Siopay Nepeg Mon Panmatooran?

“Say bansa tayo: . . . Komon ta satan so naynay a duga; balet siansian satan so bansa tayo, duga man itan odino aliwa.”​—Stephen Decatur, opisyal na navy ed E.U., 1779-1820.

SAY agnasuppiat a katooran ed bansa na sakey so ipapasen na dakel bilang sankamanunaan ya obligasyon da. Arum so manguuman ed saray balikas nen Stephen Decatur, ‘Say relihyon ko, komon ta satan so naynay a duga; balet siansian satan so relihyon ko, duga man itan odino aliwa.’

Petepeteg, say bansa odino relihyon a mankakaukolan na katooran tayo so mabetbet a nadetermina diad pasen a nianakan tayo, balet say pandesisyon nipaakar ed no siopay nepeg a panmatooran tayo so importantin tuloy ya iyalagar ed ag-ilaloan a nagawa. Anggaman ontan, say panuppiat ed panmamatoor na sakey ed abangonan to so mankaukolan na inkakpel tan mamawala na saray angat.

Sakey a Subok ed Saray Katooran

Oniay inkuan na sakey a biin binmaleg ed Zambia: “Siak so relihyoso nanlapu la’d inkaugaw ko. Kabiangan ed saray nipabangon ed siak so inagew-agew a panagdasal diad kuarton kawalaay altar mi, panagselebra ed saray relihyoson  agew, tan maparanay ya iyaatendi diad templo. Say relihyon tan panagdayew ko so maapit a nisiglaot ed kultura, komunidad, tan pamilyak.”

Ingen, sanen ngalngali la man-20 años, sikatoy impaiyaralan na Biblia ed saray Tastasi nen Jehova tan kayarin tuloy na satan et denesidi ton umanen so relihyon to. Kasin sakey iyan kiwas na ag-inkamatoor?

Si Zlatko so binmaleg ed Bosnia, tan diad pigaran panaon et sikatoy akibiang ed pambabakal a tinmalona ed dilin bansa to. Sikatoy impaiyaralan met na Biblia ed saray Tastasi nen Jehova. Natan et sikatoy agla mamebemben na armas pian milaban ed siopaman. Kasin sikatoy aliwa lan matoor?

Say pangebat yo ed saratan a tepet so mandependi ed punto de bista yo. Oniay inkuan na say biin asalambit ed akadkauna: “Diad lugar mi, say pansalat na sakey ed relihyon to et sakey ya agnaperdonan kababaingan; ipapasen itan bilang gawa na ag-inkamatoor, panangitapat ed pamilya tan komunidad na sakey.” Ontan met, moriaen na saray datin kaulop nen Zlatko a sundalo a traidor so siopaman ya agmilaban diad dapag da. Balet panisiaan na saman a bii tan si Zlatko a say atagtagey a nengneng na katooran​—katooran ed Dios​—so mamapakiwas ed sikara. Sankaimportantian, panon a momoriaen na Dios iraman so malabay a manmatoor ed sikato?

Tuan Katooran​—Sakey a Panangipatnag na Aro

Oniay inkuan nen Arin David ed si Jehova a Dios: “Dia ed sakey a matoor et onkiwas ka ed katooran.” (2 Samuel 22:26, NW) Say Hebreon salitan nipatalos dia a “katooran” so mangipapatnag ed ideya na kaabigan a maaron isisiglaot toy inkasikato ed sakey a bengatla anggad nasumpal so gagala to parad satan a bengatla. Lapud walaan na awawey na singa sakey ya ina a walaay papasusoen ya anak, si Jehova so simamaaron mangiyaasingger na inkasikato ed saramay matoor ed sikato. Oniay inkuan nen Jehova ed matoor iran lingkor to ed kadaanan ya Israel: “Nayarian ta na sakey a bii a lingwanan so anak to a mansuso, ya agto komon kasian so anak na eges to? On, saraya makalingwan ira, balet agak makalingwan ed sika.” (Isaias 49:15) Saramay mabulos a mangipasen ed katooran ed Dios a manunaan ed bilay da so apaseguroan ed maaron panangasikaso to.

Say katooran ed si Jehova so nibase ed aro. Papakiwasen na satan so too a mangaro ed aaroen nen Jehova tan manggula ed saray marelmeng a bengatla a kagula nen Jehova. (Salmo 97:10) Lapud say matalonan kalidad nen Jehova et aro, say katooran ed Dios so mangamper ed sakey a too ya onkiwas ed agmaaron paraan ed arum. (1 Juan 4:8) Kanian no umanen na sakey so relihyon to lapud katooran to ed Dios, agkabaliksan na satan ya agto la aaroen so pamilya to.

Katooran ed Dios​—Sakey a Makagunggonan Puersa

Oniay impangipaliwawa na biin asalambit ed akadkauna nipaakar ed inkiwas to: “Diad impanaral ko na Biblia, akabatan kon si Jehova so tuan Dios, tan abayuboan ko so personal a pisisiglaotan ed sikato. Si Jehova so aliwan singa saray dirios a datin dadayewen ko; sikatoy sigpot ya asimbang ed aro, inkahustisya, kakabatan, tan pakapanyari. Lapud kakaukolanen nen Jehova so nikabkabiig a debosyon, kaukolan kon benegan so arum a dirios.

“Ibabagan naynay ed siak na atateng ko a sikaray talagan agnaliliketan ed siak tan sikaray sasaewen ko. Saya so agaylay irap, lapud importantin tuloy parad siak so panangabobon na atateng ko. Balet legan ya onaaligwas so pikakabat ko ed katuaan ed Biblia, say panamili so malinlinew la ed siak. Agko nayarian a benegan si Jehova.

“Say desisyon kon manmatoor ed si Jehova imbes a diad saray relihyoson abangonan ko et agmankabaliksan ya aliwa ak lan matoor ed pamilyak. Panggugunaetan kon ipatnag ed sikara panamegley na saray salita tan gawa a natatalosan koy liknaan da. Balet no agak manmatoor ed si Jehova, diad ontan et pupugeran koy pamilyak a makapikabat ed sikato, tan satan so peteg a gawa na ag-inkamatoor.”

 Ontan met, aliwan traidor so sakey a too sano kakaukolanen na katooran ed Dios a sikatoy mansiansian neutral ed politika tan paliisan toy pamemben na armas sumpad arum. Oniay impangipaliwawa nen Zlatko ed inkiwas to: “Anggaman siak so pinabaleg bilang Kristiano ed ngaran lambengat, siak so angasawa na sakey ya aliwan ontan. Sanen tinmerak so bakal, kinaukolan na parehon dapag so katooran ko. Apaskar ak a mamili no dinan a dapag so pibakalan ko. Siak so akibiang ed bakal ed loob na talora tan kapaldua a taon. Diad kaunoran et sikamin sanasawa so inmarawi ed Croatia, a diman mi akabat iray Tastasi nen Jehova.

“Diad panaaral mi na Biblia, atalosan mi a si Jehova so nepeg a manunan panmatooran mi tan kaliktan ton aroen mi so kapara min too antokaman so relihyon odino rasa to. Natan et sikamin sanasawa so nankasakey a mandadayew ed si Jehova, tan naaralan ko ya agak nayarin manmatoor ed Dios insan milaban ed kaparak a too.”

Katooran a Minoldi na Suston Pikakabat

Lapud si Jehova so Manamalsa tayo, manepeg a sikatoy manunan panmatooran tayo nen say arum nin mankakaukolan na katooran tayo. (Apocalipsis 4:11) Balet, pian say katooran ed Dios so agmagmaliw a panatiko odino makaderal a puersa, nepeg a moldien itan panamegley na suston pikakabat. Oniay isisimbawa ed sikatayo na Biblia: “Manpasimbalo kayo . . . ed espiritu na kalakal yo, tan ikawes yo so too a balo, a sikato so pinalsa unong ed linaway Dios ed matuan . . . kasantosan [“katooran,” NW].” (Efeso 4:23, 24) Say bantog a lakin nansulat ed saratan a pinuyanan a salita so makpel ya anuppiat ed saray nipabangon ed sikaton katooran. Say impangusisa to so angitonton ed makagunggonan pananguman.

On, asubok iray katooran nen Saulo, a singa dakel met diad panaon tayo. Si Saulo so pinabaleg ed mapeget iran tradisyon na pamilya to, tan sikatoy matalonggaring a nanmatoor ed abangonan ton relihyon. Say katooran to ed saray relihyoson kalat to so amakiwas ni ingen ed sikaton manggawa na karawalan sumpad saramay agmipakna ed panmoria to. Kabkabat si Saulo ed panag-loob ed kaabungan na saray Kristiano tan gayugoyen iran papaway pian dusaen tan pateyen ni ingen.​—Gawa 22:3-5; Filipos 3:4-6.

Ingen, sanen akagamor la si Saulo na suston pikakabat diad Biblia, ginawa to so bengatlan ipapasen na saray kalimog to ya agmakatunongan. Inuman toy relihyon to. Si Saulo, a diad kaunoran et akabatan bilang apostol Pablo et pinili to so manmatoor ed Dios imbes a diad tradisyon. Say katooran ed Dios a nibase ed suston pikakabat so amakiwas ed si Saulo pian magmaliw a maanos, maaro, tan makapaseseg, a misunian ed datin makaderal tan panatikon awawey to.

Akin a Nepeg Kan Manmatoor?

Say pangiyabuloy a namoldi na saray estandarte na Dios iray katooran tayo so mangitarok na mapatnag iran gunggona. Alimbawa, inkuan na report nen 1999 na Australian Institute of Family Studies a kabiangan ed saray makana parad manbayag tan makapenek iran panamaley et say “panagmatalek tan inkamatoor . . . [tan] say pakatebek ed espiritualidad.” Aromogan diad parehon  impanaral ya ontutulong so “malet tan makapenek a panamaley” ed pagmamaliw na lalaki tan bibii a mas maliket, mabunigas, tan manbilay na andukey tan satan a malet a panamaley so mangiiter na mas maabig a pankanawnawa ed ananak pian panggayagaan so maliket a bilay.

Diad mundo natan ya anggapoy inkasegurado, say katooran et singa sakey a manangisalban lubir ya akapeketan na sakey a mipupuligesgesan ya onlalangoy ed baloton panagsalba. No anggapo iray katooran na “lumalangoy,” sikatoy iyanor na saray daluyon tan dagem. Balet no naandi so katooran to, satan so singa manangisalban lubir ya akakabit ed onlelereg a barko. Singa si Saulo, nayarin amoria ton sikatoy niguguyor ed makaderal a kurang. Balet, say katooran ed si Jehova, a nibase ed suston pikakabat, so sakey a manangisalban lubir a mamapaligen ed sikatayo tan mangitotonton ed kilalaban tayo.​—Efeso 4:13-15.

Onia so isisipan nen Jehova ed saramay matoor ed sikato: “Si Jehova aroen to so kaalasan, tan agto ikaindan so sasantos to; niyapiger ira lawas.” (Salmo 37:28) Agmanbayag et amin iramay matoor ed si Jehova so makaloob ed paraison dalin, a ditan et panggayagaan da so kaandi na ermen tan ot-ot tan manliket ira ed magnayon iran siglaotan ya anggapo lay inkaapag-apag ed relihyon tan politika.​—Apocalipsis 7:9, 14; 21:3, 4.

Natan ni labat et napapaneknekan la na minilyon ya indibidual ed sankagloboan a say tuan liket so manlalapu lambengat ed katooran da ed si Jehova. Akin a sikay agpatulongan ed saray Tastasi nen Jehova pian usisaey panmoriam nipaakar ed katooran diad liwawa na katuaan ed Biblia? Oniay ibabaga na Biblia ed sikatayo: “Dalepdep yo ed sikayon dili, no wala kayo ed pananisia, sali yo so sikayon dili.”​—2 Corinto 13:5.

Nakaukolan so inkakpel pian nausisa so pananisia tayo tan no akin a matoor itayo ed satan, balet saray tumang ed pansagpot so mablin tuloy sano manresulta itan ed pagmaliw tayon maapit ed si Jehova a Dios. Say bii ya inaon ed akadkauna so angibalikas ed liknaan na dakel a totoo sanen inkuanto: “Naaralan kon say pagmaliw a matoor ed si Jehova tan ed saray estandarte to so ontulong ed sikatayon magmaliw ya asimbang ed pidedeneng tayo ed saray kapamilya tayo tan magmaliw a magmaong a membroy komunidad. Anggaman mairap a tuloy iray subok, no matoor itayo ed si Jehova, sikatoy lawas manmatoor ed sikatayo.”

[Saray litrato ed pahina 6]

Say suston pikakabat so amakiwas ed si Saulo pian umanen so panmamatooran to

[Litrato ed pahina 7]

Akin ya ag-usisaen iray katooran yo diad liwawa na katuaan ed Biblia?

[Picture Credit Lines ed pahina 4]

Churchill, tagey ed nikawigi: U.S. National Archives photo; Joseph Göbbels, bandad kawanan: Library of Congress