Apakiwas Lapud ‘Makapakelaw Iran Bengatla na Dios’

“Sikara so narengel tayo a mansalita ed salita tayo a dili nipaakar ed saray makapakelaw a gawa [“bengatla,” NW] na Dios.”​—GAWA 2:11.

1, 2. Anton makapakelaw a bengatla so agawa ed Jerusalem nen Pentecostes 33 K.P.?

 SAKEY a kabuasan na pansamposampot lay primabera nen taon 33 K.P., walay makapakelkelaw ya agawa ed sakey a grupo na saray babangatan nen Jesu-Kristo a lalaki tan bibii, a nandaragup ed sakey a pribadan abung diad Jerusalem. “Kapagdakan sinmabi a nanlapu ed tawen so sakey a tanol a singa sakey a dagem a mabiskeg a sinmabi a maksil, et pinano to so sankaabungan a kawalaan dan akayurong. Et pinmatnag ed sikara so diladila a singa apoy. . . . Et sikaray napno ya amin na espiritu santo, et ginmapo ra a nansalita na salitan nagsikasikmat.”​—Gawa 2:2-4, 15.

² Nandaragup so baleg a grupo na totoo diad arap na abung. Kaiba da iray Judion nianak ed arum a dalin, “masisimpit a lalaki” a linma ed Jerusalem pian manselebra ed piesta na Pentecostes. Nikelkelawan ira lapud nadngel da so impansalita na saray babangatan ed mismon lenguahe na kada sakey ed sikara ‘nipaakar ed saray makapakelaw a bengatla na Dios.’ Panon itan ya agawa anta amin da et taga-Galilea?​—Gawa 2:5-8, 11.

3. Anton mensahe so impasabi nen apostol Pedro ed ulop na totoo nen Pentecostes?

³ Sakey ed saratan a taga-Galilea et si apostol Pedro. Impaliwawa to a pigaran simba labat so apalabas et si Jesu-Kristo so pinatey na mauges  iran totoo. Anggaman ontan, pinaoli na Dios so Anak to manlapud inaatey. Kayari na satan, pinmayawar si Jesus ed dakel ed saray babangatan to, kaiba lay Pedro tan say arum a wadman. Samploy agew ni labat ed asasakbay et tinmokotok si Jesus ed tawen. Sikato so angiyibung na masanton espiritu ed saray babangatan to. Wala kasi so kaimportantian na saya parad saramay nanselebra na Pentecostes? On. Say impatey nen Jesus so angilukas na dalan parad sikara pian nagamoran da so panamerdona ed saray kasalanan da tan makaawat ira na “langkap na espiritu santo” no agamilen da so pananisia ed sikato. (Gawa 2:22-24, 32, 33, 38) Kanian panon so inkiwas na saramay maniimaton ed nadngelan da nipaakar ed ‘makapakelaw iran bengatla na Dios’? Tan panon a makatulong iyan salaysay a mandetermina ed mismon panaglingkor tayo ed si Jehova?

Apakiwas!

4. Anton propesiya nen Joel so asumpal nen agew na Pentecostes 33 K.P.?

⁴ Diad impakaawat day masanton espiritu, tampol ya innabang na saray babangatan ed Jerusalem so maong a balita na kilalaban diad arum, a ginmapo ed saray ulop a nantitipon ed saman a kabuasan. Sinumpal na panagpulong da so makatantandan propesiya, ya inkurit nen Joel, ya anak nen Pethuel, waloy siglo lay apalabas ed saman: “Ikalbok naani so espirituk ed amin a laman; et saray anak yo a lalaki tan bibii manpropeta ra naani, saray mamasiken yo mankugkugip ira naani na saray kugkugip; saray tobonbalo yo a lalaki makanengneng ira naani na saray pasingawey. Tan ontan met ed saray ariripen a lalaki tan bibii dia ed saratan ya agew ikalbok naani so espirituk . . . ed arapen na isabi na baleg tan makapataktakot ya agew nen Jehova.”​—Joel 1:1; 2:28, 29, 31; Gawa 2:17, 18, 20.

5. Diad anton pantalos a nampropesiya iray inmunan-siglon Kristiano? (Nengnengen so paimano’d-leksab.)

⁵ Kabaliksan kasi na saya a mamawala so Dios na sakey a kailalakan na saray propeta, a lalaki tan bibii, a mipadpara ed si David, Joel, tan Debora, ya usaren to ira a mangipasakbay ed saray ebento ed arapen? Andi. Manpropesiya iray Kristianon ‘anak a lalaki tan bibii, ariripen a lalaki tan bibii’ diad pantalos a sikara so pakiwasen na espiritu nen Jehova a mangiyabawag ed ‘makapakelaw iran bengatla’ a ginawa la nen Jehova tan gawaen to ni. Kanian sikara so onkana a pinagkasangiyan na Sankatageyan. * Balet, panon so inkiwas na ulop?​—Hebreos 1:1, 2.

6. Kayari na impakadngel da ed paliwawa nen Pedro, apakiwas so dakel ed saray ulop a manggawa na anto?

⁶ Sanen nadngel na ulop na totoo so salaysay nen Pedro, dakel ed sikara so apakiwas. ‘Inawat da so salita to’ tan ‘nambinyag ira et niarum ed saray binangatan ed saman ya agew so ngalngali talonlibo a kamarerwa.’ (Gawa 2:41) Lapud sipor la iran Judio tan Judion proselita, walaan la ray manunan pikakabat ed Kasulatan. Satan, tekep na pananisia ed naaralan da ed si Pedro, so angitarya ed sikara na basiyan pian manpabautismo ed “ngaray Ama, tan say Anak, tan say espiritu santo.” (Mateo 28:19) Kayari na impanpabautismo ra et “nansiansia ran malet ed bangat na saray apostoles.” Ontan met, innabang  da ed arum so aromog dan pananisia. On, “inagew-agew, a nansiansia ra a malet ed sakey a kanonotan ed dalem na templo, . . . ya inggalgalang da so Dios tan kakaliktanen ira ya amin na ombaley.” Bilang resulta na sayan panagpulong a kimey da, “say Katawan inyarum to ed sikara ya inagew-agew so saray nilaban.” (Gawa 2:42, 46, 47) Tampol ya aporma iray Kristianon kongregasyon ed dakel a daldalin a panaayaman na saray balon mananisia. Anggan panon et saya so maseguron makasengeg ed maseseg iran sagpot da a mangipulong ed “ebanghelyo” sanen sinmempet ira.​—Colosas 1:23.

Say Salitay Dios so Mangisekar na Pakayari

7. (a) Anto so manasagyat ed totoo manlapud amin a nasyon ya onasingger ed organisasyon nen Jehova natan? (b) Antoran posibilidad parad kaaruman ya idaraak so naiimatonan yo ed sankamundoan a lawak tan diad lokal? (Nengnengen so paimano’d-leksab.)

⁷ Komusta iramay manpipilalek a magmaliw a lingkor na Dios natan? Nakaukolan da met so maalwar a panaral ed Salitay Dios. Legan a gagawaen da itan, nakakabat da si Jehova bilang Dios a “mapangasi tan mapaaro, mapalna ya onsanok, tan daakan ed maaro ya abig na linawa, tan katuaan.” (Exodo 34:6; Gawa 13:48) Naaralan da so mapangasin probisyon nen Jehova a dondon panamegley nen Jesu-Kristo, a say niyibung a dala to so manlinis ed sikara ed amin a kasalanan. (1 Juan 1:7) Misalsalamat met ira nipaakar ed gagala na Dios a niwala so “kioli ed bilay na saray matunong tan agmatunong.” (Gawa 24:15) Onleppua ed kapusoan da so panangaro ed Lapuan na saratan a ‘makapakelaw a bengatla,’ tan sikara so napakiwas a mangipulong ed sarayan mabmablin katuaan. Sikara sirin so magmaliw a dedikado, bautismadon lingkor na Dios tan mantultuloy ira ya “ombaleg ed kakabatan na Dios.” *​—Colosas 1:10b; 2 Corinto 5:14.

8-10. (a) Panon ya apaneknekan ed eksperiensya na sakey a Kristianon bii a say Salitay Dios so ‘mangisesekar na pakayari’? (b) Anto so naaralan yo ed sayan eksperiensya nipaakar ed si Jehova tan ed saray pidedeneng to ed saray lingkor to? (Exodo 4:12)

⁸ Aralem so pikakabat a nagagamoran na saray lingkor na Dios manlapud panagaral da ed Biblia. Satan a pikakabat so mamapakiwas ed kapusoan da, manguuman ed paraan na panag-isip da, tan mansiasiansia itan ed sikara. (Hebreos 4:12) Alimbawa, sakey a biin manngaray Camille so nantrabaho bilang managkomponi ed saray maedad la. Sakey ed saray kokomponien to et si Martha, sakey ed saray Tastasi nen Jehova. Lapud si Martha so pirmin naapektaan na dementia, sikato so nakaukolan a naynay a bantayan. Sikato so kinaukolan a panonotan pian mangan​—anggan say pangakmon ni ingen ed tagano to. Balet, walay bengatlan permanentin nipaslep ed kanonotan nen Martha, unong a nanengneng tayo.

⁹ Sakey ya agew, anengneng nen Martha si Camille a mannanangis lapud kagogonigon to ed pigaran problema. Sikato so nilakap nen Martha tan inopresian ton iyaralan na Biblia. Balet nasarag kasi na toon walad kipapasen nen Martha so mangikondukta na panangiyaral na Biblia? On, nayarian to! Anggaman dakel a bengatla so alingwanan to la, agni alingwanan nen Martha so alay abig a Dios to; nisay alingwanan toray mabmablin katuaan a naaralan to manlapud Biblia. Legan na panaaral da, binilin nen Martha si Camille a basaen to so kada parapo, bukayen iray nisitan Kasulatan, basaen so tepet ed leksab na pahina, tan ebatan to itan. Nantultuloy itan ed pigaran panaon, tan anggaman ed saray limitasyon nen Martha, inmaligwas si Camille ed pikakabat ed Biblia. Amoria nen Martha a nakaukolan a milimog si Camille ed arum ya interesadon manlingkor ed Dios. Lapud sinononot ed satan, inikdan to si Camille na kawes tan sapatos, ta pian walay matukoy a nisulong nen Camille diad primeron iyatendi to ed Kingdom Hall.

¹⁰ Si Camille so apakiwas ed maaron interes, ehemplo, tan kombiksion nen Martha. Inkuan ton importantin tuloy so ibabangat ed  sikato nen Martha, lapud anggano alingwanan la nen Martha so amin lawarin bengatla et agto ni alingwanan so naaralan to manlapud Kasulatan. Saginonor, sanen niyalis si Camille ed sananey a pasilidad, amoria to a panaon la pian sikatoy onkiwas. Diad primeron pankanawnawa, sikato so linma ed Kingdom Hall, ya akasulong ed sikato imay kawes tan sapatos ya inter nen Martha, tan sikatoy impaiyaralan na Biblia. Maabig so inyaligwas to tan sikatoy abautismoan.

Apakiwas a Mangipatnag ed Saray Estandarte nen Jehova

11. Niarum ed pagmaliw a maseseg ed panagpulong a kimey, panon tayon nidemostra a napapakiwas itayo ed mensahe na Panarian?

¹¹ Natan, wala so masulok ya anemiran milyon a Tastasi nen Jehova a, singa si Martha tan natan et si Camille, a mangipupulong ed “ebanghelyo na panarian” ed sankamundoan. (Mateo 24:14; 28:19, 20) Singa ed saray inmunan-siglon Kristiano, sikara so pirmin apakiwas ed ‘makapakelaw iran bengatla na Dios.’ Papablien da so pribilehyon mangakbibit ed ngaran nen Jehova tan inkalbo to ed sikara so espiritu to. Kanian pansasagpotan dan maong so ‘pankurang a makana ed Katawan ya onarap ed amin a makapaliket [ed sikato],’ diad pangiyaplika ed saray estandarte to ed kada aspekto na kabibilay da. Kabiangan ed panagrespeto ra ed saray estandarte na Dios et say nipaakar ed panangawes tan panag-ayos.​—Colosas 1:10a; Tito 2:10.

12. Anton espesipikon simbawa nipaakar ed panangawes tan panag-ayos so naromog tayon nikurit ed 1 Timoteo 2:9, 10?

¹² On, inletneg nen Jehova iray estandarte nipaakar ed personal ya itsura tayo. Indatak nen apostol Pablo so arum ed saray kakaukolanen na Dios nipaakar ed saya. “Saray bibii a manpales ira na masimpit, a manparakep ira na mabinta tan madangka; aleg ed saray buek a nilaga, tan balitok odino perlas odino kawes ya ankabli; noag ingen dia ed saray maabig a gawa (a sikato  so matukoy ed saray bibii a labay da so mansimpit).” * Anto so naaralan tayo ed sarayan salita?​—1 Timoteo 2:9, 10.

13. (a) Anto so kabaliksan na ‘masimpit a panangawes’? (b) Akin a nibaga tayo a makatunongan iray estandarte nen Jehova?

¹³ Ipapanengneng na saray salita nen Pablo a nepeg a ‘manpales na masimpit’ iray Kristiano. Sikara so agnepeg ya akulastay, maringot, odino agmaayos ed itsura ra. Amin lawari, anggan saramay mairap-bilay, so makakapet ed satan a makatunongan iran estandarte diad paneseguro ra a say panangawes da et maayos, malinis, tan presentable. Alimbawa, kada taon et manaakar ed takel iray Tastasi diad sakey a bansa diad Abalaten ya Amerika insan manbaroy ira na pigay oras panamegley na paraw ta pian makaatendi ira ed distriton kombension da. Kaslakan lan walay napelag ed ilog odino nasagur so kawes to ed kasupokan diad pambabaroy da. Kanian sano makasabi iray onatendi diad pankombensionan da, aliwan maayos so itsura ra. Kanian ipanaon da so pandait ed saray butones, pangapiger ed saray siper, tan ipesak tan palansaen da iray isulong dan kawes parad kombension. Papablien da so imbitasyon a mantagano ed dulang nen Jehova, tan kaliktan day mankawes na matukoy.

14. (a) Anto so kabaliksan na pankawes na “mabinta tan madangka”? (b) Anto so lalanoren ed sikatayo na pankawes bilang ‘totoo a mangigagalang ed Dios’?

¹⁴ Impatnag ni nen Pablo a nepeg itayon mankawes a “mabinta tan madangka.” Kabaliksan na saya a say itsura tayo so agnepeg a maparayag, akulastay, makasagyat, mankaninag, odino miuuso. Niarum ni, nepeg itayon mankawes ed paraan a ‘mangigagalang ed Dios.’ Satan so bengatlan panumamengan, agta ontan? Aliwa lambengat itan a pankawes na matukoy sano onatendi ed saray miting ed kongregasyon insan akulastay la no arum a pankanawnawa. Say personal ya itsura tayo so nepeg a mangipatnag lawas na mapagalang, marespeton awawey lapud Kristianos tan ministros itayo ed loob na 24 oras ed kada agew. Mabitar sirin a say kawes tayo no mantratrabaho tan maneeskuela itayo so matukoy ed nengneng na gawaen tayo. Anggaman kuan, nepeg itayon mankawes a masimpit tan tekep na dignidad. No say kawes tayo et lawas mangipapatnag ed panisia tayo ed Dios, agtayon balot magmaliw a masuyat a manpulong ya impormal lapud ta agtayo ibabaing so itsura tayo.​—1 Pedro 3:15.

‘Ag-aaroen so Mundo’

15, 16. (a) Akin ya importantin paliisan tayo so pangalig ed mundo nipaakar ed panangawes tan panag-ayos? (1 Juan 5:19) (b) Parad anton praktikal a rason a nepeg itayon ompaliis ed saray uso ed panangawes tan panag-ayos?

¹⁵ Say simbawan nikurit ed 1 Juan 2:15, 16 so mangitatarya met na panangigiya nipaakar ed panagpili tayo ed kawesen tan itsura tayo. Oniay nabasa tayo: “Aleg ya aroen yo so mundo, ni saray bengatla a wala ed mundo. No siopaman a too aroen to so mundo say aro na Ama andi ed sikato. Ta amin a wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo.”

 ¹⁶ Agaylan nipanpanaon itan a simbawa! Diad sayan panaon a pirmi so pananesdes na saray kalimog, agtayo nepeg ya abuloyan so mundo a mangontrol ed panagpili tayo na kawesen. Saray estilo na kawes tan panag-ayos so nagmaliw lan mabanday diad agano niran taon. Anggan say paraan na panangawes na saray negosyante tan propesyonal a totoo so aglawas mangitatarya na napanmatalkan ya estandarte no anto so matukoy ed saray Kristiano. Saya so sakey nin rason no akin a nepeg itayo lawas a maimano ed pankaukolan ya ‘agmiabobon unong ed sayan mundo’ ta pian manbilay itayo unong ed saray estandarte na Dios tan sirin et ‘dia ed amin naparakep so bangat na Dios a Manangilaban tayo.’​—Roma 12:2; Tito 2:10.

17. (a) Antoran tepet so konsideraen tayo sano mansaliw itayo na kawesen odino manpili na estilo? (b) Akin a nepeg a pampagaan na saray ulo na pamilya so personal ya itsura na saray kapamilyaan da?

¹⁷ Sakbay kayon mandesidi no manaliw na kawes, makabat so pangitepet yo ed inkasikayon dili: ‘Akin a nasasagyat ak ed sayan moda? Kasin ontan so isusulong na bantog ya artista​—a pandidinayewan ko? Kasin ontan iray isusulong na saray pangkat ya akaistambay ed karsada odino sakey a grupon mangiyaalibansay independente, rebelyoson awawey?’ Nepeg met ya imanoen tayon maong so kawes. No bestida itan odino palda, komusta so karukey na satan? Say tabas? Kasin say kawes et masimpit, matukoy, tan mapagalang, odino mapitpitat, makasagyat, odino akulastay? Tepetan yoy inkasikayo, ‘Kasin makagapol no isulong ko iyan kawes?’ (2 Corinto 6:3, 4) Akin a nepeg tayon pampagaan itan? Lapud ibabaga na Biblia: “Si Kristo met agto pinaliket so inkasikaton dili.” (Roma 15:3) Nepeg a pampagaan na saray ulo na Kristianon pamilya so itsura na saray kapamilyaan da. Lapud panagrespeto ed maglorian Dios a dadayewen tayo, nepeg ya agmasuyat iray ulo na pamilya a mangiter na mapekder, maaron simbawa sano nakaukolan.​—Santiago 3:13.

18. Anto so mamakiwas ed sikayon mangiter na maalwar a pangimano ed panagkawes tan panag-ayos yo?

¹⁸ Say mensahe ya aakbibiten tayo so nanlapud si Jehova, a mismon mangilalaman na dignidad tan inkasanto. (Isaias 6:3) Papasesegen itayo na Biblia a sikatoy aligen tayo bilang ‘anak ya inararo.’ (Efeso 5:1) Say panangawes tan itsura tayo so nayarin mangipatnag na maabig odino makapuy ed mangatatawen ya Ama tayo. Maseguron labay tayon paliketen so puso to!​—Uliran 27:11.

19. Antoray nagunggona ed pangipaamta ed arum na ‘makapakelaw iran bengatla na Dios’?

¹⁹ Anto so liknaan yo nipaakar ed ‘makapakelaw iran bengatla na Dios’ a naaralan yo? On, agaylan pribilehyo so pakaaral tayo ed katuaan! Lapud aagamilen tayo so pananisia ed nipaagus a dala nen Jesu-Kristo, napeperdona iray kasalanan tayo. (Gawa 2:38) Bilang resulta, walaan itayo na inkamabulos a mansalita ed arap na Dios. Agtayo tatakotan so patey a singa ed saramay andian na ilalo. Imbes, walaan itayo na panamaseguro nen Jesus a walay agew ya “amin so saray wala ed saray lubok narengel da so boses to, et ompaway ira.” (Juan 5:28, 29) Si Jehova so mapalabo diad pangipapatnag to ed sarayan amin a bengatla ed sikatayo. Niarum ni, inkalbo to so espiritu to ed sikatayo. Kanian, say pisalsalamat ed amin na sarayan maong a langkap so nepeg a mamakiwas ed sikatayon manrespeto ed atagey iran estandarte to tan sikatoy idayew tayo tekep na seseg, ya iyabawag ed arum irayan ‘makapakelaw a bengatla.’

[Saray paimano ed leksab]

Panon Yon Ebatan?

• Antoran ‘makapakelaw a bengatla’ so nadngelan na totoo nen Pentecostes 33 K.P., tan panon iran kinmiwas?

• Panon a say sakey so magmaliw a babangatan nen Jesu-Kristo, tan anto so sasaglawien na pagmaliw a babangatan?

• Akin ya importante ed sikatayo so panimano ed panangawes tan panag-ayos tayo?

• Antoran aspekto so ikonsidera tayo sano determinaen tayo no matukoy so sakey a kawes odino moda?

[Tepetepet Parad Panagaral]

[Litrato ed pahina 15]

Inyabawag nen Pedro ya apaoli si Jesus manlapud inaatey

[Saray litrato ed pahina 17]

Kasin maabig so ipapatnag na personal ya itsura yo ed Dios a dadayewen yo?

[Saray litrato ed pahina 18]

Nepeg a pampagaan na saray Kristianon atateng so itsura na saray kapamilyaan da