Yoga​—Ehersisyo Lambengat Odino Nagkalalo Ni?

SINONONOT so totoo natan ed pakawalaan na mayapis tan mabunigas a laman. Kanian dakel so ombabaling ed saray gymnasium tan saray health club pian natulongan. Satan met so rason no akin a dakerakel a totoo diad Mamasagur a mundo so ombabaling ed panag-yoga na Mamabukig.

Saray totoon nagogonigon, walaay depresyon, tan nadidismaya so ombabaling met ed yoga pian naligliwa tan nasolbar so problema ra. Nen dekada na 1960, dekada na saray hippie tan flower children, et nagkalautlan nainteresan ed saray relihyon ed Mamabukig tan kinmayat ed interon Sagur iray misteryoson agamil da. Say transcendental meditation, a kabiangan ed yoga, so pinabantog na saray artista tan saray managtogtog na rock. Lapud ondarakel so interesado ed yoga, nayarin itepet tayo: ‘Kasin say yoga et rotina labat ya ehersisyo a makapabunigas, mamayapis ed laman tan mamareen ed nonot na mangaagamil ed satan? Kasin naagamil so yoga ya anggapoy antokaman a relihyoso iran implikasyon? Kasin matukoy so yoga parad saray Kristiano?’

Say Lapuan na Yoga

Say lapuan na salitan “yoga” et misiglaotan ed lapuan na Ingles a salitan “yoke.” Nayarin mankabaliksan itan na panulopen odino pankasakeyen odino isiglaot, pian nabanlongan odino nakontrol. Parad sakey a Hindu, say yoga et sakey a paraan odino totontonen a manresulta ed pakapikasakey ed sakey a mabiskeg nen say toon puersa odino espiritu. Satan so adeskribe bilang “say pangisiglaot ed amin a pakayari na laman, isip tan kamarerwa ed Dios.”

Panon tayon nasuysoy so kabayag la na yoga ed awaran? Saray kurti na totoon akayurong ed nanduruman posisyon na yoga so wala ed saray selyo ya aromog diad Indus Valley, ed Pakistan la natan. Say sibilisasyon na Indus Valley so pinetsaan na saray arkeologo diad kapegleyan na komatlo tan komadua iran milenyo K.K.P., asingsingger ed peryodo na panaon na kulturay Mesopotamia. Saray artifact a nanlapud saratan a lugar so mangililitrato ed sakey a laki, a mangirerepresenta ed sakey a dios, ya abalangetan na saray saklor na ayep tan apaliberay ayayep, a pakanonotan  ed si Nimrod, say “maong ya umaanop.” (Genesis 10:8, 9) Ibabaga na saray Hindu a saray totoon akayurong ed saray posisyon na yoga so estatua na dios a Siva, katawan na saray ayep tan katawan na yoga, a sikatoy mabetbet a dadayewen panamegley na lingam, simbolo na kayarian na laki. Kanian, say yoga so tinukoy na libron Hindu World bilang “sakey a kodigo na asetikon agagamil, salanti ginmapo itan sakbay na panaon na Aryan, a walaan na saray pakanodnonotan ed dakel a karaanan ya ideya odino ritual.”

Saray metodo na yoga so primeron nipasabi diad insangin paraan. Insan indetalye tan insulat iratan na makabat ya Indian a manaagamil na yoga a si Patañjali bilang say Yoga Sutra, a nansiansia itan a manunan libro a panontonan nipaakar ed yoga. Unong ed si Patañjali, say yoga et “sakey a sistematikon sagpot pian nadampot so inkanaspot, panamegley na pangontrol ed nanduruman elemento na inkatoo, pisikal tan ekstraordinaryon pannonot.” Manlapud inggapo na satan ya anggad natan, say yoga so manunaan a kabiangan na saray Mamabukig a relihyon, nagkalalo la ed Hinduismo, Jainismo, tan Budismo. Panisiaan na arum a mangaagamil na yoga a satan so pakadampotan da na moksha, odino kibulos, panamegley na piulop ed sakey ya espiritun onkakamayat.

Kanian nitepet tayo lamet: ‘Kasin naagamil so yoga bilang pisikal ya ehersisyo lambengat pian nabayuboay mabunigas a laman tan relaks a nonot, ya anggapoy pakapilanor ed relihyon?’ Nisesengeg ed lapuan na satan, nepeg a say ebat et andi.

Iner so Nayarin Pangipaarapan ed Sika na Yoga?

Say gagala na yoga bilang totontonen et pian ipaarap so sakey a too diad espiritual a pakaeksperiensya na ‘pakapisiglaot’ odino pakapiulop ed makapanyari nen say toon espiritu. Balet dinan kasin espiritu itan?

Diad Hindu World, oniay inkuan na autor a si Benjamin Walker nipaakar ed yoga: “Nayarin satan so akadkaunan sistema na mahikon ritualismo, tan agni nauman so kabaliksan na yoga a mangipapatnag na okultismo tan panagsalamangka.” Aaksobien na saray Hindun pilosopo a say agamil a yoga so makapangiter na mabiskeg nen say toon pakayari, anggaman mabetbet dan ibabaga ya aliwan satan so ultimon kalat na yoga. Alimbawa, diad libron Indian Philosophy, inkuan na datin presidente na India a si Dr. S. Radhakrishnan nipaakar ed yogi (toon mangaagamil na yoga) a “say pangontrol ed laman panamegley na saray postura so manreresulta ed agpakalikna na pirmin petang odino betel. . . . Say yogin so makanengneng tan makadngel anggan walad arawi . . . Posibli a nipasabi so kanonotan na sakey a too ed sananey anggan agmangusar na normal a mekanismo ed pitatalosan. . . . Nayarian na yogi a paandipaten so laman to.”

Say pakanengneng ed sakey a yogi ya onuugip ed dukolan a walaray akaturon pasak odino manaakar ed ngalab so ompatnag a makapalikdo tan bengatlan makapalek parad arum. Balet saraya so kaslakan a nagagawa diad India, a singa say iyalagey panamegley na sakey a sali legan ya akatangay a direkta ed agew diad loob na pigaran oras tan say pangontrol ed panaglinawa pian mabayag a makapaot so toon itabon ed buer. Nen Hunyo 1995, inreport na The Times of India a walay sakey a biin mantaon na talora tan kapaldua ya akarukol ya andiay liknaan insan impaparalisan so eges to ed kotsin manbelat na masulok a 750 kilo. Mankelkelaw iray totoo lapud sikatoy agbalot asakitan sanen abangon. Inyarum ni na report: “Sakey itan a puron pakapanyari na yogi.”

Seguradon anggapoy normal a toon makagawa na anggan dinan ed saratan. Kanian, nepeg ya itepet na sakey a Kristiano: Anto kasi so ipapatnag na sarayan makapakelkelaw ya agawaan? Kasin manlalapu iratan ed si Jehova a Dios, “say Sankatageyan ed interon dalin,” odino kasin manlalapu iratan ed sananey? (Salmo 83:18, NW) Malinew so ibabagay Biblia nipaakar ed sayan punto. Sanen magano lan onloob iray Israelita ed Insipan a Dalin, a panaayaman na saray Canaanita, oniay inkuan nen Jehova ed ananak na Israel panamegley nen Moises: ‘Agyo nepeg ya aralen a gawaen iray makapadimlan bengatla na saraman a nasyon.’ Anto iray ‘makapadimlan bengatla’? Amasakbay si Moises sumpad “sakey a manaagamil na panagparles, sakey  a managsuma, odino sakey a managsalamangka, odino manag-anito.” (Deuteronomio 18:9, 10) Sarayan bengatla so makapadimla ed Dios lapud gawagawa iratan na saray demonyo tan say makabos a laman.​—Galacia 5:19-21.

Aliwan Parad Saray Kristiano

Antokaman ya agpipaknaan na saray instruktor ed bunigas, say yoga so aliwan pisikal ya ehersisyo lambengat. Insalaysay na libron Hindu Manners, Customs and Ceremonies iray eksperiensya na duaran kagapogapo ra ed yoga ya iwawanwan na sakey a guru (managbangat). Sakey so inaon a mangibabagan: “Ginawak so labas nen say too iran sagpot ya ag-onlinawa anggad posibli, tan onlinawa ak lambengat sano naupotan ak lay linawa. . . . Sakey ya agew, a kagkaagwan, abaloan ko et akanengneng ak na managaag a bulan, a singano onaalis-alis tan ombabalyog. Aminsan met et inisip kon siak so sinakloban na makapal a bilunget diad kaagwan. Say mangididirehi ed siak . . . so manliket a maong sanen sinalambit ko irayan pasingawey ed sikato. . . . Pinaseguroan to ak ya agmanbayag et naeksperiensyak la so dakel nin makapasurprisa a resulta na inkasimoon ko.” Oniay insalaysay na komaduan laki: “Inobliga to ak ya ontangay ed tawen ya inagew-agew ya agko ikirem so matak odino umanen so posisyon ko. . . . Aminsan et abaloan kon akanengneng ak na saray kidyam na apoy diad tagey; no maminsan et singa ak makakanengneng na saray tibukel ya apoy tan arum nin meteor. Manliket a maong so manbabangat ed siak lapud matalona iray sagpot ko.”

Mapatnag a saray ekstraordinaryon nanenengneng et saratan imay ipapasen na guru a manepeg iran resulta a mamapatua ed gagala na saray ehersisyon yoga. On, say ultimon kalat na yoga et say moksha, ya impaliwawa bilang pakapiulop ed aliwan personan mabiskeg ya espiritu. Deneskribe itan bilang “say (ginagalan) pamatunda ed kasiporan lan abilidad a mannonot.” Mabitar a sumlang iya ed say kalat a nidatak parad saray Kristiano, a sikaray binilin ya: “Ipatnag yo so saray laman yo a mabilay a bagat, masantos, makapaliket ed Dios, ta sikato so maespiritu a lingkor yo. Tan agkayo miaabobon unong ed sayan mundo: noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.”​—Roma 12:1, 2.

Makauley so sakey no dinan a pisikal ya ehersisyo so pilien ton gegemtanen. Balet, nepeg ya ag-abuloyan na saray Kristiano so antokaman​—balanglan pisikal a panag-ehersisyo, panangan, panag-inum, panangawes, panliliket, odino arum nin bengatla​—a maneral ed pisisiglaotan da ed si Jehova a Dios. (1 Corinto 10:31) Parad saramay man-eehersisyo nisengeg lambengat ed bunigas da, walay dakel a paraan ya agmangilalanor ed kidunget ed saray kapeligroan na espiritismo tan okultismo. Diad ipaliis ed agagamil tan sisisiaen a nilamut ed palson relihyon, makapanilalo itayo ed bendisyon na Dios a matunong a balon sistema na bengabengatla a ditan et napanggayagaan tayo so ayadyarin bunigas ed laman tan isip diad ando lan ando.​—2 Pedro 3:13; Apocalipsis 21:3, 4.

[Saray litrato ed pahina 22]

Dakel so manggagayaga ed mabunigas iran aktibidad ya agmangilalanor ed kidunget ed espiritismo