“Dago Kayo’d Siak, . . . et Ikdan ta Kayoy Pampainawa”

“Manggawa Itayo na Maabig ed Saray Amin”

SAY pangipulong tan pangibangat ed maong a balita na Panarian na Dios so manunan kimey nen Jesus. (Marcos 1:14; Lucas 8:1) Lapud pilalek na saray patumbok nen Kristo a sikatoy aligen da, momoriaen da so kimey a panangibangat ed mensahe na Biblia nipaakar ed Panarian na Dios bilang manunan kimey ed bilay da. (Lucas 6:40) Talagan makapaligsay-puso parad Tastasi nen Jehova so pakaimano ed no panon a say mensahe na Panarian so mangitatarok na magnayon a pakainawaan ed saraman so mangawat ed satan​—no panon a makapainawa itan sanen wadiad dalin si Jesus.​—Mateo 11:28-30.

Likud ed pangibabangat ed Salita na Dios, nanggawa si Jesus na arum niran maabig a kimey, a singa say impantatambal ed saray mansasakit tan impamakan ed saray narasan. (Mateo 14:14-21) Mipadpara, niarum ed panagbangat a kimey na Tastasi nen Jehova et onkikiwas met ira pian ontulong ed totoon mankaukolan. Diad tua, kikinlongan na Kasulatan iray Kristiano “ed amin a gawa a maabig” tan mamapaseseg ed sikaran manggawa “na maabig ed saray amin.”​—2 Timoteo 3:16, 17; Galacia 6:10.

“Wadtan Iray Agagi Tayo”

Nen Setyembre 1999, agawa so maksil a yegyeg ed Taiwan. Kayari na pigaran bulan, saray biewbiew ya uran tan geray na palandey so sengegan na sakey ed sankagrabian iran natural a desyang diad awaran na Venezuela. Mas agano ni, saray pirmin delap so graben aneral diad bansa na Mozambique. Diad sarayan taloran inkagawa, tampol a sinmabi iray Tastasi nen Jehova ya awit da iray suplay na tagano, danum, tambal, kawekawes, tolda, tan panaglutoan parad saray biktima. Saray boluntaryon walaan na dunong ed medikal so angiletneg na saray temporaryo iran “infirmary” parad saray asugatan, tan saray boluntaryon komikimey ed konstruksion so angipaalagey na balon kaabungan parad saraman so naandian na ayaman.

Atenyeg iray biktima lapud nipanpanaon iran tulong a naawat da. “Sanen sikami so desperado lan maong, wadtan iray agagi tayo,” so inkuan nen Malyori, a say abung to so ginaygay na pirmin geray na palandey diad Venezuela. Kayarin nipaalagey na saray  boluntaryo so balon ayaman parad pamilya to, inkuan nen Malyori: “Agmin balot sigpot a napisalamatan si Jehova ed amin a ginawa to parad sikami!” Tan sanen naawat na saray biktima na delap diad Mozambique iray tombok parad balon paalagey iran ayaman da, say interon grupo so angansion na kanta nipaakar ed Panarian a “Si Jehova so Salimbengan Tayo.” *

Say panulong ed saray mankaukolan so makapaliket met ed saray boluntaryo. “Maliket ak lapud makakatulong ak ed sarayan agagi a pirmin maniirap,” inkuan nen Marcelo, a nanserbi bilang nars ed refugee camp diad Mozambique. Onia so inkuan nen Huang, sakey a boluntaryo ed Taiwan: “Makapaliket a maong so pakapibiang ed panangipatulor ed tagano tan saray tolda parad saray agagi a mankaukolan. Makapabiskeg na pananisia itan.”

Epektibon Programa a Panagboluntaryo

Say panagboluntaryo a kimey so angitarok met na espiritual a pakainawaan ed saray nilibon priso ed sankamundoan. Panon? Diad agano niran taon, saray Tastasi nen Jehova so angitarya met na literatura na Biblia parad masulok a 30,000 a priso ed manga 4,000 a prisoan ed Estados Unidos labat. Niarum ni, inerman a posibli, saray Tastasi so personal ya ombibisita ed saray prisoan pian mangiyaral na Biblia ed saray priso tan mangikondukta na saray Kristianon miting. Kasin nagugunggonaan iray priso?

Arum a priso a manaaral na Biblia so ginmapo lan manginabang na makaparepresko iran bangat na Salitay Dios ed kapara ran priso. Bilang resulta, diad pigaran prisoan ed sankamundoan, walaray grupo na priso natan a mankakasakey a mandadayew ed si Jehova. “Onaaligwas so grupo mi,” so inreport na sakey a priso diad Oregon, E.U.A, nen 2001. “Walaan kami na 7 manangipalapag na Panarian tan mangikokondukta kami na 38 a panangiyaral na Biblia. Masulok a 25 a totoo so onaatendi diad publikon paliwawa tan Panagaral na Panag-Bantayan, tan 39 so inmatendi diad Memoryal [na impatey nen Kristo]. Talora ni so magano lan manpabautismo!”

Saray Gunggona tan Gayaga

Naimano na opisyales na prisoan ya epektibo iyan programa na panagboluntaryo. Say pandinayewan a maong na saray opisyales et say manbayag a gunggona na sayan programa na panagboluntaryo. Ipapaimano na sakey a report: “Diad loob la na samploy taon a gagawaen iyan programa, anggapoy anggan sakey a nibulos lan priso ya abautismoan bilang sakey ed saray Tastasi nen Jehova a pinmawil ed prisoan​—a miduma ed 50-60 a porsienton ompapawil ed prisoan a kabiangan na sananey iran grupo.” Lapud apakiwas ed resulta na agawaan na saray Tasin boluntaryo, oniay inkuan na sakey a pari ed prisoan diad Idaho a nansulat ed sankamundoan iran hedkuarter na Tastasi nen Jehova: “Anggaman ag’ak personal ya onabobon ed teolohiya yo, pandinayewan ko so organisasyon yo.”

Napapaneknekan a makapatumang met ed saray boluntaryo so itutulong ed saramay walad prisoan. Kayari na impangikondukta to ed sakey a miting diad sakey a grupo na saray priso a primeron angansion na kanta nipaakar ed Panarian, insulat na sakey a boluntaryo: “Makapaseseg so pakaimaton ed 28 a lalaki a mibibiang ed panagkanta na saray panangidayew ed si Jehova. Tan maksil so panagkansion da! Agaylan pribilehyo so pagmaliw a presente ed ontan ya okasyon!” Inkuan na sakey a boluntaryo ya ombibisita ed saray prisoan diad Arizona: “Agaylan bendisyon so pakapibiang ed sayan nikaduman kimey!”

Saray Tasin boluntaryo ed interon mundo so onabobon ed si Jesus, a kuanto: “Lalo a mapalar so mangiter nen say mangawat.” (Gawa 20:35) Pekderan da met a say panumbok ed simbawa na Biblia a manggawa na maabig ed arum et talagan makapainawa.​—Uliran 11:25.

[Paimano ed Leksab]

[Litrato ed pahina 8]

Venezuela

[Litrato ed pahina 8]

Taiwan

[Litrato ed pahina 8]

Mozambique