Paparakepen nen Jehova so Totoo To Panamegley na Liwawa
Paparakepen nen Jehova so Totoo To Panamegley na Liwawa
“Onalagey ka [O bii], onsinag ka; ta say liwawam onsabi; et say gloria nen Jehova ompelnak ed sika.”—ISAIAS 60:1.
1, 2. (a) Anto so kipapasen na katooan? (b) Siopa so walad benegan na kabilungetan ed katooan?
“WALA komon so singa si Isaias odino si San Pablo!” Ontan so maksil ya inkelyaw na Presidente na E.U. a si Harry Truman nen dekaday 1940. Akin ya imbalikas to iratan a salita? Lapud atebek ton kaukolan iray lider a walaan na matalonggaring a moralidad diad mundo nen panaon to. Naeksperiensya la na mundo so sankauddieman a peryodo na koma-20 siglo, say komaduan guerra mundial. Balet anggaman asumpal lay bakal, anggapo nin siansiay kareenan ed mundo. Nantultuloy ni so kabilungetan. On, 57 a taon kayari na satan a bakal, say mundo so wala ni’d kabilungetan. No mabilay ni natan si Presidente Truman, maseguron namoria to a kaukolan niray lider a walaan na moralidad a singa si Isaias odino si apostol Pablo.
2 Balanglan amta itan nen Presidente Truman odino andi, sinaglawi nen apostol Pablo so nipaakar ed kabilungetan a mamapairap ed katooan, tan impasakbay to itan diad saray sulat to. Alimbawa, pinasakbayan to iray kapananisiaan: “Ag-itayo mitulot ed laman tan dala, noag ingen onsumpa itayo ed saray manunaan, onsumpa ed saray pakayari, onsumpa ed saray manuley ed mundo na sayan kabilungetan, sumpa ed saray mauges ya espiritu ed pasen a mangatatawen.” (Efeso 6:12) Diad saratan a salita et impabitar nen Pablo ya agto lambengat kabat so nipaakar ed espiritual a kabilungetan a manasakbong ed mundo noagta amta to met so peteg a lapuan na satan—saray makapanyarin demonikon puersa ya adeskribe bilang “saray manuley ed mundo.” Lapud saray makapanyarin espiritu so walad benegan na kabilungetan ed mundo, wala ta so nagawaan na totoo lambengat pian paandien itan?
3. Anggaman ed mauddiem a kipapasen na katooan, anto so impasakbay nen Isaias parad saramay matoor?
3 Sinaglawi met nen Isaias so nipaakar ed kabilungetan a mamapairap ed katooan. (Isaias 8:22; 59:9) Balet, diad panatalaran ed panaon tayo, sikato so apuyanan ya angipasakbay ya anggan diad sarayan mauddiem a panaon, paligsaen nen Jehova so panmoria na saramay mangaaro ed liwawa. On, anggano agtayo aktual a kalimog si Pablo odino si Isaias natan, walaan itayo na apuyanan a sulsulat da a mangiwanwan ed sikatayo. Pian natebek tayo a talagan bendisyon itan parad saramay mangaaro ed si Jehova, konsideraen tayo iray mapropetikon salita nen Isaias a naromog ed koma-60 a kapitulo na libro to.
Mangisisindag na Liwawa so Mapropetikon Bii
4, 5. (a) Anto so igaganggan nen Jehova a gawaen na bii, tan anto so insipan ton gawaen? (b) Anton makapasagyat ya impormasyon so lugan na Isaias kapitulo 60?
4 Saray primeron salita na Isaias 60 so nipaarap ed sakey a biin walad makapasinagem a kipapasen—walad kabilungetan, ya akarukol ed dalin. Insan biglan pinmelnak so liwawa ed kabilungetan, tan kinmelyaw si Jehova: “Onalagey ka [O bii], onsinag ka; ta say liwawam onsabi; et say gloria nen Jehova ompelnak ed sika.” (Isaias 60:1) Sinmabi la so panaon pian onalagey so bii tan isindag to so liwawa na Dios, say gloria to. Akin? Nanengneng tayo so ebat ed ontumbok a bersikulo: “Nia say kabilungetan sakbongan to so dalin, tan say makapal a kabilungetan so saray balbaley; balet si Jehova onalagey naani ed tapew mo, et say gloria to nanengneng mo naani ed tapew mo.” (Isaias 60:2) Sanen tinulok na bii so ganggan nen Jehova, sikatoy apaseguroan na makapakelaw a resulta. Inkuan nen Jehova: “Saray nasyon ondago ra naani ed liwawam, tan saray arari ed sinag na kapepelnak mo.”—Isaias 60:3.
5 Saray makapasagyat a salita ed sayan taloran bersikulo so sakey ya introduksion tan segek na arum a lugan na Isaias kapitulo 60. Ipapasakbay na satan iray naeksperiensya na mapropetikon bii tan isasalaysay na satan no panon itayon makapansiansia ed liwawa nen Jehova anggaman ed walan kabilungetan ya anakbong ed katooan. Balet, anto so kabaliksan na saray simbolo ed sarayan taloran manangilukas a bersikulo?
6. Siopa so bii ed Isaias kapitulo 60, tan siopa so mangirerepresenta ed sikato diad dalin?
6 Say bii ed Isaias 60:1-3 et say Sion, say mangatatawen ya organisasyon nen Jehova a tugyopen na saray espiritun palsa. Natan, say Sion so irerepresenta ed dalin na saray nakekeraan na “Israel na Dios,” say internasyonal a kongregasyon na saray Kristianon alanaan na espiritu, a walaan na ilalon miuley ed si Kristo diad tawen. (Galacia 6:16) Sayan espiritual a nasyon so walaan na dagup a 144,000 a membro, tan say modernon kasumpalan na Isaias kapitulo 60 so akasentro ed saramay mabilay diad dalin legan na “saray kaunoran ya agew.” (2 Timoteo 3:1; Apocalipsis 14:1) Dakel ni so ibinsabinsa na propesiya nipaakar ed saray kaiba na sarayan alanaan a Kristiano, say “baleg ya ulop” na ‘arum a karnero.’—Apocalipsis 7:9; Juan 10:16.
7. Anto so kipapasen na Sion nen 1918, tan panon iyan nipropesiya?
7 Wala kasi so panaon nensaman a walad kabilungetan so “Israel na Dios,” a singa inyanino na satan a mapropetikon bii? On, saya so agawa masulok lan 80 a taon so apalabas. Leleg na inmunan guerra mundial, akipuligesgesan a maong iray alanaan a Kristiano pian nitultuloy da so panagpulong a kimey. Balet nen 1918, say sampot a taon na bakal, apatunda lawari so organisadon panagpulong a kimey. Si Joseph F. Rutherford, a mangaasikaso ed sankamundoan a kimey a panagpulong, tan arum niran prominentin Kristiano so asentensiaan na abayag a pakapriso makasengeg ed palso iran akusasyon. Diad libro na Apocalipsis, saray alanaan a Kristiano a wala nensaman ed dalin so mapropetikon adeskribe bilang bangbangkay a ‘kitungilang ed lansangan na baleg a syudad, ya unong ed inka-espiritu sikato so manngaran na Sodoma tan Ehipto.’ (Apocalipsis 11:8) Satan so peteg a mauddiem a panaon parad Sion, unong ya inrepresenta na alanaan ya ananak to diad dalin!
8. Anton dramatikon pananguman so agawa nen 1919, tekep na anton resulta?
8 Anggaman ontan, naimatonan ed taon 1919 so makapasagyat a pananguman. Insindag nen Jehova so liwawa ed Sion! Kinmiwas iramay nakekeraan na Israel na Dios ta pian niwandag da so liwawa na Dios, a makpel dan inyabawag lamet so maong a balita. (Mateo 5:14-16) Lapud apasimbalon seseg na sarayan Kristiano, arum so atangguyor ed liwawa nen Jehova. Diad pangigapo, saray balon sabi so alanaan bilang kaaruman a kabiangan na Israel na Dios. Atawag ira ya arari ed Isaias 60:3, lapud sikara so nakaiba nen Kristo a manawir ed mangatatawen a Panarian na Dios. (Apocalipsis 20:6) Saginonor, say baleg ya ulop na arum a karnero so atangguyor ed liwawa nen Jehova. Saraya so ‘nasyones’ ya asalambit ed propesiya.
Onsempet la so Ananak na Bii!
9, 10. (a) Anto so makatantandan anengneng na bii, tan anto so ipaparungtal na saya? (b) Anton rason so walad Sion pian manggayaga?
9 Natan et intarya nen Jehova so dakel nin detalye ed impormasyon a nidatak ed Isaias 60:1-3. Inter to ed bii so sananey a ganggan. Talinengen so inkuanto: “Itangay mo so saray matam ed liberliber et onnengneng ka.” Tinmulok so bii, tan agaylan makapaligsay-puso so anengneng to! Onsesempet laray ananak to. Oniay intuloy ya inkuan na teksto: “Sikara ya amin mantitipon ira, onla ra ed sika; saray anak mo a lalaki onsabi ra naani a manlapu ed arawi, et saray anak mo a bibii niyakar ira naani ed saray taklay.” (Isaias 60:4) Say sankamundoan a panangiyabawag na Panarian a ginmapo nen 1919 so anangguyor ed nilibo iran balo ni a manlingkor ed si Jehova. Saraya met so nagmaliw ya ‘anak a lalaki’ tan ‘anak a bibii’ na Sion, saray alanaan a membro na Israel na Dios. Kanian, pinarakep nen Jehova so Sion diad impangitarok to ed unor laran kabiangan na 144,000 diad liwawa.
10 Kasin naisip yo so liket na Sion nen pinmawil la’d sikato so ananak to? Ingen ta angiter si Jehova ed Sion na kaaruman iran rason pian manggayaga. Oniay nabasa tayo: “Saman la nanengneng mo tan isinag mo, et say pusom omparok naani tan napabaleg lapu ed inkadaakan na dayat ompawil naani ed sika; say kayamanan na saray nasyon onla ed sika.” (Isaias 60:5) Mitunosan ed saratan a mapropetikon salita, nanlapu la’d dekaday 1930, dinmagsa ed Sion so dakerakel a Kristiano a walaay ilalon manbilay na ando lan ando diad dalin. Sikara so pinmaway ed “dayat” na katooan a nisian ed Dios tan irerepresenta ra so “kayamanan na saray nasyon.” Sikara so “makaparoyroyon bengatla na amin a nasyon.” (Aggeo 2:7, NW; Isaias 57:20) Imanoen met a sarayan “makaparoyroyon bengatla” so agnagsi-nagsin manlilingkor ed si Jehova. Andi, mangaarum ira ed karakpan na Sion diad idadagsa ran mandayew kaiba iray alanaan ya agagi ra, kanian nagmaliw iran “sakey a pulok” ed silong na “sakey a pastol.”—Juan 10:16.
Saray Managtagilako, Managpastol, tan Negosyante so Ondago ed Sion
11, 12. Deskribien iray ulop ya anengneng a mamapaarap ed Sion.
11 Say resulta na sayan impasakbay a panagtipon et sakey a matalonggaring ya indakel na saray managdayew ed si Jehova. Saya so nipasakbay ed ontumbok iran salita na propesiya. Isipen pan akaalagey kayon kaiba so mapropetikon bii ed Palandey Sion. Onnengneng kayo ed bukig, tan anto so nanengneng yo? “Say inkarakel na saray kamelyo sakbongan to ka naani, saray dromedario a taga Midian, tan taga Efa; sikara ya amin manlapu ed Saba ondago ra naani; sikara ya amin onsabi ra a mangyakar na balitok tan insenso. Et ibawag da naani so saray kagalangan nen Jehova.” (Isaias 60:6) Ipapaarap na saray ulop na managtagilako so dakerakel a kamelyo ra diad saray basbas a mamaarap ed Jerusalem. Agayla, saray kamelyo et singa delap a manasakbong ed dalin! Tarok na saray negosyante iray ankablin langkap, “balitok tan insenso.” Tan sarayan managtagilako so dinmago ed liwawa nen Jehova ta pian sikatoy mapublikon idayew da, ‘pian iyabawag da iray kagalangan nen Jehova.’
12 Aliwan saray managtagilako labat so onkukurang. Saray managpastol met so ondadagsa ed Sion. Oniay intuloy ya inkuan na propesiya: “Saray amin a karnero na Cedar natipon ira ed sika, saray kalakian a karnero na Nabaiot onkana ra naani ed sika.” (Isaias 60:7a) Ondagsa met ed masanton syudad iramay managpastol a tribu pian mangisaklang ed si Jehova na sankaabigan da manlapud saray pulok da. Iyapay da ni ingen so inkasikara a manlingkor ed Sion! Panon ya abrasaen nen Jehova irayan sankaili? Oneebat a mismo so Dios: “Ontatdang ira naani a katekep na panangunor na altar ko; et pagayagaen ko naani so abung na gayagak.” (Isaias 60:7b) Tekep na kamaongan ya awaten nen Jehova iray apay tan serbisyo na sarayan sankaili. Say kiwawala ra so mamaparakep ed templo to.
13, 14. Anto so anengneng a manasingger manlapud sagur?
13 Natan et onlingaw kayo tan bantag yo so walad sagur. Anto so nanengneng yo? Diad arawin pasen, wala so singa amputin lurem a sinmaknap ed dayat. Intepet nen Jehova so walad kanonotan yo: “Siopa ta so saraya ya ontekkiab a singa lurem, tan singa ra malapati ed saray dorongawen da?” (Isaias 60:8) Oniay ebat nen Jehova ed mismon tepet to: “Saray pulo manalagar ira naani ed siak, tan saray sakayan na Tarsis unona, a mangyakar ed saray anak mo a lalaki a manlapu ed arawi, say pilak da tan balitok da a kaulop da, nipaakar ed ngaran nen Jehova a Dios mo, tan nipaakar ed Santo na Israel, lapu ed sikato so amagayaga [“amarakep,” NW] ed sika.”—Isaias 60:9.
14 Kasin nilitrato yo’d kanonotan yo itan? Satan ya amputin lurem so manasingger tan natan et singa amungkog iran tulnek ed sagur. Singa ra manok a mibabansag ed saray daluyon. Balet no manasingger la ra, saratan manaya et saray bapor ya akabuskag iray layag da a manusuba ed dagem. Agaylan karakel a bapor so manlalayag a paarap ed Jerusalem a singano ra grupo na saray malapati. Manlapud arawi iran daongan, sayan ulop na bapor so maples a manbabaroy, a mangitatarok na saray mananisia diad Jerusalem pian mandayew ed si Jehova.
Onlalaknab so Organisasyon nen Jehova
15. (a) Anton idaraak so ipapasakbay na saray salita na Isaias 60:4-9? (b) Saray tuan Kristiano so mangipapatnag na anton espiritu?
15 Agaylan linew a mapropetikon panangilitrato so ipaparungtal na bersikulo 4 ya anggad 9 nipaakar ed sankamundoan ya ilalaknab a nagagawa la manlapud nen 1919! Akin ya ontanlan idaraak so impalabo nen Jehova ed Sion? Lapud nen 1919 ni et say Israel na Dios so matulok tan tuloytuloy ya angisindag ed liwawa nen Jehova. Balet, kasin naimano yo a diad bersikulo 7, saray balon sinmabi so ‘ontatatdang ed altar [na Dios]’? Diad altar so pambabagatan, tan sayan aspekto na propesiya so mangipapanonot ed sikatayo a say panaglingkor ed si Jehova so mangilalanor ed panagbagat. Oniay insulat nen apostol Pablo: “Pikasik ed sikayo, . . . ya ipatnag yo so saray laman yo a mabilay a bagat, masantos, makapaliket ed Dios, ta sikato so maespiritu a lingkor yo.” (Roma 12:1) Mitunosan ed saray salita nen Pablo, saray peteg a Kristiano so agkontento ed iyatendi lambengat ed pigaran relihyoson pantitipon ed kada simba. Uusaren da so panaon, biskeg, tan kaykayarian da pian iyalibansa so puron panagdayew. Agta say kiwawala na saratan a debosyonadon managdayew so mamaparakep ed abung nen Jehova? Inkuan na propesiya nen Isaias ya ontan so nagawa. Tan bilang resulta, makaseguro itayon saratan a maseseg a managdayew so marakdakep ed imaton nen Jehova.
16. Siopa so ontutulong ed panagpaalagey a kimey ed kadaanan iran panaon, tan siopa so manggagawa ed satan diad modernon panaon?
16 Kaliktan na saray balon sabi so mankimey. Oniay intuloy ya inkuan na propesiya: “Saray sankaili ipaalagey da naani so saray bakor mo, et saray ari ra manlingkor ira naani ed sika.” (Isaias 60:10) Diad primeron kasumpalan na sarayan salita ed panaon na impawil na saray adestiero ed Babilonia, saray ari tan arum niran nanlapud nasyones so aktual a tinmulong ed panagpaalagey na templo tan say syudad na Jerusalem. (Esdras 3:7; Nehemias 3:26) Diad modernon kasumpalan, susuportaan na baleg ya ulop iray alanaan a nakdaan diad panangiletneg ed tuan panagdayew. Ontutulong iran mamabiskeg ed saray Kristianon kongregasyon tan diad ontan et napapaelet so singa-syudad iran “bakor” na organisasyon nen Jehova. Mibibiang met ira ed literal a panagpaalagey a kimey—panagpaalagey na saray Kingdom Hall, Assembly Hall, tan saray pasilidad na Bethel. Diad amin na sarayan paraan, susuportaan daray alanaan ya agagi ra diad panangasikaso ed saray pankaukolan na onlalaknab ya organisasyon nen Jehova!
17. Anto so sakey a paraan a paparakepen nen Jehova so totoo to?
17 Agaylan makapaseseg iray unor a salita na Isaias 60:10! Inkuan nen Jehova: “Dia ed sanok ko kinabil ta ka, balet dia ed pamalangkap ko kinasian ta ka.” On, nen 1918/19, dinisiplina nen Jehova so totoo to. Balet apalabas la itan. Natan la so panaon pian ipatnag nen Jehova so panangasi to ed saray alanaan a lingkor to tan saray kaiba ran arum a karnero. Say ebidensya a peteg itan et say ekstraordinaryon indaak ya impalabo to ed sikara, a ‘pinarakep to ira,’ a singa panangibaga.
18, 19. (a) Anto so insipan nen Jehova nipaakar ed saramay balon ondaragsa ed organisasyon to? (b) Anto so ibabaga ed sikatayo na saray nakekeraan a bersikulo na Isaias kapitulo 60?
18 Kada taon, nilasus nilibo a kaaruman iran “sankaili” so mililimog ed organisasyon nen Jehova, tan lukas nin siansia so dalan parad dakel nin ontumbok ed sikara. Oniay kuan nen Jehova ed Sion: “Saray pintom met akalukas ira naani a naynay; ag-ira naani nikapot ed agew odino labi; pian saray lalaki nayarian da komon a yakar ed sika so kayamanan na saray nasyon, tan saray arari ra niyakar ira a dinakep.” (Isaias 60:11) Sasalien na arum a sumusumpa ya ikapot ‘iratan a pinto,’ balet amta tayo ya agda nayariay ontalona. Imbaga nen Jehova a mismo a diad nanduruman dalan et mansiansian akalukas iray pinto. Mantultuloy so idaraak.
19 Wala niray arum a paraan a pamebendisyon nen Jehova ed totoo to, a paparakepen to ira, diad sarayan kaunoran ya agew. Saray nakekeraan a bersikulo na Isaias 60 so mapropetikon mangiparungtal ed saratan a paraan.
Kasin Nipaliwawa Yo?
• Siopa so “bii” a kien na Dios, tan siopa so mangirerepresenta ed sikato diad dalin?
• Kapigan ya akarukol iray ananak na Sion, tan kapigan tan panon iran ‘inmalagey’?
• Diad impangusar na nanduruman simbolo, panon ya impasakbay nen Jehova so idaraak natan na saray mangipupulong ed Panarian?
• Diad antoran paraan ya insindag nen Jehova so liwawa to ed totoo to?
[Tepetepet Parad Panagaral]
[Litrato ed pahina 10]
Say “bii” a kien nen Jehova so niganggan ya onalagey
[Litrato ed pahina 12]
Saray grupo na barko so ompatnag a singa saray malapati ed arawi