Mantultuloy Yon Agamilen Iray Bengatlan Naaralan Yo
Mantultuloy Yon Agamilen Iray Bengatlan Naaralan Yo
“Saray bengabengatlan inaral yo tan inawat yo tan nadngel yo tan anengneng yo ed siak, sikara so gawaen yo; et say Dios na kareenan miulop-ulop ed sikayo.”—FILIPOS 4:9.
1, 2. Diad inkalapagan, kasin walay impluensya na Biblia ed bilay na saray totoo a mangibabagan relihyoso ira? Ipaliwawa.
“ONKAKASIL so Impluensya na Relihyon, balet Onkakapuy so Moralidad.” Sayan paulon-balita ed peryodikon Emerging Trends so anegek ed resulta na sakey a surbi ed interon Estados Unidos. Mapatnag a naiimatonan ed satan a bansa so idarakel na totoo a mimimisa tan mangibabagan say relihyon so walaan na importantin betang ed bilay da. Balet, ibabaga na report: “Anggaman ed saratan a makapasagyat a nengneng, dakel ya Amerikano so manduaruwa ed impluensya na relihyon ed kabibilay na indibidual tan ed sosyedad bilang interamenti.”
2 Ontan met so kipapasen ed arum a bansa. Diad interon mundo, dakel a totoo a mangibabagan aawaten da so Biblia tan relihyoso ira balet ta ipupulisay da so peteg ya impluensya na Kasulatan ed bilay da. (2 Timoteo 3:5) “Siansian papablien mi so Biblia,” so inkuan na angidaulo ed sakey a grupo na saray managsukimat, “balet nipaakar ed panaon ya aktual ya uusaren ed panagbasa, panagaral tan panangiyaplika ed satan—satan so alingwanan la.”
3. (a) Panon a mangaapekta so Biblia ed saramay magmamaliw a tuan Kristiano? (b) Panon so pangiyaaplika na saray patumbok nen Jesus ed simbawa nen Pablo a nikurit ed Filipos 4:9?
3 Balet, miduma so kipapasen ed saray tuan Kristiano. Say pangiyaplika ed simbawa na Salitay Dios so akapanguman ed panag-isip tan kondukta ra. Tan naimanon tampol na arum so balon personalidad ya ipapatnag da. (Colosas 3:5-10) Parad saray patumbok nen Jesus, say Biblia et aliwa labat a libron papaulyanan a narabokan. Diad pisunian, oniay imbaga nen apostol Pablo ed saray Kristiano ed Filipos: “Saray bengabengatlan inaral yo tan inawat yo tan nadngel yo tan anengneng yo ed siak, sikara so gawaen [“agamilen,” NW] yo; et say Dios na kareenan miulop-ulop ed sikayo.” (Filipos 4:9) Aglambengat aawaten na saray Kristiano so katuaan a naromog ed Salitay Dios. Ikakana ra so naaaralan da, a tuloytuloy dan iyaaplika so simbawa na Biblia—diad loob na pamilya, diad trabaho, diad kongregasyon, tan diad arum niran pamaakaran na bilay.
4. Akin ya angat so pangagamil ed saray ganggan na Dios?
4 Aliwan mainomay so pangagamil ed saray ganggan tan prinsipyo na Dios. Manbibilay itayo ed mundon walad pakapanyari nen Satanas a Diablo, a tinawag na Biblia bilang “say dios na sayan sistema na bengabengatla.” (2 Corinto 4:4; 1 Juan 5:19) Kanian, importante so pambantay sumpad antokaman a bengatlan makaamper ed panumpal tayo ed kurang na katooran ed si Jehova a Dios. Panon tayon napansiansia so katooran tayo?
Mansiansia ed ‘Uliran na Makagunggona Iran Salita’
5. Anto so kabaliksan na balikas nen Jesus a: ‘Mantultuloy yo ak a tumboken’?
5 Sakey ya aspekto ed pangagamil ed naaaralan tayo so mankaukolan na matoor a panangitandoro ed tuan panagdayew, anggaman ed isusumpa na saray agmananisia. Say panagsungdo so mankaukolan na sagpot. “No say siopaman a too et labay toy ontumbok ed siak,” inkuan nen Jesus, “benegan toy dili ya inkasikato, et alaen toy krus to, tan [“mantultuloy a,” NW] tumboken to ak.” (Mateo 16:24) Ag-imbaga nen Jesus a nepeg ya ontumbok itayo ed sikato diad loob na sakey simba, sakey bulan, odino sakey taon labat. Imbes, inkuanto: ‘Mantultuloy yo ak a tumboken.’ Ipapabitar na saray salita to a say pagmaliw tayon babangatan et aliwan kabiangan labat na bilay odino temporaryon debosyon tayo. Say matoor a pangitandoro ed tuan panagdayew so mankabaliksan a matoor itayon mansungdo ed kurang a pinili tayo, antokaman so nagawa. Panon tayon nagawaan itan?
6. Anto so uliran na makagunggona iran salita a naaralan na saray inmunan-siglon Kristiano manlapud si Pablo?
6 Pinaseseg nen Pablo so kakimeyan to a si Timoteo: “Tandaan mon maong so uliran na saray maabig a salita a nadngel mo ed siak, dia ed pananisia tan panangaro a wala ed Kristo Jesus.” (2 Timoteo 1:13) Anto so labay ya ibaga nen Pablo? Say Griegon salita ya impatalos ya “uliran” so literal a mankabaliksan na indibuho na sakey a pintor. Anggaman agtanto detalyado, satan a dibuho so walaan na malinew a gulis ta pian natalosan na makatebek ya onnengneng ed interon litrato. Mipadpara, say uliran na katuaan ya imbangat nen Pablo ed si Timoteo tan ed arum nira so ag-adesinyon mangiter na espesipikon ebat ed kada posiblin tepet. Ingen, sayan tugyop na bangat so mangitatarya na magenap a giya—sakey a panontonan, a singa panangibaga—ta pian natebek na saray matuan-impanpuso so kakaukolanen ed sikara nen Jehova. Siempre, pian napaliket so Dios et nakaukolan so pansiansia ed satan ya uliran na katuaan diad pangagamil ed naaralan da.
7. Panon a makapansiansia iray Kristiano ed uliran na makagunggona iran salita?
7 Nen inmunan siglo, saray indibidual a singa si Himeneo, Alejandro, tan Fileto so angitandoro ed saray ideyan agmanepeg ed “uliran na saray maabig a salita.” (1 Timoteo 1:18-20; 2 Timoteo 2:16, 17) Panon komon a napaliisan na saray inmunan Kristiano so panangibalang na saray apostata? Diad maalwar a panaral ed apuyanan iran sulsulat tan pangiyaplika ed saratan diad kabibilay da. Saramay manutumbok ed ehemplo nen Pablo tan arum niran matoor so makapangibiig tan makapangipulisay ed antokaman a sumlang ed uliran na katuaan a nibabangat ed sikara. (Filipos 3:17; Hebreos 5:14) Imbes a magmaliw a ‘kinmalog so ulo ra nisengeg ed saray pikokolkol tan pisasangsangan ed saray salita,’ nantultuloy ira ya inmaligwas ed positibon kurang na maridios a debosyon. (1 Timoteo 6:3-6) Ontan met so nagawaan tayo sano iyaplika tayo iray katuaan a naaaralan tayo. Agaylan makapabiskeg-pananisia so pakanengneng ed minilyon a manlilingkor ed si Jehova diad sankadalinan a mansiasiansian malet ed uliran na katuaan na Biblia a nibabangat ed sikara.—1 Tesalonica 1:2-5.
Ipulisay Iray “Palson Tongtong”
8. (a) Panon a panggugunaetan nen Satanas a deralen so pananisia tayo natan? (b) Anton pasakbay nen Pablo so naromog ed 2 Timoteo 4:3, 4?
8 Panggugunaetan nen Satanas a buyaken so integridad tayo diad pangitatanem to ed saray panduaruwa nipaakar ed nibabangat ed sikatayo. Singa nen inmunan-siglo, saray apostata tan arum nira natan so manggugunaet a maneral ed pananisia na saramay andiay panamalingo. (Galacia 2:4; 5:7, 8) No maminsan et uusaren da so media pian ikayat so pikewet ya impormasyon odino sigpot a katilaan ni ingen nipaakar ed saray metodo tan motibo na totoo nen Jehova. Impasakbay nen Pablo a walaray onkasipa ed katuaan. “Onsabi so panaon,” so insulat to, “ya agda nitepel so maabig a bangat; noag ingen dia ed kiwala na gatel ed laman da [“unong ed dilin pilpilalek da,” NW] mantipon ira ed saray managbangat ed sikara; unong ed saray dilin kaalakan na laman da. Et itaynan da so saray pandengel da ed tua, tan sikara so pandengel da ed saray labilabir [“saray palson tongtong,” NW].”—2 Timoteo 4:3, 4.
9. Anto so nayarin walad nonot nen Pablo sanen sinaglawi to iray ‘palson tongtong’?
9 Imbes a mansiansia ed uliran na saray makagunggonan salita, arum so asagyat ed “saray palson tongtong.” Anto iratan a palson tongtong? Nayarin walad nonot nen Pablo iray ginawan alamat, a singa saramay naromog ed apokripal a libro na Tobit. * Saray palson tongtong so nayari met a mangilaktip ed saray makasagyat tan palbeng iran dengel-dengel. Insan, arum met—“unong ed dilin pilpilalek da”—so nayarin apalikdo ed saramay angiyalibansa na malukak a panmoria ed saray estandarte na Dios odino makritiko ed saramay mangidadaulo ed kongregasyon. (3 Juan 9, 10; Judas 4) Antokaman so nalalanor iran pakagapolan, arum so mapatnag ya amili ed saray katilaan nen say katuaan a naromog ed Salitay Dios. Agnambayag et intunda ran agamilen iray bengatlan naaralan da, tan saya so inkaderalan da ed espiritual a paraan.—2 Pedro 3:15, 16.
10. Anto so pigaran palson tongtong natan, tan panon ya impabitar nen Juan so pankaukolan a manalwar?
10 Ag-itayo nasagyat ed saray palson tongtong natan no surien tan pilien tayo no anto so dengelen tan basaen tayo. Alimbawa, mabetbet ya iyaalibansa na media so imoralidad. Ipapaseseg na dakel a totoo so agnostisismo odino sigpot ya ateismo. Balbalawen na saray higher critic so ibabagan say Biblia so pinuyanan na Dios. Tan panggugunaetan na saray modernon-agew ya apostata so pangitanem na saray bini na panduaruwa ta pian naderal so pananisia na saray Kristiano. Nipaakar ed mipadparan kapeligroan ya impaarap na saray palson propeta nen inmunan-siglo, amasakbay si apostol Juan: “Inararok ira, agyo ra sisiaen so amin ya espiritu; noag ingen salien yo so saray espiritu no kien ira na Dios; ta dakel ya aliwan peteg a propeta so pinmaway dia ed mundo.” (1 Juan 4:1) Kanian nakaukolan itayon manalwar.
11. Anto so sakey a paraan pian nasubok tan nanengneng no kasin wala itayo ed pananisia?
11 Nipaakar ed saya, insulat nen Pablo: “Dalepdep yo ed sikayon dili, no wala kayo ed pananisia.” (2 Corinto 13:5) Impaseseg na apostol ed sikatayo a suboken tayo so inkasikatayo pian nadetermina no kasin ontutumbok itayo ed interon sisisiaen na saray Kristiano. No midedengel itayo ed saray maingongot, nakaukolan a masimoon tayon analisaen so inkasikatayo. (Salmo 139:23, 24) Kasin tendensia tayo so mananap na lingo ed totoo nen Jehova? No ontan, akin? Kasin asakitan itayo ed imbaga odino inkiwas na arum? No ontan, kasin momoriaen tayon maong so amin a bengatlan nalalanor ed agawa? Temporaryo so antokaman ya irap a kidungetan tayo ed sayan sistema na bengatla. (2 Corinto 4:17) Anggano nasubok itayo ed loob na kongregasyon, akin ya ontunda itayon manlingkor ed Dios? No adismaya itayo ed sakey a bengatla, agta magmaong no gawaen tayo so anggaay nayarian tayo pian resolbien so pamaakaran insan ipalima la itan ed si Jehova?—Salmo 4:4; Uliran 3:5, 6; Efeso 4:26.
12. Panon ya impanengneng na saray taga-Berea so maabig ya alimbawa ed sikatayo?
12 Imbes a mankritiko, komon ta mantinien tayo so panmoria a mabunigas ed espiritual nipaakar ed impormasyon a naaawat tayo panamegley na personal a panagaral tan saray miting ed kongregasyon. (1 Corinto 2:14, 15) Tan imbes a panduaruwaan so Salitay Dios, agaylan mas makabat so pakawalaan na awawey a singa ed saray taga-Berea nen inmunan-siglo a maapit a nanusisa ed Kasulatan! (Gawa 17:10, 11) Onkiwas itayo sirin ed naaralan tayo, ya ipulisay iray palson tongtong tan ompeket ed katuaan.
13. Panon a nayarin bengatbengat a makapangikayat itayo na palso iran tongtong?
13 Wala ni so sananey a nengneng na palson tongtong a nakaukolan tayon pan-alwaran. Onkakayat so dakel a makasagyat iran tongtong, a mabetbet et diad panamegley na E-mail. Makabat so panalwar nipaakar ed saratan a tongtong, nagkalalo la no agtayo amta no iner so nanlapuan na impormasyon. Anggano say eksperiensya odino istorya so impawit na sakey a gagalangen a Kristiano, nayarin anggapo ed satan ya indibidual so direktan pikabat ed saray impormasyon. Satan so rason no akin ya importante so panalwar nipaakar ed pangulit odino pangipasa ed saray agseguradon salaysay. Maseguron agtayo labay ya uliten iray “agmaridios a mito,” odino “palson tongtong a manusumlang ed no anto so masanto.” (1 Timoteo 4:7; New International Version) Lapud walaan itayo na obligasyon a mansalitan matua ed balang sakey, onkikiwas itayon makabat no papaliisan tayo so antokaman a bengatlan managdag ed sikatayon bengatbengat a mangikayat na saray aliwan katuaan.—Efeso 4:25.
Saray Gunggona ed Pangagamil na Katuaan
14. Antoray nagunggona ed pangagamil ed saray bengatlan naaralan tayo manlapud Salitay Dios?
14 Say pangagamil ed naaralan tayo panamegley na personal a panagaral na Biblia tan saray miting na Kristiano so mangitarok na dakel a gunggona. Alimbawa, nayarin namoria tayon onaaligwas so pisisiglaotan tayo ed saramay kapananisiaan tayo. (Galacia 6:10) Magmaliw a maabig so mismon awawey tayo sano iyaplika tayo iray prinsipyo na Biblia. (Salmo 19:8) Niarum ni, diad pangagamil tayo ed naaralan tayo, ‘naparakep tayo so bangat na Dios’ tan nayarin makatangguyor ed arum diad tuan panagdayew.—Tito 2:6-10.
15. (a) Panon ya akapanpakpel so sakey a kalangweran a mantasi ed eskuelaan? (b) Anto so naaralan yo ed sayan eksperiensya?
15 Kabiangan ed saray Tastasi nen Jehova so dakel a kalangweran a mangaagamil ed naaralan da diad panamegley na personal a panagaral ed Biblia tan ed saray Makristianon publikasyon ontan met ed regular ya iyaatendi ed saray miting ed kongregasyon. Say maabig a kondukta ra so mapuersan pantasi ed saray managbangat tan ed saray kaeskuelaan da. (1 Pedro 2:12) Konsideraen pa si Leslie, sakey a 13 años a bii a taga Estados Unidos. Inaksobi to a sikatoy gendat a nairapan a mangitongtong ed saray kaeskuelaan to nipaakar ed pananisia to, balet sinmabi agew et anguman itan. “Pantotongtongan ed klase no panon so panggugunaet na totoo a mangilako na saray bengatla. Intagey na sakey a bii so lima to tan binitla to iray Tastasi nen Jehova.” Bilang Tasi, anto so reaksion nen Leslie? “Indepensak so pananisiak,” so kuanto, “a maseguron anurprisa ed amin, lapud marendeen ak ed eskuelaan.” Anto so resulta na impanpakpel nen Leslie? “Akapangipalima ak na brosyur tan sakey a tract ed estudyante, lapud sikatoy walaan ni na arum a tepet,” so kuan nen Leslie. Seguradon naliliketan si Jehova sano saray kalangweran a mangaagamil ed naaralan da so manpakpel a mantasi ed eskuelaan!—Uliran 27:11; Hebreos 6:10.
16. Panon ya agunggonaan so sakey a kalangweran a Tasi ed Teokratikon Eskuelaan Parad Ministeryo?
16 Sakey nin alimbawa et si Elizabeth. Manlapu la’d edad a pitora tan diad interon impan-elementarya to, iimbitaan na sayan kalangweran a bii ed Kingdom hall iray mamaestra to no walay betang to ed Teokratikon Eskuelaan Parad Ministeryo. No ag-akaatendi so sakey ed saray maestra to, mansiansia ni si Elizabeth ed eskuelaan tan ipresenta to so parte to ed maestra. Diad unor lan taon to ed haiskul, nansulat si Elizabeth na samploran-pahinan report nipaakar ed saray gunggona ed Teokratikon Eskuelaan Parad Ministeryo tan impresenta to itan ed arap na apatiran bumabangat. Sikato so naimbitaan met a mangiter na pinagkamodelon paliwawa ed Teokratikon Eskuelaan Parad Ministeryo, a pinili to so teman “Akin ya Aabuloyan na Dios so Karelmengan?” Agunggonaan si Elizabeth ed edukasyonal a programa na saray Tastasi nen Jehova ed Teokratikon Eskuelaan Parad Ministeryo. Sikato so sakey ed dakel a Kristianon kalangweran a mangitatarok na dayew ed si Jehova diad pangaagamil ed saray bengatlan naaralan da ed Salita to.
17, 18. (a) Anton simbawa nipaakar ed inkamatua so iyoopresi na Biblia? (b) Panon a naapektoan so sakey a laki ed matuan kondukta na sakey ed saray Tastasi nen Jehova?
17 Sisimbawaen na Biblia iray Kristiano a manugali iran matua ed amin a bengatla. (Hebreos 13:18) Say ag-inkamatua so maneral ed pisisiglaotan tayo ed arum tan, nagkalalo la, ed si Jehova a mismo. (Uliran 12:22) Say napanmatalkan a kondukta tayo so mangiter na ebidensya ya aagamilen tayo iray naaralan tayo, tan lapud satan et dakel so walaan na babaleg a respeto ed saray Tastasi nen Jehova.
18 Konsideraen tayo so eksperiensya na sakey a sundalon manngaran na Philip. Agto amtay akapanginan to ed blanko nin tseke, ingen ta apirmaan to la tan agto alimen itan anggad nen nipawil itan ed sikato panamegley na koreo. Say tseke so aromog na sakey ed saray Tastasi nen Jehova, tan nitekep so sakey a nota a mangibabagan impawil itan na akaromog lapud relihyoso iran sisiaen to. Abigla si Philip. “Nayarian da komon ya upoten so $9,000 ko!” so kuanto. Sikato so adismaya ed sananey ya inkagawa sanen say sombrero to so tinakew ed dalem na simbaan. Mapatnag, kabat to so angala ed sombrero to, bangta agto kabat so angipawil ed sikato na tseke a mankantidad na nilibon dolyar! On, say matua iran Kristiano so mangitarok na galang ed si Jehova a Dios!
Itultuloy ya Agamilen so Naaaralan Yo
19, 20. Panon itayon nagunggonaan no onkiwas itayo unong ed saray Makasulatan a bengatlan naaaralan tayo?
19 Dakel so nagunggona na saramay mangaagamil ed naaaralan da manlapud Salitay Dios. Oniay insulat nen babangatan a Santiago: “Siopaman a manimano ed ayadyarin katunongan, say katunongan na pankanawnawa, tan mansiansia’d tan, sikato so bangta aliwa a maililingwan a dumerengel, mananumpal ingen ed gawa, sayan too mapalar naani ed gawa to.” (Santiago 1:25) On, no onkiwas itayo unong ed saray Makasulatan a bengatlan naaralan tayo, nawalaan itayo na tuan liket tan mas natalonaan tayo iray desdes ed bilay. Importante ed amin, nagamoran tayo so panamendisyon nen Jehova tan say ilalon andi-anggaan a bilay!—Uliran 10:22; 1 Timoteo 6:6.
20 Diad amin a nayarian tayo sirin, itultuloy yon panseetan so panaral ed Salitay Dios. Regular a mitipon ed saray mandadayew ed si Jehova, tan manimano ed materyal ya iprepresenta ed saray miting na Kristiano. Iyaplika yo so nanaaralan yo tan itultuloy yon agamilen itan, tan “say Dios na kareenan miulop-ulop ed sikayo.”—Filipos 4:9.
[Paimano ed Leksab]
^ par. 9 Say Tobit, a nayarin nisulat nen komatlon siglo K.K.P., so mangilaktip ed napnoy-anito a tongtong na sakey a Judio a manngaray Tobias. Nibaga a sikato so walaan na abilidad a makagamor na pakayarin manambal tan mamapaway na demonyo diad panamegley na say puso, say apgo, tan say altey na sakey ya abalbaleg a sira.
Kasin Nanonotan Yo?
• Anto so ‘uliran na makagunggona iran salita,’ tan panon itayon makapansiansia ed satan?
• Anton ‘palso iran tongtong’ so nakaukolan tayon ipulisay?
• Antoray nagunggona na saramay mangaagamil ed bengatlan naaaralan da ed Salitay Dios?
[Tepetepet Parad Panagaral]
[Litrato ed pahina 17]
Panon komon a napaliisan na saray inmunan Kristiano so panangibalang na saray apostata?
[Saray litrato ed pahina 18]
Saray bini na panduaruwa so nayarin itanem na media, panamegley na Internet, tan saray modernon-agew ya apostata
[Litrato ed pahina 19]
Agmakabat so pangikayat ed agsegurado iran report
[Saray litrato ed pahina 20]
Diad trabaho, diad eskuelaan, tan inerman a pasen, iyaaplika na saray Tastasi nen Jehova so nababasa ra ed Salitay Dios