Bilay a Kontrolado na Anito

AKAPITUPAAN ka ed sakey a too sanen onsisipot ka la ed abung mo. Nitiror moy tangan na salim ed bato. Mankiak so sakey a klase na manok diad labi. Apasakey so nakukugip mo. Parad dakel, sarayan nagagawa so kaslakan la tan andiay mauges ya epekto. Balet parad pigaran totoo ed Sagur Aprika, nayarin moriaen da iraya bilang tantanda, sinyalis, odino mensahe iran manlalapud mundo na espiritu. Isipen da a balanglan maabig a pansumpalan odino kalamidad so magano lan onsabi, depende ed tanda tan interpretasyon na satan.

Siempre, papanisiaan iray anito pati diad paway na Aprika. Anggaman dakel lan taon ya impanbilay ed sosyedad a tinmalona so ateismo, say makapakelaw a bilang na totoo diad Tsina tan diad saray republika na datin Unyon Sobyet so siansian manisia ed saray anito. Diad Mamasagur a mundo, dakel so ontutupleg ed horoscope da, natatakot ed Biernes a-trese, tan ompapaliis ed saray andeket a pusa. Saray liwawa ed mamaamianen (aurora borealis) so momoriaen na arum a totoo diad Arawin Amianen bilang sinyal na bakal tan salot. Diad India et onkakayat so AIDS lapud panisiaan na saray drayber na trak a sikaray nakaukolan a misekso pian mansiansia iran presko diad panaon na ampetang. Diad Hapon et panisiaan na saray managgaway tunnel a malas so iloob na sakey a bii ed tunnel sakbay itan a nasumpal. Kasmak met iray anito diad propesyonal ya isport. Inkuan na sakey a managgalaw ed balibol a say mantutumbokan ya impanalo ra et makasengeg ed impangisulong to na andeket a midyas imbes ya amputi. Say listaan so agmanampot.

Komusta ka balet? Kasin walaray iyaamot mo, ya agnipaliwawan katatakotan? Naaapektaan ka ta ed sakey a “sisiaen, aliwan puron sisiaen, odino kustombre ya andian iratan na makatunongan ya eksplinasyon”? Say ebat mo so mangiparungtal no kasin naaapektaan ka odino andi, lapud ontan so impanguker na sakey a reperensya ed salitan “anito.”

Say toon mangiyaabuloy ed anito a mangapekta ed saray desisyon tan inagew-agew a bilay to et papaulyanan toy inkasikaton dominaen na bengatlan agto natatalosan a peteg. Kasin makabat iya? Nepeg kasin manpakontrol itayo ed satan a makilot tan posiblin mauges ya impluensya? Kasin say anito et sakey ya agmakapasakit ya agamil odino kasin sakey a mapeligron sesga?