Panon Kan Natulongan na Tuan Sasanto?

DIAD Kasulatan, say Griegon salitan nipatalos a “santo” ed pigaran bersion so nayarin ipatalos a “masanton sakey.” Diad siopa so aplikaan na satan a termino? Inkuan na An Expository Dictionary of New Testament Words: “Diad plural, sano ontutukoy ed saray mananisia, satan so manutukoy ed amin a mananisia tan aglabat onaaplika ed totoo a walaay nikaduman kasantosan, odino ed saraman so, diad impatey da et abidbir ira lapud nikaduma iran gawa na inkasanto.”

Kanian tinukoy nen apostol Pablo so amin ya akadkaunan Kristiano bilang tuan sasanto, odino saray masanto. Singa bilang, nen inmunan siglo K.P. et sikatoy nansulat “dia ed iglesia na Dios a wala ed Corinto, pati saray amin a sasantos a wala ra ed lapag na [say probinsya na Roma ya] Acaya.” (2 Corinto 1:1) Diad saginonor, nansulat si Pablo ed “amin a wala ed Roma, ya inaro na Dios, atawag a masantos.” (Roma 1:7) Mabitar ya agni inaatey ed saman irayan masanto, nisay lapud matalonggaring a birtud et nibiig la ra, a talonaan day arum niran mananisia. Diad anton basiyan a sikaray nibiig bilang sasanto?

Pinasanto na Dios

Ipapanengneng na Salitay Dios a say too so ag-inyabawag na totoo odino sakey ya organisasyon bilang santo. Ibabaga na Kasulatan: “[Say Dios] so angilaban ed sikatayo, tan tinawag to itayo ed sakey ya impanawag a masantos, aliwa ya unong ed saray gawa tayo, noag unong ed pamaakaran ton dili, tan say grasya.” (2 Timoteo 1:9) Say masanto a sakey so apasantos lapud impanawag nen Jehova, unong ed agkanepegan a kaabigan na Dios tan mitunosan ed gagala To.

Saray masanto ed Kristianon kongregasyon so kabiangan ed ‘balon sipanan.’ Say nipaagus a dala nen Jesu-Kristo so amekder ed sayan sipanan tan mamapasantos ed saray kabiangan na satan. (Hebreos 9:15; 10:29; 13:20, 24) Lapud alinisan ed imaton na Dios, sikaray ‘masantos ya inkasaserdote tan mangisaklang na saray maespiritun bagat a makapaliket ed Dios lapu ed Jesu-Kristo.’​—1 Pedro 2:5, 9.

Ey-ey ed Saray Sasanto tan say Pagmaliw Dan Manamegley

Minilyon so mangigagalang ed saray “sasanto” diad panguusar da ed saray kagawaan odino diad iyey-ey ed sikara bilang manamegley lapud sisiaen dan makapangiter ira na nikaduman  pakapanyari ed saray mananisia. Kasin bangat iya na Biblia? Diad Sermon to ed Palandey, imbangat nen Jesus iray papatumbok to no panon so iyasingger ed Dios, a kuanto: “Onia sirin no mikasi kayo; Ama min wala ka ed tawen, Nagalang komon so ngaran mo.” (Mateo 6:9) Saray pikakasi so manepeg ya ipaarap lambengat ed si Jehova a Dios.

Diad gunaet a paneknekan so pagmamaliw na saray “sasanto” a manamegley, isisitas na arum a teologo so Roma 15:30, ya onia so nabasa tayo ditan: “Pikasik ed sikayo, agagik, lapu ed Katawan tayo a Jesu-Kristo, tan lapu ed aro na espiritu, a miimanes kayo ed siak ed saray pikakasi yo ed Dios ya onkana ed siak.” Kasin papasesegen nen Pablo iray mananisia a manpikasi ed sikato odino oney-ey ed ngaran to diad iyasingger ed Dios? Andi. Anggaman nipapaseseg ed Biblia so pampikasi ed biang na tuan sasanto, odino saray masanto, agbalot igaganggan ed sikatayo na Dios a manpikasi ed odino diad panamegley na saratan a masanto.​—Filipos 1:1, 3, 4.

Balet, anuro so Dios na sakey a Manamegley parad saray pikakasi tayo. Inkuan nen Jesu-Kristo: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.” Inkuan met nen Jesus: “Anggan anton kerewen yo ed ngaran ko, satan gawaen ko, pian say Ama nigloria ed Anak. No onkerew kayo na antokaman ed ngaran ko, satan ko gawaen ko.” (Juan 14:6, 13, 14) Makapanmatalek itayo ed inkamabulos nen Jehova ya ondengel ed saray pikakasi tayo a niyaapay ed ngaran nen Jesus. Nipaakar ed si Jesus, ibabaga na Biblia: “Nayarian to met ya ilaban angga ed kasumpalan so saray onasingger ed Dios dia ed panamegley to, ta manbilay lawas a mangyesel [odino, mamegley] ed sikara.”​—Hebreos 7:25.

No mabulos si Jesus a mamegley ed biang tayo, akin a mabetbet ya oneey-ey ed “sasanto” iray managdayew ed Kakristianoan diad pikakasi? Diad libro ton The Age of Faith, sinuysoy na manag-awaran a si Will Durant so lapuan na sayan agamil. Anggaman ipapaimano to a say Makapanyarin-amin a Dios so tatakotan tan si Jesus so ompatnag a mas mainomay ya asinggeran, inkuan nen Durant: “Agnitepel na sakey so mitongtong a direkta ed [si Jesus] kayari ton sigpot ya imbaliwala iray Sermon To. Ompatnag a mas makabat so pampikasi na sakey ed arap na santo a sisiaen a sikatoy walad tawen, tan kerewen ed sikato a mamegley ed si Kristo.” Kasin makatunongan irayan kapagaan?

 Ibabangat ed sikatayo na Biblia a diad panamegley nen Jesus et walaan itayo na “bulos a panagsalita tan iyaasingger tekep na talek” diad pampikasi ed Dios. (Efeso 3:11, 12, NW) Say Makapanyarin-amin a Dios so aliwan arawi ed katooan pian dengelen iray pikakasi tayo. Onia so matalek ya impikasi na salmistan David: “O sika a dengelen mo so pikakasi, amin a laman ondago ed sika.” (Salmo 65:2) Imbes ya iparalan so tulong to panamegley na saray kagawaan na inaatey a “sasanto,” ikakalbo nen Jehova so masanton espiritu to ed saraman so onkerew ed satan diad pananisia. Inkatunongan nen Jesus: “No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?”​—Lucas 11:13.

Say Betang na Saray Masanto

Saray masanto a diad sikara et nisulat iray sulat nen Pablo so inaatey la, dakel a siglo lay apalabas tan, asabi panaon et naawat day “balanget na bilay,” say inkioli ed tawen. (Apocalipsis 2:10) Namomoria na saray managdayew nen Jehova a Dios a say panamagalang ed sarayan tuan sasanto et agmakasulatan tan agmangiter na proteksion manlapud sakit, natural iran desyang, ag-inkaligen ed ekonomya, itatakken, odino ipapatey. Kanian, nayarin itepet yo, ‘Kasin saray masanto na Dios so peteg a manatalima ed sikatayo? Kasin ilaloan tayon onkiwas ira ed biang tayo?’

Nipabitar a maong iray masanto diad propesiya ya inkurit nen Daniel. Diad komanem a siglo K.K.P., anengneng to so makapasagyat a pasingawey, say kasumpalan ya onnatnat anggad panaon tayo. Manlapud dayat et inmimwas so apatiran makapataktakot ya atap ya ayep a mangisisimbolo ed saray gobierno na too, ya agmakasarag a mamenek ed peteg iran pankaukolan na katooan. Insan impropesiya nen Daniel: “Balet saray sasanto na Sankatageyan awaten da naani so panarian, et kayarianen da naani so panarian ed ando lan ando, salanti ed ando lan ando lawas.”​—Daniel 7:17, 18.

Pinekderan nen Pablo iyan ‘tawir parad saray sasanto,’ a magmaliw a kaiban tomatawir nen Kristo diad katawenan. (Efeso 1:18-21) Say dala nen Jesus so angilukas na dalan parad 144,000 iran masanto a napaoli ed mangatatawen a gloria. Oniay inyabawag nen apostol Juan: “Mapalar tan santo so walay pibiang to ed unona a kioli ed bilay; say komadua ya ipapatey anggapo so pakayari to ed saraya; noag ingen sikara so nagawa a saserdote na Dios tan si Kristo, et miari ra ed sikato ed sanlibon taon.” (Apocalipsis 20:4, 6; 14:1, 3) Diad pasingawey, nadngel nen Juan so dakerakel a mangatatawen iran pinalsa a mankakanta ed arap na niglorian Jesus: “Sinaliw mo ya inggana ed Dios, lapu ed dalam, so totoo ed balang kailalakan, tan salita tan baley tan nasyon: Tan ginawam ira a panarian tan saserdote nipaakar ed Dios mi; et manari ra ed tapew na dalin.” (Apocalipsis 5:9, 10) Agaylan makapaseguro! Pinili a maong nen Jehova irayan lalaki tan bibii. Sakey ni, sikaray nanlingkor a sitotoor diad dalin, a nidunget ed amin lawarin probleman naeeksperiensia na totoo. (1 Corinto 10:13) Matalek tayo sirin a sarayan apaolin masanto, odino sasanto, so mapangasi tan makatalos a manuley, ya ikokonsidera iray kaleteyan tan limitasyon tayo.

Saray Bendisyon ed Silong na Uley na Panarian

Say gobierno na Panarian so magano lan onkiwas pian sigpot a mangekal ed amin a karelmengan tan kairapan diad dalin. Diad satan a panaon, saray totoo so lalon onapit ed Dios nen say kapiganman. Insulat nen Juan: “Nadngel ko so sakey a baleg a boses ed tawen, a kuanto, Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara.” Saya so mangitarok na daakan a bendisyon ed katooan, lapud intuloy na propesiya:  “Punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”​—Apocalipsis 21:3, 4.

Agaylan maliket a panaon itan! Nagkalalo lan adeskribe so resulta na nagnap a pananguley nen Kristo Jesus tan say 144,000 a masanto ed sarayan salita a nikurit ed Miqueas 4:3, 4: “[Si Jehova] ukomen to naani so saray dakel a baley, tan igeter to naani so nipaakar ed saray mabiskeg a nasyon ed arawi. Et pitpiten da naani so saray kampilan da a tarem na lukoy, tan saray gayang da a kalkalawit; say nasyon agto naani yayag so kampilan a sumpa ed sananey a nasyon, tan ag-ira met la naani manaral na bakal. Balet onyurong ira naani balang sakey ed silong na kiew to ya ubas tan ed silong na kiew to a higos; et anggapo naani manaktakot ed sikara: ta say sangi nen Jehova na saray ehersito sikato so sinalita to.”

Say imbitasyon a minabang ed saratan a bendisyon so ikekelyaw na saray masanto. Bilang mangisisimbolo ed nobya, saray tuan sasanto so mantutultuloy a mangibabaga: “Gala.” Intuloy na teksto: “Tan say makadngel, kuanto komon: Gala. Tan say napgaan, ondago: et say malabay, mangala ed danum na bilay ya andi bayar.” (Apocalipsis 22:17) Antoy kalaktip ed “danum na bilay”? Sakey ed saratan et say suston pikakabat ed saray gagala na Dios. Diad pikakasi ed Dios, inkuan nen Jesus: “Saya et kabaliksan toy andi-anggaan a bilay, say pangala ra na pikakabat ed sika, say saksakey a tuan Dios, tan ed saman so imbakim, si Jesu-Kristo.” (Juan 17:3, NW) Sayan pikakabat so nagamoran panamegley na regular a panagaral ed Biblia. Agaylan maliket itayo ta diad panamegley na Salita na Dios et natalosan tayo so tuan pakabidbiran ed saray masanto tan naaralan tayo no panon to iran usaren parad magnayon a pakagunggonaan na katooan!

[Litrato ed pahina 4]

Insulat nen Pablo so apuyanan iran sulat to parad saray tuan sasanto

[Litrato ed pahina 4, 5]

Saray matoor ya apostol nen Jesus so nagmaliw a tuan sasanto, odino saray masanto

[Litrato ed pahina 6]

Matalek itayon makapanpikasi ed Dios panamegley nen Jesu-Kristo

[Litrato ed pahina 7]

Saray apaolin sasanto, odino saray masanto, so magmaliw a maabagey a manuley ed interon dalin