Panoy Nepeg a Panmoria Tayo ed Saray Subok?

SUBSUBOK! Amin so nipapaarap ed saratan. Nayarin resulta iratan na saray panduruma ed personalidad, kairapan ed panagbilay, maletey a bunigas, pakatuksoan, pananesdes na kalimog a manggaway makapuy, panamasegsegang, pakaangatan ed talindeg tayo ed neutralidad odino sumpad idolatriya, tan dakel niran bengatla. Antokaman so nengneng na subsubok ya aarapen tayo, saratan so mabetbet a pansengegay pirmin kapagaan. Panon tayon napidenengan iratan a matalona? Kasin walay antokaman a pakagunggonaan tayo ed saratan?

Say Sankaabigan a Tulong

Say bilay nen Arin David nensaman so napno na saray subok, ingen sikatoy inatey a matoor. Panon ton akapansungdo? Impabitar toy lapuan na biskeg to sanen inkuanto: “Si Jehova so managpastol ed siak; agak naani onkulang.” Insan intuloy ton inkuan: “On, anggan manakar ak ed lawak na anino na patey, agak la ontakot ed mauges: ta sika wala ka ya ibak; say baras tan say tayukor mo ligliwaen da ak.” (Salmo 23:1, 4) On, si Jehova so lapuan na ag-ageteran a tulong. Pinastolan to si David legan na makapagonigon a panaon, tan sikatoy akaparaan a manggawa met na ontan ed sikatayo sano nakaukolan.

Panon tayon nagamoran so tulong nen Jehova? Impabitar na Biblia so paraan diad impangibagan: “O tawayan yo et nanengneng yo a si Jehova maong.” (Salmo 34:8) Satan so masimoon ya imbitasyon, balet antoy kabaliksan na satan? Satan so pakasagyatan pian panlingkoran si Jehova tan sigpot ya itunos so kabibilay tayo ed linawa to. Satan a kurang so mankabaliksay pangisuko ed arum a kawayangan tayo, pansakripisyo. Diad arum a kipapasen et panlapuan ni ingen itan na saray subok​—panamasegsegang tan kairapan. Ingen, agbalot magbabawi iraman so sigpot-puson mangaawat ed imbitasyon nen Jehova. Magmaliw a maomaong si Jehova ed sikara. Iwanwan tan asikasoen to ira diad espiritual a paraan. Sikaray tulongan to sano nidunget ira ed saray subok panamegley na Salita to,  masanton espiritu to, tan say Kristianon kongregasyon. Tan diad saginonor et sikaray tumangan to na andi-anggaan a bilay.​—Salmo 23:6; 25:9; Isaias 30:21; Roma 15:5.

Saramay mandesidin manguman ed bilay da pian panlingkoran si Jehova tan mansiasiansia ed satan a desisyon et namoria ran sumpalen nen Jehova so amin a sipan to. Satan so naeksperiensya na saray Israelitan tinmumbok ed si Josue a paarap ed Insipan a Dalin. Sanen akabaliw lara ed Jordan, walaray subok a nepeg dan sungdoan, saray bakal a nepeg dan pilabanan, tan saray mairap a leksion a nepeg dan naaralan. Balet satan a kailalakan so apaneknekan a mas matoor nen saray atateng da, a pinmaway ed Ehipto tan inaatey diad kalawakan. Kanian, tinulongan nen Jehova iramay matoor, tan nipaakar ed kipapasen da diad impatey nen Josue, oniay inkuan na rekord na Biblia: “Si Jehova initer to ed sikara so painawa ed liberliber, unong na amin a sinambaan to ed saray atateng da . . . Anggapo so linmiwat a balot ed anton maong a bengatla a si Jehova sinalita to ed abung na Israel; amin agawa.” (Josue 21:44, 45) Ontan met so naeksperiensya tayo no sigpot itayon manmatalek ed si Jehova sano nasusubok tan diad amin niran panaon.

Antoy nayarin mamakapuy ed panagmatalek tayo ed si Jehova? Impabitar nen Jesus so sakey a rason sanen inkuanto: “Anggapoy too a makapanlingkor ed duaran katawan . . . Agyo nayarian so manlingkor ed Dios tan saray kayamanan.” (Mateo 6:24) No manmamatalek itayo ed si Jehova, agtayo anapen so seguridad diad materyal iran bengatla a ditan so panaanapan na maslak a totoo ed mundo. Sinimbawa nen Jesus iray patumbok to: “Ingen anapen yo nin unona so panarian, tan say inkatunong to; et amin iraya [a nakakaukolan a materyal] a bengatla niarum ira ed sikayo.” (Mateo 6:33) Say sakey a Kristiano a pansiasiansiaen toy asimbang a panmoria ed materyal iran bengatla tan mangiyuuna ed Panarian na Dios diad bilay to so manggagawa na dugan desisyon. (Eclesiastes 7:12) Siempre, walan-walay kasalat na satan parad sikato. Nayarin sikatoy mansakripisyo diad materyal a paraan. Balet sikatoy manani na dakel a tumang. Tan ontulong si Jehova ed sikato.​—Isaias 48:17, 18.

No Anto so Naaralan Tayo Manlapud Saray Subok

Siempre, say pandesidin ‘tawayan tan nengnengen a si Jehova et maong’ so agmanalimbeng ed sakey manlapud ag-ilaloan iran nagagawa ed bilay; nisay sigpot a manalimbeng ed sikatayo manlapud saray panangataki nen Satanas tan saray uusaren ton totoo. (Eclesiastes 9:11) Bilang resulta, nayarin nasubok so inkasimoon tan determinasyon na sakey a Kristiano. Akin a papaulyanan nen Jehova a nidunget iray managdayew to ed ontan iran subok? Inter nen apostol Pedro so sakey a rason sanen insulat to: “Nagonigon kayo la ni natan na saray nambabangil a katuksoan [“subok,” NW], no ontan so nakaukolan, pian say pakapamintuaan na pananisia yo, a mamabli nen say balitok, ta saya et naderal, anggaman nisali ed apuy, naalmo ed dayew, gayaga tan galang yo no ompanengneng si Jesu-Kristo.” (1 Pedro 1:6, 7) On, saray subok so mangiyabuloy ed sikatayon nipatnag so kalidad na pananisia tayo tan panangaro tayo ed si Jehova. Tan ontulong iratan pian naebatan iray panamalaw tan akusasyon nen Satanas a Diablo.​—Uliran 27:11; Apocalipsis 12:10.

Saray subok so ontutulong met ed sikatayo pian nabayuboan so arum niran Kristianon kalidad. Bilang alimbawa, konsideraen iray salita na salmista: “Wala so panangimano [nen Jehova] ed makabos a too: bangbalet say mankinon kabat to ya anggan wala ed arawi.” (Salmo 138:6) Dakel ed sikatayo so agkasiporan a mapaabeba, balet makatulong ed sikatayo iray subok pian nabayuboan itan a makanan kalidad. Nonoten pay agawa nensaman diad panaon nen Moises sanen minoria na arum ed Israel a makapasawa so pangan na mana a sinimba-simba, binulan-bulan. Mapatnag, sakey itan a subok ed sikara, anggaman say mana so mamilagron probisyon. Anto so gagala na subok? Inkuan nen Moises ed sikara: “[Si Jehova] so amakan ed sikad’man ed  kalawakan na mana . . . pian napauyamo to ka, tan pian nasubok to ka.”​—Deuteronomio 8:16.

Say kaumildian tayo so nayarin nasubok met. Panon? Alimbawa, panon so ikiwas tayo ed saray pananguman ed organisasyon? (Isaias 60:17) Kasin sikatayoy sigpot-puson manusuporta ed panagpulong tan panagbangat a kimey? (Mateo 24:14; 28:19, 20) Kasin magunaet itayon mangaawat ed saray eksplinasyon ed katuaan ed Biblia unong ya itatarya na “say matoor tan makabat ya aripen”? (Mateo 24:45-47; Uliran 4:18) Kasin lalabanan tayoy desdes a nawalaan na sankabaloan a kagawaan, sankabaloan ya istilo’d panangawes, odino say sankabaloan a modelon luluganan? Say mapaabeban too so makaebat na positibo ed saratan a tepet.​—1 Pedro 1:14-16; 2 Pedro 3:11.

Ontulong iray subok pian niwala ed sikatayo so sananey nin makanan kalidad​—panagsungdo. Oniay inkuan nen babangatan a Santiago: “Agagik ira, ibilang yo ya amin a liket no napelag kayo ed nambabangil a katuksoan; amtaen yo a say panalsali ed pananisia yo gawaen to so anos [“panagsungdo,” NW].” (Santiago 1:2, 3) Say matalonan pakapansungdo ed dakerakel a subok tekep na sigpot a panagmatalek ed si Jehova so mamawala na inkapekder, inkamatoor, tan integridad. Satan so mamabiskeg ed sikatayon naresistian iray arapen a panangataki nen Satanas, say masanok a dios na sayan mundo.​—1 Pedro 5:8-10; 1 Juan 5:19; Apocalipsis 12:12.

Pansiansiaen ya Asimbang so Panmoria ed Saray Subok

Say ayadyarin Anak na Dios, si Jesu-Kristo, so nidunget ed dakel a subok legan a wadiad dalin tan akaawat na dakel iran gunggona diad impansungdo to ed saratan. Insulat nen Pablo a si Jesus et “inaral to so katutulok lapu ed saray bengatlan intepel to.” (Hebreos 5:8) Say impanmatoor to anggad patey so angidayew ed ngaran nen Jehova tan amakayari ed si Jesus ya iyapay so balor na ayadyarin bilay to bilang too pian panondon ed katooan. Satan so angilukas na dalan parad saramay angagamil na pananisia ed si Jesus a nawalaan na ilalon andi-anggaan a bilay. (Juan 3:16) Lapud si Jesus so nansiansian matoor diad silong na subok, sikato la natan so Atagey a Saserdote tan nitronon Ari tayo.​—Hebreos 7:26-28; 12:2.

Komusta tayo natan? Say panmatoor tayo sano nasusubok so mangitarok met na dakel iran bendisyon. Parad saramay walaan na mangatatawen ya ilalo, oniay ibabaga na Biblia: “Mapalar so too a mantepel na panalsali, ta no asali la, awaten to so balanget na bilay ya insipan na Katawan ed saray mangaro ed sikato.” (Santiago 1:12) Saramay walaan na mangaraldalin ya ilalo so napaseguroan a no mansungdo ira a sitotoor, sikaray manawir na andi-anggan a bilay diad mangaraldalin a paraiso. (Apocalipsis 21:3-6) Tan sankaimportantian, say matoor a pansungdo ra so mangitarok na dayew ed ngaran nen Jehova.

Legan tayon tutumboken iray bakat nen Jesus, makapankompiyansa itayo a natalonaan tayo so amin na saray subok ya aarapen tayo diad sayan sistema na bengabengatla. (1 Corinto 10:13; 1 Pedro 2:21) Panon? Diad panamegley na panmatalek tayo ed si Jehova, a mangiiter na “sankatageyan ya inkabaleg na pakayari” ed saraman so ompapapeg ed sikato. (2 Corinto 4:7) Magmaliw komon a say kombiksion tayo et singa ed si Job, ya anggan legan a mansusungdo ed mairap iran subok et sikatoy amekder tekep na kompiyansa: “Sano asali to ak, ompaway ak a singa balitok.”​—Job 23:10.

[Litrato ed pahina 31]

Say katooran nen Jesus sanen nasusubok so angitarok na dayew ed ngaran nen Jehova. Ontan met ed sikatayo