“Say Pinilik, a Panliketan na Kamarerwak”
Propesiya nen Isaias—Liwawa Parad Amin a Katooan II
Kapitulo Tres
“Say Pinilik, a Panliketan na Kamarerwak”
1, 2. Akin a say kapitulo 42 na Isaias so makapainteres ed saray Kristiano natan?
“SIKAYO so saray tasik, kuan nen Jehova tan say aripen ko a pinilik.” (Isaias 43:10) Sayan deklarasyon nen Jehova, ya inkurit nen propeta Isaias nen komawalon siglo K.K.P., so mangipapanengneng a say akisipanan a totoo nen Jehova nensaman et nasyon na tastasi. Sikaray pinilin lingkor na Dios. Kayari na manga 2,600 a taon, nen 1931, saray alanaan a Kristiano so mapublikon angiyabawag a sarayan salita so onaaplika ed sikara. Inadapta ra so ngaran a Tastasi nen Jehova tan interon-puso ran inawat iray responsabilidad a misiglaot ed pagmaliw a lingkor na Dios diad dalin.
2 Saray Tastasi nen Jehova so masimoon a manpipirawat a mamaliket ed Dios. Lapud saya, say koma-42 a kapitulo na libro na Isaias so pirmin makapainteres ed balang sakey ed sikara, lapud itatarya na satan so panangilitrato ed sakey a lingkor ya aabobonan nen Jehova tan say sananey a lingkor ya ipupulisay to. Say pangonsidera ed sayan propesiya tan saray kasumpalan na saya so mangiter na aralem a pakatalos ed no anto so mangitonton ed panangabobon tan agpanangabobon na Dios.
“Inyan Ko so Espirituk ed Sikato”
3. Anto so impropesiya nen Jehova panamegley nen Isaias nipaakar ed ‘lingkor ko’?
3 Panamegley nen Isaias, impropesiya nen Jehova so isabi na sakey a lingkor a turoen to a mismo: “Nia, say aripen [“lingkor,” NW] ko, a sikato so ampayaen ko; say pinilik, a panliketan na kamarerwak: inyan ko so Espirituk ed sikato: sikato yakar to naani inkatunong [“inkahustisya,” NW] ed saray Gentil [“nasyon,” NW]. Sikato agnaani onakis, tan agto met itagey so boses to, tan agto met gawaen a narengel ed pulong. Say sakey a kawayan ya abalbal agto naani puteren, tan say sakey a pabilo a mandarlang a makuyep agto naani erepen: sikato papawayen to naani kaptekan [“inkahustisya,” NW] ed katuaan. Sikato agnaani onkulang tan agmet ontakot so linawa to ya angga ed nipasen to so inkatunong [“inkahustisya,” NW] ed dalin; et saray pulo alagden da naani so tunong to.”—Isaias 42:1-4.
4. Siopa so impasakbay a ‘pinili,’ tan panon tayon amta iya?
4 Siopa so Lingkor a tutukoyen dia? Ag-itayo apaulyan a manduaruwa. Naromog tayo irayan salita ya inaon ed Ebanghelyo nen Mateo tan inyaplika ed si Jesu-Kristo. (Mateo 12:15-21) Si Jesus so inad-aron Lingkor, say sakey a ‘pinili.’ Kapigan inyan nen Jehova so espiritu to ed si Jesus? Nen 29 K.P., diad panaon na bautismo nen Jesus. Deneskribe na impuyan a rekord itan a bautismo tan inkuan na satan a kayarin tinmatdang si Jesus ed danum, “say tawen nilukas, et inmakseb ed sikato so espiritu santo ed nengneng na laman, a singa malapati, tan sakey a boses nanlapu ed tawen, a kuan to, Sika so Ana’ko ya inad-aro, dia ed sika napaliket ak a maong.” Diad onian paraan et personal ya impakabat nen Jehova so inad-aro to a Lingkor. Say sinmublay a ministeryo nen Jesus tan saray milagron ginawa to so amaneknek a say espiritu nen Jehova so peteg a wala ed sikato.—Lucas 3:21, 22; 4:14-21; Mateo 3:16, 17.
‘Iyakar To so Inkahustisya ed Saray Nasyon’
5. Akin a nakaukolan so panangipalinew ed inkahustisya nen inmunan siglo K.P.?
5 Say Pinilin Sakey nen Jehova so ‘mangiyakar,’ odino mangipabidbir, ed tuan inkahustisya. “Ipalinew to ed saray nasyon no anto so inkahustisya.” (Mateo 12:18, NW) Agaylan saya so kakkaukolan nen inmunan siglo K.P.! Saray Judion lider na relihyon so angibangat na pikewet a panmoria ed inkahustisya tan inkatunong. Kinaliktan dan dampoten so inkatunong diad panutumbok da ed mapeget a kodigo na saray ganggan—a karaklan et gawagawa ran dili. Saray legalistikon hustisya ra so andian na panangasi tan panangabagey.
6. Diad antoran dalan ya impaamta nen Jesus so tuan inkahustisya?
6 Diad pidumaan, imparungtal nen Jesus so panmoria na Dios ed inkahustisya. Panamegley na imbangat tan impanbilay to, impanengneng nen Jesus a say tuan inkahustisya so maabagey tan mapangasi. Konsideraen pa labat so bantog a Sermon to ed Palandey. (Mateo, kapitulo 5-7) Agaylan inkadunong ed panagpaliwawa ed no panon so nepeg a pangagamil ed inkahustisya tan inkatunong! Sano babasaen tayo iray salaysay na Ebanghelyo, agtayo ta natetenyeg ed inkamaabagey nen Jesus ed saray pobri tan pakaskasi? (Mateo 20:34; Marcos 1:41; 6:34; Lucas 7:13) Impasabi to so makaligliwan mensahe to ed dakel a singa saray abalbal a kawayan, akalupaypay tan atamtampal. Singa ira makuykuyep a pabilo, a say unor a kiddiam na bilay da so ngalngali la nakatsep. Agpinuter nen Jesus so “abalbal a kawayan” nisay inerep so “pabilo na mandarlang a makuyep.” Imbes, say maaro tan maabagey iran salita tan kiwas to so amagayaga ed kapusoan na saray mauyamo.—Mateo 11:28-30.
7. Akin a nibaga na propesiya a si Jesus so ‘ag-onakis tan agmet mangitagey na boses to ed pulong’?
7 Balet, akin ya inkuan na propesiya a si Jesus so ‘ag-onakis tan agmet mangitagey na boses to, tan agto met gawaen a narengel ed pulong’? Lapud agto impaatagey so inkasikato, a singa ginawa na dakel nen panaon to. (Mateo 6:5) Sanen tatambalen to so sakey ya akating, inkuan to ed inmabig a laki: “Nengneng mo ya anggapoy toon pangibagaan mo.” (Marcos 1:40-44) Imbes a manpilalek a napabantog tan nawalaan iray totoo na konklusyon unong ed saray dengeldengel a report, kinaliktan nen Jesus a natebek dan mismo base ed malet ya ebidensya a sikato so Kristo, say nilanaan a Lingkor nen Jehova.
8. (a) Panon ya inyakar nen Jesus so ‘inkahustisya ed saray nasyon’? (b) Anto so ibabangat ed sikatayo na ilustrasyon nen Jesus a mapangasin Samaritano nipaakar ed inkahustisya?
8 Say Pinilin Lingkor so mangiyakar na ‘inkahustisya ed saray nasyon.’ Saya so ginawa nen Jesus. Nilikud ed impangidanet ed maabagey a kalidad na maridios ya inkahustisya, imbangat nen Jesus a nepeg a walaan na ontan so amin a totoo. Diad sakey ya inkagawa et pinanonotan nen Jesus so sakey a lakin makabat ed Ganggan a kaukolan ton aroen so Dios tan say kapara ton too. Intepet na too ed si Jesus: “Siopa so kaparak a too?” Nayarin say ilaloan ton ebat nen Jesus et: “Say kaparam a Judio.” Balet indalatdat nen Jesus so parabolo na mapangasin Samaritano. Diad parabolo, sakey a Samaritano so tinmulong ed sakey a lakin kinabil na saray tulisan, bangta agtinulongan na sakey a Levita tan sakey a saserdote. Diad satan a situasyon et kaukolan a bidbiren na mantetepet a say minudmoran Samaritano so kaparan too, aliwan samay Levita odino samay saserdote. Sinampotan nen Jesus so ilustrasyon to ed bilin a: “Gawam [met] so ontan.”—Lucas 10:25-37; Levitico 19:18.
“Sikato Agnaani Onkulang tanAgmet Ontakot so Linawa To”
9. Panon a mangapekta ed sikatayo so pakatalos ed kabaliksan na tuan inkahustisya?
9 Lapud impalinew la nen Jesus so kabaliksan na tuan inkahustisya, naaralan na saray babangatan to ya ipatnag iyan kalidad. Nepeg ya ontan itayo met. Unona ed amin, kaukolan tayon awaten iray estandarte na Dios ed maabig tan mauges, lapud sikato so walaan na kanepegan a manetermina no anto so maalas tan matunong. Legan tayon panggugunaetan a gawaen iray bengatla ed paraan nen Jehova, say maptek a kondukta tayo so malinew a mangipatnag ed no anto so tuan inkahustisya.—1 Pedro 2:12.
10. Akin a lalanoren na panangipatnag na inkahustisya so pibibiang ed panagpulong tan panagbangat a kimey?
10 Nipapatnag tayo met so tuan inkahustisya no makuli itayon mibiang ed panagpulong tan panagbangat a kimey. Si Jehova so mabunbunlok ya angitarya na manangiliktar-bilay a pikakabat nipaakar ed sikato, ed Anak to, tan ed saray gagala to. (Juan 17:3) Aliwan duga odino makatunongan ya ikibot tayo itan a pikakabat. “Agmo abalaen so maong ed saray kanepegan to, sano wala ed pakayari na limam so panggawa,” inkuan nen Solomon. (Uliran 3:27) Interon-puso tayo sirin ya inabang so amta tayo nipaakar ed Dios diad amin a totoo, antokaman so nanlapuan dan rasa, etniko, tan bansa.—Gawa 10:34, 35.
11. Diad pangaalig ed si Jesus, panon so nepeg a pideneng tayo ed arum?
11 Niarum ni, saray tuan Kristiano so midedeneng ed arum a singa ginawa nen Jesus. Dakel natan so walaan na makapadismaya iran problema tan mankakaukolan ira na panangabagey tan panamaseseg. Anggan saray arum a dedikadon Kristiano so nayarin pirmin apairap ed saray kipapasen a mipara ira ed abalbal a kawayan odino makuykuyep a pabilo. Agta nakaukolan da so tulong tayo? (Lucas 22:32; Gawa 11:23) Agaylan makarepresko so pagmaliw a kabiangan na muyongan na tuan Kristianos, a mangaalig ed si Jesus diad pangaagamil na inkahustisya!
12. Akin a makapanmatalek itayo ya agmanbayag et ontua so inkahustisya parad amin?
12 Peteg kasin niwala so inkahustisya ed amin? On, peteg. Say Pinili a Sakey nen Jehova so ‘ag-onkulang tan agmet ontakot so linawa to angga ed pakapangipasen to ed inkahustisya ed dalin.’ Agmanbayag say nitronon Ari, say apaolin Kristo Jesus, so ‘mangiter na panamales ed saray agmikabat ed Dios.’ (2 Tesalonica 1:6-9; Apocalipsis 16:14-16) Salatan na Panarian na Dios so pananguley na too. Say inkahustisya tan inkatunong so ontalona. (Uliran 2:21, 22; Isaias 11:3-5; Daniel 2:44; 2 Pedro 3:13) Tekep na magunaet a panatalaran, saray lingkor nen Jehova ed inerman a pasen—anggan saramay walad nisulinek a lugar, “saray pulo”—so manaalagar ed satan ya agew.
‘Sikato so Iter Ko a Silew na Saray Nasyon’
13. Antoy impropesiya nen Jehova nipaakar ed Pinili ton Lingkor?
13 Intuloy nen Isaias: “Onia so kuan na Dios a Jehova, a sikato so amalsa ed saray tawen, tan amuskag ed sikara, sikato ya angilaknab na dalin tan say ompaway ed sikato; sikato so mangiter na panlinawa na saray totoo ed tapew to, tan say espiritu ed saray manakar ed sikato.” (Isaias 42:5) Agaylan puersan panangideskribe ed si Jehova, say Manamalsa! Sayan panonot ed biskeg nen Jehova so mangidadanet a tuloy ed imbalikas to. Oniay inkuan nen Jehova: “Siak, si Jehova, tinawag taka ed inkatunong, tan egnaan ko naani liman, tan kawaloen taka naani, tan iter [ta] ka naani nipaakar a sakey a sipan ed saray totoo, nipaakar a sakey a silew na saray Gentil [“nasyon,” NW]. Pian lukasan mo so saray bulag a mata, pian ipaway mo so saray pinangaw ed mainget a panangipangawan, tan saray manyurong ed kabilungetan ipaway mo ra ed panangipangawan.”—Isaias 42:6, 7.
14. (a) Anto so kabaliksan na pangeegna nen Jehova ed lima na naabobonan a Lingkor to? (b) Anto so betang ya aagamilen na Pinilin Lingkor?
14 Say Engranden Manamalsa na uniberso, say Manangiter tan Mananustuni na bilay, so mangeegna ed lima na Pinili ton Lingkor tan mangisisipan na sigpot tan tuloytuloy a suporta. Agaylan makapaseguro itan! Niarum ni, sikatoy pansiasiansiaen nen Jehova a liktar pian sikatoy iter bilang “sakey a sipan ed saray totoo.” Say sipanan et sakey a kontrata, sakey a nampaknaan, masimoon a sipan. Satan so seguradon totontonen. On, ginawa nen Jehova so Lingkor to a “samba ed totoo.”—An American Translation.
15, 16. Diad anton dalan a kinmana si Jesus bilang ‘silew na saray nasyon’?
15 Bilang ‘silew na saray nasyon,’ say insipan a Lingkor so mangilukas ed “saray bulag a mata” tan mangibulos ed “saray manyurong ed kabilungetan.” Saya so ginawa nen Jesus. Diad impangipulong ed katuaan, inggloria nen Jesus so ngaran na mangatatawen ya Ama to. (Juan 17:4, 6) Inwalwal to iray katilaan na relihyon, impulong to so maong a balita na Panarian, tan inlukas to so dalan a mamaarap ed espiritual a kawayangan parad saramay relihyoson nipangaw. (Mateo 15:3-9; Lucas 4:43; Juan 18:37) Sikatoy angipasakbay sumpad panggawa ed saray kimey a kayarian na kabilungetan tan inwalwal to si Satanas bilang “ama na tila” tan “say prinsipe na sayan mundo.”—Juan 3:19-21; 8:44; 16:11.
16 Inkuan nen Jesus: “Siak so silew na mundo.” (Juan 8:12) Pinaneknekan to a sikatoy ontan diad matalonggaring a dalan sanen inyapay to so ayadyarin bilay to bilang dondon. Diad ontan et inlukas to so dalan parad saramay mangaagamil na pananisia pian naperdona iray kasalanan da, nawalaan na naabobonan a relasyon ed Dios, tan ilalon magnayon a bilay. (Mateo 20:28; Juan 3:16) Diad impamasiansia to ed ayadyarin maridios a debosyon diad interon bilay to, intandoro nen Jesus so inkasoberano nen Jehova tan pinaneknekan to a matila so Diablo. Peteg a si Jesus so manangiter na pakanengneng ed saray bulag tan manangibulos ed saramay nipukok ed espiritual a kabilungetan.
17. Diad antoran dalan ya onkakana itayo bilang manangakbibit na liwawa?
17 Diad Sermon to ed Palandey, inkuan nen Jesus ed saray babangatan to: “Sikayo so silew na mundo.” (Mateo 5:14) Agta manangakbibit itayo met na liwawa? Diad paraan na kabibilay tayo tan diad panagpulong a kimey tayo, walaan itayo na pribilehyo ya iwanwan so arum ed si Jehova, say Lapuan na tuan pakaliwawaan. Bilang pangalig ed si Jesus, ipapaamta tayo so ngaran nen Jehova, itatandoro so inkasoberano To, tan iyaabawag so Panarian To bilang alenleneg ya ilalo na katooan. Niarum ni, bilang manangakbibit na liwawa, iwawalwal tayo iray katilaan na relihyon, mamapasakbay sumpad marutak a gawagawa a kien na kabilungetan, tan iwawalwal si Satanas, say marelmeng a sakey.—Gawa 1:8; 1 Juan 5:19.
“Ikantaan Yo si Jehova naSakey a Balo a Kanta”
18. Antoy linawa nen Jehova a naamtaan na totoo to?
18 Natan et inimano nen Jehova so totoo to, inkuanto: “Siak si Jehova, satan so ngaran ko; et say gloriak agko naani iter ed sananey, tan agko met iter so galang ko ed saray imbolik a talintao. Nia, saray unona a bengatla nagawa la, tan balobalo a bengabengatla so ipaliwawak; dia ed arapen na ipaway da ibagak ed sikayo so nipaakar ed sikara.” (Isaias 42:8, 9) Say propesiya nipaakar ed ‘lingkor ko’ so binitla na say alenleneg a mabilay tan tua a Dios, ya aliwan saray andi-kana a dirios. Satan so seguradon ontua, tan satan so agawa. Peteg a si Jehova a Dios so Autor na balo a bengabengatla, tan ginawa ton naamtaan iratan na totoo to antis a nagawa. Panoy nepeg tayon ikiwas?
19, 20. (a) Anton kanta so nepeg a kantaen? (b) Siopara natan so mangikakanta na panangidayew ed si Jehova?
19 Oniay insulat nen Isaias: “Ikantaan yo si Jehova na sakey a balo a kanta, tan say galang to a manlapu ed sampot na dalin; sikayo ya onleksab ed dayat, tan saray amin a wala ed sikato, saray pulpulo, tan saray manaayam ed sikara. Say lawak tan saray syudad to itagey da komon so boses da, saray pulok a panayaman na Cedar; mankanta komon so saray taga Sela, oneyag ira komon ed liket a manlapu ed toktok na saray palandey. Mangiter ira komon na galang ed Jehova, tan ipaliwawa ra so galang to ed saray pulpulo.”—Isaias 42:10-12.
20 Saray manaayam ed saray syudad, diad saray baryo ed lawak, diad pulpulo, anggan diad “Cedar,” odino saray mankakampamento ed saray desierto—totoo ed inerman a pasen—so papasesegen a mangikanta na panangidayew ed si Jehova. Agaylan makapalikliket a diad panaon tayo et minilyon so kinmiwas ed sayan mapropetikon kerew! Inabrasa ra so katuaan na Salitay Dios tan ginawa ran Dios da si Jehova. Saray totoo nen Jehova so mangakanta ed sayan balo a kanta—a mangiiter na gloria ed si Jehova—diad masulok a 230 a daldalin. Agaylan makapaliket so panganta a kaiba ed sayan koro na nanduruman kultura, lenguahe, tan rasa!
21. Akin ya ag-ontalona so kakabusol na totoo na Dios a mamatunda ed kanta na panangidayew ed si Jehova?
21 Sarag kasi na saray onsusumpa so ontalindeg sumpad Dios tan patundaen iyan kanta na panangidayew? Imposible! “Si Jehova ompaway naani a singa sakey a mabayani a too; papawayen to naani so seseg a singa sakey a too na bakal: sikato naani oningal, on, sikato naani oneyag; gawaen to naani a mabisbiskeg a sumpa ed saray kabusol to.” (Isaias 42:13) Anton pakayari so makatalindeg sumpad si Jehova? Manga 3,500 taon ed apalabas, si propetan Moises tan saray anak na Israel so maksil ya angikanta: “Say Dios sikato so mibabakal: Jehova so ngaran to. Saray luganan nen Faraon tan saray ehersito to impataboy to ra ed dayat; tan saray apili a kapitan to linmereg ira’d man ed Ambalanga a Dayat.” (Exodo 15:3, 4) Tinmalona si Jehova sumpad samay sankabiskegan a puersa na militar ed saman a panaon. Anggapoy makatalonan kabusol na totoo na Dios sano onabanti si Jehova bilang mabiskeg a mibabakal.
“Abayag la a Binenbenan Ko so Deen Ko”
22, 23. Akin ya ‘abayag a binenbenan [nen Jehova] so deen’ to?
22 Si Jehova so agmangidumaduma tan maptek, anggan sano mangipapaakseb na panangukom ed kakabusol to. Oniay inkuan to: “Abayag la a binenbenan ko so deen ko; agak inmesel, tan pinokpokan ko so inkasiak: natan oningal ak naani a singa sakey a bii a manpasakit; mamagbag ak tan mangakmon ak a maminpinsan. Igebak naani so saray palandey tan pukdol, tan pamagaen ko so amin a dika ra; tan saray ilog pagmaliwen ko ra naani a pulpulo, tan paekaten ko naani so saray libsong.”—Isaias 42:14, 15.
23 Antis ya onkiwas pian mangukom, inabuloyan ni nen Jehova ya onlabas so panaon pian ikdan na pankanawnawa iray mankakasalanan ya ipulisay so mauges iran kurang da. (Jeremias 18:7-10; 2 Pedro 3:9) Konsideraen so kipapasen na saray taga-Babilonia, a bilang say matalonan pakayari ed mundo et impankibalatar da so Jerusalem nen 607 K.K.P. Inabuloyan iya nen Jehova pian disiplinaen iray Israelita lapud agda inkamatoor. Balet, sinmaew iray taga-Babilonia a mamidbir ed betang da. Maruksan tuloy so impideneng da ed totoo na Dios nen say kakaukolanen na Dios a panangukom. (Isaias 47:6, 7; Zacarias 1:15) Agaylan seguradon ansakit ed tuan Dios a nanengneng so totoo to a maniirap! Balet pinokpokan to ni so onkiwas anggad nigetar a panaon to. Insan, sikatoy nampasakit—singa biin manaanak—pian ibulos so akisipan a totoo to tan gawaen ira bilang bansa a walay kawayangan. Pian nasumpal iya, nen 539 K.K.P., pinaekatan tan dineral to so Babilonia tan saray depensa na satan.
24. Anton ilalo so inlukas nen Jehova parad totoo to ya Israel?
24 Agaylay liket na totoo nen Jehova sanen, kayari na dakel a taon na impakakautibo, alukasan a siansia ed sikara so dalan a pasempet! (2 Awaran 36:22, 23) Maseguron maliket iran maka-eksperiensya ed kasumpalan na sipan nen Jehova: “Yakar ko naani so bulag ed sakey a dalan ya agda amta: ed saray basbas ya agda amta so pangidalanan ko ed sikara; say bilunget gawaen ko naani a liwawa ed arap da, tan panpeteken ko so pikewet a pasen. Saraya a bengatla so gawaen ko naani, tan agko ra paulyan.”—Isaias 42:16.
25. (a) Diad anto a makaseguro iray totoo nen Jehova natan? (b) Anto so nepeg a determinasyon tayo?
25 Panon ya onaaplika irayan salita natan? Bueno, diad abayag lan panaon natan—diad loob na saray siglo—pinaulyanan nen Jehova a gawaen na saray nasyon so labalabay da. Balet, asingsingger la so aturon panaon to pian peteken iray pamaakaran. Diad modernon panaon et pinatalindeg to iray totoo pian mantasi ed ngaran to. Pinatar to so antokaman ya isusumpa ed sikara, pinalatas to so dalan pian sikaray makapandayew ed sikato “ed espiritu tan katuaan.” (Juan 4:24) Insipan to: “Agko ra paulyan,” tan tinoor to so salita to. Komusta iramay siansia nin mandadayew ed palson dirios? Inkuan nen Jehova: “Ompawil ira naani, nibabaing ira naani a tuloy, saray manmatalek ed saray imbolik a talintao, a mankuan ed saray inbobo a talintao, Sikayo so dirios mi.” (Isaias 42:17) Agaylan makana a mansiansia itayon matoor ed si Jehova, a singa ginawa na Pinili to a Sakey!
‘Lingkor a Telek tan Bulag’
26, 27. Panon a pinaneknekan na Israel a sikatoy ‘lingkor a telek tan bulag,’ tan tekep na antoran pansumpalan?
26 Say Pinilin Lingkor na Dios, si Jesu-Kristo, so nansiansian matoor anggad patey. Balet, say totoo nen Jehova ya Israel, so apaneknekan ya agmatoor a lingkor, telek tan bulag diad espiritual a pantalos. Nipaakar ed sikara, oniay inkuan nen Jehova: “Dengel kayo, sikayo a telek; tan nengnengen yo, sikayo a bulag, pian nanengneng yo. Siopa so bulag, noag say aripen [“lingkor,” NW] ko? Odino telek singa say igaganggan ko ya ingganggan ko? Siopa so bulag a singa saman so akipakna ed siak, tan bulag a singa say aripen nen Jehova? Sika nanengneng mo so saray dakel a bengatla balet sika agmo imanoen; saray layag to akalukas ira, balet sikato so agmakadngel. Sikato so makapaliket ed kinen Jehova, lapu ed kaptekan to, a pamabaleg ed tunong, tan pagalangan to.”—Isaias 42:18-21.
27 Agaylan makapasinagem a sinmaew so Israel! Say totoo to so aminpigan kinmasipa a nandadayew ed demonyon dirios na saray nasyon. Paulit-ulit ya ibabaki nen Jehova iray mensahero to, balet agtinmalineng so totoo to. (2 Awaran 36:14-16) Impasakbay nen Isaias iray pansumpalan: “Saya sikato so baley ya atakewan tan asamsaman; sikara ya amin akalotan ira ed saray abot, et wala ra a niyamot ed abung a panangipangawan nipaakar ira a dinakep, tan anggapo so mangilaban; nipaakar ira a sakey a samsam, et anggapo so mankuan, Ipawil yo. Siopa ed sikayo so ondengel na saya? A talinengen to tan imatleken nipaakar ed panaon ya onsabi? Siopa so angiyawat ed Jacob a sakey a samsam, tan say Israel ed saray tulisan? Aliwa ta a si Jehova? A sikato so nankasalananan tayo, tan saray dalan to agda nilabay a dinalan, tan ag-ira met inmunor ed tunong to. Kanian yibong to ed sikato so kasebegan na sanok to, tan say kasil na bakal, tan sikato so sinelselan to ed liberliber, manwari agto kinabat; et sikato so pinoolan to, anggan ontan agto inggaton ed puso.”—Isaias 42:22-25.
28. (a) Anto so naaralan tayo manlapud alimbawa na saray manaayam ed Juda? (b) Panon tayon nagegemtan so panangabobon nen Jehova?
28 Lapud ag-inkamatoor na saray manaayam ed satan, inabuloyan nen Jehova so dalin na Juda a nasamsam tan natakewan nen 607 K.K.P. Pinoolan na saray taga-Babilonia so templo nen Jehova, impankibalatar da so Jerusalem, tan kinautibo da iray Judio. (2 Awaran 36:17-21) Komon ta ipapuso tayo iyan panmadmaran ya alimbawa tan agbalot mantelektelekan ed saray bilin nen Jehova odino manbulagbulagan ed nisulat a Salita to. Imbes, komon ta anapen tayo so panangabobon nen Jehova diad pangalig ed si Kristo Jesus, say Lingkor ya inabobonan a mismo nen Jehova. Singa si Jesus, komon ta ipakabat tayo so tuan inkahustisya panamegley na salita tan gawa tayo. Diad onian paraan, makapansiansia itayo ed limog na totoo nen Jehova, a manlilingkor bilang manangakbibit na liwawa a mandadayew ed tua a Dios tan mangiglogloria ed sikato.
[Tepetepet Parad Panagaral]