Leksion Manlapud Dolakak

“ON, say dolakak na saray tawen amta to so saray tinandaan a panaon to; . . . Balet say baley ko agto amta so tunong nen Jehova.” (Jeremias 8:7) Diad saratan a salita, inyabawag nen propeta Jeremias so panangukom nen Jehova sumpad apostatan totoo na Juda, ya angikaindan ed si Jehova a Dios da tan nandayew ed arum a dirios. (Jeremias 7:18, 31) Akin ya inusar nen Jeremias so dolakak ed pangiter na leksion parad agmatoor iran Judio?

Parad saray Israelita, say dolakak, tan nagkalalo la ed amputin dolakak, so kaslakan a naiimanon onaalis-alis ed saray daldalin ya asalambit ed Biblia. Say Hebreo a ngaran na sayan baleg tan malasway a mansasakatsakat a manok so walad porma a salitan ontukoy ed bii a mankabaliksan na “matoor a sakey; sakey a walaan na maaron-kaabigan.” Matukotukoy iya, lapud aliwan singa ed kaslakan a manok, say lalong tan nganak ya amputin dolakak so mansiasiansian mankapares legay bilay da. Kayari na impanayam ed ampetpetang iran rehyon legan na tiempoy ambetel, maslak a dolakak so ompapawil a kada taon, mabetbet et diad samay nan-ubongan da lanlamang.

Say nisipor a wale-waleng na dolakak so mangiyiilustra ed kalidad na katooran diad arum niran nikadkaduman paraan. Say lalong tan nganak a dolakak so mansublayan a manlemlem ed saray iknol tan mamakan ed saray siwsiw da. Ipapaliwawa na libron Our Magnificent Wildlife: “Bilang mankapares, saray dolakak so nikadkaduman matoor ed sakey tan sakey. Sakey a lalong a dolakak diad Alemanya so tinmekkiab ed atagey-boltahe iran alambre tan akoryente. Intuloy na kapares to a nilemleman iray iknol a bukor diad loob na taloy agew, a legan na saman et aminsan labat ya inmalis ya agano pian mananap na nakan. . . . Diad sananey ya inkagawa, sanen apaltog so nganak a dolakak, samay lalong so amabaleg ed siwsiw.”

Peteg, diad panamegley na nisipor a pangipapanengneng na katooran to’d legay-bilay a kapareha to tan matamoy a panangasikaso ed siwsiw to, say dolakak so manusumpal ed kabaliksan na ngaran to​—“matoor a sakey.” Kanian, saray dolakak so kinmana a mapuersan leksion parad agmatoor tan anawet-tenten iran Israelita.

Parad dakel a totoo natan, say katooran et kadaanan lan ideya​—pandinayewan balet ta aliwan praktikal. Napatnagan ed idaraak na diborsyo, panangikaindan, panagsaol, tan arum niran nengneng na panamalikdo ya agla papablien so katooran. Diad pidumaan, papablien a tuloy na Biblia so katooran a papakiwasen na aro tan kaabigan. Satan so mamapaseseg ed saray Kristiano a ‘mangikawes ed too a balo, a sikato so pinalsay Dios ed loob na kaptekan tan matuan kasantosan.’ (Efeso 4:24) On, say balon personalidad so ontulong ed sikatayon magmaliw a matoor, balet naaralan tayo met so sakey a leksion nipaakar ed katooran manlapud dolakak.