Propesiya nen Isaias​—Liwawa Parad Amin a Katooan I

Kapitulo Trenta

 “Ligliwaen Yo so Totook”

Isaias 40:1-31

1. Antoy sakey a paraan a liligliwaen itayo nen Jehova?

 SI Jehova so ‘Dios a mangiiter na ligliwa.’ Sakey a paraan a liligliwaen to itayo et diad panamegley na saray sipan ya impaikurit to ed Salita to. (Roma 15:4, 5, NW) Alimbawa, sano inatey so sakey ya inad-aro yo, anto ni so lalon makaligliwa nen say ilalon kioli na satan ya inad-aro diad balon mundo na Dios? (Juan 5:28, 29) Tan komusta so sipan nen Jehova a magano to lan panganggaen so karelmengan tan pagmaliwen iyan dalin a paraiso? Agta makaligliwa so pakawalaan na ilalo a niliktar a mamaarap ed satan ya onsasabin Paraiso tan aglan balot ompatey?​—Salmo 37:9-11, 29; Apocalipsis 21:3-5.

2. Akin a napanmatalkan tayo iray sipan na Dios?

² Kasin peteg a napanmatalkan tayo iray sipan na Dios? Petepeteg! Sigpot a napanmatalkan so Nanggawa ed saraman a sipan. Sikatoy walaan na kapasidad tan kaliktan ton sumpalen so salita to. (Isaias 55:10, 11) Saya so mabisbiskeg a nipatnag unong ed imbalikas nen Jehova panamegley nen propetan Isaias ya ipawil to so tuan panagdayew ed Jerusalem. Konsideraen tayo itan a propesiya a pinmatnag ed Isaias kapitulo 40, lapud say panggawa ed satan so mamabiskeg na pananisia tayo ed si Jehova, say Mananumpal na saray sipan.

Sakey a Makaligliwan Sipan

3, 4. (a) Anto so inkurit nen Isaias a makaligliwa iran salita a nakaukolan na totoo na Dios diad saginonor a panaon? (b) Akin ya idestiero ed Babilonia iray manaayam ed Juda tan Jerusalem, tan kaunongan kabayag so panserbi ra?

³ Nen koma-walon siglo K.K.P., inkurit nen propeta Isaias iray makaligliwan salita a nakaukolan na totoo nen Jehova diad saginonor a panaon. Kayari ton imbaga ed si Arin Ezekias a manasingger so kadederal na Jerusalem tan say kibantak na Judion totoo ed Babilonia, tampol ya impaamta nen Isaias iray salita nen Jehova a mangisisipan ed kipawil: “Ligliwaen yo, ligliwaen yo so totook, kuan na Dios yo. Mansalita kayo na makaligliwa ed Jerusalem; et yakis yo ed sikato a say pibabakal to mangangga la, ta say inkauges to aperdona la, a sikato so inawat to ed lima nen Jehova ed mamidua a nipaakar ed amin a kasalanan to.”​—Isaias 40:1, 2.

⁴ ‘Ligliwa,’ say manangilukas a salita na Isaias kapitulo 40 so maabig a manideskribe ed mensahe na liwawa tan ilalo a lugan na interon libro na Isaias. Lapud nan-apostata iray manaayam ed Juda tan Jerusalem, sikaray idestiero ed Babilonia diad 607 K.K.P. Balet saratan ya akautibon Judio so agmanserbi a magnayon ed saray taga-Babilonia. Andi, sikaray manserbi lambengat anggad ‘naperdona la’ so lingo ra. Kaunongan kabayag itan? Unong ed si Jeremias a propeta, 70 taon. (Jeremias 25:11, 12) Kayari na satan, iwanwan nen Jehova so magbabawin nakdaan ya ompawil ed Jerusalem manlapud Babilonia. Diad koma-70 taon na impankibalatar na Juda, agaylan ligliwa parad saray akautibo so pakamorian say panaon na insipan a kililiktar da so asingsingger la!​—Daniel 9:1, 2.

5, 6. (a) Akin a say arawin biahe manlapud Babilonia anggad Jerusalem so agmakasbel ed pakasumpal na sipan na Dios? (b) Say kipawil na saray Judio ed nianakan dan dalin so walaan na anton epekto ed arum a nasyones?

⁵ Say pambaroy manlapud Babilonia anggad Jerusalem so 800 angga 1,600 a kilometro, depende ed dalanen a rota. Kasin makasbel so arawin biahe diad pakasumpal na sipan na Dios? Andin balot! Insulat nen Isaias: “Say boses na sakey a mantawag, Itadia yo ed kalawakan so dalan nen Jehova, pataren yo so sakey a dalan ed takel a nipaakar ed Dios tayo. Balang lawak nitandoro, tan amin a palandey tan pukdol napaabeba ra naani; tan say tibatibagkol napalanas ira naani, tan saray lasonglasong a pasen magmaliw a sakey a pasen a mapatar: Tan say gloria nen Jehova nipatnag naani, tan amin a laman sikato  so nanengneng da a sankatipon; ta say sangi nen Jehova sinalita to.”​—Isaias 40:3-5.

⁶ Antis ya onggapon manbaroy, saray taga-Bukig a manuley so mabetbet a mangibabaki na lalaki pian iparaan so dalan diad pangekal ed angkakabaleg iran bato tan manggawa ni ra ingen na saray karsada tan mamalatas ed saray pukdol. Diad biang na saray ompapawil a Judio, singa say Dios a mismo so wala’d arapan da, a mamapalatas ed antokaman iran makasbel. Tutal, saraya so totoon mangaakbibit ed ngaran nen Jehova, tan say panumpal ed sipan to ya ipawil ira ed dalin da so kirayewan to diad imaton na amin a nasyones. Labay da man itan odino andi, napaskar iratan a nasyon a nengnengen a si Jehova et Mananumpal ed saray sipan to.

7, 8. (a) Anto so kasumpalan na saray salita ed Isaias 40:3 nen inmunan siglo K.P.? (b) Anto so babaleg a kasumpalan na propesiya nen Isaias nen 1919?

⁷ Say inkipawil nen komanem a siglo K.K.P. so aliwan mogmon kasumpalan na sayan propesiya. Wala met so kasumpalan nen inmunan siglo K.P. Si Juan a Managbautismo so boses na sakey a “mantawag dia ed lawak,” bilang kasumpalan na Isaias 40:3. (Lucas 3:1-6) Diad inkipuyan, inyaplika nen Juan ed inkasikato iray salita nen Isaias. (Juan 1:19-23) Manlapu nen 29 K.P., ginmapon imparaan nen Juan so dalan parad si Jesu-Kristo. * Say pagpaunan impangiyabawag nen Juan so anagyat ed totoo a mananap ed insipan a Mesias pian sikara met so ondengel tan ontumbok ed sikato. (Lucas 1:13-17, 76) Diad panamegley nen Jesus et iwanwan nen Jehova iray magbabawin totoo diad kawayangan a say Panarian na Dios lambengat so makapangitarya​—satan so kibulos manlapud panangaripen na kasalanan tan patey. (Juan 1:29; 8:32) Saray salita nen Isaias so walaan na babaleg a kasumpalan diad inkibulos na nakdaan na espiritual ya Israel manlapud Babilonia a Baleg nen 1919 tan diad inkipawil da ed tuan panagdayew.

⁸ Balet, komusta so nipaakar ed saramay manatalaran a nagunggonaan ed manunan kasumpalan na sipan, salanti, saray Judion akautibo ed Babilonia? Kasin peteg a napanmatalkan da so sipan nen Jehova a papawilen to ra ed pinabli ran dalin? Peteg a napanmatalkan da! Diad panamegley na malinew iran salita tan ilustrasyon manlapud inagew-agew a kabibilay, angiter natan si Isaias na mapuersa iran rason no akin a sigpot iran makapankompiyansa a sumpalen nen Jehova so salita to.

Dios a Mansiansia ed Andolan Ando so Salita To

9, 10. Panon a pinankompara nen Isaias so kinatikey na bilay na too ed inkapermanente na “salita” na Dios?

⁹ Unona, say salita na Sakey a mangisisipan na kipawil so mansiansia ed ando lan ando. Insulat nen Isaias: “Say boses na sakey a kuan to, Yakis mo. Et say sakey inkuan to, Anto so yakis ko? Amin a laman sikato so dika, tan amin a kalimgasan sikato so singa bolaklak ed uma. Say dika namagaan, say bolaklak nalenes, lapu ed say panlinawa nen Jehova onsibok ed sikato; tua a saray totoo sikara so dika. Say dika namagaan, say bolaklak nalenes; balet say salita na Dios tayo mansiansia ed ando lan ando.”​—Isaias 40:6-8.

¹⁰ Amtan tuloy na saray Israelita a say dika so agmanbayag ed ando lan ando. Diad panaon na tiagew, say maberdi so nalenes ed pirmin petang na banwa. Diad pigaran aspekto, say bilay na too so singa dika​—sipor a temporaryo lambengat. (Salmo 103:15, 16; Santiago 1:10, 11) Pinankompara nen Isaias so kinatikey na bilay na too ed inkapermanente na “salita,” odino nibalikas a gagala na Dios. On, “say salita na Dios tayo” so mansiansia ed ando lan ando. Sano mansalita so Dios, anggapoy makapabes ed saray salita to odino makaamper ed pakasumpal na saratan.​—Josue 23:14.

11. Akin a napanmatalkan tayo si Jehova a sumpalen to so sipasipan a lugan na nisulat a Salita to?

¹¹ Natan et wala la’d sikatayo so nibalikas a gagala nen Jehova a nisulat ed Biblia. Diad loob na saray siglo et pirmin sinumpa so Biblia, tan saray andi-takot a manangipatalos tan arum ni ra so angirisga ed bilay da pian nipreserba itan. Ingen, aliwan saray sagpot da lambengat so rason no akin a nansiansia itan. Amin a dayew diad impansiansia na satan so nepeg ya onla ed si Jehova, say ‘mabilay tan magnayon a Dios’ tan say Manangipreserba ed Salita to. (1 Pedro 1:23-25) Isipen pa iya: Lapud impreserba nen Jehova so nisulat a Salita to, agtayo ta napanmatalkan a sumpalen to so sipasipan to a lugan na satan?

 Mabiskeg a Dios a Matamoy a Mangaasikaso ed Karnero To

12, 13. (a) Akin a napanmatalkan so sipan a kipawil? (b) Anto so maong a balita parad saray adestieron Judio, tan akin a makapankompiyansa ira?

¹² Inter nen Isaias so komaduan rason no akin a napanmatalkan so sipan a kipawil. Say Sakey ya angisipan et mabiskeg a Dios a matamoy a mangaasikaso ed totoo to. Intuloy nen Isaias: “O sika a mangibaga na saray maong a balita ed Sion, ontatdang ka ed toktok na atagey a palandey: O sika a mangibaga na saray maong a balita ed Jerusalem, itagey mo so boses mo a tekep na biskeg: itagey mo, agka antakot; ibagam ed saray syudad na Juda, Nia, so Dios yo! Nia, say Katawan a Jehova onsabi a singa sakey a makapanyari [“tekep ni ingen na biskeg,” NW, paimano’d leksab] tan manuley naani taklay to nipaakar ed sikato: Nia, say panumang to kaulop to, tan say panumang to wala ed arap to. Pankabkaben to naani so ayep to a singa sakey a pastol, tiponen to naani so saray kordero ed taklay to, tan awiten to ra ed pagew to, tan guyoren to a makalna naani so saray walaan na kilaw.”​—Isaias 40:9-11.

¹³ Diad panaon na Biblia, niyugali na saray bibii a selebraan iray impanalo, ya ikekelyaw odino ikakanta ra so maong a balita na impanalo ed saray bakal odino ed onsasabin tulong. (1 Samuel 18:6, 7; Salmo 68:11) Mapropetikon ipapabitar nen Isaias a walay maong a balita parad saray adestieron Judio, balita a nikelyaw ya andi-takot, anggan diad toktok na saray palandey​—iwanwan nen Jehova so totoo to ya ompawil ed pinabli ran Jerusalem! Makapankompiyansa ira, lapud si Jehova so onsabi “tekep ni ingen na biskeg.” Kanian, anggapo so makaamper ed panumpal toy sipan to.

14. (a) Panon so impangiyilustra nen Isaias ed matamoy a paraan na pangiwanwan nen Jehova ed totoo to? (b) Antoran alimbawa so mangiyiilustra no panon a matamoy ya aasikasoen na saray managpastol so karnero ra? (Nengnengen so kahon.)

¹⁴ Anggaman kuan, sayan mabiskeg a Dios so matamoy met. Si Isaias so maligligsan aneskribe no panon ya iwanwan nen Jehova so totoo to ya ompawil ed nianakan dan dalin. Si Jehova et singa sakey a maaron managpastol a mantipon ed saray kordero to tan ampopoen to ra ed “pagew” to. Mapatnag a say salita dia a “pagew” so ontutukoy ed banda’d pagew a tupi na kawes. No maminsan et ditan so pangiiyanan na saray managpastol ed kapangiyanak iran kordero ya agni makapibansag ed pulok. (2 Samuel 12:3) Say ontan a makatenyeg ya eksena ed bilay na managpastol so andi-duaruwan mangipapaseguro ed adestieron totoo nen Jehova nipaakar ed maaron panangiyansakit to ed sikara. Maseguron say ontan a mabiskeg ingen matamoy a Dios so napanmatalkan a manumpal ed insipan to ed sikara!

15. (a) Kapigan sinmabi si Jehova “tekep ni ingen na biskeg,” tan siopa so ‘taklay a manuuley nipaakar ed sikato’? (b) Anton maong a balita so nepeg a makpel ya iyabawag?

¹⁵ Saray salita nen Isaias so napno na mapropetikon kabaliksan ed panaon tayo. Nen 1914, si Jehova so sinmabi “tekep ni ingen na biskeg” tan inletneg  to so Panarian to ed katawenan. Say ‘taklay a manuuley nipaakar ed sikato’ et say Anak to, si Jesu-Kristo, ya impasen nen Jehova ed mangatatawen a trono to. Nen 1919, inliktar nen Jehova manlapud inkadakep ed Babilonia a Baleg iray alanaan a lingkor to diad dalin tan inggapo ra so sigpot a pangipawil na puron panagdayew ed say mabilay tan tuan Dios. Saya so maong a balita a nepeg a makpel ya iyabawag, a singano ikekelyaw manlapud toktok na saray palandey pian malaknab so kipasabi na iyaabawag. Ikasil tayo sirin so boses tayo tan makpel ya ipaamta ed arum ya impawil la nen Jehova a Dios so puron panagdayew to diad dalin!

16. Diad anton paraan ya iwawanwan natan nen Jehova so totoo to, tan anton padron so itatarya na saya?

¹⁶ Saray salita na Isaias 40:10, 11 so walaan na nagkalalon praktikal a kakanaan parad sikatayo natan. Makaligliwan imanoen a say panangiwanwan nen Jehova ed totoo et diad matamoy a paraan. No panon a natatalosan na managpastol so indibidual iran pankaukolan na karnero​—a pati saray angkekelag a kordero ya agmakapibansag ed arum​—natatalosan nen Jehova iray limitasyon na balang sakey ed saray matoor a lingkor to. Niarum ni, si Jehova, bilang matamoy a Managpastol, so mangitatarya na padron parad saray Kristianon managpastol. Saray mamatatken so nepeg a matamoy a mantrato ed pulok, a mangaalig ed maaron panangiyansakit ya impatnag nen Jehova a mismo. Kaukolan a sinononot iran naynay ed liknaan nen Jehova ed balang membro na pulok, “a sinaliw to ed dala na mismon Anak to.”​—Gawa 20:28, NW.

Sankamakapanyarian, Sankakabatan

17, 18. (a) Akin a makapankompiyansa iray adestieron Judio ed sipan a kipawil? (b) Antoran makapakelkelaw a tepet so pinalesa nen Isaias?

¹⁷ Saray Judion adestiero so makapankompiyansa ed sipan a kipawil lapud say Dios so sankamakapanyarian tan sankakabatan. Inkuan nen Isaias: “Siopa ta so anukat na danum ed kutlaong na lima to, tan anukat na tawen ed dangan, tan say angilugan na dabok na dalin ed sakey a sukatan, tan animbang na saray palandey ed saray katiyan, tan saray pukdol ed sakey a simbangan? Siopa ta so angipanengneng na Espiritu nen Jehova, odino anta sikato so manimbawa ed sikato, sikato so ibangat to? Siopa so angala na simbawa, tan siopa so angibangat ed sikato, tan angipaliwawa ed sikato na dalan na inkatunong, tan say angibangat ed sikato na pikakabat, tan angipatnag ed sikato na dalan na pakatalos?”​—Isaias 40:12-14.

¹⁸ Saraya so makapakelkelaw a tepetepet a nepeg ya umamengen na saray adestieron Judio. Kasin naamper na totoo lambengat so daluyon na mabiskeg a kadayatan? Siempre, andi! Ingen, no para ed si Jehova, say kadayatan ed interon dalin et singa sankatedter a danum ed dakulap to. * Kasin nasukat na makabos a too so maaw-awang tan mabitewen a katawenan odino kasin nasimbang to so kapalandeyan tan pukpukdol na dalin? Andi. Ingen, main-inomay a susukaten nen Jehova so katawenan a singa panusukat na sakey a too ed sakey a bengatla a sankarangan​—distansia manlapud tangan anggad kiking sano akaunat so lima. Nayarian na Dios, a singa panangibaga, a simbangen so kapalandeyan tan pukpukdol diad sakey a simbangan. Kasin nasimbawa na anggan say sankakabatan lan totoo so Dios no anto so nepeg ton gawaen ed kaplesan iran kipapasen odino nibaga to’d Sikato so nepeg ton gawaen ed arapen? Maseguron andi!

19, 20. Pian idanet so kabalgan nen Jehova, antoray inusar nen Isaias ya ilustrasyon?

¹⁹ Komusta balet iray mabiskeg a nasyones diad dalin​—sarag da kasin amperen so Dios legan a susumpalen to so salitan insipan to? Inmebat si Isaias diad impaneskribe ed nasyones a singa ed onggendan: “Nia, saray nasyon singa ra sankatedter na sakey a timba, tan nibilang ira a singa melanting a dabok na simbangan: nia, sikato ekalen to so saray pulo a singa sakey a melag a bengatla. Et say Libano ag-onsarag a poolan, tan agmet masarag so saray ayep to a napoolan a bagat. Amin iray nasyon singa anggapo so kakanaan ed arap to; ibilang to ra a melmelag nen say anggapo, tan kaapaan.”​—Isaias 40:15-17.

²⁰ Parad si Jehova, saray amin a nasyon et singa sankatedter a danum a manlapud sakey timba. Nibilang ira a singa pinon dabok a natitipon ed simbangan, ya anggapoy epekto. * Bilbilang et walay sakey a manpaalagey na abalbaleg ya altar tan say itungo  to ed altar et say amin a kakiewan diad kapalandeyan na Libano. Insan bilbilang et ibagat to so amin ya ayayep a wala’d saratan a kapalandeyan. Anggan say ontan a panangibagat et agmagmaliw a makana ed si Jehova. Lapud singa kulang ni so piguratibon ilustrasyon to, angusar si Isaias na mas mapuersa nin balikas, salanti, amin a nasyon so “melmelag nen say anggapo” diad imaton nen Jehova.​—Isaias 40:17.

21, 22. (a) Panon ya indanet nen Isaias ya agnaparaan si Jehova? (b) Itonton itayo na malinlinew ya ilustrasyon nen Isaias ed anton konklusyon? (c) Inkurit nen Isaias so anton balikas a susto unong siensia? (Nengnengen so kahon ed pahina 412 na libro.)

²¹ Pian lalon nidanet a si Jehova so agnaparaan, nantultuloy ya impanengneng nen Isaias so kakulangkulangan na saramay manggagawa na talintao panamegley na balitok, pilak, odino kiew. Agaylan kinaambagel so panisip a dinanman ed saratan a talintao so matukoy a mangirerepresenta ed “Sikato a manyurong ed tagey na tinibukel a dalin” tan manguuley ed saray manaayam ditan!​—Basaen so Isaias 40:18-24.

²² Amin na sarayan malinew a deskripsion so mangitonton ed sikatayo ed sakey a konklusyon​—anggapo so makaamper ed sankamakapanyarian, sankakabatan, tan agnaparaan a Jehova diad panusumpal to ed sipan to. Agaylan akaligliwa tan amabiskeg iray salita nen Isaias ed saray adestieron Judio ed Babilonia a manpipilalek a makapawil ed nianakan dan dalin! Natan et makapankompiyansa itayo met a nasumpal iray sipan nen Jehova parad arapen tayo.

“Siopa so Amalsa ed Saraya”?

23. Diad anton rason a napaseseg iray adestieron Judio, tan anto so idadanet natan nen Jehova nipaakar ed inkasikato?

²³ Wala ni sananey a rason no akin a napaseseg iray adestieron Judio. Samay Sakey a mangisisipan na kililiktar et say Manamalsa ed amin a bengatla tan say Lapuan na amin a dinamikon biskeg. Pian nidanet so makapakelkelaw a kapasidad to, impaimano nen Jehova so abilidad to a napatnagan ed pinalsa: “Siopa sirin so pangiparaan yo ed siak, pian nipara ak komon ed sikato? Kuan na Santo. Itangay yo so saray mata yo ed tagey, tan nengnengen yo no siopa so amalsa ed saraya, a sikato alaen to so saray ehersito ra ed bilang; sikato tawagen to ra ya amin ed saray ngaran; lapu ed kabaleg a tuloy na biskeg to ed pakayari, tan lapu ed mabiskeg ed pakayari, anggapo so kulang anggan sakey.”​—Isaias 40:25, 26.

24. Diad pansasalita parad inkasikaton dili, panon ya impanengneng nen Jehova ya anggapoy kapara to?

²⁴ Say Santo a Sakey na Israel so mansasalita parad inkasikato. Pian ipanengneng ya anggapoy kapara to, impaimano nen Jehova iray bitewen ed katawenan. Singa say komander ed militar a mangoorganisa ed saray armada to, si Jehova so mangokontrol ed saray bitewen. No tiponen to ra ‘anggapo so onkulang anggan sakey’ ed sikara. Anggaman amayamay iray bitewen, tatawagen to ra ed kangaranan da, balang lan indibidual a ngaran odino pangaran. Singa saray matulok a sundalo, mansiasiansia ira ed pasen da tan mauk-uksoy ira, lapud say Lider da so walaan na ‘baleg a tuloy a biskeg’ tan “mabiskeg ed pakayari.” Kanian saray adestieron Judio so walaan na rason a mankompiyansa. Say Manamalsa, a mangigaganggan ed saray bitewen, so walaan na pakayari a manuporta ed saray lingkor to.

25. Panoy ikiwas tayo ed imbitasyon na Dios a nikurit ed Isaias 40:26, tan tekep na anton epekto?

²⁵ Siopa ed sikatayo so makatepel ya ag-onkiwas ed imbitasyon a nikurit ed Isaias 40:26 ya: “Itangay yo so saray mata yo ed tagey, tan nengnengen yo”? Ipapanengneng na saray adiskobre na modernon-panaon iran astronomo a say mabitewen a katawenan et nagkalalo nin makapakelkelaw nen say padesir ed saya nen panaon nen Isaias. Kakalkulaen na saray astronomo ya onkukunineng ed katawenan panamegley na mabiskeg iran teleskopyo a walay anggad 125 bilyon a galaksi diad nanenengneng ya uniberso. Agayla, say sakey labat la ed saraya​—say Milky Way a galaksi​—so walaan na masulok a 100 bilyon a bitewen, unong ed kalkulasyon na arum! Say pikabat ed satan so nepeg a mamaliing ed kapusoan tayo a mangigalang ed Manamalsa tayo tan sigpot a manmatalek ed insipan to.

26, 27. Panon ya adeskribe so liknaan na saray adestiero ed Babilonia, tan antoran bengatla so nepeg dan amtaen?

²⁶ Lapud kabat to a saray taon na impakautibo so manismaya ed saray adestieron Judio, pinuyanan nen Jehova si Isaias a masakbay lan ikurit irayan manamaseguron salita: “Akin a kuan mo, O Jacob, tan salitaen mo, O Israel, Say dalan ko nisanib ed kinen Jehova, tan say inkatunong a nipaakar ed siak linmabas a nanlapu ed Dios ko? Agmo  ta naamtaan? Agmo ta nadngelan? Say ando lan ando a Dios, si Jehova, a Manamalsa ed saray sampot na dalin, ag-onkapuy, tan agmet nakesawan; anggapo so makausisa ed linawa to.”​—Isaias 40:27, 28.

²⁷ Inkurit nen Isaias iray salita nen Jehova a manideskribe ed liknaan na saray adestiero ed Babilonia, a nilasus kilometro manlapud dalin a nianakan da. Iisipen na arum a say “dalan” da​—say mairap a kipapasen na panagbilay da​—so agnanenengneng odino ag-amta na Dios. Iisipen da ya agmanginenen si Jehova ed saray ag-inkahustisyan nasasagmak da. Pinanonotan ira ed saray bengatlan kaukolan dan amtaen, no aliwan manlapud personal ya eksperiensya ra, et anggan dia lambengat ed impormasyon a nipasabi ed sikara. Sarag tan kaliktan nen Jehova ya iliktar so totoo to. Sikato so magnayon a Dios tan say Manamalsa na interon dalin. Kanian, wala ni’d sikaton siansia so pakapanyari ya impatnag to ed panamalsa, tan sarasarag to anggan say mabiskeg a Babilonia. Say ontan a Dios so agnakesawan tan agto saewen so totoo to. Agda nepeg ya ilaloan a natalosan da a sigpot iray gawagawa nen Jehova, lapud say pakatalos to, odino say inkatudio, pakatebek, tan panmoria to et agdan balot natalosan.

28, 29. (a) Panon a pinanonotan nen Jehova so totoo to a tulongan to ray naksawan? (b) Anton ilustrasyon so inusar a mangipanengneng ed pamapabiskeg nen Jehova ed saray lingkor to?

²⁸ Panamegley nen Isaias et nantultuloy ya amaseseg si Jehova ed saray naeekalay-ilalon destiero: “Sikato mangiter na pakayari ed makapuy; et saman so andian na pakapanyari sikato so parakelan to na biskeg. Anggan saray ugugaw onkapuy ira tan nakesawan ira, tan saray tobonbalo parukol ira naani a sigpot; balet saray manalagar ed Jehova pasimbaloen to so biskeg da; mamaatagey ira naani ya akapayak a singa say agila; ombatik ira naani, tan ag-ira nakesawan; manakar ira naani tan ag-ira onkapuy.”​—Isaias 40:29-31.

²⁹ Sano sasalitaen so pankaukolan a pangiter na biskeg ed naksawan, nayarin walad kanonotan nen Jehova so makapakesaw a pambaroy na saray adestiero pian makasempet ira. Pinanonotan nen Jehova so totoo to a kasiporan la’d sikato so ontulong ed saray naksawan a maniilalo ed tulong to. Anggan saray sankabiskegan ed totoo​—“saray ugugaw” tan “saray tobonbalo”​—so onkapuy tan natiror lapud inkakesaw. Ingen, insipan nen Jehova a sikatoy mangiter na biskeg​—ag-onkapuy a biskeg pian makabatik tan makaakar​—ed saramay manmamatalek ed sikato. Say singa main-inomay a katetekkiab na agila, sakey a mabiskeg a manok a mamatayong diad loob na pigaran oras, so inusar pian iyilustra so pamapabiskeg nen Jehova ed saray lingkor to. * Tekep na ilalo a tulongan ira na Dios, anggapoy rason a nadismaya iray adestieron Judio.

30. Panon a naligliwa iray tuan Kristiano natan ed saray unor a bersikulo na Isaias kapitulo 40?

³⁰ Lugan na sarayan unor a bersikulo na Isaias kapitulo 40 iray makaligliwan salita parad saray tuan Kristiano a manbibilay ed kaunoran iran agew na sayan marelmeng a sistema. Diad karakel na saray desdes tan problema a manidismaya, makapaseguro so pakaamta a saray kairapan a susungdoan tayo tan saray ag-inkahustisyan sasagmaken tayo so naiimano na Dios tayo. Maseguro itayo a say Manamalsa na amin a bengatla, samay Sakey a “say pakatalos to anggapo so sampot to,” so mametek ed amin ya ag-inkahustisya diad dilin panaon tan paraan to. (Salmo 147:5, 6) Kaleganan ni, agtayo kaukolan so mansungdo diad dilin biskeg tayo. Si Jehova, ya agnaupot so pakayari to, so makapangiter ed sikatayo na biskeg, anggan “say sankatageyan ya inkabaleg na pakayari” ed saray lingkor to diad panaon na subok.​—2 Corinto 4:7.

31. Anton sipan na liwawa so lugan na propesiya nen Isaias parad saray akautibon Judio ed Babilonia, tan diad anto a sigpot itayon makapankompiyansa?

³¹ Isipen pa iramay Judion akautibo ed Babilonia nen komanem a siglo K.K.P. Nilasus kilometro ed kaarawi, say pinabpabli ran Jerusalem et nankibalatar, a say templo na satan so ageray. Parad sikara et lugan na propesiya nen Isaias so makaligliwan sipan na liwawa tan ilalo, salanti, ipawil nen Jehova ed sikara so nianakan dan dalin! Nen 537 K.K.P., inwanwan nen Jehova a pasempet so totoo to, a pinaneknekan ton sikatoy Mananumpal na saray sipan. Sikatayo met so sigpot a makapankompiyansa ed si Jehova. Saray sipan ed Panarian to, a marakdakep ya imbalikas ed propesiya nen Isaias, so ontua. Peteg a satan so maong a balita​—sakey a mensahe na liwawa parad amin a katooan!

[Saray paimano ed leksab]

[Tepetepet Parad Panagaral]

[Kahon ed pahina 25]

Si Jehova, Sakey a Maaron Managpastol

Si Jehova so inyaliling nen Isaias ed sakey a maaron managpastol a mangaampopo ed saray kordero ed pagew to. (Isaias 40:10, 11) Mapatnag ya imbase nen Isaias iyan maligsan ilustrasyon ed peteg a gagawaen na saray managpastol. Oniay inreport na sakey a modernon-agew a mangoobserba ed saray managpastol diad alosadsar na Palandey Hermon diad Pegley Bukig: “Balang managpastol so manbabantay a maong ed pulok to pian naimano so kipapasen da. Sano makaromog na kapangiyanak a kordero satan so iyan to ed saray tupi na . . . andukey a kawes to, lapud satan so makapkapuy ni pian makatumbok ed ina. Sano napano la so pagew to, iyan to iray kordero ed takeb to legan ton eegnaan iray sali ra, odino iyan to ra ed bag o baskit diad beneg na sakey ya asno, anggad sarag la na angkekelag a tumboken iray ina ra.” Agta makaligliwa so pakaamta a manlilingkor itayo ed Dios a walaan na ontan a matamoy a panangiyansakit ed totoo to?