Aliketan Ira Lapud Naaralan Day Manbasa!

DIAD arum a lugar ed Solomon Islands, anggad 80 porsiento ed saramay Tastasi nen Jehova la natan so walaan na problema lapud sikaray agmakabasa. Aglabat lilimitaan na saya so pakapibiang da ed sinimba iran miting ed kongregasyon noagta mairap met parad sikara so pangibangat ed arum na saray katuaan nipaakar ed Panarian. Posibli ni kasi parad saray wala la’d edad ya agnin balot akabemben na lapis so makaaral a manbasa?

Say brosyur ya Apply Yourself to Reading and Writing, ya impalapag na saray Tastasi nen Jehova, so nauusar ed saray klase parad panagbasa diad amin lawarin kongregasyon na saray Tastasi nen Jehova ed interon Solomon Islands. Iyiilustra na saray onggendan ya eksperiensya no panon ya atulongan so dakerakel pian napaaligwas so intiramintin abilidad da panamegley na sayan programa. Nagkalalon importante, say impakaaral dan manbasa so akatulong ed sikara pian epektibon makapantasi nipaakar ed pananisia ra.​—1 Pedro 3:15.

Naimano na misionaryo a nibaki ed sakey a kongregasyon a walaay masulok a sanlasus a manangipalapag na Panarian a diad sinimban panagaral da na Biblia ya uusaren so Say Panag-Bantayan et daiset so walaay dilin kopya na magasin tan pigpigara so mankokomento. Say rason? Ag-ira akaaral a manbasa. Sanen inyanunsyo na kongregasyon so kaporma na sakey ya eskuelaan pian ibangat so panagbasa tan panagsulat, maliket a namboluntaryo so misionaryo a manbangat. Diad primero et pigpigara labat ya estudyante so linma, balet ag-abayag et masulok a 40 a totoo ed nanduruman edad so inmatendi.

Antoray resulta? Oniay insalaysay na misionaryo: “Ag-abayag kayarin ginmapo so klase, siak so linma ed tindaan diad ala-sais ed kabuasan pian manaliw na taganon parad misionaryon ayaman. Anengneng ko’d man so arum ya estudyante, pati saray ugugaw ni, a manlalako na saray niyog tan pisipising. Akin? Lapud labay day nawalaan na magenap a kuarta pian isaliw na lapis tan kuaderno  ya usaren da diad klase! Ontan met, nasasagyat iran onatendi ed satan a klase lapud labay day nawalaan na personal a kopya na magasin a Panag-Bantayan.” Inyarum to: “Natan legan na Panagaral na kongregasyon ed Panag-Bantayan, mibibiang so parehon ugugaw tan matakken, tan mabilabilay so diskusyon mi.” Sayan misionaryo so nagkalautlan malikeliket sanen tinmepet so apatiran membro ed klase no kasin nayarian da lay mibiang ed panagpulong a kimey diad publiko lapud, unong ya inkuan da, sikaray “agla natatakot.”

Say makagunggona iran epekto na saray klase ed saray estudyante so ninmatnat ed mas ni nen say impakaaral dan manbasa tan mansulat. Singa bilang, pigay taon lan kapapagaan diad kongregasyon so agmananisian asawan bii na sakey a Tasi. Saray totoo so tutupaken to na saray bato anggan napasyodot labat na daiset tan pepekpeken to ni ingen na tabla iray arum a bibii. Sano sikatoy onatendin sagpaminsan ed Makristiano iran pantitipon a kaibay asawa to, sikatoy alabas a maimon ed masiken to kanian mansulong na parad-agew ya antipara so masiken to pian agto naakusaan ya onlilimgis ed arum a bibii.

Balet, nen kagapogapo ni na saray klase, sayan bii so mareen a tinmepet: “Nayarian ko tay mibiang ed klase?” Say ebat et on. Manlapu la’d saman et agto sinaew a balot so klase odino say miting ed kongregasyon. Sikatoy nanaral a maong ed saray leksion to ed panagbasa tan makapakelkelaw ya inmaligwas, a satan so pirmin amaliket ed sikato. Say tinmumbok a kerew to et: “Nayarin iyaralan yo ak na Biblia?” Say masiken to so malikeliket ya angiyaral ed sikato, tan nantultuloy ya inmaligwas ed abilidad ton manbasa tan mansulat tan ed pikakabat to ed Biblia.

Parad sakey a 50-años ya agnin balot akaegnay lapis et singa la palandey a babeng so pamemben na lapis tan pangisulat ed saray letra na alpabeto. Linmanok so gamegamet na arum lapud pirmin pangitetelmer da ed lapis tan papel sanen aganggano ni ran manaaral. Kalabas na pigaran simban irap ed panamemben tan panangontrol na lapis, arum ya estudyante so makakaimis a mangibabaga: “Aliwa lan matelmer so limak ed papel!” Say pakaimano ed iyaaligwas na saray estudyante so makapaliket met ed saray managbangat. Oniay inkuan na sakey a managbangat: “Talagan makapaliket so pambangat ed klase, tan mabetbet ya ibabalikas na saray estudyante so puron apresasyon da ed sayan probisyon nen Jehova panamegley na saray tipak kasumpal na klase.”

Sarayan Tastasi a marunong la natan a manbasa tan mansulat, pati saray misionaryo, so malikeliket. Akin? Lapud nausar da la natan so abilidad dan manbasa tan mansulat pian igalang si Jehova.

[Saray litrato ed pahina 8, 9]

Aapresyaen na kalangweran tan mamatakken iray klase parad panagbasa tan panagsulat