Mandadayew Iray Kristiano Panamegley na Espiritu tan Katuaan

“Say Dios sikatoy sakey ya espiritu: et saray mangigalang ed sikato nepeg dan igalang ed espiritu tan katuaan.”​—JUAN 4:24.

1. Anton nengneng na panagdayew so mamaliket ed Dios?

 IMPABITAR na bogbogtong ya Anak nen Jehova, si Jesu-Kristo, so panagdayew a makapaliket ed mangatatawen ya Ama to. Legan na makapaligsay-puson impanpulong to ed sakey a Samaritana diad bobon a walad asingger ed syudad na Sychar, inkuan nen Jesus: “Sikayo igalang yo so agyo amta: sikami igalang mi so amta mi; ta say kilabanan manlapu ed saray Judios. Ingen say oras onsabi, tan natan la, sano saray tua a manangigalang igalang da so Ama dia ed espiritu tan katuaan; ta saray ontan so anapen na Ama a manangigalang ed sikato. Say Dios sikatoy sakey ya espiritu: et saray mangigalang ed sikato nepeg dan igalang ed espiritu tan katuaan.” (Juan 4:22-24) Panon tayon talosan iratan a salita?

2. Anto so angibasiyan na saray Samaritano ed panagdayew da?

² Saray Samaritano so walaan na palso iran relihyoson panmoria. Inawat da lambengat so limaran libro na Masanton Kasulatan bilang apuyanan​—tan saratan so unong labat ed patalos da, a tinawag a Samaritan Pentateuch. Bangta agpeteg a kabat na saray Samaritano so Dios, nimatalek ed saray Judio so pikakabat ed Kasulatan. (Roma 3:1, 2) Posiblin panggayagaan na saray matoor a Judio tan arum nira so pabor nen Jehova. Balet anto so kakaukolanen na saya ed sikara?

3. Anto so kinaukolan pian nidayew tayo so Dios “ed espiritu tan katuaan”?

³ Ta pian napaliket si Jehova, anto so nepeg a ginawa na saray Judio, Samaritano, tan arum ni nensaman? Kinaukolan a sikatoy idayew da “ed espiritu tan katuaan.” Ontan met so nepeg tayon gawaen. Anggaman say serbisyo ed Dios so nepeg a maligsa, odino maseseg, tan apakiwas na puson napnoy aro tan pananisia, nagkalalon kakaukolanen ed panagdayew ed Dios tekep na espiritu so pakawalaan tayoy masanton espiritu tan paiwanwan itayo ed satan. Diad panaral tan pangiyaplika ed Salitay Dios, say espiritu tayo, odino awawey na kanonotan tayo, so nepeg a mitunosan ed kanonotan to. (1 Corinto 2:8-12) Pian abobonan nen Jehova so panagdayew tayo, satan so nepeg ya isaklang met ed sikato tekep na katuaan. Nepeg a mitunosan itan ed ipaparungtal na Salitay Dios, say Biblia, nipaakar ed sikato tan ed saray gagala to.

Naromog so Katuaan

4. Panon so panmoria na arum ed katuaan?

⁴ Abayuboan na pigaran manaaral na pilosopiya so panmoria a say nagnap a katuaan so agnarapat na katooan. Diad tua et oniay insulat na Suekon autor a si Alf Ahlberg: “Dakel a pilosopikon tepetepet ya agnayarin naikdan na pihon ebat.” Anggaman ibabaga na arum a wala lambengat  so relatibon katuaan, peteg kasin ontan? Aliwan ontan so inisip nen Jesu-Kristo.

5. Akin a linma si Jesus diad mundo?

⁵ Isipen tayo pan maniimaton itayo ed ontumbok iran eksena: Kasakbayan itan na taon 33 K.P., tan akaalagey si Jesus ed arap na Romanon Gobernador a si Poncio Pilato. Oniay kuan nen Jesus ed si Pilato: “Nisengeg ed saya linma ak dia ed mundo, pian tasian ko so katuaan.” Intepet nen Pilato: “Anto so katuaan?” Balet agto la inalagar so kaaruman ya ebat nen Jesus.​—Juan 18:36-38.

6. (a) Panon a naukeran so “katuaan”? (b) Anto so ingganggan nen Jesus ed saray patumbok to?

⁶ Say “katuaan” so naukeran bilang “say tugyop na tudtua iran bengatla, ebento, tan impormasyon.” (Webster’s Ninth New Collegiate Dictionary) Balet, kasin say pinekderan nen Jesus et say kaslakan lan katuaan? Andi. Espesipikon katuaan so walad kanonotan to. Ingganggan to iray patumbok to a mangiyabawag ed satan a katuaan, lapud oniay inkuanto ed sikara: “Manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Sakbay na “anggaan na mundo,” saray tuan patumbok nen Jesus so mangiyabawag ed “katuaan na ebanghelyo” diad sankamundoan. (Mateo 24:3; Galacia 2:14) Saya so gawaen bilang kasumpalan na saray salita nen Jesus: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Mateo 24:14) Kanian makana a nibiig tayo iramay mangibabangat na katuaan ed amin a nasyones diad pangipupulong da ed maong a balita na Panarian.

No Panon Tayon Naaralan so Katuaan

7. Panon yon napaneknekan a si Jehova so Lapuan na katuaan?

⁷ Si Jehova so Lapuan na espiritual a katuaan. Diad tua, si Jehova so tinawag nen salmistan David bilang say “Dios na katuaan.” (Salmo 31:5; 43:3) Binidbir nen Jesus a say salita na Ama to et katuaan, tan inyabawag to met: “Nisulat ed saray propeta, et nabangatan ira ya amin ed Dios. Balang sakey ya akadngel ed Ama, tan akaaral, ondago ed siak.” (Juan 6:45; 17:17; Isaias 54:13) Malinew sirin a saramay manaanap na katuaan so nepeg a nibangat nen Jehova, say Sankatalonggaringan a Managbangat. (Isaias 30:20, 21) Saray manaanap na katuaan so nakaukolan a makagamor ed “[mismon] pikakabat ed Dios.” (Uliran 2:5) Tan si Jehova so maaron mangibabangat odino mangipapasabi ed katuaan diad nanduruman dalan.

8. Diad antoran dalan ya imbangat odino impasabi na Dios so katuaan?

⁸ Alimbawa, impasabi na Dios so Ganggan ed saray Israelita diad panamegley na saray anghel. (Galacia 3:19) Panamegley na saray kugip, insipan to iray bendisyon ed saray patriarkan si Abraham tan si Jacob. (Genesis 15:12-16; 28:10-19) Nansalita ni ingen so Dios manlapud tawen, sanen abautismoan si Jesus tan saratan a makapasagyat a salita so nadngel ed dalin: “Saya so Ana’ko  ya inararok; napaliket ak a maong ed sikato.” (Mateo 3:17) Misalsalamat itayo met ta impasabi na Dios so katuaan diad impamuyan to ed saray managsulat ed Biblia. (2 Timoteo 3:16, 17) Diad panaral sirin ed Salitay Dios, nawalaan itayo na “pananisia ed katuaan.”​—2 Tesalonica 2:13.

Say Katuaan tan say Anak na Dios

9. Panon ya inusar na Dios so Anak to pian iparungtal so katuaan?

⁹ Nagkalalo lan inusar na Dios so Anak to, si Jesu-Kristo, pian iparungtal so katuaan ed katooan. (Hebreos 1:1-3) Diad tua, anggapoy siopaman a too a makapipara ed impansalita nen Jesus nipaakar ed katuaan. (Juan 7:46) Anggan sanen kayari na intokotok to ed tawen, imparungtal to so katuaan a nanlapud Ama to. Singa bilang, akaawat si apostol Juan na “puyan nen Jesu-Kristo ya initer na Dios ed sikato, pian ipakaba’to ed saray ariripen to, salanti saray bengatlan nakaukolan da so nagawa a magano.”​—Apocalipsis 1:1-3.

10, 11. (a) Say katuaan ya impulong nen Jesus so misiglaotan ed anto? (b) Panon a say katuaan so pinagmaliw nen Jesus a petepeteg?

¹⁰ Inkuan nen Jesus ed si Poncio Pilato a Sikatoy linma diad dalin pian tasian so katuaan. Legan na ministeryo to, imparungtal nen Jesus a misiglaotan itan a katuaan diad kiyalangon na inkasoberano nen Jehova panamegley na Panarian na Dios a si Kristo so Ari. Balet aliwa lambengat a say pampulong tan pambangat nen Jesus so kakaukolanen diad pantasi ed katuaan. Pinekderan nen Jesus itan a katuaan diad impanumpal to ed satan. Mitunosan ed satan et oniay insulat nen apostol Pablo: “Anggapo komon sirin so too a mangukom ed sikayo nipaakar ed panangan, odino kakainum, odino nipaakar ed agew na piesta, odino ed balo a bulan, odino ed agew na sabaton: A sikara so sakey ya anino na saray bengatla ya onsabi; bangbalet say laman sikato so kayarian nen Kristo.”​—Colosas 2:16, 17.

¹¹ Sakey lan paraan a nagmaliw a petepeteg so katuaan et say nipasakbay a kianak nen Jesus diad Betlehem. (Miqueas 5:2; Lucas 2:4-11) Nagmaliw met a petepeteg so katuaan diad inkasumpal na mapropetikon salita nen Daniel nipaakar ed ipatnag na Mesias diad kasampotan na 69 a ‘simsimba na taotaon.’ Agawa itan sanen impresenta nen Jesus so inkasikato ed Dios diad bautismo tan sikatoy alanaan na masanton espiritu, ya eksakto ed nipasakbay a panaon, nen 29 K.P. (Daniel 9:25; Lucas 3:1, 21, 22) Say katuaan so lalon nagmaliw a petepeteg diad makaibangat a ministeryo nen Jesus bilang manangiyabawag ed Panarian. (Isaias 9:1, 2, 6, 7; 61:1, 2; Mateo 4:13-17; Lucas 4:18-21) Nagmaliw met itan a petepeteg diad impatey tan inkioli to.​—Salmo 16:8-11; Isaias 53:5, 8, 11, 12; Mateo 20:28; Juan 1:29; Gawa 2:25-31.

12. Akin a nibaga nen Jesus a, ‘Siak so katuaan’?

¹² Lapud nisentro so katuaan ed si Jesu-Kristo, nibaga ton: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.” (Juan 14:6) Nibubulos iray totoo ed espiritual a paraan sano iyan day inkasikara ed “dapag na katuaan” diad pamidbir da ed betang nen Jesus ed gagala na Dios. (Juan 8:32-36; 18:37, NW) Lapud aawaten na saray kinmarnero so katuaan tan tutumboken da si Kristo tekep na pananisia, makagamor ira na andi-anggaan a bilay.​—Juan 10:24-28.

13. Konsideraen tayo so Makasulatan a katuaan diad anton taloran aspekto?

¹³ Say tugyop na katuaan ya impasabi nen Jesus tan saray apuyanan a babangatan to so manibukel ed tuan Kristianon pananisia. Saramay ‘matulok ed pananisia’ so ‘manaakar sirin ed katuaan.’ (Gawa 6:7; 3 Juan 3, 4) Kanian siopa sirin so  mankukurang ed katuaan natan? Siopan peteg so mangibabangat na katuaan diad amin a nasyon? Pian naebatan iratan a tepet, iyapasakey tayo ed saray akadkaunan Kristiano tan usisaen tayo so Makasulatan a katuaan a misiglaotan ed (1) saray sisiaen, (2) paraan na panagdayew, tan (3) personal a kondukta.

Say Katuaan tan Saray Sisiaen

14, 15. Anto so nibaga yo nipaakar ed awawey na saray akadkaunan Kristiano tan saray Tastasi nen Jehova nipaakar ed Kasulatan?

¹⁴ Say nisulat a Salita nen Jehova so papablien a tuloy na saray akadkaunan Kristiano. (Juan 17:17) Satan so estandarte ra nipaakar ed saray sisiaen tan agagamil. Oniay kuan nen Clement na Alexandria nen komadua tan komatlon siglo: “Saramay mansasagpot parad matalonggaring a kalidad so ag-ontunda ed pansusukimat da ed katuaan, angga ed nagamoran da so Makasulatan a paneknek ed saray sisiaen da.”

¹⁵ Singa ed saray akadkaunan Kristiano, say Biblia so papablien a tuloy na saray Tastasi nen Jehova. Panisiaan da ya “amin a Sulat ya impuyan na Dios sikato met so maabig a pakaaralan.” (2 Timoteo 3:16) Kanian konsideraen tayo so pigaran sisiaen na saray akadkaunan Kristiano tekep na pangonsidera met ed nanaaralan na saray kaplesan a lingkor nen Jehova lapud uusaren da so Biblia bilang manunan libron-panaralan da.

Say Katuaan Nipaakar ed Kamarerwa

16. Anto so katuaan nipaakar ed kamarerwa?

¹⁶ Lapud papanisiaan da so imbaga na Kasulatan, imbangat na saray akadkaunan Kristiano so katuaan nipaakar ed kamarerwa. Amta ra a say “too so nagmaliw a mabilay a kamarerwa” sanen sikato so pinalsa na Dios. (Genesis 2:7, NW) Niarum ni, binidbir da ya ompatey so kamarerwa na too. (Ezequiel 18:4; Santiago 5:20) Amta ra met a “saray inaatey agda amta so bengatla.”​—Eclesiastes 9:5, 10.

17. Panon yon ipaliwawa so ilalo parad inaatey?

¹⁷ Ingen, saray inmuunan babangatan nen Jesus so walaan na seguradon ilalo a napaoli, odino ombilay so inaatey a walad pakanodnonotan na Dios. Satan a sisiaen so malinew ya impabitar nen Pablo, ya oniay inyabawag to: “Wala so ilalok ed Dios . . . a wala naani kioli ed bilay na saray matunong tan agmatunong.” (Gawa 24:15) Anggan diad saginonor a panaon et insulat na mankuan a Kristiano a si Minucius Felix: “Siopa so maatiw odino makulangkulang a manasalin mangipilit a say too, a pinalsa na Dios diad gapo, so aglamet makapalsa ed sikato?” Singa saray inmuunan Kristiano, papanisiaan na saray Tastasi nen Jehova so Makasulatan a katuaan nipaakar ed kamarerwa na too, ipapatey, tan say kikioli. Konsideraen tayo natan so pakabidbiran ed Dios tan si Kristo.

Say Katuaan tan say Trinidad

18, 19. Akin a nibaga a say Trinidad et aliwan Makasulatan a bangat?

¹⁸ Agminoria na saray akadkaunan Kristiano a Trinidad so Dios, Kristo, tan say masanton espiritu. Inkuan na The Encyclopædia Britannica: “Agpinmatnag ed Balon Sipan so salitan Trinidad odino say mabitar a doktrina, nisay ginetma nen Jesus tan saray patumbok to a sumlangen so Shema [sakey a Hebreon pikakasi] diad Daan a Sipan: ‘Dengelen mo, O Israel: Say Katawan a Dios tayo so sakey a Katawan’ (Deut. 6:4).” Agnandayew iray Kristiano ed santatlon dios odino antokaman a dirios na Romano. Inawat da so balikas nen Jesus a si Jehova lambengat so nepeg a dayewen. (Mateo 4:10) Niarum ni, manisia ira ed saray salita nen Kristo: “Say Ama babaleg nen say siak.” (Juan 14:28) Ontan met so panmoria na saray Tastasi nen Jehova natan.

¹⁹ Say Dios, Kristo, tan say masanton espiritu so mabitar ya impandumaan na saray akadkaunan patumbok nen Jesus. Diad tua, binautismoan  da iray babangatan (1) diad ngaran na Ama, (2) diad ngaran na Anak, tan (3) diad ngaran na masanton espiritu, aliwan diad ngaran na sakey a Trinidad. Pareho met a Makasulatan a katuaan so ibabangat na saray Tastasi nen Jehova tan impandumaan da sirin so Dios, say Anak to, tan say masanton espiritu.​—Mateo 28:19.

Say Katuaan tan Bautismo

20. nton pikakabat so nakaukolan na saray manpabautismo?

²⁰ Ingganggan nen Jesus iray patumbok to a manggawa na saray babangatan diad pangibangat na katuaan ed totoo. Pian onkualipika iratan ed bautismo, nakaukolan da so manunan pikakabat ed Kasulatan. Singa bilang, nepeg dan bidbiren so posisyon tan autoridad na Ama tan say Anak to, si Jesu-Kristo. (Juan 3:16) Nakaukolan met a natebek na saray manpabautismo a say masanton espiritu et aliwan persona noagta aktibon puersa na Dios.​—Genesis 1:2, paimano’d-leksab na New World Translation.

21, 22. Akin a nibaga yon say bautismo et parad saray mananisia?

²¹ Saray akadkaunan Kristiano so nambautismo labat ed saray nibangat tan nagbabawin indibidual a mabulbulos dan indedika so inkasikara ed Dios pian gawaey linawa to. Saray Judio tan proselita a nandaragup ed Jerusalem nen Pentecostes 33 K.P. so walaan lay pikakabat ed Hebreon Kasulatan. Sanen nadngel da so impansalita nen apostol Pedro nipaakar ed si Jesus a Mesias, manga 3,000 so “angawat na salita to” tan “nambinyag ira.”​—Gawa 2:41; 3:19–4:4; 10:34-38.

²² Say Makristianon bautismo so parad saray mananisia. Say katuaan so inawat na totoo ed Samaria, tan ‘sanen anisia ira ed si Felipe ya angipakabat na maong a balita na panarian na Dios tan ngaran nen Jesu-Kristo, nambinyag iray lalaki tan bibii.’ (Gawa 8:12) Bilang debosyonadon proselita a walaan lay pikakabat ed si Jehova, say Etiopen eunoko so inmunan angawat ed saray balikas nen Felipe nipaakar ed kasumpalan na Mesianikon propesiya, insan sikatoy nampabautismo. (Gawa 8:34-36) Diad saginonor, inkuan nen Pedro ed si Cornelio tan arum niran Gentiles a say toon walaan na ‘takot ed [Dios] tan manggawa na matunong et akoen to’ tan siopaman a manisia ed si Jesu-Kristo so makagamor na panamerdona na saray kasalanan. (Gawa 10:35, 43; 11:18) Amin na saya so mitunosan ed ganggan nen Jesus a ‘manggawa na saray babangatan, ya ibangat iran mangunor ed amin a bengatlan ingganggan to.’ (Mateo 28:19, 20; Gawa 1:8) Ontan met ya estandarte so papanisiaan na saray Tastasi nen Jehova, a babautismoan da labat iramay walaan na manunan pikakabat ed Kasulatan tan nanggawa la na dedikasyon ed Dios.

23, 24. Anto so manepeg a paraan na Makristianon bautismo?

²³ Say sigpot a kipalgep ed danum so matukoy a nengneng na bautismo parad saray mananisia. Sanen abautismoan si Jesus ed Ilog Jordan, sikato so “nanlapu ed danum.” (Marcos 1:10) Say Etiopen eunoko so abautismoan diad “[baleg a] danum.” Sikato tan si Felipe et “linmasur ira a dua ed danum.” (Gawa 8:36-40) Say impangisiglaot na Kasulatan ed bautismo diad simbolikon inkiponpon so mangipabitar met ed sigpot a kipalgep ed danum.​—Roma 6:4-6; Colosas 2:12.

²⁴ Oniay inkuan na The Oxford Companion to the Bible: “Saray deskripsion ed Balon Sipan nipaakar ed saray espesipikon bautismo so mangipabitar a say toon babautismoan so ilelebleb ed danum.” Unong ed reperensyan Pranses a Larousse du XX^e Siècle (Paris, 1928), “binautismoan iray inmunan Kristiano diad panangipalgep inerman a kawalaay danum.” Tan inkuan na libron After Jesus​—The Triumph of Christianity:  “Diad manunaan a tuloy a paraan, kakaukolanen ed [bautismo] so pangiyabawag na kandidato ed pananisia to, a tumbokan na sigpot a kipalgep ed danum diad ngaran nen Jesus.”

25. Anto so singbaten tayo ed ontumbok ya artikulo?

²⁵ Saray asalambit lan punto nipaakar ed saray nibase’d Biblia a sisiaen tan agamil na saray inmuunan Kristiano so alimbawa lambengat. Posiblin idatak so arum niran pipadparaan na saray sisiaen da tan saray Tastasi nen Jehova. Diad ontumbok ya artikulo, singbaten tayo so kaaruman iran paraan na pangibiig ed saramay mangibabangat na katuaan ed totoo.

Panon Yon Ebatan?

• Anton nengneng na panagdayew so kakaukolanen na Dios?

• Panon a nagmaliw a petepeteg so katuaan diad panamegley nen Jesu-Kristo?

• Anto so katuaan nipaakar ed kamarerwa tan ipapatey?

• Panon a gagawaen so Makristianon bautismo, tan anto so kinaukolan ed saray manpabautismo?

[Tepetepet Parad Panagaral]

[Litrato ed pahina 16]

Inkuan nen Jesus ed si Pilato: ‘Linma ak dia pian tasian so katuaan’

[Litrato ed pahina 17]

Nipaliwawa yo kasi no akin ya inkuan nen Jesus a: ‘Siak so katuaan’?

[Litrato ed pahina 18]

Anto so katuaan nipaakar ed Makristianon bautismo?