Matoor a Manpasakop ed Maridios ya Autoridad

“Si Jehova sikato so Ukom tayo, si Jehova sikato so Mangiiter na tunong ed sikatayo, si Jehova sikato so Ari tayo.”​—ISAIAS 33:22.

1. Antoray makasengeg a nikadkaduma so kadaanan ya Israel ed arum niran nasyon?

 NEN 1513 K.K.P. et aporma so nasyon na Israel. Diad saman a panaon et anggapo so kabiseran syudad, anggapo so binalegan a dalin, tan anggapo so nanengneng ya ari. Saray uuleyan na satan so datin ariripen. Anggaman ontan, nikadkaduma itan a balon nasyon diad sananey nin paraan. Si Jehova a Dios so agnanengneng ya Ukom, Manangiter na ganggan, tan Ari na satan. (Exodo 19:5, 6; Isaias 33:22) Anggapo lay arum a nasyon a makapangideklara ya ontan so kipapasen to!

2. Anton tepet so onlesa nipaakar ed inka-organisa na Israel, tan akin ya importante ed sikatayo so ebat?

² Lapud si Jehova et Dios na uksoy, tan Dios met na kareenan, nailaloan tayo ya organisadon maong so antokaman a nasyon ya inuleyan to. (1 Corinto 14:33) Ontan so kipapasen ed Israel. Balet panon a say sakey a mangaraldalin tan nanengneng ya organisasyon so nidirehi na agnanengneng a Dios? Nagunggonaan itayo no konsideraen tayo so paraan na impanuley nen Jehova ed satan a kadaanan a nasyon, a nagkalautlan imanoen tayo no panon ya ipapabitar na pidedeneng to ed Israel so kaimportantian na matoor a pampasakop ed maridios ya autoridad.

No Panon ya Inuleyan so Kadaanan ya Israel

3. Antoran praktikal ya uksoyan so ginawa nen Jehova pian nigiya so totoo to?

³ Anggaman si Jehova et agnanengneng ya Ari na Israel, sikatoy anuro na matoor a lalaki bilang nanengneng a manangilaman to. Walaray papangulo, ulo ed saray sankaabungan na ama, tan mamasiken a manlingkor ed totoo bilang mananimbawa tan uko-ukom. (Exodo 18:25, 26; Deuteronomio 1:15) Balet, agtayo nepeg ya isipen a no anggapo so panangigiya na Dios ed saratan a responsablin lalaki et makapanhusga ira ed saray pamaakaran tekep na naspot a pakatebek tan pakatalos. Ag-ira ayadyari, tan agda nabasa so kapusoan na saray kapara ran managdayew. Siansia, saray matakot ed Dios ya uko-ukom so makapangiter ed saray kapanisiaan da na makatulong a simbawa lapud nibase itan ed Ganggan nen Jehova.​—Deuteronomio 19:15; Salmo 119:97-100.

4. Antoran tendensia so pampagaan a paliisan na saray matoor ya ukom na Israel, tan akin?

⁴ Anggaman ontan, mas ni so kakaukolanen ed pagmaliw ya ukom nen say pakaamta labat  ed Ganggan. Lapud ag-ira ayadyari, saray mamasiken so kinaukolan a magmaliw ya alerton mangiwaklit ed antokaman ed saray agnakontrol a tendensia ran dili​—a singa say inkasiblet, panangidumaduma, tan agum​—a nayarin mamikewet ed panaghusga ra. Inkuan nen Moises ed sikara: “Agkayo manlalabi na totoo ed panangukom; noag ingen dengel yo so angkekelag tan angkabaleg a parapara; agkayo ontatakot ed lupa na too, ta say panangukom nabebetangan na Dios.” On, saray ukom na Israel so manguukom parad Dios. Agaylan makapadinayew a pribilehyo itan!​—Deuteronomio 1:16, 17.

5. Niarum ni ed impangiyuksoy ed saray ukom, anto niran probisyon so ginawa nen Jehova pian naasikaso so totoo to?

⁵ Nanggawa si Jehova na arum niran probisyon pian naasikaso iray espiritual a pankaukolan na totoo to. Sakbay ni ingen na isabi ra ed Insipan a Dalin, ingganggan to ira a mangipaalagey la na tabernakulo, say sentro na tuan panagdayew. Inyuksoy to met so inkasaserdote a mangibangat ed Ganggan, a mangiyapay ed saray bagat ya ayayep, tan mamool na insenso ed kabuasan tan labi. Tinuro na Dios so panguloan ya agi nen Moises, si Aaron, bilang say inmunan atagey a saserdote na Israel tan tinuro toray ananak a lalaki nen Aaron ya ontulong ed saray obligasyon na ama ra.​—Exodo 28:1; Numeros 3:10; 2 Awaran 13:10, 11.

6, 7. (a) Anto so siglaotan na saray saserdote tan aliwan saserdoten Levitas? (b) Anto so leksion a naaralan tayo manlapud katuaan a saray Levita so walaan na nanduruman kimey? (Colosas 3:23)

⁶ Say pangasikaso ed saray espiritual a pankaukolan na pigaran milyon a totoo so abalbaleg a kimey tan dagdaiset iray saserdote. Kanian intarya so sakey ya uksoyan parad sikara pian natulongan na arum a membro na tribu na Levi. Inkuan nen Moises: “Iter mo naani so saray Levitas ed kinen Aaron, tan dia ed saray lalaki ya anak to. Niiter ira a sigpot ed sikato nisengeg ed saray anak na Israel.”​—Numeros 3:9, 39.

⁷ Organisadon maong iray Levita. Naapag ira unong ed taloran pamilya​—saray Gersonita, saray Coatita, saray Merarita​—a kada sakey so walaan na asainmin a gawaen. (Numeros 3:14-17, 23-37) Arum ya asainmin so nayarin mas importante nen say arum, balet amin na saratan so makanakana. Kinaukolan ed kimey na saray Coatitan Levita a wala ira ed kaliberliber na sagradon kaban na sipan tan saray muebles ed tabernakulo. Balet, kada Levita, balanglan Coatita odino andi, so nanggayaga ed alay abig iran pribilehyo. (Numeros 1:51, 53) Makapaermen ta arum so ag-angapresya ed saray pribilehyo ra. Imbes a matoor ira a manpasakop ed maridios ya autoridad, nagmaliw ira ya agkontento tan awalaan ira na kinon, ambisyon, tan imon. Sakey la ed sikara so Levita a manngaran na Core.

“Anapen Yo Met so Inkasaserdote?”

8. (a) Siopa si Core? (b) Anto so nayarin sengegan a minoria nen Core so inkasaserdote unong ed punto de bista na too?

⁸ Si Core so aliwan ulo ed sankaabungan nen Levi, nisay sikato so ulo na saray pamilya na Coatita. (Numeros 3:30, 32) Anggaman kuan, sikato so respetadon pangulo ed Israel. Saray obligasyon nen Core so nayarin amaapit ed sikato ed si Aaron tan saray ananak ton lalaki. (Numeros  4:18, 19) Diad impakaimaton to ed ag-inkayadyari na sarayan lalaki, nayarin inkatunongan nen Core: ‘Sarayan saserdote so petepeteg ya ag-ayadyari, balet ta siak so ilaloan a manpasakop ed sikara! Agano ni et nanggawa si Aaron na binalitokan a kilaw a baka. Say totoo so naplag ed idolatriya lapud impandayew da ed satan. Natan si Aaron, say agi nen Moises, so manlilingkor bilang atagey a saserdote! Agaylan panaglabi! Tan komusta met iray ilalak nen Aaron, si Nadab tan Abihu? Diad tua, impatnag da so pirmin agpanagrespeto ed saray pribilehyo na serbisyo ra kanian tinigway ira nen Jehova!’ * (Exodo 32:1-5; Levitico 10:1, 2) Antokaman so inisip nen Core, mapatnag a minoria to so inkasaserdote unong ed punto de bista na too. Angitonton itan ed impanrebeldi to ed si Moises tan Aaron tan, diad kaunoran et sumpad si Jehova.​—1 Samuel 15:23; Santiago 1:14, 15.

9, 10. Anto so akusasyon nen Core tan saray kaiba ton rebelde sumpad si Moises, tan akin ya agda komon inangat so autoridad to lapud pikabat da la?

⁹ Lapud maimpluensyan too, aliwan mairap ed biang nen Core so panangguyor ed arum a walaay awawey a singa sikato. Sikato, kaiba si Datan tan Abiram, so awalaan na 250 ya akigampi ed sikara​—ya amin da et papangulo na duypo. Sikaran amin so inmasingger ed si Moises tan Aaron tan kuanda: “Say amin a duypo masantos, balang sakey ed saray duypo, et si Jehova miulop-ulop a lanang ed sikara: Akin ta sirin et manuna ya ipangta yo so inkasikayo dia ed duypo nen Jehova?”​—Numeros 16:1-3.

¹⁰ Agda la komon inangat so autoridad nen Moises lapud pikabat da la. Agano ni labat et ontan so ginawa met la di Aaron tan Miriam. Diad tua, mipara ni ingen so panagkatunongan da ed si Core! Unong ed Numeros 12:1, 2, intepet da: “Si Moises ta labat so pisalitaan nen Jehova? Aglabat misalita kasi ed sikata?” Mandengdengel si Jehova. Ingganggan to si Moises, Aaron, tan si Miriam a mandaragup ira ed wangalan na tolda na duypo ta pian nipabitar To so pilien ton lider. Insan, diad malinew a balikas et inkuan nen Jehova: “No wala so sakey a propeta ed sikayo, siak a Jehova ipaamtak so inkasiak naani ed sikato ed sakey a payawar, misalita ak ed sikato ed sakey a kugip. Si aripen ko a Moises aliwa ya ontan: sikato so maseseg ed amin ya abung ko.” Kayari na satan, si Jehova so temporaryon angidapo na kating ed si Miriam.​—Numeros 12:4-7, 10.

11. Panon ya inarap nen Moises so situasyon a mangilalanor ed si Core?

¹¹ Satan ya agawa et seguradon amta nen Core tan saramay akigampi ed sikato. Agbalot nikatunongan so impanrebeldi ra. Anggaman ontan, si Moises so maanos ya akikatunongan ed sikara. Pinaseseg to ira a pablien da iray pribilehyo ra, a kuanto: “Isipen yo lagi a daiset [“melag a bengatla,” NW] so impangisian nen Jehova ed sikayo ed muyong na Israel, pian yasingger to kayo ed sikato lanlamang?” Andi, aliwa itan a “melag a bengatla”! Dakerakel so wala la’d saray Levita. Anto ni so anapen da? Inwalwal na kaaruman iran salita nen Moises iray panagkatunongan na kapusoan da: “Anapen yo met so inkasaserdote?” * (Numeros 12:3; 16:9, 10) Balet panon so inkiwas nen Jehova ed sayan impanrebeldi ed maridios ya autoridad?

Akibali la so Ukom na Israel

12. Anto so akadependian na tuloytuloy a maabig a pisisiglaotan na Israel ed Dios?

¹² Sanen inter nen Jehova so Ganggan ed Israel, inkuan to ed totoo a no matulok ira, sikara so magmaliw a “masanton nasyon” tan mansiansian masanto so nasyon no awaten da so uksoyan nen Jehova. (Exodo 19:5, 6) Natan ta parungtalan la ran nanrebelde, panaon la pian mibali so Ukom tan Manangiter na ganggan ed Israel! Inkuan nen Moises ed si Core: “Sika tan say amin a duypom manayam kayo naani ed arapan nen Jehova, sika tan sikara nabuas. Et alaen na balang sakey a laki so panagpoolan to  na insenso, tan inan yo ra na insenso, insan yo naani yakar ed arap nen Jehova, balang sakey wala so panagpoolan to na insenso, duanlasus tan limamplo a panagpoolan na insenso; sika met tan si Aaron balang sakey wala so panagpoolan to na insenso.”​—Numeros 16:16, 17.

13. (a) Akin ya inka-mapalakbat ed biang na saray nanrebelde so mangiyapay na insenso ed si Jehova? (b) Panon so impideneng nen Jehova ed saray nanrebelde?

¹³ Unong ed Ganggan na Dios, saray saserdote lambengat so nayarin mangiyapay na insenso. Say mismon kanonotan a mangiyapay na insenso ed arap nen Jehova so sakey a Levita ya aliwan saserdote so ninonot la komon a maong na saratan a rebelde. (Exodo 30:7; Numeros 4:16) Aliwan ontan so inisip nen Core tan saray onsusuporta ed sikato! Diad tinmumbok ya agew et “tinipon to so amin a duypo ya onsusumpa ed [si Moises tan Aaron] ed wangalan na pinto na abel ya abung-abung na duypo.” Onia so ibabaga ed sikatayo na kuritan: “Si Jehova akisalita ed kindi Moises tan Aaron, ya inkuanto, Biig kayo ed saya a duypo, pian upoten ko ra ed sankasikmat.” Balet akikasi si Moises tan si Aaron a naliktar komon so bilay na saray totoo. Inmabuloy si Jehova ed saray kerew da. Nipaakar ed si Core tan say muyong to, “et pinmaway so apoy a nanlapu ed Jehova, et inakmon to so duanlasus tan limamplo a lalaki ya angiyapay na insenso.”​—Numeros 16:19-22, 35. *

14. Akin a mapekder a kinmiwas si Jehova sumpad duypo na Israel?

¹⁴ Makapakelaw ta saray Israelita ya akaimaton ed impideneng nen Jehova ed saray rebelde so agni apera. “Sanen ontumbok a kabuasan amin a duypo na saray anak na Israel nannguronguro ra sumpa ed Moises tan Aaron, ya inkuan da, Pinate’yo so totoo nen Jehova.” Pinilaan na saray Israelita iray nankokomplot! Diad saginonor et angangga so panaanos nen Jehova. Anggapon balot​—anggan si Moises odino Aaron​—so makapangiyawa ed totoo ed saman. Pinalesa nen Jehova so salot a mamairap ed saray matunganga, “et saray inatey ed salot labin-apat a libo tan pitonlasus ira, pati ni so inaatey ed pamaakaran nen Core.”​—Numeros 16:41-49.

15. (a) Diad antoran rason a nepeg komon a mabulbulos ya awaten na saray Israelita so panangidaulo nen Moises tan Aaron? (b) Anto so ibabangat ed sikayo na sayan salaysay nipaakar ed si Jehova?

¹⁵ Agkomon atigway iraman a totoo, no inusar da so panagkatunongan da. Onia komon so intepet da ed inkasikara: ‘Sioparay akiarap ed si Faraon ya inrisga ray bilay da? Siopa so angiganggan a nepeg ya ibulos iray Israelita? Siopa labat so atawag ya ontatdang ed Palandey Horeb kayari na inkiliktar na Israel pian misalita a lupa-lupaan ed anghel na Dios?’ Maseguron say makatantandan rekord nen Moises tan Aaron so mangiter na prueba ed katooran da ed si Jehova tan panangaro ra ed totoo. (Exodo 10:28; 19:24; 24:12-15) Agnanliketan nen Jehova so impanigway to ed saray rebelde. Balet, sanen pinmatnag a tuloytuloy lay panrerebelde na totoo, sikato so mapekder lan kinmiwas. (Ezequiel 33:11) Amin na saya so importantin tuloy ed sikatayo natan. Akin?

Pamidbir ed Paralanan Natan

16. (a) Anton ebidensya so nepeg a mangombinse ed saray inmunan-siglon Judio a si Jesus so manangilaman ed si Jehova? (b) Akin a sinalatan nen Jehova so inkasaserdote na Levitas, tan anto so insalat to?

¹⁶ Natan et wala lay balon “nasyon” a si Jehova so agnanengneng ya Ukom, say Manangiter na ganggan, tan Ari ed satan. (Mateo 21:43) Satan a “nasyon” so niwala nen inmunan siglo K.P. Diad saman a panaon et say tabernakulo ed panaon nen Moises so asalatan la na alay abig a templo ed Jerusalem, a siansian onkakana iray Levita. (Lucas 1:5, 8, 9) Balet, nen taon 29 K.P., niwala so sananey a templo, say espiritual a templo, a si Jesu-Kristo so Atagey a Saserdote. (Hebreos 9:9, 11) Linmesa lamet so isyu nipaakar ed maridios ya autoridad. Siopa so usaren nen Jehova a mangidaulo ed sayan balon “nasyon”? Pinaneknekan nen Jesus a mismo so sigpot a katooran ed Dios. Inaro to so totoo. Sikato so  nanggawa met na dakel a makapakelaw iran tanda. Balet, singa ed saray anawet-tenten ya inmuunan atateng da, say karaklan ed saray Levita so ag-angawat ed si Jesus. (Mateo 26:63-68; Gawa 4:5, 6, 18; 5:17) Diad kaunoran, sinalatan nen Jehova so inkasaserdote na Levita na nikaduma, salanti, say maarin inkasaserdote. Nantultuloy itan a maarin inkasaserdote anggad sayan panaon.

17. (a) Anton grupo so tutugyopen na maarin inkasaserdote natan? (b) Panon so panguusar nen Jehova ed maarin inkasaserdote?

¹⁷ Siopa so manugyop ed sayan maarin inkasaserdote natan? Inebatan nen apostol Pedro itan a tepet diad inmunan apuyanan a sulat to. Parad saray alanaan a membro na laman nen Kristo, oniay insulat nen Pedro: “Sikayo so apili a kapolian, peteg ya inkasaserdote, masantos a nasyon, sakey a baley na Dios a dilin kayarian to, a mangibelyaw na karlangan na saman so angekal ed sikayo ed kabilungetan, ta tinawag to kayo ed makapakelaw a silew to.” (1 Pedro 2:9) Malinew ed saratan a salita a bilang grupo et saray alanaan a patumbok nen Jesus so manugyop ed “[maarin] inkasaserdote,” a tinawag met nen Pedro a “masantos a nasyon.” Tugyopen da so paralanan ya uusaren nen Jehova pian mangitarya ed totoo to na bilin tan espiritual a panangidirehi.​—Mateo 24:45-47.

18. Anto so pansiglaotan na aturon mamatatken tan say maarin inkasaserdote?

¹⁸ Say mangirerepresenta ed maarin inkasaserdote et saray aturon mamatatken, a manlilingkor ed responsablin posisyon diad saray kongregasyon na totoo nen Jehova ed interon dalin. Sarayan lalaki so makanepegan na respeto tan interon-puson suporta tayo, balanglan sikara so alanaan odino andi. Akin? Lapud, diad panamegley na masanton espiritu to, tinuro nen Jehova so mamasiken ed saray posisyon da. (Hebreos 13:7, 17) Panon a nagmaliw ya ontan?

19. Diad anton dalan ya aturo iray mamatatken panamegley na masanton espiritu?

¹⁹ Kakapeten na sarayan mamasiken iray kakaukolanen a nidatak ed Salitay Dios, a pinawala na espiritu na Dios. (1 Timoteo 3:1-7; Tito 1:5-9) Kanian say inkaturo ra so nibaga a diad panamegley na masanton espiritu. (Gawa 20:28) Saray mamasiken, odino mamatatken, so nepeg a magmaliw a sigpot a mikabisado ed Salitay Dios. Singa say Supremon Ukom ya anuro ed sikara, nepeg a gulaen na mamatatken so antokaman a pakapatnagan na panangidumaduma ed panaghusga ra.​—Deuteronomio 10:17, 18.

20. Anto so apresyaen yo nipaakar ed saray maseet a mamatatken?

²⁰ mbes a suppiaten so autoridad da, apresyaen tayon maong so maseet iran mamatatken! Lalon manmatalek itayo ed sikara lapud rekord na matoor a serbisyo ra, a mabetbet et diad loob na dakel lan dekada. Sikara so maseet a manpaparaan tan mangikokondukta na saray miting  ed kongregasyon, a benebenek a mikikimey ed sikatayo diad panangipulong na “maong ya ebanghelyo na Panarian,” tan mangitatarya na Makasulatan a bilin sano nakaukolan tayo itan. (Mateo 24:14; Hebreos 10:23, 25; 1 Pedro 5:2) Bisitaen da itayo sano mansasakit itayo tan ligliwaen da itayo sano maneermen tayo. Sikara so matoor tan andi-siblet a manusuporta ed intereses na Panarian. Walad sikara so espiritu nen Jehova; aabobonan to ira.​—Galacia 5:22, 23.

21. Saray mamatatken so nepeg a sikakabat ed anto, tan akin?

²¹ Siempre, ag-ayadyari iray mamatatken. Lapud sinononot ira ed saray limitasyon da, ag-ira papakatawan ed pulok, say ‘impatawir na Dios.’ Imbes, ipapasen day inkasikara a ‘katulongan a panliketan na agagi ra.’ (1 Pedro 5:3; 2 Corinto 1:24) Saray mapaabeba, maseet a mamatatken so mangaaro ed si Jehova, tan amta ra a no sikatoy lalon aligen da, lalon nagunggonaan so kongregasyon ed sikara. Sinononot ed satan, sikara so naynay a manbabanikel a mamayubo ed saray maridios a kalidad a singa say aro, panangabagey, tan anos.

22. Panon a napabiskeg so pananisia yo ed nanengneng ya organisasyon nen Jehova diad panrepaso ed salaysay a nipaakar ed si Core?

²² Alay liket tayo ta si Jehova so agnanengneng a Manuley tayo, si Jesu-Kristo so Atagey a Saserdote tayo, saray kabiangan na alanaan a maarin inkasaserdote so manbabangat ed sikatayo, tan saray matoor a Kristianon mamasiken so manisimbawa ed sikatayo! Anggaman anggapo so organisasyon a papakurangen na totoo a magmaliw a naspot, maliket itayo a makapanlingkor ed Dios kaiba iray matoor a kapananisiaan, a maliket a manpapasakop ed maridios ya autoridad!

[Saray paimano ed leksab]

Anto so Naaralan Yo?

• Antoray maaron intarya nen Jehova pian naasikaso iray Israelita?

• Akin ya agnikatunongan so impanrebelde nen Core ed si Moises tan Aaron?

• Anto so naaralan tayo ed paraan na impideneng nen Jehova ed saray rebelde?

• Panon tayon nipatnag so panamabli tayo ed saray uksoyan nen Jehova natan?

[Tepetepet Parad Panagaral]

[Litrato ed pahina 9]

Kasin ipapasen yon pribilehyo so antokaman ya asainmin diad serbisyo ed si Jehova?

[Litrato ed pahina 10]

“Akin ta sirin et manuna ya ipangta yo so inkasikayo dia ed duypo nen Jehova?”

[Litrato ed pahina 13]

Irerepresenta na saray aturon mamatatken so maarin inkasaserdote