Tekepan na Maridios a Debosyon so Panagsungdo Yo
Tekepan na Maridios a Debosyon so Panagsungdo Yo
“Ipatnag yo komon ed pananisia yo so . . . anos; tan dia ed anos yo say kasantosan [“maridios a debosyon,” NW].”—2 PEDRO 1:5, 6.
1, 2. (a) Anton klase na ibubulaslas so iilaloan ed sakey ya ugaw? (b) Panon kaimportante so ibubulaslas ed espiritual?
IMPORTANTE ed sakey ya ugaw so ibaleg, balet aliwa lambengat a say ibaleg ed pisikal so kakaliktanen. Iilaloan met so ibulaslas to ed mental tan emosyon. Nasabi panaon et ekalen la na ugaw so inuugaw iran kagagawa to tan ombaleg anggad magmaliw lan susto ed edad a laki odino bii. Tinukoy itan nen apostol Pablo sanen insulat ton: “Nen ugaw ak, nansasalita ak a singa ugaw, akalikna ak a singa ugaw, nanisip ak, a singa ugaw; natan ta nagmaliw ak a too, paulyan koray kagagawa na ugaw.”—1 Corinto 13:11.
2 Walay importantin punto na saray salita nen Pablo no nipaakar ed ibubulaslas ed espiritual. Nakaukolan ya onaligwas iray Kristiano manlapud inkaugaw ed espiritual a magmaliw ya ‘ontakken ira ed saray pakasarag a mantalos.’ (1 Corinto 14:20, NW) Nepeg dan dampoten tan panggunaetan a narapat so “sukat na kabaleg unong ed inkagnap na Kristo.” Diad ontan et ag-ira “manugaw-ugawan, a nipalirpalir a singa daluyon tan nitektekkiab na amin a dagem na bangat.”—Efeso 4:13, 14, NW.
3, 4. (a) Anto so nepeg tayon gawaen ta pian sigpot so itakken tayo ed espiritual? (b) Antoran maridios a kalidad so nepeg tayon ipatnag, tan panon iratan kaimportante?
3 Panon itayon magmaliw a matakken ed espiritual? Anggaman automatiko lawari so ibabaleg ed pisikal diad silong na normal iran kipapasen, say espiritual ya ibubulaslas so mankaukolan na impasyan sagpot. Onggapo itan diad igamor na suston pikakabat ed Salitay Dios tan ikiwas unong ed naaralan tayo. (Hebreos 5:14; 2 Pedro 1:3) Bilang resulta, saya so ontulong ed sikatayon mangipatnag na maridios iran kalidad. Mipadpara ed pisikal ya ibabaleg tan saray misiglaotan ya aspekto na satan, say ibubulaslas ed nanduruman maridios a kalidad so kaslakan a manbabansag a nababayuboan. Insulat nen apostol Pedro: “Dia ed pangiyan yo na seseg nisesengeg ed saya, ipatnag yo komon ed pananisia yo so birtud, tan dia ed birtud yo say kakabatan; tan dia ed kakabatan yo say bembey linawa: tan dia ed bembey linawa yo say anos; tan dia ed anos yo say kasantosan [“maridios a debosyon,” NW]; tan dia ed kasantosan yo say kauyamoay sanaagi; tan dia ed kauyamoay sanaagi, say aro.”—2 Pedro 1:5-7.
4 Importante so kada kalidad ya indatak nen Pedro, tan anggapo so nayarin ibaliwala. Inyarum to: “No kien yo so sarayan bengatla, tan daakan ira, ag ta kayo paulyan a manmenengmeneng tan ag-ombunga ed pikakabat ed Katawan tayo a Jesu-Kristo.” (2 Pedro 1:8) Iyapasakey tayo sirin so pankaukolan a tekepan na maridios a debosyon so panagsungdo tayo.
Say Pankaukolan a Mansungdo
5. Akin a nakaukolan tayo so panagsungdo?
5 Impansiglaotan di Pedro tan Pablo so maridios a debosyon tan panagsungdo. (1 Timoteo 6:11) Say kabaliksan na pakapansungdo et aliwa lambengat a pantepel ed irap tan pansiansian determinado. Sasaglawien na satan so inka-anos, inkakpel, tan inkapekder ya agnaandian na ilalo sano nipaarap ed saray subok, babeng, tukso, odino panamasegsegang. Lapud manbibilay itayon “sinasanto ed Kristo Jesus,” nailaloan tayo a sikatayoy napasegsegang. (2 Timoteo 3:12) Nepeg itayon mansungdo ta pian napaneknekan tayo so aro tayo ed si Jehova tan nabayuboan tayo iray kalidad a nakaukolan parad kilalaban. (Roma 5:3-5; 2 Timoteo 4:7, 8; Santiago 1:3, 4, 12) No anggapo so panagsungdo, agtayo nagamoran so andi-anggaan a bilay.—Roma 2:6, 7; Hebreos 10:36.
6. Say pansungdo anggad kasampotan so mankabaliksan na panggawa na anto?
6 Anggan panon lay abig na inggapo tayo, say sankaimportantian et say pakapansungdo tayo. Inkuan nen Jesus: “Say misungdo ya angga ed kasampotan, sikato lanlamang so nilaban naani.” (Mateo 24:13) On, nepeg itayon mansungdo anggad kasampotan, balanglan satan so anggaan na kaplesan a bilay tayo odino anggaan na sayan sistema na bengabengatla. Antokaman so kipapasen, nepeg tayon mantinien so integridad tayo ed Dios. Balet, no agtayo tekepan na maridios a debosyon so panagsungdo tayo, agtayo napaliket si Jehova, tan agtayo nagamoran so andi-anggaan a bilay. Balet anto so maridios a debosyon?
No Anto so Kabaliksan na Maridios a Debosyon
7. Anto so maridios a debosyon, tan mamakiwas itan ed sikatayon manggawa na anto?
7 Say maridios a debosyon so personal a panamagalang, panagdayew, tan serbisyo ed si Jehova a Dios lapud katooran ed sankatalbaan ya inkasoberano to. Pian naagamil so maridios a debosyon tekep na panagrespeto ed si Jehova, nakaukolan tayo so suston pikakabat ed sikato tan ed saray dalan to. Nepeg tayon kaliktanen a kabaten so Dios diad personal tan maapit a paraan. Saya so mamakiwas ed sikatayon mamayubo na masimoon a pisisiglaotan ed sikato, a nipapatnag diad kakikiwas tan kabibilay tayo. Nepeg tayon pilaleken ya aligen si Jehova anggad posibli—pian aligen iray dalan to tan ipatnag iray kalidad tan personalidad to. (Efeso 5:1) On, say maridios a debosyon so mamakiwas ed sikatayon mankaliktan a paliketen so Dios ed amin a gagawaen tayo.—1 Corinto 10:31.
8. Panon a maapit a mansiglaotan so maridios a debosyon tan say nikabkabiig a debosyon?
8 Ta pian naagamil tayo so tuan maridios a debosyon, nepeg a si Jehova labat so dayewen tayo, ya agtayo aabuloyan so antokaman a manamsam na pasen to diad kapusoan tayo. Bilang Manamalsa tayo, sikato so makanepegan na nikabkabiig a debosyon tayo. (Deuteronomio 4:24; Isaias 42:8) Anggaman kuan, sikatayo so agpapaskaren nen Jehova a mandayew ed sikato. Say pilalek to et say mabulos a debosyon tayo. Say aro tayo ed Dios, a nibase ed suston pikakabat ed sikato, so mamakiwas ed sikatayon mansiansian malinis ed kabibilay tayo tan manggawa na bulobulos a dedikasyon ed sikato tan manbilay unong ed satan.
Paeleten so Pisisiglaotan ed Dios
9, 10. Panon tayon napabiskeg tan napansiansia so maapit a relasyon ed Dios?
9 Kayarin nisimbolo so dedikasyon tayo ed Dios diad impanpabautismo, nakaukolan tayo nin siansia a lalon paeleten so personal a pisisiglaotan tayo ed sikato. Kanian say pilalek tayon manggawa ed saya tan say matoor a panlingkor ed sikato so mamakiwas ed sikatayon mantultuloy a manaral ed Salita to tan mandalepdep ed satan. Legan na pangiyaabuloy tayo ed espiritu na Dios a mangimpluensya ed kanonotan tan kapusoan tayo, onaaralem met so panangaro tayo ed si Jehova. Say pisisiglaotan tayo ed sikato so mantultuloy a magmaliw a sankaimportantian a bengatla ed kabibilay tayo. Ipasen tayo si Jehova bilang sankaabigan a Kaaro tayo tan sikatoy kaliktan tayon paliketen ed amin a panaon. (1 Juan 5:3) Ombulaslas so gayaga tayo ed maabig a relasyon ed Dios, tan misalsalamat tayo a sikato so maaron mangibabangat tan mamepetek ed sikatayo no nakaukolan.—Deuteronomio 8:5.
10 No agtayo mantultuloy ed saray sagpot tayo a paeleten so mablin relasyon tayo ed si Jehova, nayarin onletey itan. No agawa itan, aliwan say Dios so natetel, lapud sikato so “ag-arawi ed sinansakey ed sikatayo.” (Gawa 17:27) Agaylan liket tayo ta aliwan mairap so onasingger ed si Jehova! (1 Juan 5:14, 15) Siempre, nepeg a panbanikelan tayon mantinien so maapit a pisisiglaotan ed si Jehova. Balet, tutulongan to itayon onapit ed sikato diad pangiiter to ed sikatayo na amin a probisyon a nakaukolan tayo pian nabayuboan tan napansiansia so maridios a debosyon. (Santiago 4:8) Panon tayon sigpot a nikana so amin na sarayan maaron probisyon?
Mansiansian Mabiskeg ed Espiritual
11. Anto so pigaran pakapatnagan na maridios a debosyon tayo?
11 Say nilamut a maong a panangaro ed Dios so mamakiwas ed sikatayon mangipatnag ed kinaaralem na maridios a debosyon tayo, a mitunosan ed simbawa nen Pablo: “Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen mo ed matunong so salita a tua.” (2 Timoteo 2:15) Say panggawa ed saya so mankaukolan na panmantini tayo ed maong a rotina na regular a panagaral na Biblia, iyaatendi ed saray miting, tan pibibiang ed lawak na ministeryo. Nayarian tayo met so mansiansian maapit ed si Jehova diad ‘pampikasin andi-tunda.’ (1 Tesalonica 5:17) Saraya so makabaliksan a pakapatnagan na maridios a debosyon tayo. Say pamaulyan ed antokaman ed saratan so nayarin sengeg na espiritual a pansakit tan magmaliw itayon mainomay a nakalotan ed saray pakana nen Satanas.—1 Pedro 5:8.
12. Panon tayon maaligwas a natalonaan iray subok?
12 Say pansiansian mabiskeg tan aktibo ed espiritual so makatulong met ed sikatayo a mangarap ed dakel iran subok ya onsabi ed sikatayo. Saratan so nayarin manlapud saray bengatlan makapasubok a tuloy ed sikatayo. Lalon mairap a sungdoan so agpananginenen, isusumpa, tan panamasegsegang sano manlapu iratan ed maapit iran kapamilyaan, kakanayon, odino kakaabay. Saray masilib a pananesdes pian ikompromiso iray Kristianon prinsipyo so nayarin onlesa diad trabaho odino diad eskuelaan. Say pakadismaya, sakit, tan depresyon so mamaletey ed sikatayo diad pisikal a paraan tan lalon onirap so panalona ed saray subok ed pananisia. Balet maaligwas tayon natalonaan so amin a subok no mansiansia itayo ed ‘amin a masantos a panagbilay tan kasimpitan [“saray gawa na maridios a debosyon,” NW], dia ed panalagar tan pampilalek tayo ed isabi agew na Dios.’ (2 Pedro 3:11, 12) Tan namantini tayo so gayaga tayo diad panggawa ed satan, a matalek ed panamendisyon na Dios.—Uliran 10:22.
13. Anto so nepeg tayon gawaen ta pian mantultuloy tayon naagamil so maridios a debosyon?
13 nggaman pupuntiryaen nen Satanas iramay mangaagamil na maridios a debosyon, nakaukolan ya agtayo ontakot. Akin? Lapud “amta na Katawan so pangiliktar to ed saray masantos ed katukso.” (2 Pedro 2:9) Pian nasungdoan tayo iray subok tan naeksperiensya tayo itan a panangiliktar, nepeg ya “iwaklit tayo so ag-inkamaridios tan minumundo iran pilalek tan . . . manbilay tekep na inkalimpio na kanonotan tan inkatunong tan maridios a debosyon diad utel na sayan kaplesan a sistema a bengabengatla.” (Tito 2:12, NW) Bilang Kristiano, nepeg itayon manalwar ta pian antokaman a kaleteyan a mangilalanor ed silalaman iran pilalek tan agamil et agmangapekta ed maridios a debosyon tayo tan maneral ed satan. Konsideraen tayo so pigara ed sarayan pakasesgaan.
Manalwar ed Saray Sesga ed Maridios a Debosyon
14. Anto so nepeg tayon tandaan sano nasagyat itayo ed patit na materyalismo?
14 Say materyalismo so patit ed dakel. Nayarin napalikdo tayoy inkasikatayo, a “manisip a say maridios a debosyon so sakey a paraan a pakagunggonaan [ed materyal].” Kanian, ompakpel itayo a manggaway agmanepeg a panganamot ed talek ya ipapatnag na agagi. (1 Timoteo 6:5, NW) Nayarin lingo ni ingen ya ibaga tayon aliwan mauges so panesdes ed sakey a maasenson Kristiano ya ibayaran to itayo ed otang ya agtayo la sarag a bayaran. (Salmo 37:21) Balet say maridios a debosyon, aliwan say igamor na materyal iran bengatla, so “sipan na sayan bilay a peles, tan say onsabi.” (1 Timoteo 4:8) Lapud ‘anggapo so nitarok tayo ed mundo, tan anggapoy nipaway tayo,’ komon ta lalo itayon determinado a gegemtanen so “maridios a debosyon katekep na dilin-panagpasarag” tan abuloyan tayoy inkasikatayo a magmaliw a ‘kontento ed taganoen tan kawesen.’—1 Timoteo 6:6-11, NW.
15. Anto so nagawaan tayo sano say pangegemtan ed panliliket et manesesga a mamuger ed maridios a debosyon tayo?
15 Say pangegemtan ed panliliket so mamuger ed maridios a debosyon. Posibli kasi a nakaukolan tayoy manggawan tampol na saray pananguman diad sayan pamaakaran? Tua, walay arum a gunggona a nagamoran ed pisikal a panag-ehersisyo tan panligliwaan. Ingen ta melag iratan a tumang no ikompara ed andi-anggaan a bilay. (1 Juan 2:25) Natan, dakel so ‘maaro ed saray likeliket, a lalo nen say dia ed Dios, a wala so nengneng da ya inkasanto,’ tan nakaukolan a paliisan tayo iratan a totoo. (2 Timoteo 3:4, 5) Saramay mangidadanet ed maridios a debosyon so ‘mantipon na nipaakar ed sikara ed sakey a maabig a pangiletnegan a niparaan ed panaon ya onsabi, pian nabembenan da so bilay, a sikato so bilay a peteg.’—1 Timoteo 6:19.
16. Antoran makasalanan a pilalek so mangaamper ed arum a manbilay unong ed matunong iran kakaukolanen na Dios, tan panon tayon nadaeg irayan pilalek?
16 Say lingon panag-usar na alkohol tan druga, imoralidad, tan saray makasalanan a pilalek so maneral ed maridios a debosyon. Say isuko ed saratan so mangamper ed sikatayon manbilay unong ed matunong iran kakaukolanen na Dios. (1 Corinto 6:9, 10; 2 Corinto 7:1) Anggan si Pablo so kinaukolan a mansungdo ed tuloytuloy a pipupuligesgesan ed makabos a laman. (Roma 7:21-25) Nakaukolan iray mapeget a kundang pian niwaklit so makapuy iran pilalek. Say sakey lan kundang et nepeg a determinado itayon mansiansia a malinis ed moral. Imbaga ed sikatayo nen Pablo: “Pateyen yo . . . so kabiangan yo a wadia ed tapew na dalin; panaglawan, inkarutak, kaalakan, mauges a getma, tan agum, say panagdayew ed talintao.” (Colosas 3:5) Say pamatey tayo ed saray kabiangan na laman tayo nipaakar ed saray makasalanan a bengatla so mankaukolan na determinasyon ta pian niwaklit tayo iratan. Say masimoon a pikakasi parad tulong na Dios so ontulong ed sikatayo pian nipulisay iray makapuy a pilalek tan nagegemtan tayo so inkatunong tan maridios a debosyon anggaman ed sayan marelmeng a sistema na bengabengatla.
17. Panon tayon moriaen so disiplina?
17 Say pakadismaya so mamatayer ed panagsungdo tayo tan walaan na makaderal ya epekto ed maridios a debosyon tayo. Dakel ed saray lingkor nen Jehova so akaeksperiensia na inkadismaya. (Numeros 11:11-15; Esdras 4:4; Jonas 4:3) Lalon makadesyang so epekto ed sikatayo na pakadismaya sano atekepan itan na panem-em lapud sikatayoy naopendi odino abaat odino adisiplina. Balet, say panamaat tan disiplina so pakapatnagan na interes tan maaron panangiyansakit na Dios. (Hebreos 12:5-7, 10, 11) Say disiplina so nepeg ya ag-ipasen a dusa noagta paraan na panangipasal ed sikatayo diad dalan na inkatunong. No mapaabeba itayo, pablien tan awaten tayo so simbawa, a moriaen a “saray panamaat na pangibangat sikara so dalan na bilay.” (Uliran 6:23) Makatulong iya ed sikatayon manggawa na maabig ya aligwas ed espiritual diad pangegemtan ed maridios a debosyon.
18. Anto so responsabilidad tayo nipaakar ed personal iran impakaopendian?
18 Saray agpantatalosan tan personal ya impakaopende so nayarin mangipaarap na angat ed maridios a debosyon tayo. Nayarin pansengegan iratan na kapagaan odino mamakiwas ed arum a manggawa na agmakabat a kundang diad pangisian da ed inkasikara manlapud espiritual ya agagi ra. (Uliran 18:1) Balet maabig no nodnonoten a say panem-em na sakit na linawa odino panimbel ed arum so pirmin mangapekta ed pisisiglaotan tayo ed si Jehova. (Levitico 19:18) Diad tua, “say agmangaro ed agi to, anta anengneng to, agto nayarian ya aroen so Dios ya agto anengneng.” (1 Juan 4:20) Dia ed Sermon to ed Palandey, indanet nen Jesus so pankaukolan ya onkiwas a tampol pian resolbien iray personal a pambabalingaan. Inkuanto ed saray onderengel ed sikato: “No isasaklang mo so bagat mo ed altar, et nanonotan mod’man a say agim et walay bengatlan pamusolan to ed sika. Itilak mod’man so panangarom ed arap na altar, et onla ka, ta mipulangan ka nin unona ed agim, insan ka ed satan onla tan isaklang mo so panangarom.” (Mateo 5:23, 24) Say ikerew na dispensa so nayarin mamaabig ed inkasakitan makasengeg ed saray maruksan salita odino kiwas. Say balingaan so nayarin natambal tan say mareen a pisisiglaotan so nipawil no miperdonaan itayo tan aksobien tayo ya agmanepeg so impanggawa tayo ed saray bengatla. Angiter met si Jesus na sakey nin simbawa diad panresolbi ed saray pambabalingaan. (Mateo 18:15-17) Agaylay liket tayo sano matalona iray sagpot tayo a resolbien iray problema.—Roma 12:18; Efeso 4:26, 27.
Tumboken so Ehemplo nen Jesus
19. Akin ya importantin aligen so ehemplo nen Jesus?
19 Maseguron naliktob itayo na saray subok, balet saratan so agnepeg a mangisuawi ed sikatayo manlapud babatiken a parad andi-anggaan a bilay. Tandaan a nayarian itayon ipaliis nen Jehova manlapud subok. Legan tayon ‘ikakaindan so amin a pakabelatan,’ tan ‘babatiken tayo a siaanos so babatiken a niyan ed arap tayo,’ komon ta ‘nengnengen tayo si Jesus a nanggawa tan manamayadyari ed pananisia tayo.’ (Hebreos 12:1-3) Say maapit a pangusisa ed ehemplo nen Jesus tan say panggunaet a pangalig ed sikato diad salita tan gawa so ontulong pian nabayuboan tayo so maridios a debosyon tan nipatnag itan ed mas malaknab a paraan.
20. Antoray tumang ed pangegemtan na panagsungdo tan maridios a debosyon?
20 Mansiglaotan a maong so panagsungdo tan maridios a debosyon pian naseguro so kilalaban tayo. Diad pangipatnag ed sarayan mablin kalidad, makapantultuloy itayon matoor ed sagradon serbisyo ed Dios. Anggan sano nasusubok itayo, magmaliw itayon maliket sano naeeksperiensia tayo so matamoy a panangaro tan panamendisyon nen Jehova lapud mansusungdo itayo tan aagamilen tayo so maridios a debosyon. (Santiago 5:11) Niarum ni, oniay impaseguro ed sikatayo nen Jesus a mismo: “Dia ed pantepel yo natalima yo naani kamarerwa yo.”—Lucas 21:19.
Panon Yon Ebatan?
• Akin ya importante so panagsungdo?
• Anto so maridios a debosyon, tan panon itan a nipatnag?
• Panon tayon napabiskeg tan napansiansia so maapit a siglaotan ed Dios?
• Anto so pigaran pakasesgaan ed maridios a debosyon tayo, tan panon tayon napaliisan iratan?
[Tepetepet Parad Panagaral]
[Saray litrato ed pahina 12, 13]
Nipatnag so maridios a debosyon ed dakel a paraan
[Saray litrato ed pahina 14]
Manalwar ed saray pakasesgaan na maridios a debosyon yo