Tepetepet Manlapud Saray Managbasa

Anton giya so itatarya na Kasulatan nipaakar ed panangipasal ed anak sano say sakey ya ateng et sakey ed saray Tastasi nen Jehova balet ta say sananey et andi?

Mangiiter na giya so Kasulatan na duaran importantin prinsipyo nipaakar ed panangipasal ed anak no say asawa na sakey a Tasin ateng et aliwan Tasi. Say sakey et: “Nakaukolan ya unoren mi so Dios, nen saray totoo.” (Gawa 5:29) Say sananey et: “Say asawan laki sikato so ulo na asawan bii, a singa si Kristo met sikato so ulo na iglesia.” (Efeso 5:23) Say unor so aglabat parad kaasawaan a bibii a Tasi iray masiken da noagta para met itan ed saramay aliwan Tasi so masiken da. (1 Pedro 3:1) Panon a nasimbang na sakey a Tasin ateng irayan prinsipyo sano ibabangat toy ananak to?

No say asawan laki et sakey ed saray Tastasi nen Jehova, responsabilidad to so mangitarya na espiritual tan pisikal iran probisyon parad pamilya to. (1 Timoteo 5:8) Anggaman nayarin malaglaem so panaon ya uusaren na agmananisian ina ed ananak da, say ama a Tasi so nepeg a mangibangat ed ananak to diad pangitarya na espiritual a panangipasal ed ayaman tan diad pangitagar to ed sikara ed saray Kristianon miting, a minabang ira ed panangibangat ed moralidad tan makapabiskeg a panlilimog.

Panon to no say agmananisian akulaw to et ipilit ton itagar iray anak da ed pandadayewan to odino ibangat to’d sikara iray sisiaen to? Nayarin say ley na bansa so mangipapagamor ed sikato na ontan a kanepegan. Mandependin tuloy ed kalidad na espiritual a panagbangat na ama no kasin saray anak so nasagyat a mandayew ed saratan a pasen. Diad itakken na ananak, kaukolan a natulongan ira ed Makasulatan a panangibangat na ama ra a manumbok ed katuaan na Salitay Dios. Agaylay liket na mananisian asawan laki no saray anak to so ontalindeg parad katuaan!

No say ina et sakey ed saray Tastasi nen Jehova, kaukolan a respetoen to so prinsipyo na inkaulo bangta pampagaan to met so magnayon a pankaabigan na ananak to. (1 Corinto 11:3) Diad dakel a kaso et papaulyanan na agmananisian asawa so akulaw ton mangibangat ed ananak da nipaakar ed moral tan espiritual, tan naromog so tulong nipaakar ed satan diad saray pantitipon na totoo nen Jehova. Natulongan na asawan bii so agmananisian masiken to a natebek iray gunggona na marakep ya edukasyon a nagagamoran na ananak da manlapud organisasyon nen Jehova. Mataktikan nipabitar to so kaimportantian na pangipaslep na saray moral a prinsipyo na Biblia ed ananak da, nagkalautla ta nipapaarap iray ugugaw ed mundon manabeba so estandarte ed moral.

Balet, ompan ipilit na agmananisian asawan laki a say relihyon to so kaukolan ya agamilen na ananak to, ya itagar to ra ed pandadayewan to tan ibangat to ra unong ed relihyon to. Odino nayarin sikatoy sumpa ed amin a relihyon tan ipilit ton ag-ibangat iray anak to ed antokaman a relihyon. Bilang ulo na pamilya, sikato so manunan responsable ed panagdesisyon. *

Legan a rerespetoen to so inkaulo na masiken to, bilang dedikadon Kristiano, nepeg a tandaan na mananisian asawan bii so awawey di apostol Pedro tan Juan, ya angikuan: “Agmi nayarin agsalitaen so anengneng tan nadngel mi.” (Gawa 4: 19, 20) Nisesengeg ed espiritual a pankaabigan na ananak, say Tasin ina so mananap na saray pankanawnawa pian iwanwan ira nipaakar ed moral. Walay responsabilidad to ed si Jehova ya ibangat iray arum ed amta to a katuaan, tan nepeg ya agnipuera iray anak to. (Uliran 1:8; Mateo 28:19, 20) Panon a napidenengan na Tasin ina iyan mairap a problema?

Alaen pan alimbawa so nipaakar ed panisia ed Dios. Nayarin say Tasin asawan bii so agmakapangiyaral na Biblia ed ananak to diad pormal a paraan lapud panameget na masiken to. Lapud saya, kasin paliisan to lay pangibangat ed ananak to na antokaman nipaakar ed si Jehova? Andi. Saray salita tan gawa to so kaukolan a mangipatnag na pananisia to ed Manamalsa. Maseguron walaray tepet na ananak to nipaakar ed satan a pamaakaran. Kaukolan a sikatoy bulos a mangagamil na kawayangan to ed relihyon diad panangibalikas na pananisia to ed Manamalsa, pati ed ananak to. Anggaman agto makapangiyaral na Biblia ed ananak to odino makapangitagar ed sikaran regular diad saray miting, nayarian ton inabang ed sikara so pikakabat nipaakar ed si Jehova a Dios.​—Deuteronomio 6:7.

Nipaakar ed relasyon ed baetan na sakey a Tasi tan ed agmananisian asawa to, oniay insulat nen apostol Pablo: “Say asawan laki ya agmanisia napasanto ed bii ya asawa, tan say asawan bii ya agmanisia napasantos ed agi: ta no aliwan ontan saray anak yo marutak ira komon; natan balet masantos ira.” (1 Corinto 7:14) Momoriaen nen Jehova so relasyon na sanasawa bilang masanto lapud say mananisian asawa tan saray anak so masanto ed imaton nen Jehova. Nepeg a gawaen na Tasin asawan bii so anggaay nayarian to pian tulongan iray anak to a natalosan so katuaan, ya ipalima la ed si Jehova so kaunoran a pansumpalan.

Diad itakken na ananak, kaukolan iran mandesidi no dinan so talindegan da base’d impormasyon a naawat da la manlapud atateng da. Nayarin desidien day onkiwas unong ed saray salita nen Jesus: “Say mangaro ed ama ono ina a nagkalalo nen say siak agmakana’d siak.” (Mateo 10:37) Niganggan met ed sikara: “Sikayon anak, ontulo’kayo ed saray kaatatengan yo dia ed Katawan.” (Efeso 6:1) Denesidi na dakel a tobonbalo so ‘ontulok ed Dios bilang manuley’ imbes a diad aliwan-Tasin ateng, anggaman sikaray pairapen na satan ya ateng. Agaylan tumang parad ateng a Tasi a naimatonan ton desidien na ananak so manlingkor ed si Jehova anggaman ed isusumpa!

[Paimano ed Leksab]