so lawas manmatoor. Agbalot ontayer so pananisia, panagsungdo, tan seseg da a mangigalang ed ngaran na Dios.

¹⁵ Amin a membro na satan ya espiritual a paraiso so nibiang ed balon sipanan. Nisulat ed kapusoan dan amin so ganggan nen Jehova, tan si Jehova, base ed dondon bagat nen Jesus, so amerdona ed saray kasalanan da. (Jeremias 31:31-34) Inyabawag to ira a matunong bilang ‘ananak’ tan midedeneng ed sikara a singano ayadyari ira. (Roma 8:15, 16, 29, 30) Napeperdona met so kasalanan na kaiba ran arum a karnero base ed bagat nen Jesus tan, singa si Abraham et niyabawag ira a matunong bilang kakaaro na Dios panamegley na pananisia. “Inurasan da so kawekawes da, tan sikara so pinaputi ra ed dala na Kordero.” Tan maniilalo irayan kakaiban arum a karnero ed sananey a matalonggaring a bendisyon. Kayari pakaliktar da ed ‘baleg a kairapan’ odino kayari na kioli ra, naeksperiensya ra so literal a kasumpalan na saray salita na Isaias 60:21 sano say interon dalin so magmaliw a paraiso. (Apocalipsis 7:14; Roma 4:1-3) Diad satan a panaon, “saray mauyamo tawiren da naani dalin: tan manliket ira a dili ed inkadaakan na kareenan.”​—Salmo 37:11, 29.

Mantultuloy so Idaraak

16. Anton makatantandan sipan so ginawa nen Jehova, tan panon itan ya asumpal?

¹⁶ Diad unor a bersikulo na Isaias 60, nabasa tayo so masimoon ya insipan nen Jehova ed sayan kapitulo. Inkuanto ed Sion: “Say daiset magmaliw naani a sanlibo, et say melag magmaliw naani a mabiskeg a nasyon: Siak, si Jehova, sikato naani gawaen ko a magano ed panaon to.” (Isaias 60:22) Diad panaon tayo, tinoor nen Jehova so salita to. Sanen nipawil iray alanaan diad kimey da nen 1919, pigpigara ira, talagan “daiset.” Dinmakel ira sanen nitipon so kaaruman iran espiritual ya Israelita. Insan dinmagsa so arum a karnero a lawas ondarakel. Say mareen a kipapasen na totoo na Dios, say espiritual a paraiso a wala ed “dalin” da, so anagyat ed dakel a matuan-impapuso kanian “say melag” so peteg a nagmaliw a “mabiskeg a nasyon.” Diad kaplesan, sayan “nasyon”​—say Israel na Dios tan say masulok ya anemiran milyon a dedikadon “sankaili”​—so mas dakel nen say amayamay ya independentin estado ed mundo. (Isaias 60:10) Amin ya ombaley na satan so mibibiang ed panangiwandag na liwawa nen Jehova, tan satan so mamaparakep ed sikaran amin diad imaton to.

17. Panon kayon naapektaan ed impaningbat ed Isaias kapitulo 60?

¹⁷ On, makapabiskeg-pananisia a konsideraen iray manunan punto na Isaias kapitulo 60. Makapaligliwan naimatonan a masakbay nin tuloy et amta la nen Jehova a say totoo to so nadakep ed espiritual insan nipawil lamet. Mankelkelaw itayo ta masakbay nin tuloy et anengneng la nen Jehova so pirmin idakel na saray tuan managdayew diad panaon tayo. Niarum ni, agaylan makapaligliwan nodnonoten ya ag-itayo ikaindan nen Jehova! Agaylan maaro so panamaseguro a saray wangalan na “syudad “ so lawas akalukas tan maparawes a mangabrasa ed saramay “nikiling ed bilay ya andi-anggaan”! (Gawa 13:48, NW) Mantultuloy a sisinagan nen Jehova so totoo to. Say Sion so mantultuloy a pandinayewan legan ya onsisinag lan onsisinag so liwawa na ananak to. (Mateo 5:16) Maseguro a lalon determinado itayo nen say kapiganman a mansiansian maapit ed Israel na Dios tan pablien so pribilehyo tayon mangiwandag na liwawa nen Jehova!

Kasin Nipaliwawa Yo?

• Nipaakar ed isusumpa, anto so napanmatalkan tayo?

• Panon a ‘sosopsopen [na ananak na Sion] so gatas na saray nasyon’?

• Diad antoran paraan ya ‘inyakar [nen Jehova] so gansa imbes a kiew’?

• Anton duaran kalidad so nipabitar diad Isaias 60:17, 21?

• Panon a say “melag” et nagmaliw a “mabiskeg a nasyon”?

[Tepetepet Parad Panagaral]

[Kahon/Saray litrato ed pahina 18]

PROPESIYA NEN ISAIAS​—Liwawa Parad Amin a Katooan

Say segek na materyal ed sarayan artikulo so nipresenta ed sakey a paliwawa legan na 2001/02 a “Manangibangat na Salitay Dios” a Distrito Iran Kombension. Diad kaunoran a parte na paliwawa, impaway na espiker so balon publikasyon ya apauloan na Isaiah’s Prophecy​—Light for All Mankind, Tomo Dos, diad dakel a lugar. Diad akadkaunan taon et nipaway so Isaiah’s Prophecy​—Light for All Mankind, Tomo Uno. Diad inkipaway na sayan balon publikasyon, wala la natan so nipanpanaon ya impaningbat ed amin lawarin bersikulo na libroy Isaias. Napaneknekan a sarayan tomo so maabig a tulong ed pamaaralem ed pakatalos tan panamabli tayo ed makapabiskeg-pananisian mapropetikon libro na Isaias.

[Saray litrato ed pahina 15]

Anggaman ed marawal ya isusumpa, ‘paparekepen nen Jehova so totoo to tekep na kilalaban’

[Saray litrato ed pahina 16]

Uusaren na totoo na Dios so makanan kaykayarian na saray nasyon pian iyabante so puron panagdayew

[Litrato ed pahina 17]

Benendisyonan nen Jehova so totoo to tekep na iyaaligwas na organisasyon tan deen