‘Inikdan ta Kayo na Pangaligan’
‘Inikdan ta Kayo na Pangaligan’
“Nepeg yo la komon so managbangat, lapu ed inkabayag la na panaon.”—HEBREOS 5:12.
1. Akin a saray salita ed Hebreos 5:12 so nayarin sipor lan pampapagaan na sakey a Kristiano?
LEGAN mon babasaen so apuyanan iran salita ed teksto tayo, kasin nisisiglaot mo itan ed inkasika? No ontan, agmo bukbukor. Bilang papatumbok nen Kristo, amta tayo a nepeg itayon magmaliw a managbangat. (Mateo 28:19, 20) Amta tayon manbibilay itayo la ed saray panaon a kakkaukolan so marunong a pambangat anggad nayarian tayo. Tan amta tayon say panagbangat tayo so balanglan mankabaliksay bilay odino patey parad saramay ibabangat tayo! (1 Timoteo 4:16) Makatunongan sirin ya itepet tayo ed inkasikatayo: ‘Peteg kasin nagagawaan koy kanepegan bilang managbangat? Panon ak ya onaligwas?’
2, 3. (a) Panon ya impaliwawa na sakey a managbangat so pundasyon parad maong a panagbangat? (b) Anton pangaligan so impatnag nen Jesus ed sikatayo nipaakar ed panagbangat?
2 Say ontan iran panagpaga so agnepeg a manismaya ed sikatayo. No moriaen tayo lambengat so panagbangat bilang pigaran inaral a metodo, nayarin liknaen tayo a mair-irap so onaligwas. Balet, say pundasyon na maong a panagbangat et aliwan say metodo noagta wala ni mas importante. Imanoen so insulat na sakey ya eksperiensyadon managbangat ed sakey a libro nipaakar ed satan a tema: “Say maong a panagbangat so ag-akadepende ed saray espesipikon metodo odino estilo, plano odino kiwakiwas. . . . Say panagbangat so manunan akadepende ed aro.” Siempre, say nonoten to et say pagmaliw a sekular a managbangat. Anggaman ontan et nayarin mas onaplika so punto to ed panagbangat a gagawaen tayo bilang Kristiano. Panon ya ontan?
3 Say Ehemplo tayo bilang sakey a managbangat et si Jesu-Kristo, ya oniay inkuan to ed saray patumbok to: ‘Inikdan takayo na pangaligan.’ (Juan 13:15) Tutukoyen to so alimbawa to diad panangipanengneng na kaumildian, balet say pangaligan ya impanengneng nen Jesus ed sikatayo so maseguron mangilaktip ed manunan kimey to diad dalin bilang sakey a too, salanti, say pangibangat ed totoo na maong a balita na Panarian na Dios. (Lucas 4:43) Nipaakar ed satan, no manpili kayo na sakey a salita a maneskribe ed ministeryo nen Jesus, maseguron pilien yo so salitan “aro,” agta ontan? (Colosas 1:15; 1 Juan 4:8) Sankamanunaan so panangaro nen Jesus ed mangatatawen ya Ama to, si Jehova. (Juan 14:31) Balet, bilang managbangat et impatnag nen Jesus so aro ed duaran kaaruman a paraan. Inaro toray katuaan a binangatan to, tan inaro to so totoo ya imbangat to. Iyapasakey tayo pan nagkalalo ed sarayan duaran aspekto na pangaligan ya impanengneng to ed sikatayo.
Say Magnayon a Panangaro ed Saray Madibinon Katuaan
4. Panon a binayuboan nen Jesus so panangaro ed saray bangat nen Jehova?
4 Say awawey na managbangat ed babangatan to so walaan na pirmin epekto ed kalidad na panagbangat to. No wala man so kakulangan na interes et maseguron satan so napatnagan tan mangimpluensya ed saray babangatan to. Anggapo so pananginenen ya alikna nen Jesus ed saray ankablin katuaan ya imbangat to nipaakar ed si Jehova tan ed Panarian To. Aralem so panangaro nen Jesus ed satan a tema. Binayuboan to itan ya aro bilang sakey a binangatan. Diad andukey a panaon na impanbilay to la sakbay a nagmaliw a too, say bogbogtong ya Anak so maseet a nanaral. Inkurit na Isaias 50:4, 5 irayan matukoy a salita: “Si Katawan a Jehova initer to ed siak so dila na saray abangatan, pian naamtaan ko komon no panon so panamabiskeg ed saray naksawan ed panamegley na saray salita: sikato onliing a kinabuasan, sikato liingen to so layag ko a pandengel a singa pandengel na saray abangatan. Si Katawan a Jehova nilukasan to so layag ko, et agak masunggay, tan agak met binmeneg.”
5, 6. (a) Anto so mapatnag a naeksperiensya nen Jesus sanen sikatoy abautismoan, tan tekep na anton epekto? (b) Anto so pandumaan nen Jesus tan si Satanas no nipaakar ed panangusar ed Salitay Dios?
5 Legan ya ombabaleg bilang too diad dalin, intultuloy nen Jesus a pinabli so madibinon kakabatan. (Lucas 2:52) Insan, diad panaon na inkabautismoan to, sikato so awalaan na nikadkaduman eksperiensya. ‘Say tawen so nilukas,’ so inkuan na Lucas 3:21. Mapatnag, anonotan ed saman nen Jesus so kiwawala to sakbay a nagmaliw a too. Kanian sikato so nanayunal ed loob na 40 ya agew diad kalawakan. Nanliketan ton maong so panagdalepdep ed dakel iran panaon na impangibangat nen Jehova ed sikato diad tawen. Balet, agnambayag et asubok so panangaro to ed saray katuaan na Dios.
6 Sanen abanalan tan narasan lay Jesus, sikato so nanggunaetan nen Satanas a tuksoen. Agayla so pandumaan na sayan duaran anak na Dios! Pareho ira ya angaon ed Hebreon Kasulatan—balet ta mandumaan a tuloy so awawey da. Pinikewet nen Satanas so Salitay Dios, ya agmarespeton angusar ed satan parad dili ton gegemtan. On, satan a rebelde so walaan na pambusol ed saray madibinon katuaan. Diad biek a dapag, angaon si Jesus ed Kasulatan tekep na mapatnag a panangaro, a maalwar ton inusar so Salitay Dios ed kada ebat to. Abayag lan niwala si Jesus sakbay a nisulat iratan ya apuyanan a salita, ingen ta saratan so nirespeto to. Saratan so ankablin katuaan a nanlapud mangatatawen ya Ama to! Inkuanto ed si Satanas a mas importante niray salita nen Jehova nen say tagano. (Mateo 4:1-11) On, pinabli nen Jesus so amin a katuaan ya imbangat ed sikato nen Jehova. Balet, panon ton impatnag itan a panangaro bilang managbangat?
Panangaro ed Saray Katuaan ya Imbangat To
7. Akin a pinaliisan nen Jesus so panggawa na saray bangat ton bukor?
7 Lawas pinmatnag so aro nen Jesus ed saray katuaan ya imbangat to. Anggaman ontan, sikato so nayarin mainomay a makatibukel na saray ideya ton dili lapud sikato so walaan na pirmin pikakabat tan kakabatan. (Colosas 2:3) Balet, aminpigan pinanonotan to iray onderengel ed sikato ya amin a bengatlan imbangat to so nanlapud mangatatawen ya Ama to, aliwan ed inkasikaton dili. (Juan 7:16; 8:28; 12:49; 14:10) Pinabli ton maong iray madibinon katuaan kanian agto iratan sinalatan na dilin kaisipan to.
8. Diad gapo na ministeryo to, panon ya impatnag nen Jesus so pangaligan nipaakar ed panagdepende ed Salitay Dios?
8 Sanen inggapo nen Jesus so mapublikon ministeryo to, sikato so tampol ya angipatnag na pangaligan. Konsideraen pa so paraan na primeron impangiyabawag to ed totoo na Dios a sikato so insipan a Mesias. Kasin sikatoy pinmatnag labat ed arap na dakel a totoo, ya inyabawag ton sikato so Kristo, insan nanggawa na makapakelaw iran milagro pian paneknekan so ibabaga to? Andi. Sikato so linma ed sinagoga, a ditan so akaugalian lan pambabasaan na totoo na Dios manlapud Kasulatan. Ditan et binasa ton maksil so propesiya ed Isaias 61:1, 2 tan impaliwawa to a saratan a mapropetikon katuaan so inmaplika ed sikato. (Lucas 4:16-22) Akatulong so dakel iran milagro to a mamaneknek a sikatoy susuportaan nen Jehova. Anggaman ontan, sikato so lawas nanmatalek ed Salitay Dios diad impanbangat to.
9. Diad impideneng to ed saray Fariseo, panon ya impanengneng nen Jesus so matoor ya aro to ed Salitay Dios?
9 Sanen si Jesus so inangatan na saray relihyoson sumusumpa, agto ira pinalumbasan ed pikakabat anggaman sarasarag to ira ed satan a pulpiyaan. Imbes, inabuloyan to so Salitay Dios a manuppiat ed sikara. Singa bilang, nodnonoten pa so akusasyon na saray Fariseo a sinumlang na saray patumbok nen Jesus so ganggan ed Sabaton diad impanggetel da na saray dawa diad uma tan kinan da iratan legan na idadalan da. Oniay ebat nen Jesus: “Agyo ta abasa so ginawa nen David, nen sikatoy nadnarasan tan saray ibiba to.” (Mateo 12:1-5) Siempre, nayarin abasa la na saratan a mantunongtunongan a totoo so apuyanan a salaysay a nikurit ed 1 Samuel 21:1-6. No ontan, agda atebek so importantin leksion a lugan na satan. Anggaman ontan, aglabat binasa nen Jesus so salaysay. Inisip ton maong itan tan impapuso to so mensahe na satan. Pinabli to iray prinsipyo ya imbangat nen Jehova panamegley na satan a teksto. Kanian inusar to itan a salaysay, ontan met ed sakey ya alimbawa ed Mosaikon Ganggan, pian iparungtal so inkamakatunongan na Ganggan. Mipadpara, say matoor ya aro nen Jesus so amakiwas ed sikato a mangidepensa ed Salitay Dios sumpad saray sagpot na relihyoso iran lider ya amikewet ed satan nisesengeg ed dilin gagala ra odino ed impangiyamot da ed satan diad lunek na saray tradisyon na too.
10. Panon a sinumpal nen Jesus iray propesiya nipaakar ed kalidad na panagbangat to?
10 Say panangaro nen Jesus ed katuaan ya imbangat to so agbalot angiyabuloy a sikatoy manbangat labat ed apasakey a paraan, a makapaalipanes odino makapasawa. Sinaglawi na saray apuyanan a propesiya a say Mesias so mansalita tekep na ‘grasya ed saray bibil to,’ a mangusar na saray “marakep a balikas.” (Salmo 45:2; Genesis 49:21) Saratan a propesiya so sinumpal nen Jesus, ya impansiansia ton makapainteres tan mabitar so mensahe to, tan angusar na “saray salita a magrasya” legan ton ibabangat iray katuaan a pinabpabli to. (Lucas 4:22) Anggapoy duaruwa a napatnagan so inkaligsa ed lupa to, tan masnag iray mata to tekep na mabilay ya interes ed katuaan ya ibabangat to. Agaylan makapaliket so italineng ed sikato, tan agaylan abig a pangaligan so tumboken tayo sano mitongtong itayo ed arum nipaakar ed naaralan tayo!
11. Akin a saray abilidad nen Jesus bilang managbangat so agbalot anagyat ed sikato a manpasirayew?
11 Kasin nagmaliw a mapasirayew si Jesus lapud malaklaknab a pakatalos to ed saray madibinon katuaan tan say makatangguyor a pananalita to? Ontan so mabetbet a nagagawa ed biang na saray toon managbangat. Balet, tandaan a si Jesus so makabat ed maridios a paraan. Say ontan a kakabatan so agmangiyabuloy ed inkamapaatagey, lapud diad “saray mapaabeba wala so kakabatan.” (Uliran 11:2) Wala ni so bengatlan amasiansia ed si Jesus ya agmanpasirayew odino manpaatagey.
Inaro nen Jesus so Totoo ya Imbangat To
12. Panon ya impanengneng nen Jesus ya agto labay ya ompayakot ed sikato iray patumbok to?
12 Say aralem a panangaro nen Jesus ed totoo so lawas napatnagan diad panagbangat to. Say panagbangat to so agbalot amagyaw ed totoo, aliwan singa ed saray mapaatagey a totoo. (Eclesiastes 8:9) Sanen naimatonan to so sakey ed saray milagro nen Jesus, si Pedro so mankelkelaw a maong, tan sikatoy tinmalimukor ed si Jesus. Balet aglabay nen Jesus a natatakot ed sikato iray patumbok to. Oniay mapangasi ton inkuan, “Agka antakot” insan imbaga to ed si Pedro so pibiangan ton makapaliket a kimey na panaggaway-babangatan. (Lucas 5:8-10) Labay nen Jesus a napakiwas iray babangatan to lapud panangaro ra ed saray ankablin katuaan nipaakar ed Dios, aliwan lapud takot da ed mangibabangat ed sikara.
13, 14. Diad antoran dalan ya impatnag nen Jesus so empatya ed totoo?
13 Say panangaro nen Jesus ed totoo ya imbangat to so napatnagan met ed empatya to ed sikara. “Sanen anengneng toray dakerakel a totoo, inabagey to ra, lapud maermen tan abuybuyak ira, a singa saray karnero ya anggapoy pastol da.” (Mateo 9:36) Sikato so akilikna ed sikara lapud pakaskasin kipapasen da tan sikatoy apakiwas ya ontulong ed sikara.
14 Imanoen so empatya nen Jesus ed sananey nin inkagawa. Sanen inmasingger ed sikato diad leet na dakel a totoo so sakey a biin manpaparala tan diniwit toy saloy na kawes to, say bii so mamilagron atambal. Alikna nen Jesus a pinmaway ed sikato so pakayari, balet agto naimano no siopa so atambal. Pinilit ton inanap so bii. Akin? Aliwan pian pantamian ed impakasumlang toy Ganggan odino ed saray totontonen na eskribas tan Fariseos, unong a nayarin tatakotan na bii. Imbes, inkuan nen Jesus ed sikato: “Anak, say pananisiam pinaabig to ka, onla ka’d kareenan, et onabig ka ed sakit mo.” (Marcos 5:25-34) Imanoen so empatya ed saratan a salita. Agto lambengat inkuan a, “Natambal ka.” Imbes, inkuanto: “Onabig ka ed [graben] sakit mo.” Inusar dia nen Marcos so salita a literal a mankabaliksan na “panagsiplat,” sakey a nengneng na panaglewet a mabetbet ya uusaren ed panamairap. Kanian, binidbir nen Jesus a say sakit na bii so paniirapan to, a nayarin pirmin ot-ot ed pisikal tan emosyon. Sikato so akilikna ed sikato.
15, 16. Antoran inkagawa ed ministeryo nen Jesus so mangipanengneng ya inimano to so maong iran kalidad na totoo?
15 Impanengneng met nen Jesus so aro ed totoo diad innengneng to ed saray maong a kalidad da. Konsideraen pa so agawa sanen nabet to si Natanael, a nagmaliw ya apostol ed saginonor. “Si Jesus anengneng to si Natanael ya oonla ed sikato et kuanto nipaakar ed sikato, Nia, so sakey a peteg ya Israelita, a dia ed sikato anggapo so panamalingo.” Diad mamilagron paraan, naimano nen Jesus so akindalem iran kalidad nen Natanael, kanian dakel so naamtaan to nipaakar ed sikato. Siempre, aliwan ayadyari si Natanael. Sikato so walaan na saray kalilingoan, a singa sikatayon amin. Diad tua, sanen nadngel to so nipaakar ed si Jesus, sikato so prangkan angikuan: “Nayari ta’d antokaman a maong so ompaway ed Nazaret?” (Juan 1:45-51) Balet, diad amin a nayarin nibaga nipaakar ed si Natanael, inimano nen Jesus so positibon bengatla, say inkamatua nen Natanael.
16 Mipadpara, sanen say sakey ya opisyal na armada—a nayarin Gentil, sakey a Romano—so inmasingger tan papatambal to ed si Jesus so mansasakit ya aripen to, amta nen Jesus a say sundalo so walaan na saray kalilingoan. Say sakey ya opisyal na armada ed saraman ya agew so maseguron walaan na datin estilo na kabibilay a napnoy gawa na karawalan, panamaagus na dala, tan palson panagdayew. Ingen, ninengneng nen Jesus so bengatlan maong—say matalonggaring a pananisia na too. (Mateo 8:5-13) Saginonor, sanen akisalita si Jesus ed managgaway-mauges ya akabitin ed abay ton panamairapan a kiew, agbinaat nen Jesus so too lapud agawa ton krimen ed apalabas balet sikatoy pinaseseg to tekep na ilalo ed arapen. (Lucas 23:43) Amtan maong nen Jesus a say pakawalaan na negatibo, maukom a panmoria ed arum so manismaya labat ed sikara. Agpanduaruwaan a saray sagpot ton mananap na maong ed arum so amaseseg ed dakel a manguman.
Inkamabulos a Manserbi ed Totoo
17, 18. Diad impangawat to ed asainmin to ya onla diad dalin, panon ya impanengneng nen Jesus so inkamabulos a manserbi ed arum?
17 Sakey nin mabiskeg a pakapatnagan na panangaro nen Jesus ed totoon imbangat to et say inkamabulos ton manserbi ed sikara. Diad bilay to sakbay a nagmaliw a too, lawas panliliketan na Anak na Dios so totoo. (Uliran 8:30, 31) Bilang “Salita,” odino pinagkasangiyan nen Jehova, nanggayagaan to so dakel ya impideneng ed totoo. (Juan 1:1, NW) Balet, kabiangan ed inyakar to ed dalin et say lalon direktan pangibangat ed katooan, a “nilukpos to so inkasikato, ya inala to so ereng na sakey ya aripen,” a tinaynan to so atagey a posisyon to ed tawen. (Filipos 2:7; 2 Corinto 8:9) Legan a wadiad dalin, si Jesus so ag-impaserbian. Kasunian, oniay inkuanto: “Say Anak na too ya agdia linma a panlingkoran, noag say manlingkor, tan iter toy bilay to a panondon ed amayamay.” (Mateo 20:28) Si Jesus so nagnap ya anumpal ed saratan a salita.
18 Mapaabeban nanserbi si Jesus parad saray pankaukolan na saramay imbangat to, a mabulos ton impausar so inkasikato nisesengeg ed sikara. Binaroy to so Insipan a Dalin, ya inakar to so nilasus kilometro diad pampupulong to tekep na sagpot a sabien so dakel nin totoo anggad posibli. Aliwan singa saray mapaatagey a Fariseo tan eskriba, sikato so nansiansian mapaabeba tan mainomay ya asinggeran. Amin a nengneng na totoo—saray dederlengen, sundalo, abogado, bibii, ugugaw, mairap-bilay, mansasakit, anggan saramay impulisay na sosyedad—so magunaet tan agnatatakot ya inmasingger ed sikato. Anggaman ayadyari, si Jesus so too, a nayarin nakesawan tan naerasan. Balet, anggan sanen sikato so naksawan odino mankaukolan na painawa odino mareen a pankanawnawa pian makapanpikasi, inyuna to iray pankaukolan na arum nen say sikaton dili.—Marcos 1:35-39.
19. Panon ya impanengneng nen Jesus so pangaligan diad mapaabeba, maanos, tan mapangasin pidedeneng ed saray babangatan to?
19 Si Jesus so mabulos met a nanserbi ed saray mismon babangatan to. Ginawa to itan diad mapangasi tan maanos ya impangibangat to ed sikara. Sanen agda tampol atalosan so pigaran makanan leksion, agto sinmuko, sinmanok, odino nantami ed sikara. Intultuloy ton inanap iray balon paraan pian natulongan to ira a makatalos ed labay ton ibaga. Alimbawa, isipen pa labat no kaunongan kabetbet a nankokolkolan na saray babangatan to no siopa so sankatalonggaringan ed sikara. Anggad diad samay labin sakbay na pamatey ed sikato, aminpigapigan nananap si Jesus na balo iran paraan pian nibangat ira a mideneng ed balang sakey diad mapaabeban paraan. Nipaakar ed kaumildian, a singa ed arum niran bengatla, suston nibaga nen Jesus: “Inikdan ta kayo na sakey a pangaligan.”—Juan 13:5-15; Mateo 20:25; Marcos 9:34-37.
20. Anton metodo ed panagbangat so impanengneng nen Jesus a miduma ed saray Fariseo, tan akin ya epektibo itan a metodo?
20 Imanoen ya aglambengat imbaga nen Jesus ed saray babangatan no anto itan a pangaligan; ‘inter to so pangaligan.’ Imbangat to ira panamegley na alimbawa. Agto nansalita ed sikara tekep na panmelmelag, a singano sikatoy importantin tuloy pian gawaen iray bengatlan papagawa to ed sikara. Ontan so paraan na saray Fariseo. “Ibaga ra, et agda gawaen,” so inkuan nen Jesus ed sikara. (Mateo 23:3) Mapaabeban impaliwawa nen Jesus ed saray ibabangat to no anto so eksakton kabaliksan na saray bangat to diad pangiyaplika ra ed saratan. Kanian sanen pinaseseg to iray patumbok to a manbilay ed simplin paraan a bulos manlapud materyalismo, agda la kaukolan a palbengan no anto so labay ton ibaga. Natebek da so inkapeteg na saray salita to: “Saray kuyangen walay balaong da, tan saray manok ed tawen walaan iray ubong; balet say Anak na too anggapoy pangisaralan to na ulo to.” (Mateo 8:20) Nanserbian nen Jesus iray babangatan to diad mapaabeban impangipanengneng to na pangaligan da.
21. Anto so konsideraen ed ontumbok ya artikulo?
21 Malinew, si Jesus so sankamaongan a Managbangat a nambilay ed kapiganman! Say panangaro to ed walan imbangat to tan ed saray totoon imbangat to so napatnagan na amin a matuan-impanpuso ya akaimano tan akadngel ed sikato. Mapatnag met itan ed saramay walad limog tayo natan a manaaral ed pangaligan ya impanengneng to. Balet, panon tayon natumbok so naspot ya alimbawa nen Kristo? Satan a tepet so singbaten ed ontumbok ya artikulo.
Panon Yon Ebatan?
• Anto so pundasyon parad maong a panagbangat, unong ya impatnag na siopa?
• Diad antoran paraan ya impatnag nen Jesus so aro ed saray katuaan ya imbangat to?
• Panon ya impanengneng nen Jesus so aro ed totoo ya imbangat to?
• Antoran alimbawa so mangipanengneng ed mapaabeban inkamabulos nen Jesus a manserbi ed saramay imbangat to?
[Tepetepet Parad Panagaral]
[Litrato ed pahina 12]
Panon ya impatnag nen Jesus a pinabli toray prinsipyon naromog ed Salitay Dios?