Masimoon a Sagpot​—Kapigan Itan Tutumangan nen Jehova?

“BULOSAN moak, ta say agew ompepelnak la.”

“Agta ka bulosan no agmo ak ni papalaren.”

“Siopa so ngaran mo?”

“Jacob.”

“Say ngaran mo agla nabitla a Jacob noag say Israel: ta sika akisubokan ka ed Dios tan dia ed saray totoo, et analo ka.”​—Genesis 32:26-28.

Satan a makapainteres a tongtongan so resulta na makatantandan pakapatnagan na inkakitsing nen 97-años a Jacob. Anggaman sikatoy agdedeskribien na Biblia bilang sakey ya atleta, sikatoy sanlabin akibalsakan, odino akipuligesgesan ed sakey ya anghel. Akin? Mapagan tuloy si Jacob nipaakar ed sipan nen Jehova ed inmunan ateng to​—say tawir to.

Dakel lan taon ed asasakbay et impakerew nen Esau ed yogtan ton Jacob so kanepegan na inkapanguloan bilang kasalat na sakey yaong a digo. Natan et nadngelan nen Jacob so balita ya onsasabi si Esau kaiba so 400 a lalaki. Mapagpaga si Jacob kanian sikatoy kinmerew na panamekder ed sipan nen Jehova a say pamilya to so onaligwas diad dalin ed nibaliw na Ilog Jordan. Mitunosan ed saray pikakasi to, si Jacob so determinadon kinmiwas. Sikatoy angipatulor na dakel a regalo ed onaabantin Esau. Sikato met so namparaan ed depensa to, ya impankadua to so kampamento to tan imbaliw toray asawa tan ananak to diad babaliwan na Jabok. Tekep na pirmin impansagpot tan dakel a lua, lalon insekar toy inkasikato diad sanlabin impipuligesgesan ed sakey ya anghel pian ‘onkerew parad inkasikato.’​—Oseas 12:4; Genesis 32:1-32.

Konsideraen pa so akadkaunan alimbawa nen Raquel, say komadua tan inad-aron asawa nen Jacob. Kabkabat nen Raquel so sipan nen Jehova a pamendisyon ed si Jacob. Say atsi ton Lea, ya unaan ya asawa nen Jacob, so apalaboan na apatiran anak a lalaki bangta si Raquel so nansiansian lepes. (Genesis 29:31-35) Imbes ya abageyen to so inkasikaton dili, sikatoy nantultuloy a kinmerew ed si Jehova diad pikakasi tan positibon kinmiwas unong ed saray pikakasi to. Singa ed ginawa na bai to a Sara ed si Hagar, intarok nen Raquel so aripen to a Bala tan inter to ed si Jacob bilang onkokomaduan asawa ta pian, “nawalaan ak met na anak lapu ed sikato,” so inkuan  nen Raquel. * Nananak na duara a laki si Bala ed si Jacob, salanti, si Dan tan Neftali. Sanen nianak si Neftali et inyabawag nen Raquel so inkapirmin emosyonal ya impansagpot to: “Mabiskeg a pilaglagan so impilaglagan ko ed agik, et tinalok”! Si Raquel so apalaboan na duaran dilin anak a laki, si Jose tan Benjamin.​—Genesis 30:1-8; 35:24.

Akin a benendisyonan nen Jehova so pisikal tan emosyonal iran impansagpot nen Jacob tan Raquel? Inyapasakey da so linawa nen Jehova tan pinabli ra so tawir da. Masimoon iran nampikasi parad panangabobon to ed bilay da tan positibo iran kinmiwas unong ed linawa na Dios tan ed dili ran kerekerew.

Singa si Jacob tan Raquel, dakel natan so mamepekder a nakaukolan so makulin pansagpot pian nagamoran so bendisyon nen Jehova. Saray impansagpot da so mabetbet ya atekepan na saray lua, impakadismaya, tan insaew. Nanonotan ni na sakey a Kristianon ina a si Elizabeth so masimoon ya impansagpot to pian makaatendi lamet ed saray miting Kristiano kayari na abayag ya ag-impakaatendi. Sakey ya angat so nawalaan na limaran ankekelag ya anak a lalaki, agmananisian asawan laki, tan pambiahe na 30 kilometro ed sankaasinggeran a Kingdom Hall. “Say regular ya iyakar ed saray miting so mankakaukolan na pirmin dilin-pananisiplina, ya amtak a makagunggona ed siak tan ed saray anak ko. Akatulong itan pian namoria ra a saya so kurang a makabaliksan a gegemtanen.” Benendisyonan nen Jehova iray sagpot to. Duara ed saray taloran anak ton aktibo ed Kristianon kongregasyon so sigpot-panaon a ministros. Lapud panggagayagaan to so espiritual ya iyaaligwas da, oniay inkuan to: “Pinalumbasan da ak ed espiritual ya ibubulaslas.” Agaylan tumang lapud masimoon ya impansagpot to!

Masimoon a Sagpot a Bebendisyonan nen Jehova

Maseguron say masimoon a pansagpot tan impasyan pankimey so walaan na saray gunggona. No lalon mansagpot itayo ed sakey a kimey odino asainmin, lalo itayon napenek bilang resulta. Ontan so impamalsa nen Jehova ed sikatayo. “Balang too mangan tan oninum, tan manliket a maong ed amin a kimey to, sikato so pamalangkap na Dios,” so insulat nen Arin Solomon. (Eclesiastes 3:13; 5:18, 19) Balet, pian nagamoran so panamendisyon nen Jehova, kaukolan tayon seguroen a matukoy so kipapaarapan na saray sagpot tayo. Alimbawa, kasin makatunongan so panilalo ya abobonan nen Jehova so estilo na kabibilay a mangipapasen ed saray espiritual a bengatla ya onkomadua lambengat? Kasin nailaloan na sakey a dedikadon Kristiano so panangabobon nen Jehova no awaten to so sakey a trabaho odino promosyon a mankabaliksan na regular lan agto pakaatendi ed saray makapabiskeg ed pananisia a panlilimog tan bilin diad saray miting Kristiano?​—Hebreos 10:23-25.

Say sanlegay bilay ya impasyan pankimey diad panggegemtan ed sekular a karera odino materyal ya iyaaligwas so aglawas mankabaliksan a say sakey so “manliket a maong” no ginawa itan ya akapuera iray espiritual a bengatla. Deneskribe nen Jesus iray pansumpalan na saray lingon sagpot diad ilustrasyon to nipaakar ed tomatanem. Nipaakar ed bukel a “nitanem ed nanleleetan na saray espinos,” impaliwawa nen Jesus a “sayaman so makadngel na salita; et say kapagaan ed mundo, tan say panamalingo na saray kayamanan, leneren da so salita, et sikato magmaliw ya andi-bunga.” (Mateo 13:22) Amasakbay met si Pablo nipaakar ed satan a patit tan inyarum to a saramay manggegemtan na materyalistikon kurang so ‘napelag  ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang.’ Anto so remedyo parad satan a makaderal ed espiritual a dalan na kabibilay? Intuloy nen Pablo: ‘Taynan mo so sarayan bengatla tan agmo igagaton so ilalom ed saray kayamanan a panduaruwaan, noag dia ed Dios, a sikato so mangiter ed sikatayo ed daakan na saray amin a bengatla a pinabangan tayo.’​—1 Timoteo 6:9, 11, 17.

Antokaman so edad tayo odino kabayag la na panlilingkor tayo ed si Jehova, amin tayo so nagunggonaan diad pangalig ed masimoon a sagpot ya impatnag di Jacob tan Raquel. Diad panggugunaet da ed panangabobon na Dios, agdan balot alingwanan so tawir da, anggaman agaylan makapataktakot tan makapadismaya iray sirkumstansya. Natan, saray desdes tan kairapan a kidudungetan tayo so nayari met a makapataktakot, makapadismaya, odino makapagonigon ni ingen. Wadtan so tukso ya onsuko ed pipupuligesgesan tan magmaliw a sananey lamet a biktima na panangataki nen Satanas. Sarag ton usaren so antokaman a paraan a nayarian to, balanglan panliliket odino panligliwaan, saray isport odino habi, saray karera odino materyal ya iyaaligwas, pian nasumpal iray gagala to. Mabetbet ya isisipan iray kalkaliktan a resulta balet ta matalag a nadampot. Nalmoan na saramay apalikdo odino asagyat a manali ed saratan a gegemtan a mabetbet et pakadismayaan so pansusumpalan da. Singa ed si Jacob tan Raquel nensaman, bayuboan tayo so espiritu na masimoon a pipuligesgesan tan talonaan iray pakana nen Satanas.

Anggapo lay mas labayen nen Satanas noag say pakanengneng ed sikatayon onsuko, a liknaen tayon ‘anggapo lay ilalo so kipapasen. Anggapo lay nagawaan. Anggapo lay rason a salien ni.’ Agaylan makana sirin ya amin tayo so manalwar sumpad pamayubo ed makapatey ya awawey, ya isipen ya ‘anggapoy mangaaro ed siak’ tan ‘alingwanan ak la nen Jehova.’ Makapatey ed dili so pannonot na ontan. Agta satan so mangipapatnag a sinmuko itayo la tan ag-itayo la akipuligesgesan anggad naawat tayo so panamendisyon? Tandaan, bebendisyonan nen Jehova so masimoon a sagpot tayo.

Mantultuloy a Mipuligesgesan Parad Panamendisyon nen Jehova

Say espiritual a pankaabigan tayo so akadependin tuloy diad pakatalos tayo ed duaran manunan katuaan nipaakar ed bilay tayo bilang lingkor nen Jehova. (1) Anggapoy siopaman a makapangontrol ed saray problema, sakit, odino mairap a kipapasen ed bilay, tan (2) onderengel si Jehova ed saray tagleey na saramay masimoon ya onkekerew ed sikato na tulong tan panamendisyon.​—Exodo 3:7-10; Santiago 4:8, 10; 1 Pedro 5:8, 9.

Anggan panon lay irap na kipapasen yo odino anggan panon lay panlikna yo a makapuy kayo, ag-onsusuko ed “kasalanan ya akaliktob a sankainomayan ed sikatayo”​—say kakulangan na pananisia. (Hebreos 12:1) Mantultuloy a mipuligesgesan anggad naawat yo so panamendisyon. Agamilen so panag-anos, a nonoten si masiken lan Jacob, ya akibalsakan a sanlabi pian pabendisyonan. Singa sakey a dumaralos a mantanem ed primabera insan manalagar ed panagani, maanos a talaranan so panamendisyon nen Jehova ed espiritual a kimey yo, anggaman liknaen yon limitado so kimey yo. (Santiago 5:7, 8) Tan lawas nonoten iray balikas na salmista: “Saray mantanem ed lualua manani ra naani ed gayaga.” (Salmo 126:5; Galacia 6:9) Ontalindeg a malet, tan mansiansia ed limog na saray mipupuligesgesan.

[Paimano ed Leksab]